Matfei 20
20
Arbaituspagin viinumuarjupellon ruadajih näh
1«Mittuine on Taivahallizen valdu? Kačo, ižändy lähti aijoi huondeksel palkuamah ruadajii omale viinumuarjupellole. 2Häi sobii ruadajienke yhten dinuaran päivypalkas i työndi heidy saduh. 3Läs yheksiä čuassuu häi lähti myös pihale i nägi sie miehii, kudamat seizottih joute. 4‘Mengiä työgi viinumuarjupellole’, sanoi häi heile, ‘minä maksan teile oigien palkan.’ 5I miehet lähtiettih. Läs kahtutostu čuassuu da vie läs kolmie čuassuu häi uvvessah meni pihale da myös muga ruadoi. 6Konzu häi meni pihale läs viitty čuassuu, häi nägi sie vie erähii miehii, kudamat seizottih joute, da kyzyi heil: ‘Midäbo työ seizotto tiä kaiken päivän joute?’ 7‘Ga niken ei palkannuh meidy’, vastattih hyö. Häi sanoi miehile: ‘Mengiä työgi ruadamah minun viinumuarjupellole.’ 8Konzu tuli ehty, savun ižändy sanoi ruatuttajale: ‘Kuču ruadajat da maksa heile palku, niilöile, ket tuldih jälgimäzinny, maksa enzimäzikse, a enzimäzile jälgimäzikse.’ 9Net, kudamat tuldih läs viitty čuassuu, suadih dinuaroin. 10Konzu tuldih enzimäi palkatut, hyö smietittih suaja enämbän, no hyögi suadih vai dinuaru miehen kohtah. 11Sit hyö ruvettih kurkettamah da sanottih ižändäle: 12‘Nämä jälgimäzekse tulluot ruattih vai yksi čuassu; yksikai sinä maksat heile muga kui meile, kudamat ruavoimmo räkes kaiken päivän jygiedy ruaduo.’ 13No ižändy sanoi yhtele heis: ‘Velli, enhäi minä luaji sinule viärytty; emmogo myö sobinuh dinuarua palkakse? 14Ota omat da mene. Minä tahton maksua tälle jälles tulluole muga kui sinule. 15Voinhäi minä ruadua omien eloloinke, midä tahton. Vai ongo sinul žiäli, ku minä olen hyvä heidy vaste?’ 16Nenga jälgimäzet roijah enzimäzikse, a enzimäzet jälgimäzikse.»
Iisus myös pagizou omas kuolendas
(Mark. 10:32-34; Luk. 18:31-34)
17Jerusalimah matkates Iisus kučui bokkah kahtutostu opastujua da astujes sanoi heile: 18«Myö menemmö nygöi Jerusalimah, i sie Ristikanzan Poigu annetah ylimäzien pappiloin da zakonanopastajien käzih. Hyö suuditah Händy kuolemah 19da annetah Händy vierahile rahvahile nagrettavakse, rozgitettavakse da ristah nuaglittavakse. No kolmandennu päivänny Häi nouzou kuollielois.»
Iisus da Zevedein poijat
(Mark. 10:35-45)
20Kodvazen olduu Iisusan luo tuli Zevedein poigien muamo omien poigienke, heityi polvilleh Hänen edeh da tahtoi midä lienne kyzyö. 21«Midä sinä tahtot?» kyzyi Iisus. Naine sanoi Hänele: «Uskalda minule, ku nämä minun kaksi poigua ruvettas istumah Sinun rinnal, yksi oigiel, toine hural puolel, konzu Sinä roittos suarikse.» 22Iisus vastai heile: «Työ etto ellendä, midä kyzyttö. Voittogo työ juvva sen mal՚l՚an, kudai pidäy juvva minul?» «Voimmo», sanottih hyö. 23Sit Häi sanoi heile: «Minun mal՚l՚an työ juotto, no kel istuo oigiel, kel hural puolel minus – se ei ole minun vallas. Net sijat kuulutah niilöile, kelle minun Tuatto net varusti.» 24Konzu toizet kymmene opastujua kuultih tämä, hyö suututtih velleksien piäle. 25No Iisus kučui heidy iččeh luo da sanoi: «Työ tiijättö: valdumiehet ollah rahvahien herroinnu, i suuret pietäh rahvahii omas vallas. 26Nenga ei pie olla teijän keskes. Ken teijän joukos tahtou olla suurennu, olgah se toizien kazakoiččijannu, 27i ken teijän joukos tahtou olla enzimäzenny, se olgah toizien käskyläzenny. 28Eihäi ni Ristikanzan Poigu tulluh sikse, ku Hänele sluužittas. Häi tuli iče sluužimah da andamah oman hengen, gu piästiä äijii välläle.»
Iisus parandau kahtu sogiedu
(Mark. 10:46-52; Luk. 18:35-43)
29Konzu hyö lähtiettih Jerihonaspäi, Iisusale jälles astui suuri rahvasjoukko. 30Dorogupieles istui kaksi sogiedu, i konzu hyö kuultih, Iisus astuu siiriči, hyö ruvettih kirgumah: «Žiälöiče meidy, Ižändy, Davidan Poigu!» 31Rahvas käskiettih heile vaikastuo, no hyö kirruttih vie enämbäl: «Žiälöiče meidy, Ižändy, Davidan Poigu!» 32Sit Iisus azetui, kučui heidy iččeh luo da kyzyi heil: «Midä työ tahtotto? Midä minä teile luadizin?» 33Hyö vastattih: «Ižändy, anna meile silmät.» 34Iisusale rodih heidy žiäli. Häi kosketti heijän silmii, i hyö kerras ruvettih nägemäh. Sit hyö lähtiettih Hänele jälles.
Nke Ahọpụtara Ugbu A:
Matfei 20: LIVVI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
(c) Biblienkiännändyinstituuttu, Helsinki 2003