(Evangelio según San Juan) 7
7
Jesusa yachi aidau dekaskeapi tichagbau
1Nuna tusa idaiyas, Jesusak Galileanum wekagu, Judea pujutnak dakitau, wagki nuiya judío aidau maatasag egainamu asa. 2Judío aidau fiestamtaiji tabernáculo#7.2 “Tabernáculos” tawa duke, fiesta de los tabernáculos, nuniachkuish fiesta de las enramadas tutaiyai. Nunak judío aidau nantu Eitanim-Tishri tawa nu jegatai siete tsawantai fiestamajakú ainawai. Duka hebreo chicham sukkot tawa nu, apach chichamnum tienda, enramada, cabaña tibauwai. tutai tikiju wajasú ai, 3yachi chichajuinak:
—Juig pujutsuk Judea wetá, jintintaijum aidau ame takaamun wainkatnume; 4wagki makichkish aents wainkamu atatus wakegauk, wají aidaunak uuká takachu ainawai. Nunin asamtai ju aina ju jutikakmek, ashí aents wainainamunum dutikata, tiajui.
5Nunak yachi aidaukesh niiní dekaskeapi tuinachu asag tiajui. 6Tiagtai Jesús chichaak:
—Mina tsawanjuk eke jegatsui, tujash atumdauk tsawantak uminas awai. 7Atumnak ju nugkanmaya aents aidauk kajegtamain ainatsui, tujash minak kajegtuinawai, wagki dita takaamujiya nu pegkegchauwai tusa etsegtuinamu asa. 8Atumek fiestanmag wetajum, wika minishtatjai; wagki mina tsawanjuk eke jegachu asamtai, tiuwai.
9Nuna tusa, nigka Galilea juwakui.
Jesús fiesta tabernáculo tutainum webau
10Tujash yachi fiestanum weaju ai, Jesuschakam wantintsuk uumak weuwai. 11Judío aidauk fiestatin egaidau, nuninak:
—¿Dusha tuwig pujawa? tuidau.
12Kuashat aents aina nuiya niina pachis kuashat chichaidau. Nuniai ujumak chichaidau: “Duka aentsuk pegkejai”, tuinai; tikich chichaidau: “Atsa nuninchauwai, aentsun tsanuawai”, tuidau.
13Tujash makichkish niina pachisag paan iwainakag chichainachu, judío apuji aidaun ishamaidau asag.
14Fiestamainamu tsawan ejapeantu ai, Jesuschakam jega Apajuí ememattainum wayau, nunik jintinkagtau. 15Nunitai judío apuji aidauk puyatjusag diidau, nuninak: —¿Utusaya imatikash dekawa papí ausachua annaitkush? tuidau.
16Tiagtai Jesús ayaak:
—Wi jintinkagtag duka midauchui, mina awetiuwa nudauwai. 17Aents Apajuí wakegamun takastatus wakega nunú, dekamainai wi jintiag jusha Apajuinumiayashit atsa wiki nagkamnuash taja nuna. 18Nigki nagkami chichá duka, niina imanjinak egak tawai; tujash ya awemauwaita nuna imanjin egá nuuwai, dekaskea duka nuigtush ni pegkegchau takaamujish atsuja nu.
19“¿Moisés chicham umiktinun atumin amaschaukaitjum? Dutikamuitkujum atum ainajum anuiyatigmek makichkish umiatsjume. ¿Wagka mantuatasagmesh wakegagme?”, tau.
20Tutai aents aidau aiinak:
—Iwanch ajutjamui, ¿ya mantamata tujamua? tiajui.
21Tiagtai Jesús ayaak:
—Wi aents dutikmainchaun makichik dutikamag duik anentai jegatsjume. 22Dekaskenum Moisés, uchi aishmag akiinkuig pakaji ajapjitajum tujabiajui, (nunak Moisés nagkamachui, duka atumi muunjum nagkamamui); nunin asamtai atumek tsawan ayamtai aigkish pakaji ajapjin ainagme. 23Duka dekaske, atumek Moisés umiktajum timawa nuna uwaekaig tusajum, tsawan ayamtai aigkish uchi aishmag akiinamtaig pakaji ajapjin ainagme. Nunin ainayatkugmesh ¿wagka wi tsawan ayamtai aig, aents jaun etsagagmataish kajeagme? 24Atumek aentsú niimé diisjum etegkawaigpajum; dutikakjumesh shiig anentaimsa dutikatajum, tiuwai.
Jesús tuwiya tauwaita nu etsegkamu
25Ujumak Jerusalegnumia aidau:
—¿Juchaukaih maatatus egagma nu? 26Diisjuah, tuwakbaunum chichataish pachinatsujamah. ¿Dekas Cristui tuidau asampash apu aidaush ayatak diina? 27Tujash jutiik jusha tuwiyampaita duka dekainaji, untsu Cristo minitna nunak makichkish dekajuachagtin ainawai tuwiyampaita nunak, tiajui.
28Nu tuinamun, Jesús jega Apajuí ememattainum jintinkagtak pujau antuk, senchi chichaak:
—Minak dekagjume tuwiyanua minaja duka. Tujash wika, wiki nagkamnuk taachmajai, minak dekaskea nu awetiuwai, duka atumek waintsugme. 29Tujash wika wainjai, wagki niiniya minau asan nuigtush nigki awetiuwai, tau.
30Tutai achikta tuidau; tujash makichkish achikchajui, niinu hora eke jegaachu asamtai. 31Kuashat aents niiní dekaskeapi tiajua nunú chichainak:
—Cristo taatna duish, ¿ju iwainag takaa juní nagkaemasampash takastinait? tuidau.
Fariseo aidau Jesús achikta tibau
32Aents aidau Jesusan pachisag chichainamun fariseo aidau antukajui; nunikag fariseo aidau, sacerdote apuji aina nujai jega Apajuí ememattai kuitamin aidaun awemajui Jesusan achiktinme tusag.
33Nudiagtai Jesús chichaak:
—Wika atumjaig wajumchik tsawan pujusan, mina awetiuwa nui wetatjai. 34Atumek minak egatkattagme, tujash waitkashtatjume, nuigtush wi tuwí pujuttaja, nuig atumek minimainchau ainagme, tiuwai.
35Timatai judío aidau pempeentunisag iniininak:
—¿Tuwig jusha wetí ii wainmainchaunmash? ¿Judío aidau pampagkag griego aents batsatainamunum pujuina nui wee, griego aidaun jintintuatasampash tawa? tuidau. 36¿Nunash wajuk takua, “egatkattagme, tujash waitkashtatjume, nuigtush wi tuwí pujuttaja, nuig atumek minimainchau ainagme”, tujamji? tiajui.
Yumi pujutan sukagtinun pachis Jesús tibau
37Fiesta ashimnamua nunú tsawan dekas imá puyatjusa anentaimtutai asamtai, nunú tsawantin Jesús wajantá senchi jiiká chichaak:
—Makichik aentskesh kitabauk, minai tantati, nunik uwagti. 38Ni minai dekaskeapi tauk, Agagbau tawa nunisag, niina anentainig yumi pujutan sukagtina nunú pukuni jintuktinai, tiuwai.
39Nuna tiuwa nunak, niiní dekaskeapi tuidau Wakanin jukiagtin aina nuna taku tiuwai; Nu tsawantaik Wakaní Pegkejig eke taachu, wagki Jesús jaka nantakí nayaimpinum waketchau asamtai.
Aents aidau kanakagbau
40Nunú tabaun ujumak aents antukaju chichainak:
—Dekas ju aentsua juka profetayai, tuidau.
41Tikich chichaidau:
—Juka Cristui, tiajui.
Ujumak chichaidau: ¿Cristo galileanmayag atinait? 42¿Agagbauwa nuanui, Cristuk David weantu nuigtú belegnumia atinai David pujujakua nuiya tatsuak? tuidau.
43Nuna Jesusan tukiag, aents aidauk kanajajui. 44Nuniai ujumak dita aina nuiya Jesusan achiktag tuidau, tujash achikchajui.
Judío apuji aidau Jesusai dekaskeapi tichamu
45Nunikag jega Apajuí ememattain kuitamin aidauk waketjag fariseo aidau, sacerdote apuji aidaujai batsatbaunum jegawajui. Nunikmatai iniinak:
—¿Wagka itachugme? tuidau.
46Tusá tuinam jegá kuitamin aidau aiinak:
—Makichik aentskesh nu aents chichama imatika chichauk tuke wainkashbauwai, tiajui.
47Tiagtai fariseo chichainak:
—¿Atumesh tsanuamak yujainajum? 48¿Jutii apuji aidaukesh, nuniachkush fariseo aidaukesh niiní dekaskeapi tuidaush wainjumek? 49Tujash au aents chicham umiktinun dekatsu duka, shiig pegkegchauwai, tuidau.
50Tiagtai dita aina nuiya Nicodemo, Jesusan ausatatus jegajuauwa nu chichaak:
51—¿Jutii chicham umiktina nuish, makichik aents ni chichamujish antugtsuk nuigtú ni takaamujish dekagtsuk suwimak sumainai tawak? tiuwai.
52Tutai dita aiinak:
—¿Amesh galileanmayagkaitam? Agagbauwa nu ausam diistá nuniakum wainkattame, galileanmayag makichkish profetak tuke jiinkichui, tiajui.
53Tusag makí makichik ditá jeen shiyakajui.
Nke Ahọpụtara Ugbu A:
(Evangelio según San Juan) 7: AGR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2020, Wycliffe Bible Translators, Inc.