O Kandɔɔ 13
13
1Mí Abram faŋan Esipte nda laa ndɔ a ɲɛ-ɲɛ va ndu o ba le muungoo Nekɛv. Lɔt va ndu o ba bɛngu tuŋ.
Abram sɛiyan nda Lɔt
2Vana bolofaa bɛndoo pila Abram va ni, ndóò nɔ cɔlua, volion a sianion taw. 3O lo kɔlan o pɔm-pɔmbɔ, mó faŋan Nekɛv, mó tiiya Betɛl di. Mó hiaw nɛɛ ndóò kila paandu dɔ́ɔ́ngɔ́ ndɔɔ Betɛl a Ai tɛɛn-nda, 4o fonda ndóò cɔw paandu fonda-loamaa-lasálàá-o kpeekpei. Mó piɛi Hala lon a ndu veeloo aa Mɛlɛka.
5Lɔt va bɛɛ kon Abram o ba bɛngu-o ndóò nɔ cɔlua taw: saa, cuinnda a nawva. Ndóò nɔ vɛlɛ cɛila-kolala-toandaalan taw. 6Le hee, ndáà nɔla lɛ calle nda ŋiɔn o tàndá pilɛ nin mì tàndá kon ndóò tiw nda le. Kani cɔlua vá nda o ba taw. 7Handɔɔ o kon coo, Kanannda a Perisiia bɛɛ va icali o lɛŋnde len nin telen kon. Mí vanaa mandaa n'cɔlua Abram-nda saan sɛɛngianndo nda vanaa mandaa n'cɔlua Lɔt-a. 8O kon mí Abram dimul Lɔt aa: «Vanayɛi naa n co ni, lelan, sɔngɔ bɛnda mò luɛi naa tɛɛn te. Hali vanaa co cɔlua naa mandaa-a, sɔngɔ bɛnda mò luɛi nda tɛɛn te. 9Yɔŋii kon tosan, n piɔvan telenndo ho. Má cè lɛŋnden nden kpow! Cua fonda n yeema-o. Te o ba mɛllo coo nɔm kɔɛ ni, ya i kɔɛ o ba kɛndɔɔ coo, te o ba kɛndɔɔ coo nɔm kɔɛ yɛ ni, ya i kɔɛ o ba mɛllo coo.»
10Mí Lɔt keeliaa hɔlla kpow, mó ca dɛɛla bɛndu demul peo Yurdɛn-ndo o puiyaa ɲɛkɛndɛi kɔlan tiiyaa háá Soar. Tuma kon, Mɛlɛka ndóò tɛɛmbuu vɔ Sodɔm a Komɔr le, dɛɛlaa vannun o puiyaa tɛi-tɛi mɛɛ nakɔ Mɛlɛka-o va nuaa yɛ, mɛ̀ɛ́-mɛ̀ɛ́ lɛŋnde Esipte len le co o nɛi Soar-o nuaa yɛ. 11Mí Lɔt cua dɔ́ɔ́ dɛɛla bɛndu holnun kon peo Yurdɛn-ndo kpow, mó kɔa a ba paalen le can-ndo. Lende nda piɔvan ni. 12Mí Abram ndu cal o lɛŋnde Kanaan-nden nin, mí Lɔt cal o kobila va o dɛɛla kon nin-ndan nin, mó simi cɛila-kolala-toandaala ndɔlan háá Sodɔm ciee-lekɔɔ. 13Nduyɛ, vanaa laasiannda yungoo Sodɔm va ni. Yɔŋ vɔɔndo pila nda va tosaa a Mɛlɛka ni.
Abram mɛɛndan lɛŋnde Mɛlɛka yiilu ndu kpemaa len
14Tuma Abram piɔvan nda Lɔt mí Lɔt kɔannun-ndo, mí Mɛlɛka koma dimul Abram aa: «Heelu hɔlla mà mɛɛndian, kandɔɔ o fonda n sim kon-ndo, kɔ bii a ba luaŋ-ndo, a ba too, a ba paalen le can-ndo háá a ba paalen le del-lo. 15Lɛŋnde n co len cɔu len, i co nɔm nden yɔngu niaa cuavaa nɔmaa imamaa le fɛɛn a fɛɛn. 16I kuinin polale nɔmnden mì cuavaa nɔmaa imamaa va kunda maa cundoo lɛŋ. Te vana nɔla pɛ cundu co lɛŋ-ndo cɔmndo o pilɛn-pilɛnndo, mɛɛ vana nɔlanin cuavaa nɔmaa imamaa cɔmndo. 17Lelan, cɔn mà kela o lɛŋnden nden nin, mà mɛɛndan mɛɛ le bandu yɛ a mɛɛ le nɔ buo yɛ. Nɔm ya yɔngunin nden ni.»
18O kon mí Abram bɛɛŋuu cɛila kola-toandaa lan, mó kɔ toandu lan o yálán Mamre-o ikɛi, Hebrɔn ciee-lekɔɔ. Mó cɔaw fonda-loamaa-lasálàá lon le Mɛlɛka.
Valið núna:
O Kandɔɔ 13: BKG
Áherslumerki
Deildu
Afrita
Want to have your highlights saved across all your devices? Sign up or sign in
© Alliance Biblique en Guinée