Lukah 24
24
Na morik ɓalina hi Yehu
1Babaaru ta laɗɗu Miggu, ɗa mawinni halakuɗanya ta ratina hi Yehu aɗa idiha ɗa karanu ɗama woumomar ɗapalanga hadiaɗa. 2Aɗa tomaka ta rati, itaɗanyaka na toaɗina na watu rati langa gehirnak. 3Manga hiɗa tama ta rati nou, ʄiaɗinguka daɗa itamayaha na kanawa-Na hi Yehu. 4Tanga dediɗa noulau ʄaka hiɗa hangotar aɗa pangaɗanya namaʄaʄi. Dapaliwaija eija ɗama tou maɗuah ɗama waing koapi makaɓilak ɗadedi ta lihiɗa. 5Ɗamangeꞌat oata, manga hiɗa karaɗa lapak ɗa ngoaraɗa toma ta tana. Jiaɗinguka ɗama tou maɗuah wiɗa lahi ɗuɗa, “Gahimi manyeralinya natou nama morik ta joanga tou maeti? 6Da eimanya ya. Namorik ɓalikaǃ Mi namuha napatikinagimi a einyaha ta joangami ta Galilea, wiɗa, 7‘Na Ana Tourara ɗaharakanyah ta limma tou doku-jala, ɗaharikaya, namaeti, lapakung ta laɗɗu katilun namorik ɓali.’ ”
8Jiayak ɗa mawinni hiɗa namuya napatikina hi Yehu. 9Aɗa ɓalika waling ta rati, ɗaloluk bolluya namaʄaʄi nou, ta matou habulu hatouh ɗa ana pahakoalan-Na hi Yehu ʄaka ngaladukaɗ ɗama keriya hawanguk. 10Ɗa mawinni ɗama peakaya ngaladukana nou ta mapakeri lahi Yehu ʄiahakː hi Maria Magdalena, hi Yohana, hi Maria na inana hi Yakobuh ʄaka ei ʄellaja ɗa mawinni hawanguk ɗama maraija. 11Jiaɗinguka ɗa ana pahakoala-Na hi Yehu ɗapangaɗang nahalolukuɗ ɗa mawinni hei dama tamamaya ta pangaɗang. Jiayak hidaɗa mannija ɗapapanewiɗa ɗa mawinni hou. 12Jiaɗinguka hi Petruh kiɗinanyaka ʄaka hina palai hagang ta rati. Ana tomaka hina ngaɗal ta roungu rati manga na itaya, ʄiapay na kaba kaka nama einya. Hi Petruh kaɓarrananyak manga hina ɓali, ɗangu ɗapapatuturun ta atina witina gananya nama langa ʄaʄi.
Hi Yehu napatekang wikina ta larangi nama hagangu ta paraingu Emauh
(Mrk. 16:12-13)
13Ta laɗɗu nou ʄella, eija ɗama tou maɗuaha waling ɗama keriya hi Yehu, tanga halakuɗa ta mahangin na paraingu nama ngarang Emauh. Na paraingu nou akatutukayaka habulu hangi kilun marouna waling ta koata Yeruhalem. 14Tanga halakuɗa ɗapanewi aɗa lolukuya ngaladukan namaʄaʄi nou. 15Tangiruɗa aɗa lolukuya ʄaka aɗa plaumainya-pangaɗang, aminyaka hi Yehu ana halaku maraija. 16Jiaɗinguka eingu mapatodaɗaja ɗa mataɗ hi daɗa tadaya hi Yehu.
17Manga winaja hi Yehu, “Gananya nahalolukumi?”
Dediɗanyaka, ʄaka ɗa haɗaɗa duku hadukah. 18Nama hatouna waling ta matou maɗuaha hou, na ngaran hi Kleopah. Nakapoɗuk ʄaka hiwina lahi Yehu, “Ama, ou ʄiapawu tou hangi tana nama aming ta koata Yeruhalem, dama peanya nama ɓua ʄaʄi ta laɗɗu maduga?”
19Winaja hi Yehu, “Gananya namaʄaʄi?”
Ɗapagaping, “Einya namaʄaʄi lahi Yehu natou Naharet, Ɗunna nabi ya. Napanewina ʄaka napawoluna makuaha oataya ta hagana hi Alla, ʄaka ta ngaladukaɗ ɗa tourara. 20Jiaɗinguka ɗa kapalang imam#24.20 Imam ʄiayak natou nama ta paɗuana hi Alla ʄaka na tourara. ʄaka ɗa kapalang mapareahada, ɗawoaya a huku maetinya, ʄaka hiɗa harikaya lodu ana maeti. 21Ɓakalang nyiama ʄiahinguyaka napakadawuma ana pahelaya natou Ihraelǃ Jaka ya laɗɗu, laɗɗu katilunanyak ana maeti. 22Taba liha eija ɗama tou mapirraha ɗa mawinni waling lahi nyiama ɗapa kapodukumaka. Raniɗamu ɗuɗa langa halakuɗak ta rati, 23ʄiaɗinguka daɗa itamaya na kanawa-Na hi Yehu noulau. Ɗaɓalika ʄaka ɗalolukuya aɗa itaha ɗa malaikat ɗama patekangu wikiɗ ʄaka wiɗa hi Yehu namorik ɓalika. 24Manga ɗama tou mapirrah waling lahi nyiama ɗahalaku ta rati, ʄaka ɗa itaya gananya nahawiɗang ɗa mawinni hou tounoutekana, ɗuɗa ʄellakaya daɗa itamaya na kanawa-Na hi Yehu.”
25Pagapingnanyaka hi Yehu, “Nyiami nani tou dama waingu kituna! Gahimi buatuhingu ami wainya napalanga lolukɗagimi ɗa nabina hi Moiri Alla? 26Ɓakalang mi peanyaha, na Raja Nama Pamanumara napaɗa moulunyah namawilla, adaɗi nakaaya na kuaha napapareaha waina ta ngaladukana.” 27Manga hi Yehu napalaraɗaja gananya nama matuling ngaladukana ta Hurat Ɓakul witin na ihi wiki-Na, waling ta huratuna hi Muha lapak ta huratuɗa ɗa nabi.
28Aɗa maraninyaka na paraingu Emauh, hi Yehu maga mahalaku luruhyaka, ʄiaɗinguka ɗa tahanya, wiɗanya, 29“Ama, mu lihabu letu ta padounguma nyiama, kaɗang tamananyaka na laɗɗu, riɗung winaka.” Jiayak hi Yehu na oꞌanya ʄaka hina kerih ana tama maraija ta ummaɗa. 30Ta rahi Ana ngoɗu a ɗengaja, hi Yehu naɗekiya na kababa, hina pamalanguya hi Alla, manga hina hiwi-hiwituya na kababa nou, hina woaja. 31Ta rahi nou ʄella tawehaɗanyaka ɗa mataɗ, ʄaka ɗuɗa tadaɗanyaka hi Yehu, ʄiaɗinguk hi Yehu molahnanyaka waling ta paɗuaɗa. 32Wiɗaka aɗa patuturu wikiɗa, “Jiayaka weiga hina ɗeaɗu na atida ana panewi ɗengada ta larangi lapakung Ana peakaya na ihin na Hurat Ɓakul lahi iata!”
33Ta rahi nou ʄella ɗakiɗi manga hiɗa ɓali ta koata Yeruhalem. Noulau ɗatomaja ɗama tou habulu hatouha ɗa ana pahakoalan-Na hi Yehu, ɗama tangir kaɓuaɗengaɗaja ɗama keriya hawanguk. 34Ɗama kaɓuangu hou wiɗajaka ɗama tou maduah, “Mapaɗeninguya, hi Moiri Yehu namorik ɓalikaǃ Napatekang wikinaka lahi Himonǃ”
35Ɗama tou maɗuaha waling ɗama keriya hi Yehu ɗama ɓua ɗuki ɗaloluk ʄellaya gananya napalanga reggaɗa ta paɗua larangi, ʄaka gikineina aɗa tadaya hi Moiri Yehu ta ɗalu ana hiwituya na kababa.
Hi Yehu napatekang wiki-Na ta haga ɗama keriya
(Mat. 28:16-20; Mrk. 16:14-18; Yoh. 20:19-23; Kis. 1:6-8)
36Tangirɗah aɗa lolukuya, dapaliwaimanya hi Yehu keha dedina ta paɗuaɗa ʄaka wina, “Mimagaloali-haɗadoanami!”
37Kapoduk ʄaka mangeꞌatɗanyak, kaɗang ta pangaɗanguɗa waddi tanaya wiɗ. 38Jiaɗinguka hi Yehu wina, “Gahim mangeꞌat? Gahina dadar na atim, ʄaka hi dami manni-Ga ak morik ɓali? 39Patetigaja ɗa limma-Gu ʄaka ɗa wihi-Gu. Kaem peanya aʄia-Waǃ Hamanu-Wa ʄaka pateti pakalu-Ga, kaɗang na waddi tana da eimangu katirouna ʄaka riina, mearang napa itami lahi Nyouwa.”
40Atangirun ana panewi, hi Yehu napatekaja ɗa limma-Na ʄaka ɗa wihi-Na lahi ɗuɗa. 41Ta ɗalu ɗeaɗuɗa ʄaka kaɓarraɗengaɗanya na morik ɓalin hi Yehu, ɗuɗa daɗi ɗamanni tekkamanya nalaran namaʄaʄi nou, ʄiayak hi Yehu napatutur lahi ɗuɗa, “Eikaɗingu pa angumi ya?” 42Woaɗanyaka kaboku pahangu. 43Hi Yehu naɗekiya na kaboku nou, manga hina angu ta hagaɗa.
44Namengaka nou, hiwinaja, “Ya ʄiayaka napalanga peaka-Gugimi a eigah ak oaligim nyiamiː Gananya nama matuling witi-Gu ta huratuna hi Muha, ta huratuɗa ɗa nabi, ʄaka ta hurat Loɗuna hi raja Daut, ngaladukana naʄaʄih.”
45Manga hi Yehu wehanajaka ɗapangaɗanguɗa kaɗa peanya na ihin na Hurat Ɓakul awina. 46Jaka hiwinaja, “Ta Hurat Ɓakul einya nama matulingː na Raja Nama Pamanumara namawillaha lapakung Ana mati, ʄiaɗinguka namorik ɓaliha waling ta maet ta laɗɗu katilun. 47Jaka ta ɗalu ngarana na Raja nama Pamanumara nou, patomanya ta tou ta haguꞌul pinu-tana kaɗa haria, kapiaku poahi-poɗahunaja hi Alla ɗa doku-jalaɗa. Jaka na lii nou, patomanyah waling ta koata Yeruhalem lapaka ta hupu duka tana. 48Nyiamika nama ita wainya mata waling ngaladukana namaʄaʄi, ʄaka mi patomanyah ta tou hawanguk. 49Jaka Nyouga kupangidi giminya na Hangahu Harri napalanga papaturana na Ama-Gu. Jiaɗinguka mi enganguh ta koata Yeruhalem lapakung anabinugim kuahana hi Alla.”
Hi Yehu na maɗeɗikung ta hurga
(Mrk. 16:19-20; Kis. 1:9-11)
50Namengaka nou, hi Yehu naɓeija ɗa ana pahakoalana aɗa halaku ta habali koata ta lihi Betania. Noulauka Ana ɗeɗikuja ɗa limman manga hina pamarii-malalaja. 51Tangir pamarii-pamalalanaja Ɗunna maɗeɗikungnanyak ta hurga ana paheawa ɗengaja. 52Aɗa itayaka namaʄaʄi, kahoru-karaɗaɗanyaka. Manga hiɗa ɓali ta koata Yeruhalem duku egi atiha. 53Wehangu-wehang ɗakaɓuangu ta ɓei Umma Pingi Pahabayang tou Yahudi, aɗa wuatu-hali pangalanya hi Alla.
Nke Ahọpụtara Ugbu A:
Lukah 24: wnk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 (Active), Wycliffe Bible Translators, Inc. All rights reserved.