HAGONEGAHANI 37
37
O veogana o Josepo ka merongasia
1O Jakobo ki oga nga ki Kanani, na agua i bani oga igê o vaemana. 2Ikê na sihonga renia na ahemata iana o Jakobo.
O Josepo ngaia ka na mane na gapu haoru, i tonga na 17 na harisi iana. Ngaia ma ngaira o veogana ka na kareterua ka Biliha ma ka Silipa, na gete getererua iana o vaemata. Ngaira ka bâsurira na totoha ni sipi ma ni goti.
O Josepo ki hagarongoa o vaemata renigi na bagatauhata o veogana. 3O Jakobo ki takuia o Josepo teharira o karena hato getera, suria i apara, matena i gemêa. Ngaia ki tagarahia tanga na tuguni i bâkoro ngavê. 4Matena o veogana ka girara, vi o vaemata ki takuia ngavê o Josepo teharira ngaira, ngaira ka kitenia ngavê o vesita. Tahema ngaira ka usi ngavê, vige metamasi bâkoro.
5Hoita, o Josepo ki marute. Ma na matena i hagarangora o veogana renia, ngaira ka kahu kitenia ngavê. 6O Josepo ki vi: “Mu karinga na maruteha iaku. 7Ngaia ki manga ikê. Igia hato ka oga i mu. Igia ka hugusigi na ehogo na apini na koni. Na ehogo iaku ki aharaga ma ki ura ototo. Ma na animi na ehogo ka ura rihia ma ka maruruhia na aniku.”
8O veogana ka hagatea, ka vi: “I hega, igo ko takusia vari, vi igo ko page maneraha, ko marungigami?” Tahema ngaira ka kahu ama ni kitenia ngavê surigi na muruteha iana ma na tamasinga iana renira.
9Hemuri o Josepo ki marute nikâ ma ki hagarongora o veogana renia, ki vi: “Inê kê marute nikâ. Inê kê bâsigi na arito, na hageha ma na higu tangahuru matare tage ga tubêhiê.”
10O Josepo ki hagarongoa nikâ o vaemana renia na maruteha iana. O vaemana ki ramonia, ki vi: “Na maruteha ni ta ngekê? Go takusia vari, vi kenamu ma o veogamu ma inê kami tubêhigo?” 11O veogana ka merongasia o Josepo ma o vaemana ki ama ni takoha nga renigi na tarani ngegana.
O veogana o Josepo ka hagavuringenia
12I ta na tangiana o veogana o Josepo ka bani râ i Sekemi, hanana viga bâbâsurira igê na togoha iana o vaemata. 13O Jakobo ki vi tanga o Josepo, ki vi: “Inê kê obanigo, vigo arâ i Sekemi, suria o veogamu ka bâbâsurira igê na togoha ni sipi ma ni goti.”
O Josepo ki arami, ki vi: “I koro ma gê arâ.”
14O vaemana ki vi tanga, ki vi: “Hoi, go arâ ma ko bâsira o veogamu, manga vi ngaira henira na togoha ma ka koro ma. Ma hemuri ko aporo me ko hagarongoê.” Vikê o vaemana ki kasia vê ki râ, i tavoraha i Heberoni igê na maruguna. O Josepo ki ata râ i Sekemi. 15Matena i garira rârâ igê na masusu, ta na mane ki tarahua me ma ki hagatea, ki vi: “Na ta ko bâbâ renia?”
16O Josepo ki arami, ki vi: “Inê kê bâbâ renira o veogaku ga bâbâsurira na togoha iata. I hega, igo ko girara vari na agua ga gâga igê?”
17Na mane ki arami, ki vi: “Ngaira ka bani râ. Inê kê rongora ga vi, viga arâ tanga i Totane.” Vikê o Josepo ki mumurira ma ki tarahura i Totane.
18Ngaira ka bâsia râ i arâ me. Matena i mamênga vige mataruhira me, ngaira ka harikato renia, hanana viga nahuia ki meme. 19Ngaira ka hetamatamasi, ka vi: “Bâsia râ! Na mane ni maruteha ki arâ me akana! 20Hoi, nika ge nahu hunia ma ke kasia vato na gahuana i rarona tani na vekaru i mamata. Ma hemuri ke hagarongoa o vaemaka ka vivi, vi na marâ vasiga kani garahunia. I takusia vari vi na maruteha iana ki monari!”
21Matena o Rubeni ki rongo vikana, ngaia ki uhungia vi hagatahia o Josepo tenira. Tahema ngaia ki vi: “Siana ke nahuia. 22Ge kasia bâkoro vato ma hete i rarona na vekaru ikê igê na masusu.” Ngaia ki tamasi vikana, suria i takusia vi hagatahia o Josepo tenira ma ki hagaguhia aporo tanga o vaemata. 23Matena o Josepo ki mataruhira me o veogana, ngaira ka tarisia râ na tuguni bâkoro iana. 24Ma hemuri ka torea ma ka kasia vato i rarona na vekaru i mamata.
25Matena ga oga ka ngêngê, ngaira ka sira râ ma ka bâsira tani na raraha iana o Isimaele ga arâ me. Ngaira ka na enoni ni hohoronga. Ngaira ka tavoraha me tenia i Gileata tanga i Esipito. Ngaira ka hagarutangigi i gerita na kamelo renigi na tavoni na apinige ma na marâ i sigini koro.
26O Juta ki vi tangara o veogana ma o vesina, ki vi: “Gi hita na meka, manga vi igia ma ka nahuia o vesika se ga pinihia na nahunga iaka? 27Nika, ge hagavuringenia tangara na Isimaelita ngegana. Vikana siana ke nahuia. Mu girara, ngaia ka no vesika ga mevora.” Ngaira ka heaganari. 28Matena ga tehara tani na mane ni hohoronga ni Mitiani, na veogana o Josepo ka okea akê me o Josepo tenia na vekaru ma ka hagavuringenia renigi na maani na siliva tangahuru gi rua tangara na Isimaelita, ka merâ tanga i Esipito.
29Matena o Rubeni ki aporo me igê na vekaru ma ki pe tarahua o Josepo i rarona, ngaia ki tarisigi na gahu iana marena, suria i hetaki bâraha. 30Ngaia ki aporo i pasita o vesina ma ki vi: “Inê kê bâ mareha o vesika igê na vekaru! Na ta be katoa i ngekê?”
31Vikana ngaira ka nahuia na goti ma ka anumia na tuguni iana o Josepo igê na gapuna. 32Ngaira ka torea na tuguni akana tanga o vaemata ma ka vi: “Igami kami tarahua na tuguni ikê. Na tuguni iana vari o karemu?”
33Ngaia ki bâgirara ma ki vi: “O, ngaia monari ngekê. Tani na marâ vasiga kani garahunia. O kareku o Josepo ka ngasia!” 34O Jakobo tarisigi na gahu iana marena, suria i mesia bâraha o karena ma ki hagesuru renigi na gahu na kakagani. Ngaia ki hetaki i arihu era renia o karena. 35Ngaira hato o karena ma ka karena ka râ me ka haganaku parongana, ma ngaia ki usi vi ngaira ke haganaku parongana. Ngaia ki vi ma vikê: “Inê kê hetaki rârâ renia o kareku ma kê meme kê hakunia.” Vikê ngaia ki ama ni hetaki nga renia o Josepo o karena.
36I na matena ngekana na mane ni hohoronga ni Mitiani ka bani merâ o Josepo tanga i Esipito ma ka hagavuringenia tanga o Potipare, ta na kariana na maneraha i marungia i Esipito. Ngaia ki na araha iata na mane ni me, ga anumasia na ruma raha iana na maneraha.
Nke Ahọpụtara Ugbu A:
HAGONEGAHANI 37: KCB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011 Bible Society of the South Pacific