HAGONEGAHANI 39
39
O Josepo ma kaniana o Potipare
1Hoi, na Isimaelita ka bani torea o Josepo tanga i Esipito ma ka bani hagavuringenia tanga o Potipare, na hitangita na mane ni hagaotonga iana na maneraha i Esipito. Ngaia ki araha tangara na mane ni me, ga anumasia na ruma raha iana na maneraha. 2Na Araha God ki ngahisia o Josepo ma ki katogi ka tavoraha bâkoro na tagaraha iana. O Josepo ki oga i ruma iana Potipare ni Esipito, i araha tanga. 3O Potipare ki girara, vi na Araha ki ngahisia o Josepo ma ki katogi ka tavoraha bâkoro na tagaraha hato iana. 4O Potipare ki obakoro renia o Josepo ma ki naka ki tagara tanga ngaia marena o Potipare. Ngaia ki kasia ki bâsuria na ruma henigi na ara ni nahuninga hato iana. 5Haganega tenia i ngekana suria ma o Josepo, tahema na Araha ki koro tanga na ruma iana na mane ni Esipito i ngekana, ma ki katogi na ara ni marâ i ruma iana ma i mu iana ka tavoraha bâkoro. 6O Potipare ki nakagi vê na ara ni marâ hato iana tanga o Josepo ki bâsurigi, mareha vi ngaia marena nikâ, nga noga ma na ngauha.
O Josepo ki raha tongatongani ma ki vora re na tohona na mane. 7I pe arihu râ ma kaniana o Potipare ki tenia o Josepo ma ki vi tanga, ki vi: “Gu meêrongo era.” 8O Josepo ki usi ma ki vi tanga, ki vi: “Bâ, na araha iaku ki hato, vige bâsurigi nikâ na ara ni marâ i ruma iana, suria inê kê oga ikê. Ngaia ki kasiê, kê onosurigi na ara ni nahuninga hato iana. 9I ruma ikê inê kê nahunia na ramoha manga ngaia. Ngaia ki nakagi na ara ni marâ hato i ruguhaku, nga noga ma igo, suria igo kaniana. I bara ngavê tangê, vi ve katoa na tarana go visia, suria God ki manimania.” 10Naka ma ngaia ki ama ni uhungia nga i na ara ni tangiani, ma o Josepo ki ama ni usisi nga vige memêru.
11Hoi, i ta na tangiana, matena o Josepo ki banu getea i ruma, hanana vi katogi na tagaraha iana, ma i ngekana ki mareha rârâ nikâ igê ta na hitangita na enoni tagara, 12kaniana o Potipare ki rangu igê na tuguni iana o Josepo ma ki vi: “Gu meêtâ!” Ma o Josepo ki tarasia vê na tuguni iana tanga na gete ma ki gava ki hura i metara. 13Matena na gete ki bâsia i pania na tuguni, matena i gava ki hura, 14ngaia ki unira me na enoni tagara iana ma ki vi tangara, ki vi: “Bâ ikê! Na mane na Hebereo, o vaniaku ki unia me ki tagara i ruma ikê, kani uhungia vi erasigamirua. Ngaia kani banu me igê na kiboru iaku ma ki uhungia vi tuguriê, hanana vigamuru rongo era. Ma inê kê ngere raha ngavê. 15Matena i rongoê gê ngere, ngaia ki gava ki hura i metera ma ki pania so na tuguni iana i pasiku.”
16Na gete ki naka na tuguni ki oga mataro me na matena i aporo me igê na araha iana o Josepo. 17Ma hemuri ngaia ki hagarongoa renia na tarana ngekana, ki tamasi manga i bani hagarongora na enoni tagara, ki vi: “Na mane na Hebereo go unia me ki tagara i ruma ikê, ngaia kani banu me igê na kiboru iaku ma ki uhungia, vi tuguriê, hanana vigamuru rongoa era. 18Ma na matena gê ngere raha, ngaia ki gava ki hura i metara ma ki pania so na tuguni iana i pasiku.”
19O Potipare na araha iana o Josepo ki mangariaga ngavê. 20Ngaia ki haribona ka rakua o Josepo ma ka kasia igê na ruma ni hagaitangiha. I ngekana ka oga igê na mane, na maneraha i Esipito ki bani kasira igê. Mo Josepo ki oga i ngekana.
21Ma na Araha ki ngahisia o Josepo ma ki tamania, hanana i hagakoro obana na mane i bâsuria na ruma ni hagaitangiha. 22Na mane ngekê ki nakara na mane hato getera i ruma ni hagaitangiha i ruguhana o Josepo, ma o Josepo ki raha tangagi na ara ni marâ i ruma ni hagaitangiha. 23Na mane i bâsuria na ruma ni hagaitangiha ki nakagi vê na ara ni marâ hato tanga o Josepo ki onosurigi, mareha vi ngaia marena nikâ. Suria na Araha ki ngahisia o Josepo, tahema na ara ni marâ i katogi ka tavoraha bâkoro.
Nke Ahọpụtara Ugbu A:
HAGONEGAHANI 39: KCB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011 Bible Society of the South Pacific