Luk 2
2
Jesu na twila
Mat 1.18
1Na lula sul ɗay, wa̰ay ɗəng Sesar Oguste so gṵ tɨ bi gun tɨ ər waan hul tɨ Rom ɓra. 2Bi ɓra ne toni mani ne, tɨ lula sul ne Kirinus tɨ guberno̰ tɨ lɔr nəgri sul tɨ Siri. 3Bi gun si tɨ a ndil kay. Jakaw si tɨ ər lɔr tɨ twila hul. 4Josep kaw, o̰ tɨ lɔr tɨ Najarɛt tɨ nəgri tɨ Galile, tɨ saal tɨ Betlehɛm, lɔr nəgri tɨ Jude, ne tɨ wa̰ay Dabid na lɔr. Kəysul yḭr kaw ər tɨ Dabid na kalɔ la. 5Ər si na Mari, ɓa̰ ii ne ər caw, lɛ ər yen. 6Gorne a wo tɨ Betlehɛm gɨna, ɗa̰y tɨ ɓa̰ twila an. 7Ər toy ɓa̰ ɓər ne toni mani. Ər bini ər na sər la ər ɗo ər tɨ kɔm hul, tɨ yḛ na un tɨ wa̰y tudi. Kəysul un teni gɨ a tɨ li tɨ bi ɓoy par hul.
Malayka wag tɨ bi tɨ həm ɓaw sul
8Ndog tɨ un ɗay, bi tɨ həm ɓaw wo nin. A wo a həm ɓaw na siyel. 9Baali na malayka paa wag tɨ a sul la ər Baali na taan ndeeri un tɨ a sul la ayri ka a nari. 10La malayka ja gɨ a: «Yḭ ka ayri kar lo kəysul ən ɓə gɨ i Jaa Ndinimani ne ɓə tɨm wa̰y tɨ ndula laar ɗəng tɨ bi gun maan ja. 11Kakam le, a toy gɨ i wo tɨ i nina#2.11 wo tɨ i nina Deu 32.15; 1Sam 10.19; Psa 24.5, 27.1,9; Ja̰ 4.42; Tom 5.31, 13.23 tɨ Dabid na lɔr ɗəng hul. Yḭr tɨ Krist wo ne Ndɨla ɛr la, tɨ Baali la. 12Wa̰y ne ɓə gɨ i ɓa̰ ne ɓla jo le: Yḭ ɓə ɓa̰ ne a bini ər na sər la a ɗo ər tɨ kɔm hul tina.» 13Tɨ daamu, malayka dɨbla tapeer o̰ tɨ ndɨla sul hari paa na malayka ne la, a so kwan a teen na Ndɨla. A ja ɓə:
14«Taan gɨ Ndɨla baw tɨ ndal pi,
la lapya gɨ bi tɨ nəgri sul la. Kəysul Ndɨla ka a kum.»
15Gorne malayka-a ton nɨm a la a duga a si tɨ ndɨla sul gɨna, bi tɨ həm ɓaw ja gɨ peer ɓə: «Ka yi si marway tɨ Betlehɛm tɨ wa̰y ne Baali təng i ji tɨ sul ləg» 16A tung a ndɔ la a si la. A ten Mari la, Josep la ta ɓa̰ma ne ley tɨ kɔm hul la. 17Gorne a ləg ər gɨna, a jul jaa ne malayka tɨ Ndɨla maan ja gɨ a lɔ tuna ɓa̰ ne sul. 18Bi gun ne laa jaa ne bi tɨ həm ɓaw ja gɨ a ɓɔr a ji nari. 19Mari gɨna, ər ɓaw jaa ne gun tɨ ər nirimu la ər ilgɨ tɨ sul yɔd la. 20Bi tɨ həm ɓaw duga. A teen Ndɨla la a ja ɓə ər tɨ Ndɨla ɗəng la, kəysul wa̰y ne a laa la a ləg la tɨ kuri kuna malayka ja gɨ a.
A hina na Jesu tɨ Ndɨla na li hul
21Gorne ɗa̰y maarta lɛm teni gɨna, a ɓya̰ ɓa̰ ne cina. A kay ər ndil ɓə Jesu. Tɨ ndil ne malayka ja toni barita a yen ər.
22Lɔ tɨ pla, gorne lula sul lɛm ne Mari ɓə ər pir tɨ ɓa̰ twila jul kuna Moys na gṵ hul ja gɨna, a si na ɓa̰ tɨ Jerusalɛm tɨ gɨ Baali ɓla. 23Kəysul a kya̰ tɨ Baali na gṵ hul ɓə: «A ɓə gɨ Baali ɓimi ɓərgɨ tɨ daa gun kay jak.» 24La a ɓə na gugoli tɨ gə̰y tɨ ndidi ɓee gugoli tɨ taa tɨ ndidi hina tɨ hima ɓina kuna Baali na gṵ hul ɓla. 25Ɓər paa wo tɨ Jerusalɛm, ər ndil ɓə Simeho̰. Yḭr tɨ wo tugla la, ər oy gɨ Ndɨla la. Ta ər tɨ wo ne ər wo tɨ Israhel nina a̰y. Ndɨla na lal gə̰y na ər la. 26Ndɨla ja gɨ ər na ul mu tɨ Lal ɓari dwari ɓə ər ɓə Krist wo ne Ndɨla ɛr ər ləg barita ər ɓə ulu. 27Ndɨla na lal si na ər tɨ Ndɨla li hul na ɗa̰y ne. Gorne bi tɨ Jesu twila hina na ɓa̰ ne tɨ wa̰y ne gṵ hul taam kar gɨna, 28Simeho̰ so ər tɨ ər daa la ər teen na Ndɨla la. Ər ja ɓə:
29«Ndogle, Baali, əm ka wa̰y ne əm ja toni tɨ kar,
əm nɨm əm wo tɨ cida kar ka ər uy na lapya.
30Kəysul ən ləg wo tɨ bi nina ne o̰ tɨ əm ndɔ na ən ji teni,
31nina ne əm par ɗa̰ysul gɨ bi gun:
32Yḭr tɨ un ndeeri gɨ bi ne una Ndɨla lo la,
ər tɨ əm bi tɨ Israhel na taan la.»
Simeho̰ na jaa
33Jesu na ba a na ər na̰ ɓɔr a ji tuna jaa ne Simeho̰ ja tuna ɓa̰ ne sul. 34Simeho̰ jul ər mu tɨ a sul la ər ja gɨ ər na̰ tɨ Mari ɓə: «Ndɨla kay ɓa̰ ne ka ər ti bi tɨ Israhel dɨbla na tɨba la a o̰ la. Ər ɓə tɨm wa̰y tɨ ɓla ne bi ɓə na paa mu laa lo tɨ sul. 35Gorne əm ndoigɨ ɓə hura tina kuna kaskar ɓya̰ wo gɨna, jaa ne bi ilgɨ tɨ a hul ɓə ndula ɓla tɨ bayri.»
Hana, Ndɨla nebi
36Ii paa ne ndil ɓə Hana, yḭr tɨ Ndɨla na nebi, ər wo tɨ nin la. Yḭr tɨ Panuwel na ɓa̰ ii, tɨ Aser na kalɔ. Ər na an dɨbla. Tɨ ər ibri hul, ər ti na ər ɓər na an kili, 37la ər tɨ ii tɨ ndirimu marway na an duk maarta kar soo. Ər nɨm Ndɨla na li ɗa̰y ɓudu lo. Ər ka Ndɨla na cida na ɗa̰y sul la na lula sul la. Ər so asam la, ər soon Ndɨla la. 38Yḭr kaw, ər hina na lula sul ne la ər ɗolɔ tɨ Ndɨla barka kar la. Ər ja gɨ bi gun ne wo tɨ Jerusalɛm na lapya a̰y tuna ɓa̰ ne sul.
A duga a si tɨ lɔr tɨ Najarɛt
39Gorne Jesu na bi tɨ ər twila tong mum gun ne Baali gṵ hul taam gɨna, a duga a si tɨ a lɔr hul tɨ Najarɛt, nəgri sul tɨ Galile. 40Ɓa̰ ne toni la o̰ ɗəng la. Ər na jicina dɨbla la Ndɨla jul mu tɨ ər sul la.
Jesu si tɨ Ndɨla li hul na an dɔkɔmɛ kar sap
41Jesu na bi tɨ ər twila si tɨ Jerusalɛm na an sul tɨ Juyb-a na pya̰ tɨ Pak kar, tɨ a ho̰ni jani tɨ pya̰ ne Juyb-a wag na tɨ Ejipt. 42Gorne Jesu na an dɔkɔmɛ kar sap gɨna, a si na ər tɨ Jerusalɛm kuna uri tɨ pya̰ kar ja no̰. 43Gorne pya̰ kar tong teni gɨna, a so ul tɨ duga, lɛ Jesu gə̰y tɨ Jerusalɛm. Ər ba a na ər na̰ a una lo. 44A ilgɨ ɓə ər gə̰y na a peer tɨ ɓoy saal. A ka ɗa̰y ɓudu tɨ ul barita a ɗolɔ tɨ ər taam tɨ a peer nimni la tɨ a peer korgɨ daan, 45lɛ a ten ər lo. A taam ər tɨ ul sul a duga na tɨ Jerusalɛm. 46Na ɗa̰y tɨ tedi hul tɨ plaa jo, a ten ər tɨ Ndɨla li hul, ər ti tɨ lɔr tɨ bi tɨ gṵ hul kya̰ daan. Ər wo a jaa laa la, ər wo a jaa ɓiri la. 47Bi gun ne laa ər jaa ɓɔr a ji tuna ər ul mu tɨ ilgɨ sul la ər jaa tɨ duga sul la. Gorne ər bi tɨ twila ləg ər tɨ bi ne daan gɨna, ɓɔr a ji, la ər na̰ ja gɨ ər ɓə: 48«Ən ɓa̰, kəyja əm ka gɨ i wa̰y ne in a, əm ləg, əm ba la yin la i ka jindemni la i jab əm na un gun.» 49Ər ja gɨ a: «Kəyja jo yḭ jab ən a, pay yḭ una ɓə ən ɓə ən ji kay tɨ ən ba na cida lɔ lo a?» 50Lɛ a una jaa ne ər ja gɨ a ji lo. 51La ər o̰, ər si na a tɨ Najarɛt. Ər wur ər sul tɨ a lɔ. Ər na̰ ɓaw mum gun ne ka paa tɨ ər nirimu. 52Jesu toni la ər o̰ ɗəng na jicina. Ər ko Ndɨla ji la ər ko bi ji la.
Nke Ahọpụtara Ugbu A:
Luk 2: nie
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, ATALTRAB