Luk 1
1
Jaa ne wo tɨ Jaa Ndinimani ne hul jo le
1Teopil, kuna toni bi kya̰ maktub tuna mum ne ka paa tɨ ī daan. 2A kya̰ kuna bi ton lor tɨ jaa ji tɨ mum lɔ ɗula la a duga bi tɨ Ndɨla jaa beel ɗula la#1.2 Ya̰ tɨ bi ton a lor tɨ jaa ji la mɨna duga a tɨ bi tɨ ər beel ɗula la.. 3Nejo yin kaw, gorne ən jira mum ne lɔ ɓari gɨna, ən taam kya̰ na ul, ul, gɨ yim Tehopil ne əm ndil cḛy nari. 4Ən ka kuna ne ka əm una ɓə mum tɨ ɓla ne əm ten toni tɨ jaa kuri.
Malayka paa ja jaa tuna Ja̰ Batis na twila sul
5An ne Erod tɨ wa̰ay tɨ Jude, wo tɨ hima ɓina paa ndil ɓə Jakariya. Yḭr tɨ Abiya na kakur. A tɨ bi tɨ hima ɓina. Ər ii tɨ Aro̰ na nimni. Ər ndil ɓə Elijabet. 6A ji tɨ ndidi gun a tɨ bi tugla tɨ Ndɨla kwi. A oy Baali na gṵ hul na ɓari la a ka mum ne ər hul taam la. 7Lɛ a na ɓa̰ lo, kəysul Elijabet tɨ ii sawru#1.7 sawru Gen 11.30, 26.21, 29.31; Jug 13.2-3 la a tɨ hiini teni la.
8Ɗa̰y paa, Jakariya si tɨ Ndɨla kwi tɨ ər cida tɨ hima ɓina kar, kəysul ɗa̰y ne tɨ ər kakur na ɗa̰y tɨ cida kar. 9Tuna bi tɨ hima ɓina na ul tɨ cida, marɨm tɨba tɨ ər sul tɨ wur tɨ Baali na li hul tɨ gɨ ər dukan tuglu. 10Na lula sul ne a wo dukan tuglu gɨna, bi dɨbla lor tɨ bayri, a wo Ndɨla soon. 11Gɨna Baali na malayka paa wag tɨ Jakariya sul. Ər ti tɨ un ne a tugu na dukan tɨ lɨma sul. 12Gorne Jakariya ləg ər gɨna, ər sul tɨ tugla lo, kəysul ayri ɗəng kar ər. 13Lɛ malayka ja gɨ ər: «Jakariya, ka ayri kar lo, kəysul Ndɨla laa əm gṵ tɨ ər soon: Əm ii tɨ Elijabet ɓə gɨ əm ɓa̰ ɓər twila la əm ɓə ər ndil kay ɓə Ja̰. 14Ər ɓə tɨm əm wa̰y tɨ ndula laar ɗəng kar la, bi dɨbla ɓə ndula laar kar tɨ ər twila jaa la. 15Kəysul ər ɓə tɨm wo ɗəng tɨ Baali Ndɨla kwi. Ər ɓə ham yiḭ lo la ndu na ham ho̰ni yiḭ lo la. Lal ɓari ɓə lɔ ɗula tɨ na ər tɨm tɨ ər twila hul#1.15 1Roi 17.1; Nom 6.3-4; Jug 13.5. 16Ər ɓə na bi tɨ Israhel dɨbla duga tɨ a Baali tɨ Ndɨla ndɔ. 17Ər ɓə cida kar tɨ Ndɨla kwi na nebi Eli na ilgɨ la ər dwari la. Ər ɓə ɓimi-a na bəgɨ kay tɨ paa la ər ɓə bi ton oy gɨ Ndɨla lo nirimu yɛr, ka a ilgɨ kuna bi tugla no̰ la. Nejo, ər ɓə bi nirimu yɛr ɓari gɨ Baali.» 18Lɛ Jakariya ja gɨ malayka ɓə: «Kəy wa̰y jo ɓə gɨ ən ɓla ɓə əm jaa tɨ kuri a? Kəysul yin tɨ wo hiini teni la ən ii kaw an tɨ dɨbla teni la.» 19La malayka duga gɨ ər: «Yin tɨ Gabriyel#1.19 Gabriyel tɨ malayka ne ka cida tɨ Ndɨla kwi., ən lor tɨ Ndɨla kwi tɨ ər gṵ hul kar, ər toon ən tɨ gɨ əm ja jaa la, tɨ gɨ əm Beel Ndinimani ɗula la.» 20Əm laa ɓari, əm mu ɓə ɓogɨ, la əm ɓə jaa ja lo marway ɗa̰y ne mum ne ɓə paa kar, kəysul əm ko jaa ne ən ja gɨ əm hul lo. Kuri mum ne ən ja gɨ əm ɓə an gorne a lula sul ɓə lɛm.
21Lula sul ɗay, bi a̰y Jakariya la ɓɔr a ji la, kəysul ər mu tḭ nari tɨ Ndɨla li hul. 22Lɛ gorne ər wag, ər lɛm gɨ a ja jaa lo, la bi una ɓə ər ləg wa̰y paa tɨ Ndɨla li hul. Lɛ yḭr gɨna, ər ja gɨ a jaa na ər daa kəysul ər mu ɓogɨ. 23Gorne Jakariya tong ər ɗa̰y tɨ cida kar gɨna, ər duga tɨ gə̰y. 24Lɔ tɨ plaa, ər ii tɨ Elijabet yen ɓa̰, ər wal ər ndɔ pya̰ tɨ luni, la ər ja ɓə: 25«Nejo tɨ wa̰y ne Baali ka gɨ ən: Ər so ər hul na ɗa̰y ne tɨ kaar jul tɨ ən sul tɨ bi kwi.»
Malayka ja jaa tuna Jesu na twila sul
26Na pya̰ tɨ taar hul tɨ Elijabet na ɓa̰ yina bəgri, Ndɨla toon ər malayka ne ndil ɓə Gabriyel tɨ nəgri sul tɨ Galile, tɨ lɔr ɗəng ne ndil ɓə Najarɛt, 27tɨ ɓa̰ ii ne ɓər paa ndil ɓə Josep caw ər ndɔ. Yḭr tɨ Dabid na kalɔ, ɓa̰ ii ne Ndil ɓə Mari. 28Baali Ndɨla na malayka wur tɨ ər maan la ər jaa gɨ ər: «Ka əm ndula laar əm! Ndɨla ka gɨ əm ɓari, ər ti na əm.» 29Jaa ne ɓɔr Mari ji nari la ər ɓiri ər ndɔ tuna lapya ne ər ka gɨ ər le sul. 30Ndɨla na malayka ja gɨ ər: «Mari, ka ayri kar lo, kəysul Ndɨla ka gɨ əm ɓari nari. 31Ndogle, əm ɓə ɓa̰ yina la əm ɓə ɓa̰ ɓər twila la. Əm ɓə ər ndil kay ɓə Jesu. 32Ər ɓə tɨm wo ɗəng la a ɓə ər soon Ndɨla baw ɗəng na ɓa̰ la. Baali tɨ Ndɨla ɓə gɨ ər ka tɨ Dabid na waan naa. 33Ər ɓə waan lɨma tɨ bi tɨ Israhel sul la, ər waan mu ɓə tong lo.» 34Mari ja gɨ Ndɨla na malayka ɓə: «Wa̰y ne ɓə an waa waa a, kəysul ən una ɓər lo ɗang.» 35Ndɨla na malayka ja gɨ ər: «Ndɨla na Lal wo jir tɨ əm sul la Ndɨla baw na dwari ɓə əm kubgɨ kuna lal la. Nejo a ɓə ɓa̰ ne əm ɓə twila soon wo ndeeri tɨ Ndɨla maan la Ndɨla na ɓa̰ la. 36Əm paa nimni tɨ Elijabet ne tɨ wo hiini, wo ər ɗa̰y tɨ ɓa̰ twila a̰y la. Yḭr ne a soon ər ii sawru, ər yen ɓa̰ ka pya̰ tɨ taar teni. 37Kəysul wa̰y ne ɓə Ndɨla dwari ura teni.» 38Gɨna Mari ja: «Yin tɨ Baali na wo tɨ cida kar, ka wa̰y ne əm ja kum an tɨ ən sul.» La Ndɨla na malayka nɨm ər la.
Mari si tɨ Elijabet maan
39Na ɗa̰y tɨ pla, Mari so ul, ər si sandaw tɨ lorgɨ ton ti tɨ lɔr nəgri sul tɨ Jude. 40Gorne ər an gɨna, ər wur tɨ Jakariya na jal hul la ər ka gɨ Elijabet lapya. 41Gorne Elijabet laa Mari na lapya tɨ kar gɨna, ɓa̰ ne wo tɨ ər hul dig ndɔ. Ndɨla na lal sir ər hul 42ər ka ngɔr tɨ ndal ɓə: «Ka Ndɨla jul mu tɨ əm sul ura aa gun la, ər mu jul ley tɨ ɓa̰ ne wo əm hul sul la! 43Yin wag ən maan kəy ta ən Baali na na̰ hina tɨ ən maan a? 44Kəysul, əm ləg, gorne ən laa əm lapya tɨ kar gɨna, ɓa̰ ne wo tɨ ən hul dig na ndula laar la. 45Ndula laar ɗəng gɨ əm kəysul əm ko hul ɓə wa̰y ne Baali ja gɨ əm ɓə an!»
Mari na kwan
46Gɨna Mari ja ɓə:
«Ən wur taan na ən ndula ya̰m gun tɨ Ndɨla sul,
47La ndula laar sir ən ilgɨ ən Baali wo tɨ ən nin jaa
48kəysul ər ɗo ər ji tɨ yin, ər wo tɨ cida kar na hormo̰ sul.
M, ndogle marway tɨ kwi, bi gun ɓə gɨ ən ja ɓə, ndula laar tɨ ən maan,
49Kəysul Ndɨla wo tɨ dwari ɗəng ka gɨ ən mum ne ɓɔrji dɨbla.
Yḭr tɨ Ndɨla ne ər ndeeri gun,
50ər ka ɓari na lula sul
gɨ bi ne oy gɨ ər.
51Ər ɓla ər dwari na mum gun ne ər ka.
Ər bra bi ton ilgɨ ɓə ya̰ tɨ bi nga̰.
52Ər jir woom tɨ a goblɨ tɨ waan sul
lɛ ər uma bi tɨ hormo̰ kar tɨ ndal.
53Ər naa gɨ bi tɨ ndula mum tɨ tina dɨbla lɛ,
bi tɨ wani gɨna, ər kun a daa bla.
la ər huma bi tɨ hormo̰ tɨ ndal la,
54Ər hina, ər yaar bi tɨ Israhel, ər bi tɨ cida kar.
Ər tori ər ɓari tɨ kar
55na Abraham-a na ər kalɔ lo yɔd
kuna ər so ər gṵ gɨ ī kəgɨ.»
56Kwan ne bəgri a, Mari ti na Elijabet na pya̰ tɨ teri hul, la ər duga ər si tɨ ər gə̰y la.
Ja̰ Batis na twila
57Lula sul an ne Elijabet ɓə ɓa̰ twila la ər toy ɓa̰ ɓər. 58Ər peer tɨ ləgɨ taal la ər peer nimni la, una ɓə Baali ka gɨ ər wa̰y ndinimani la a ka ndɔ laar na ər la. 59Na ɗa̰y maarta, a hina tɨ ɓa̰ cina ɓina. A taam gɨ ər ba na ndil tɨ Jakariya wur. 60Lɛ ər na̰ ja: «M-m a ɓə ər soon Ja̰.» 61A ja gɨ ər: «Wo in tɨ əm nimni hul na ndil ne lo!» 62Gɨna a ka a daa gɨ ər ba tɨ ɓiri pay kəy ndil jo ər taam gɨ ər ɓa̰ naa a? 63Jakariya ɓiri-a ka a naa gɨ ər baar. Gɨna, ər kya̰ wa̰y tɨ nin ɓə: «Kuri, Ja̰ tɨ ər ndil.» Ɓɔr a ji gun. 64Tɨ daamu, Jakariya na mu təng la ər teen Ndɨla la. 65Gɨna ayri ka ər peer tɨ ləgɨ taal gun, la bi ja jaa tuna wa̰y ne ka paa tɨ lwərgɨ nəgri tɨ Jude ne ti tɨ nan sul. 66Bi gun ton laa jaa ne ɗolɔ tɨ ilgɨ tɨ jaa ne sul. A ɓiri a ndɔ ɓə: «Ɓa̰ ne ɓə kəyjo wag a?» Kəysul Baali na dwari ti na ər.
Jakariya na kwan
67Ndɨla na Lal ti na Jakariya, ɓa̰ ba. Ər ɗolɔ tɨ ja jaa kuna Nebi. Ər ja ɓə:
68«Ka yi teen Baali, Ndɨla tɨ Israhel maan,
kəysul ər hina ər bi yaar la a nɨm tɨ ndal la.
69Ər naa gɨ ī wo tɨ ī nina ne na dwari ɗəng
tɨ wa̰ay Dabid, ər wo tɨ cida kar nimni hul.
70Nejo tɨ jaa ne ər ja toni ɓagcagri
na ər nebi ndeeri mu.
71Ər ha̰w ər gṵ tɨ ī jul tɨ ī peer tɨ pɛni daa la
tɨ bi gun ne koor ī daa la.
72Ər ka gɨ i kəgɨ ɓari
la ər tori ər ɛrgɨ ndeeri ne ər ka na i kəgɨ lo.
73Kəysul Ndɨla so gṵ naa gɨ ī kaa tɨ Abraham#1.73 Gen 22.16-17
74tɨ ī kula tɨ ī peer tɨ pɛni daa
la tɨ ī ul mu naa tɨ gɨ ər cida kar bla ayri la,
75ka yi ndeeri la i ti tugla la tɨ ər kwi
na ɗa̰y sul ne ɗang i ti jili#1.75 Na lula sul gun ne yi wo tɨ dunya̰..
76Lɛ yim, ən ɓa̰, a ɓə əm soon Ndɨla baw na nebi,
kəysul əm ɓə saal tɨ Baali kwi tɨ ər ul kaaw,
77la ər bi una ɓə ər hina tɨ a nina.
Nejo ər hul ɓə ɗina tɨ a ɓijim sul la.
78Tɨ Barka tɨ i Ndɨla na hul bor jo,
lula wag tɨ ndɨlasul ndeeri un tɨ i sul.»
79Ər ɓla ər ndɔ gɨ bi ton ti tɨ un ɗoyri la bi ton ti tɨ ɓejere la. Tɨ i kwi jul tɨ ul sul tɨ lapya la
80Tuna ɓa̰ sul gɨna, ər toni la, ər ti ɗəng na Ndɨla na Lal dwari. Ər ti tɨ tap hul marway barita ər ɓla ər ndɔ tɨ bayri gɨ bi tɨ Israhel-a.
Nke Ahọpụtara Ugbu A:
Luk 1: nie
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, ATALTRAB