(Evangelio según San Juan) 8
8
Nuwa ekagmaku Jesús ejentunbau
1Tujash Jesusak Olivosa mujajin weuwai, 2nunik kashinia dui, kashikmas, jega Apajuí ememattainum wakitki jegauwai. Nunikmatai kuashat aents tuwagkam ekeemas jintinkagtutan nagkamauwai.
3Nuniai maestro chicham umiktinun jintinkagtin aidau, fariseo aidaujai, nuwa aentsjai takamun wainkag jukiag itawaju, dutika aents aidau ejapen awaasajui, 4dutikawag Jesusan iniinak:
—Maestroh, ju nuwa aentsjai takaniak pujau wainkaji. 5Moisés chicham umiktajum tujabauwa nuig, nuwa junin aidaunak ayatak kayai tukua tukuakua maatajum tawai, ¿tujash amesh wajinpa? tuidau.
6Nunak wajintig tusa dekapsatatus tiajui, nunik tsanumjugtasag. Tujash Jesusak tsuntsumá uwejin nugkanum agau. 7Nunitaishkam ayatak inidau, imatjam Jesús pagkai chichaak:
—Atum ainajum anuiyash yaita machikish tudaun takachush, nunú dekatkauk kayai tukutí, tau.
8Tusa ataktú tsuntsumá nugkan agau. 9Nuna timatai ditá tudaujinash dekagmamaidau asag, muunchinum nagkamna makí makichik jii jiinkawag ashí shiyakagmatai, imá Jesusak nuwajaig juwakui. 10Nunik Jesús pagkai niimkamá aents atsuagtai nuwan iniak:
—Nuwah, ¿dusha wajukawagmae? ¿Makichkish tukugmachagmaka? tau.
11Tusa tama nuwa ayaak:
—Atsa Apuh, tiuwai.
Tutai Jesús chichaak:
—Wisha suwimkan jukiti tumaitsujame. Wetá, nuigtuk awenamek tudauk takasaipa, tiuwai.
Jesusai nugká tsaaptinjiya nu
12Ataktushkam Jesús aents aidaun chichajak:
—Witjai nugká tsaaptinjinuk; mina nemagtauk, suwe aidaunmag wekaesashtinai, ayatak tsaaptin pujutan sukagtina nu ajiagtinai.
13Tutai fariseo aidau chichajak:
—Amek, aminuk pachisam etsegtumame, nuniau asam ame etsegtumam duka dekaskechui, tuidau.
14Tiagtai Jesús ayaak:
—Wi wiki midaun pachisan etsegtumaknush, wi tumamag duka dekaske, wagki wika dekajai tuwiyanua tauwaitja nuigtush tuwí wetatja nunak; tujash atumek tuwiyanua tauwaitja nuigtú tuwí wetatja dusha dekatsjume. 15Atumek aentsú anentaimtaijiya dutiksagmek etegkeagme; tujash wika makichik aentsnakesh etegkeatsjai; 16tujash wi etegkeaknuk, dekaskenum dutikmainaitjai, wagki wika wikichuitjai; wi, Apag awetiuwa nujaiyaitjai. 17Atum chicham umiktin agagbauwa nuig, jimag aents etsegtuina nuuwai dekaskek tawai. 18Witjai midaun pachisan etsegtubaunuk, nuniai Apag awetiuwa dushakam mina pachis etsegtujui.
19Nuna tutai:
—¿Amina Apash tuwí pujawa? tusag inidau.
Tama Jesús ayaak:
—Atumek minak dekagtsugme, nuniau asajum mina Apagshakam dekamaitsugme. Atum mina dekagkugmek mina Apagshakam dekamain ainagme, tiuwai.
20Juna tiuwa nunak Jesusak ofrenda aidau egketainum, jega Apajuí ememattainum jintinkagtak pujus tiuwai; tujash makichik aentskesh achikchajui, wagki horaji eke jegachu asamtai.
Wi wegamunmag minimaitsugme tibau
21Jesús ataktú chichaak:
—Wika wetatjai, nunikmatai egatkattagme, tujash atumek atumi tudaugminig jakatnaitjume. Wi wetatag nuig, atumek minimainchau ainagme.
22Tutai judío aidau chichainak:
—¿Nigki maamatin asampash, wi wegamunmag atumek minimainchau ainagme tujama? tuidau.
23Tiagtai Jesús ayaak:
—Atumek nugkaya ainagme, witjai yakiyanuk. Atumek ju nugka juiya ainagme, wika ju nugka juiyachuitjai. 24Nuadui timajime atumi tudaugminig jakatnaitjume timag nunak; wagki Witjai taig dekaskeapi tujutchakjumek, atumi tudaugminig jakattagme, tau.
25Tutai:
—¿Amesh yaitpa? tusag inidau.
Tama Jesús ayaak:
—Nunak nagkamchakun timajime. 26Kuashat atum dutikajum nu pachisa tumainuk ajutui; tujash mina awetiuwa nu dekaskea nuna tawai. Nunin asamtai wika, ni tabau antukbauwa nuna aents aidaunak augjai, tiuwai.
27Tujash ditak dekachajui Apajin pachis tawa nunak. 28Nuadui Jesús ditan chichajak:
—Aentsmaga akiinauwa nunú yakí takuijum dekattagme Wikitag nu, nuigtú wiki nagkamin takatsuk, Apag jintinjuamua dutiksanuk chichag dushakam. 29Mina awetiuwa duka wijai pujawai, Apajuk minakek idaitatsui, wagki wika ni wakega dutiksanuk tuke takau asamtai, tiuwai.
30Nuna Jesús timatai, kuashat aents aidau niiní dekaskeapi tiajui.
Dekaskea nu agkanmitkagmattawai
31Jesús judío aidau niiní dekaskeapi tiaju aidaun chichajak:
—Atum wi jintinjim nu dutiksagmek umiakjumek, dekaskenum mina jintintaig atatjume; 32nuniakjum dekaskea nu dekattagme, tuja dekaskea nunú agkanmitkagmattagme, tiuwai.
33Tutai dita aiinak:
—Jutiik Abraham weantu ainaji, nunin asaja makichkish inaku waitkataig aajakchauwaitji. Nuniajinish, ¿wagka agkanmagattagme tukagtame?
34Tiagtai Jesús ayaak:
—Dekas tajime, ashí aents tudau takaa duka, tudau inaku waitkatai ainawai. 35Inaku waitkataiya duka inamnun jeenig tuke pujuchu ainawai; untsu inamnun uchijiya nuuwai jeen tuke pujuwa duka niina uchijí asa. 36Nuadui, Uchijiya nu agkanmitkagmakuig, dekaskenum agkanmagattagme. 37Dekajai atumek Abraham weantu ainajum nunak, nuninaitkujum mantuatasajum wakegagme, wagki mina chichameg atumiin shiig juwachu asamtai. 38Wika Apagdauwa nu wainkamun chichaajai; atumshakam nunisjumek, apanu antukbauwa duke takaagme, tau.
39Tutai dita aiinak:
—Jutii apajig Abrahamai, tuidau.
Tiagtai Jesús ayaak:
—Abrahama uchijí ainakjumek, Abraham takajakua duke takamainaitjume. 40Wi mina Apag jintinjuamun dutiksanuk jintinmash minak ayatak mantuatasajum wakejutagme. Abrahamak makichkish annunak anentaimajakchauwai. 41Atumek, atumi apá takatjiya nu takaagme, tau.
Tutai dita aiinak:
—Jutiik kasanum akiamuk ainatsji, iina Apajig imá makichki, Apajuiya duke, tuidau.
42Tiagtai Jesús ayaak:
—Atumi apa Apajuiyaitkuig, dekaskenum mina anenmain ainagme, wagki wika Apajuinumia taan jui pujajai. Wika wiki nagkamnuk taachmajai, minak Apajuí awetiuwai. 43¿Wagka wi chichaamush dekamain dekapeatsjume? Duka mina chichameg antut dakituidau asajum nuniagme. 44Atumin apa duka Iwanchia nuuwai; nunin asamtai atumí apa wakega duke takastasajum wakegagme. Nagkamtinish Iwanchik magkagtin aajakui, nunin asa dekaskea nunak nigka tuchauwai, wagki niinig dekaskea duka atsau asamtai. Waita nunin asa chichakush waitnak tawai tuke nunin asa, wagki nigka waitai, nunin asa waita apajiyai. 45Tujash wika dekaskea nuna chichaig, dekaskeapi tujuttsugme. 46Atum ainajum anuiyash ¿ya wi tudau takasbaugnash dekagtuinawa? ¿Wagka wi dekaskea nuna etsegkuish, dekaskeapi tujuttsugme? 47Apajuinua duka, Apajuí chichamen antujuk umijin ainawai; tujash atumek Apajuinuchu ainajum nuadui, nu antutak dakitagme.
Cristuk Abraham akiintsaig pujujakui
48Tutai judío aidau chichajuinak:
—Ii timayag duka dekaske, amek samarianmaya aentsuitme, nunin asamin Iwanch pujugtamui timayag duka.
49Tama Jesús ayaak:
—Makichik iwanchkesh minak atsugtawai. Wi takaag nunak Apajun eme anentsan aikajai, nuniaig atumek minak eme anenjusjumek diigtsugme. 50Wika mina emematjitnume tusanuk egatsjai; tujash Apajuí emematjitnume tujutu asa, mina emematjumainnak iwainawai, nuuwai aentsú etegkea duka. 51Dekas tajime, mina chichamjua nuna umiauk, tuke jakachagtin ainawai, tiuwai.
52Tutai judío aidau aiinak:
—Yamai dekas dekaji Iwanch ajutjama duka; Abraham nuigtú ashí profeta aidaush jinau aina nuniaig, “mina chichamjua nuna umiauk, tuke jakachagtinai”, tame. 53¿Ame iina apají Abraham aajakua nuna nagkaesaukaitam? Abrahamak nuigtú profeta aajakajua dushakam jinawajui nuniaish, ¿amesh ya anenmamkumea tame? tiajui.
54Tiagtai Jesús ayaak:
—Wiki eme anenmamkunuk, wi eme anenmamag duka wainkayai. Tujash mina eme anenjauk, mina Apajui, atum iina Apajuijiyai tajum nunú. 55Tujash atumek wainchauwaitjume, wika wainjai; wainchaujai takunuk, atum waitaitjum nuninuk amainaitjai. Tujash wainu asan, ni chichamenash umigjai. 56Abraham atumi muunjum aajakua nu, wi jui taamtai waitkatatus shiig anejakui; nuniau mina waituk shiig aneasui, tiuwai.
57Tutai judío aidau:
—Cincuenta mijankesh ajutjamtsu nuniaigkik, ¿Abrahaman wainkauwaitjai tame? tuidau.
58Tama Jesús ayaak:
—Dekas tajime, Abrahamash akiintsaig, tuke pujuwaitjai, tau.
59Tutai tukutasag kaya aidaun jukiajui, tujash Jesusak uumkauwai, nunik jega Apajuí ememattainmayag jiinkiuwai.
Nke Ahọpụtara Ugbu A:
(Evangelio según San Juan) 8: AGR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2020, Wycliffe Bible Translators, Inc.