Lukah 23
23
Hi Yehu ta hagana hi Pilatuh
Mat. 27:1-2, 11-14; Mrk. 15:1-5; Yoh. 18:28-38)
1Ngaladukaɗa ɗa kapalang ɓei tou Yahudi ɗama ɓotah palakara ɗama kaɓuangu hou, ɗadedi manga ɗa idiya hi Yehu ta hagana hi Pilatuh. 2Aɗa tomaka ta hagana hi Pilatuh, walinounak aɗa paɗeitunya jala, hi wiɗanya, “Nyiama matomanya natou nei ana pajalluruha ɗa tou. Na heiruja ɗa tou abi ɗa woangu hii katiku lahi Kaihar, ʄaka wina ʄellapah aʄiayaka Ɗunna hi Karituh, na Raja.”
3Manga hi Pilatuh hina tuturuya hi Yehu, “Ou tekka na Raja tou Yahudi?”
Nagapiya hi Yehu, “Tounounak, napatikimu.”
4Wina hi Pilatuh ta kapalang imam#23.4 Imam ʄiayak natou nama ta paɗuana hi Alla ʄaka na tourara. ʄaka ta tou ɗangu, “Nyouwa daku kollimanya hangitekka halan natou nei kapiku hukugu-Nya.”
5Jiaɗinguka ɗuɗa reihi ɗahikɗanyaka wiɗanya, “Waingu lii-panungangun, natuʄah ɗa tou ta haguꞌul loaɗa Yudea, ta kawungana walipang ta loaɗa Galilea ʄaka natoma ʄellaka ya.”
Hi Yehu ta hagana hi Herodeh
6Hi Pilatuh ana rangukihak, patuturnanyak, “Natou nei tou Galilea?” 7Mengaka aɗa peakanya hi Pilatuh, hi Yehu amawalinguy ta loaɗa papareahananya hi Herodeh, ʄiayak hi Pilatuh napangidinya hi Yehu lahi Herodeh, nama tanga einya ta koata Yeruhalem. 8Hi Herodeh duku egi atiya ana itaya hi Yehu, kaɗang langa rangu madeinanyaka nalara-Na, ʄaka nabuhang kaku paregga ɗenga-Nya awina. Ɗunna nakalauranya kaku itaya hi Yehu ana woluya na tada pakaɓarraɗengang awina. 9Tounounak hi Herodeh ɗangu ɗapatuturnanya lahi Ɗunna, ʄiaɗinguka hi Yehu dana pagapihingmanya. 10Ɗa kapalang imam ʄaka ɗa gurr agama tou Yahudi ei ʄellaja houlau, aɗa dedi manga hiɗa patiwung ɗapaɗeitunya jala hi Yehu. 11Hi Herodeh ʄaka ɗa hordadu ɗagiɗakwainya ʄaka ɗapamakiiya hi Yehu. Manga ɗapakenanya koapi ɓakul tou papa-akang, manga hiɗa pangidi ɓalinya lahi Pilatuh. 12Ta laɗɗu nou ʄella, hi Herodeh ʄaka hi Pilatuh ɗapa oali ɓalika, yanaga ɗapamuhung.
Hi Yehu woaɗanyaka hukung maeti
(Mat. 27:15-26; Mrk. 15:6-15; Yoh. 18:39--19:16)
13Hi Pilatuh pakehanajaka ɗa kapalang imam, ɗa kapalang ɓei tou Yahudi, ʄaka ɗa tou ɗangu. 14Manga hiwinaja, “Nyiami mi pangidiganya natou nei lahi nyouwa, ʄaka wimi napajallurhak ɗa tou. Ya ta hagami nyouwa kuparehayaka Ɗunna, ʄiaɗinguka nyouwa daku mali kollimanya hangitekka jala-Na napapaɗeitumi-Nya. 15Touʄellana napapangaɗan hi Herodeh, kaɗang nou hina pangidi ɓalinya hi Yehu lahi nyiama. Natou nei dana wolumaya hangitekka nama jala napakolliwainanya na hukung maeti. 16Jiayak kaku paleawa tou kana paluya manga hiku pahelaya.”
[17Napalanga dammaɗa, ta laɗɗu paparamiɗanya na laɗɗu Paskah tou Yahudi, hi Pilatuh napahelaya hatou natou tahang taguɗa ɗa tou ɗangu.] 18Ngaladuka ɗa tou ɗama pakehang ɗapatiwung, “Hamatiya! Pahelagamanya hi Barabah!” (19Hi Barabah hipatamanya ta gallu kaɗang napatau namaʄaʄi ta koata ana geꞌang mapareaha Roma, ʄaka nahamati tou.)
20Hi Pilatuh nabuhang papahelaya hi Yehu, ʄiayaka hiwina ana panewi hadekalingu ta tou ɗangu. 21Jiaɗinguka patiwungɗanyaka, “Harikaya! Harikayaǃ”
22Manga napapadillu wudawaingun hi Pilatuh napanewi ʄella lahi ɗuɗa, “Ganakananyaka na jala-Na? Nyouwa daku kollimanya hangitekka jala-Na nama patuꞌang hina kolling hukung maeti! Jiayak kaku paleawanya tou kana paluya manga hiku pahelaya.”
23Jiaɗinguka ɗapatiwu pangalang aɗa ɗahikuya ʄaka aɗa kaduttuya, harikayah hi Yehu awiɗa, ʄaka napatiwunguɗa hou ɗa talu wainya. 24Jiayaka hi Pilatuh nawoanya hukung maeti hi Yehu, keriya nahabuhaɗa ɗa tou ɗangu hou. 25Jaka napahelaya hi Barabah napakareiɗa. Hi Barabah nama ta galluya witin ana patau ʄaka ana hamati tou. Manga hi Pilatuh naharakaɗanya hi Yehu lahi ɗuɗa keriya ɗapabuha atiɗa.
Hi Yehu aharikaya
(Mat. 27:32-44; Mrk. 15:21-32; Yoh. 19:17-27)
26Ɗa hordadu tanga idiɗanya hi Yehu ta habali koata Yeruhalem, ta paɗua larangi ɗaparegga ɗenganya hatou nama ngarang Himon, nama waling ta koata Kirene, atanga tamana ta koata Yeruhalem. Ɗa apaya, manga hiɗa paruhunya kana ɗeituya na ai harika ta kaɗeangana hi Yehu awiɗa.
27Ei ʄellaja ɗa tou ɗangu ɗama pakeri ta kaɗengana hi Yehu. Ta jongaɗa ei ʄellaja ɗa mawinni, ɗama hou ʄaka ɗahaliya hi Yehu. 28Jiaɗinguka hi Yehu nagilakuja, ʄaka hi wina, “Mawinni Yeruhalemǃ Abi houɗi-Ga Nyouwa. Hounya na ihi wikim ʄaka ɗa anamu.” 29Kaɗang enga aminya na rahi mawilla nama buatu lapakung natou hiwina, ‘Na kanyuru ɗa mawinni dama mali pakabu, dama pa ana ʄaka dama pahuhu ana.’ 30Ta rahi nou ʄella, natou enga winaja ɗa letin, ‘Pitakuma nyiama!’ ʄaka ɗa paledi, ‘Ɓoani gama nyiama!’ Kaɗang na mawilla nama duku buatuya. 31Natou awolu tounoukanagaka dama eingu halan, parei-reihing nyiami nama eingu halan reihi mawillamika aɗa wolumi. Nyouwa ya, mearang na ai moru dama mutung ta api, ʄiaɗinguka nyiami, mearang na ai kadoku nama mutung lapak hina duka.”
32Ei ʄellaja ɗama tou maɗuaha ɗa tou irrak ɗapadutu, kapiku hukung maeti pamaraiɗenganaja hi Yehu awiɗa. 33Tomaka ta padoungu nama ngarang ‘Rii Kaꞌa Katiku’, ɗuɗa harikaɗanyaka hi Yehu ʄaka ɗama tou maɗuah ɗa tou irrak. Hatou ta karaha lawanananya ʄaka hatou ta karaha laleinanya hi Yehu. 34Manga hi Yehu nahabayang, “Ama, Mu poahi-poɗahuɗaja ɗa doku-jalaɗaǃ Daɗa peꞌamanya gananya nahawoluɗa.”
Noulau, ɗa hordadu ɗawaingu lot, kapeanya gearaya nama kollija ɗa koapina hi Yehu awiɗ. 35Ɗa tou ɗangu hou ɗa itaya ngaladukan namaʄaʄi. Jaka ɗakapalang tou Yahudi ɗayekiya hi Yehu, hiwiɗanya, “Ɗunna langa pamanumaranaka tou hawanguk; matanyay kana pamanumaraya na ihi wikin, ana paɗenikanguka Ɗunna Raja nama Pamanumaraya napapedin hi Alla!”
36Ɗa hordadu ɗayeki ʄellaya. Ɗuɗa amija ɗawoanya anggur manyilu lahi Ɗunna. 37Jaka wiɗanya, “A Raja tou Yahudi tekaɗiwu, pamanumaraya na ihi-Mu!”
38Ta pinu ai harika-Na hi Yehu, ɗatulihuya nama winaː “Ya ʄiayaka na Raja tou Yahudi.”
39Hatou natou irrak napaharika ʄella nou nayekiya hi Yehu, winanya, “Ou Raja nama Pamanumara tekkawu? Atounoukanaka pamanumaraya na ihi wikim ʄaka nyiama!”
40Jiaɗinguka hatou natou irrak ʄella napa abinya na oalina nou, winanya, “Damu mangeꞌatmanya hi Alla? Ou ʄaka Ɗunna meara kolling hukung maeti. 41Na hukung matida iata napatuꞌang waling nahawoluda, ʄiaɗinguka Ɗunna da eimang hangitekka jala-Na!” 42Manga hiwina lahi Yehu, “Munamukiwa nyouwa a amikaguka ʄaʄi Raja!”
43Wina hi Yehu lahi ɗunna, “Manningu, laɗɗu ya ʄella, ou kumarai-Gu ta Pirdauh.”#23.43 Pirdauh, ʄiayak na padounguɗ ɗa huhu-anana hi Alla ɗama langa matiɗa.
Na matina hi Yehu
(Mat. 27:45-56; Mrk. 15:33-41; Yoh. 19:28-30)
44Akatutukayaka ta tiɗu laɗɗu didaru, na matalaɗɗu dana wahamangu, ʄaka ngaladukana na loaɗa nou nakapetang lodu ana beili na matalaɗɗu. 45Jaka ta ɓei Umma Pingi Pahabayangu tou Yahudi, na kaba ɓakul nahatearung napapatoda waing ta padoungu maharri napaheawa paraɗua. 46Manga hi Yehu nakawula hawading, “Ama, ta limma-Mu Ku-harainya na moriku-Gu.” Ana mengaka papanewi tou nouna, matinanyaka.
47Ta rahin ana itaya namaʄaʄi, na kapalang hordadu nahoru-hailanya hi Alla. Manga hiwina, “Mapaɗeninguya, Ɗunna dana jalamangu!”
48Natou ɗangu nama aminya aɗa patotunya kama itaya namaʄaʄi awiɗa. Ɗa ɓali waingu haduka aɗa paɗanya nahawoluɗa ana jala. 49Ngaladukaɗa ɗa oali pabuhangun hi Yehu ʄaka ɗa mawinni ɗama keriya waling ta loaɗa Galilea, ɗadedi wali maroungu ʄaka hiɗa ita bolluya.
Taanuɗanyaka hi Yehu
(Mat. 27:57-61; Mrk. 15:42-47; Yoh. 19:38-42)
50-51Einya hatou nama ngarang Yuhup nama waling ta koata Arimatea, ta loaɗa Yudea. Ɗunna tou kalung atiya, napa-akanya tou, ʄaka nanaɗinya na rahina hi Alla ana papareahakak ʄaʄi Raja. Ɗunna ʄella hatou nama waling ta kapalang ɓei tou Yahudi, ʄiaɗinguka dana oꞌamanya ɗapabotahuɗa kahamatiya hi Yehu awiɗa. 52Hi Yuhup nahalaku lahi Pilatuh nakareiya nakanawa-Na hi Yehu kawoaganya awina. 53Manga hina hapurunya na kanawa-Na hi Yehu waling ta ai harika, ʄaka kaborunya waingu kaba kaka nama mopahu. Mengaka hina patamanya ta rongu rati koꞌu watu napaɓua pahaɓoala tou, ta paledi. Na rati nou daɗi waimanya. 54Ta laɗɗu nou, laɗɗu limaya;#23.54 Na yapuɗanya na laɗɗu Sabat waling na tama na matalaɗu ta laɗɗu Lima, lapakung ana tama na matalaɗu ta laɗɗu Nammu. ʄaka na laɗɗu hangahu laɗɗu habayangun natou Yahudi tiki hatomaɗanya.#23.54 Na kanawa-Na hi Yehu ɗageaha taanunya adaɗi na tama na matalaɗu kaɗang laɗɗu nou, laɗɗu Limaya. Napalanga dammaɗa natou Yahudi ɗa hadiaha ngaladukaɗ adaɗi tomaya na Laɗɗu Sabat. Kaɗang ɗa tou Yahudi ɗahangahu pakerang ta Laɗɗu Sabat keriya na pata agama tou Yahudi.
55Ɗa mawinni ɗama marainya hi Yehu waling ta loaɗa Galilea ɗakeriya hi Yuhup ʄaka ɗa itaya na ratina. Ɗa ita ʄellaya na kanawa-Na hi Yehu abiʄaluya ta rati. 56Mengaka nou ɓaliɗanyaka aɗa hadiaha ɗa karanu woumomar, ʄaka minya woumomar kama taunya na kanawa-Na hi Yehu awiɗ.
Ta laɗɗu habayang tou Yahudi, ɗuɗa ɗahangahu pakerang keriya napata agama tou Yahudi.
Nke Ahọpụtara Ugbu A:
Lukah 23: wnk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 (Active), Wycliffe Bible Translators, Inc. All rights reserved.