HAGONEGAHANI 38
38
O Juta ma ka Tamare
1Igê na matena ngekana o Juta ki panira o goana ma ki râ ki oga i hinua i Atulama i pasina o Gira. 2I ngekana ngaia ki tarahua igê ka karena o Sua ni Kanani. Ma ngaia ki êragia. 3Ngaia ki memêru, ma ngairerua karu apara na kare mane. Ngaia ki hêtana vi o Eri. 4Na gete ki obara ma ki apara tani nikâ na kare mane, ma ki hêtana vi o Onane. 5Ngaia ki apara ta na kare mane nikâ ma ki hêtana vi o Sela. O Juta ki oga i Kesibe, matena i vora o karena ngekana.
6O Juta ki atengenia na gete tanga o Eri na bêbê ni kare iana. Na gete ngekê kani Tamare. 7O Eri ki bagatauhana tare ma ki hagamangaria na Araha. Tahema na Araha ki nahuia ki me. 8Vikê o Juta ki vi tanga o Onane vesina o Eri, ki vi: “Gu râ ma ku memêru na nâna o veogamu. Na tarana ngekana ki tuguhigo, suria igo ka no vehana hanana o veogamu ki nahunira na raraha.” 9Ma Onane ki bani girara, vi na kare ngegana ka mareha vi na anina. Vikê matena i memêru kehana, ngaia ki hagaguguhigi hura ma na marasina i metara. 10Na bagatauhana ngekê ki hagamangaria na Araha. Tahema na Araha ki nahuia ki me nogana. 11Ma hemuri o Juta ki vi tanga ka Tamare ka hungâna, ki vi: “Gu aporo i pasina o vaemamu ma ko gâga go nânâ ma vikana, mataro me ki raharaha o kareku o Sela.” Ngaia ki vi vikana, suria ngaia ki magu vi i era ma ka nahuia nogana o Sela mangarerua o veogana. Vikê ka Tamare ki aporo i pasina.
12I rârâ ma kaniana o Juta ki me. Matena ki hato na hagahunu bungi, o Juta ma na tamana o Gira ni Atulama ngairerua karu râ i Timina, na agua ga tapurura igê na sipi iana. 13Ta na enoni ki hagarongoa ka Tamare, vi o hungâna ki râ i Timina ki tapurura igê na sipi iana. 14Vikê ka Tamare ki nakagi râ na gahu ni nâ iana, ma ki buhia na maana renia na gahu vavararaga, ma ki oga so igê na matangana na tara tanga i Enaimi na hinua i gupuna na tara tanga i Timina. Ngaia ki bani girara bâkoro, vi o Sela o karena o Juta ki bani raha, henaka ngaira ka pe atengenia tanga o Sela.
15Matena o Juta ki bâsia ka Tamare, ngaia ki takusia ma vi na êrâ, suria i buhia na maana. 16Ngaia ki râ i pasina i na akerena na tara ma ki vi tanga, ki vi: “Hoi, gi hita na memu?” Ngaia ki pe girara, vi ngaia kani ka hungâna. Ngaia ki arami, ki vi: “Na ta ko obania vigo vateê?”
17Ngaia ki arami, ki vi: “Inê kê page hagatorangenia tangago na bêhâgana na goti tenia na totoha iaku.” Ma ngaia ki vi: “I koro ma manga vi igo ma ko vateê i ngekê na marâ gê page nahunia baruna na goti, manga vi igo ma ko pe hagamonaria na tamasinga iamu.”
18Ngaia ki hagate, ki vi: “Na marâ ta ki araria vigê vatego i ngekê?”
Ngaia ki arami, ki vi: “Na marâ na giraramu henia na varo go kuha igê ma na vato iamu.” Ngaia ki vatea. Ma ngairerua karu rongo era, ma ka Tamare ki obara. 19Ngaia ki aporo i pasina, ki tavoa râ na gahu tenia na maana ma ki tuguni aporo renigi na gahu ni nâ iana.
20O Juta ki hagatorangenia o Gira na tamana, hanana vi torea na goti tanga na gete, ma ki toregi aporo me na marâ na baruna na goti. Ma o Gira ki pe tarahua rârâ. 21Ngaia ki hagatera tani na mane i Enaimi, ki vi: “I he nga na êrâ, i gâga i na akerena na tara?”
Ngaira ka arami, ka vi: “I mareha rârâ vi tani na êrâ ikê!” 22Vikê o Gira ki aporo i pasina o Juta ma ki vi: “Inê ki bara vi ve tarahua. Na mane i ngekana ka vi, vi mareha rârâ vi tani na êrâ i ngekana.”
23O Juta ki vi: “Naka vê ke nahunigi na marâ ngegana. Igia ka pe obania, vi na enoni ke rurusigerua. I koro ma. Inê kê uhungia vigê vuria, ma igo ko gari makira renia.”
24I murina na ararina na hageha gi oru, ta na enoni ki hagarongoa o Juta, ki vi: “Ka hungâmu ka Tamare ki kato manga na êrâ ma i ngekê ngaia ki obara. O Juta ki vi: “Torea hura tenia na hinua! Sungia ki meme!”
25Matena ga torea hura tenia na hinua, ngaia ki kasi tamasinga tanga o hungâna, ki vi: “Na avanuni na vato ma na marâ na girarana igê kani hagaobarê. Râ me ku bâsigi, ti ka na avanuni.” 26O Juta ki bâgiraragi, ma ki vi: “Ngaia ki vi monari. Inê kanigê aharê, suria gê pe vatea na marâ, i tuguhiê, vigê vatea. I tuguhiê hete, vigê atengenia tanga o kareku o Sela.” O Juta ki hato vige rongo era nikâ henia.
27Matena ka Tamare ki riki na gerina, ngaia ki tarahua, vi page apararerua na kare papa. 28Matena i harahara, ta na hitangiterua ki hura me i nago na rimana. Na gete i hagaapara, ngaia ki tê i rimana ma ki surua igê na varo memera, ma ki vi: “Na ani ikê ki vora me hagenago.” 29Ma na kare ki rurunia aporo na rimana, ma na tamana ki kahu vora me hagenago ngaia. Vikê na gete i hagaapara ki vi: “Ngaia ngekana gu hari ku hura!” Tahema ga hêtana vi o Peresi i vivi ‘Harihura.’ 30Ma hemuri na tamana ki kahu vora me nogana henia na varo memera i rimana. Tahema ga hêtana vi o Seraga i vivi ‘Memera.’
Nke Ahọpụtara Ugbu A:
HAGONEGAHANI 38: KCB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011 Bible Society of the South Pacific