RIPHUTNA 40
40
Lung ina tânghei rimangphan Josefan a rilfia pêk
1Kha thilhei nungah khan hingka hin a nit a, Aigupta rêng uain ipetu neh â bai isiamtu hei khan an pu Aigupta rêng maah thil thôn fel ino an nei a. 2Khanchu, Faroa khah â som ruaitu inikahei, a uain ipeh ngai ruaitu tak neh â bai isiam ngai ruaitu tak chungah khan a ning a thik tâk a. 3Khanungchu, vêngtu pôl ruaitu omna, Josefa ikhûma a omna tâng inah khan an hong khum sa tâk a. 4Tâng in vêngtu pôl ruaitu khan kha mi inikahei tirtôn rangin Josefa kha a phun a; khanchu, ani khan an sin a tho tâk a.
5Sûn itena manih tâng inah an itâng nungah khan Aigupta rêng uain ipetu neh ibai isiamtu hei khan zânkah chu an ruaikan rimang omzia dang seng seng inei an phan a. 6Atûk zîngah Josefa kha an ziangah a va lûtin chu an mêl ingûi riai kan an om iti a va mu a. 7Khanchu, ani khan, “Îtho tâk im vuani chu ingûi mêl nin irput tâk hih?” itin a pu, tâng vêngtu ina tâng sa Faroa som ruaituhei khah ardon a.
8Anni khan a ziangah, “Rimang kin phan seng seng a, ne rilfia pêk thei tute lak omak a,” an ti a.
Josefa khan an ziangah, “Rimang rilfia theina chu Pathian ipêk kêng ai nit. Ringaiihoi takkan nin rimang phan chu ne hang isîr pêk ta u,” a ti a.
9Khanchu, uain ipe ngai ruaitu tak khan armang phan khah Josefa â sîr pêk a, a ziangah, “Ker mangah khan ki makungah hin Grep rui a lei om a, 10Grep ruiah khan iṭang ithumkah a om a; khante, an hong rimuam kaneh a hong pâr suak a; â râ zel a, â râ khûhei khah a min a. 11Faroa kilât hih ki kutah hin a lei om a; khanchu, Grep irâhei khah ki lei rimal a, Faroa kilâtah khan ki sôm a, kilât khah Faroa kutah ki lei pêk a,” a ti a.
12Josefa khan a ziangah, “A omzia chu hingka hin a nit; Iṭang ithumkah khah sûn thumkah a nit; 13Atûna rithoka sûn thumka tenan chu Faroan nang ngaidam a ta, ni sintho ngai khah nang intho nôk a ta; khanchu, a uain ipetu ni nit lâia ni pêk ngai dân angka khan Faroa kilât khah a kutah nî pêk nôk rang a nit. 14Khannisela, ni chan ṭhat nôk tikah khan ne hong remai inla, ringaiihoi takkan lungkhamna ki chungah hong inlang inla, Faroa ziangah ki thurchi isîr pêk inla, hi tângna in ata suakna rangin ne ṭangpui roh. 15Hebrai ram ata min an ne îrûk ki nit a; hi ram khomah hin rip sungah an ne khumna khop thil îte thonsual mang e,” a ti a.
16Ibai siamtu khan rilfiana khah a ṭhat iti a riatin chu Josefa ziangah khan, “Kei khom rimang ki phan a; Ibai khamlu ithumkah ki lei tiang inrichuan a; 17Khamlu chung ita takah khan Faroa fâk rang ibai itui tak tak chi tinrêng hih a lei om a. Khante, ki lua ki tiang pumah khan amakhah ivahein an lei fâk suai suai a,” a ti a.
18Josefa khan a sâm a, “Amahih a omzia chu a nit; khamlu ithumkah khah sûn thumkah a nit. 19Atûna rithoka sûn thumka tenan chu Faroan nang la suak a ta, ni lu tan pai a ti. Khanungchu, thinglêrah nang ikhâi a ta; ivahein ni sa khah fa suai suai an ti,” a ti a.
20Hingka hin a nit a, a sûn thumnî-ah khan chu Faroa khan a suak champha lômin â som murdihei rang ruai â ṭhe a; a uain ipe ngai ruaitu neh ibai isiam ngai ruaitu khah â sua a, a milianhei makungah a hong inṭhung a. 21Josefan an rimang a rilfia pêk lam angka takin, uain ipe ngai ruaitu tak khah uain ipetua ân sin nôk a. 22Khannisela, ibai isiam ruaitu kha chu â khâi that tâk a. 23Nikhomsela, uain ipe ngai ruaitu tak khan Josefa khah reh phâk viat khâi mak a, a irngil phar tâk a nit.
Valið núna:
RIPHUTNA 40: BIATBSI
Áherslumerki
Deildu
Afrita
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More