Evvan 6
6
Isõs poorat vittdohat ooumžed
1Mâŋŋa tõʹst Isõs mõõni Galilea leʹbe Tiberiaazz jääuʹr tunbeälla. 2Suu viõǥǥte jiânnai oummu, kook leʹjje vuäinnam suu õõmâstuâjaid, ko son pueʹrii puõʒʒjid. 3Isõs kuärŋai värra da iišti tåk mättʼtõspäärneesvuiʹm. 4Juudlažniiʹǩǩi eʹjjpeeiʹvprääʹzneǩ leäi sami ââlda.
5Ko Isõs ǩiʹcsti, son vuõiʹni, što jiânnai oummu puäʹtte suu årra. Son cieʹlǩi Iʹllpa: «Koʹst vuäitčep vuäʹstted porrmõõžž pukid täiʹd oummid?» 6Son kõõjji tõn pâi Iʹllep ǩiččlõddâm diõtt. Son kâʹl tiõʹđi, mâiʹd tuejjeʹči. 7Iʹllep vaʹsttii suʹnne: «Håʹt vuästčep leeiʹb kuõiʹtin čuõʹđin denaarin, ij tõʹst faattče ni jueʹǩǩkeʹžže håʹt siõm kooskaž.» 8De nuʹbb suu mättʼtõspäärnain, Andreas Pietar villj, cieʹlǩi Isõʹsse: 9«Tääiʹben lij Päʹrnn, ǩeäʹst liâ vitt leeiʹb da kuõʹhtt kueʹl, leša mõõk tõk liâ nääiʹt jiânnʼjõʹsse?» 10«Päkkad oummid išttâd maddu», Isõs cieʹlǩi. Nuʹt vittdohat ooumžed iʹštte maddu, koʹst šõõddi jiânnai rääʹss. Tâʹl åumma, kook leʹjje nuʹt vittdohat, luâšttõʹtte maddu.
11Isõs vaaʹldi leeiʹbid, späʹssbõõžži Vuâsppååʹd da juõʹjji åummaid tõiʹd; seämma kuõʹlid, da puk vuåǯǯu poorrâd nuʹt jiânnai ko vuõiʹtte. 12Ko puk leʹjje kââllas poorrâm, Isõs cieʹlǩi mättʼtõspäärnees: «Noorrâd, mõõk liâ kuâđđjam, što ij ni mii mõõnče tuʹššen.» 13Sij tuejjee nuʹt, da tõiʹn, mõõk leʹjje kuâđđjam poorkâni vittân leeiʹbest, noʹrre kuâtmlo tiudd čuʹǩǩed.
14Ko oummu vuõiʹnne tõn õõmâstuâj, sij cieʹlǩǩe: «Tõt lij tuõđi tõt profeʹtt, koon pueʹttem lij vuõrddum maaiʹlme.» 15Isõs tiõʹđi, što oummu juʹrdde pâiʹlviõǥǥ raajjâd suʹst koonǥõõzz, son ǩeässõõđi meädda värra jiõččines.
Isõs väʒʒ čääʹʒʒ mieʹldd
16Leša ko jeäʹǩǩääž šõõddi, mõʹnne suu mättʼtõspäärna vuâlas jäuʹrr-riddu, 17mõʹnne võnnsa da sollee rââst jääuʹr Kapernauʹmme. Jeäʹǩǩääž seuʹnnjni ij-ǥa Isõs veâl leämma puättam sij årra. 18Šõõddi kõrr piõgg da kaaggi jõnn parruid. 19Ko leʹjje suukkâm nuʹt vitt ǩilomettred, vuõiʹnne mättʼtõspäärna Isõõzz väʹʒʒem čääʹʒʒ âʹlnn da pueʹttem ââlda võnnâz. Sij suõrggne. 20Leša Isõs cieʹlǩi: «Jeäʹlled põllu, mon-i leäm.» 21Sij juʹrdde väʹldded suu võnnsa, leša võõnâs pueʹđi juʹn tõn riddu, koozz sij leʹjje jååʹttmen.
Oummu åʹcce Isõõzz
22Nuuʹbb peeiʹv oummu, kook leʹjje kuâđđjam jääuʹr tun peälla, hoʹhssje, što mättʼtõspäärna leʹjje vuâlggam võnnsin, da tõn reeddast iʹlleäm teäʹnab võõnâs, da što Isõs iʹlleäm mõõnnâm tõõi võnnsa. 23Tiberiaazzâst puõʹtte jeeʹres võnnâz ââlda tõn pääiʹǩ, koʹst oummu leʹjje poorrâm Šuur bloouslõõvvâm leeiʹbid. 24Ko oummu vuõiʹnne, što Isõs da suu mättʼtõspäärna jeäʹleämma tåʹben, sij mõʹnne võnnsid da maʹcce Kapernauʹmme ooccâd Isõõzz.
Jieʹllem leiʹbb
25Sij kauʹnne Isõõzz jääuʹr nuuʹbb peäʹlnn da kõʹčče: «Uʹčteeʹl, kuäʹss puõʹttiǩ tiiʹǩ?» 26Isõs vaʹsttii: «Tuõđi, tuõđi mon ceälkam tiʹjjid: tij jeäʹped ooʒʒ muu tõn diõtt, što leäʹped vuäinnam õõmâstuâjaid. Tij pueʹttveʹted muu mieʹldd tõn diõtt, ko vuäǯǯaid poorrâd kââllas. 27Jeäʹlled kuõzztõllu leeiʹb, kååʹtt läppai, pâi tõn leeiʹb, kååʹtt peštt âʹǩǩpâjjsaž jieʹllma. Oummu Päʹrnn oudd tõn tiʹjjid, ko Eʹčč Vuâsppåʹd lij ouddam tõõzz suʹnne vääʹld.»
28«Muʹvddem tuâjaid Vuâsppåʹd meeʹst vuârdd?», sij kõʹčče. 29«Vuâsppåʹd vuârdd, što tij åskkveʹted suu, koon Vuâsppåʹd lij vuõlttääm», Isõs vaʹsttii. 30«Muʹvddem õõmâstuâj tuejjääk, što mij vuäinčep tuu?», sij kõʹčče. «Mâiʹd joordak tuejjeed? 31Mij maaddârääʹjj poʹrre poostaijânnmest manna, mäʹhtt juʹn Pââʹss ǩeeʹrjest cieʹlǩet; Vuâsppåʹd uuʹdi siʹjjid ââʹlmest leeiʹb poorrâm diõtt.» 32«Ceälkam tiʹjjid», Isõs vaʹsttii, «Moʹssai ij ouddam tiʹjjid ââlmlaž leeiʹb, pâi muu Eččam oudd tiʹjjid tuõđi ââlmlaž leeiʹb. 33Vuâsppååʹd leiʹbb lij son, kååʹtt puätt vuâlas ââʹlmest da oudd maaiʹlme jieʹllem.»
34«Šurr, uuʹd miʹjjid pâi tõn leeiʹb», sij cieʹlǩǩe. 35Isõs cieʹlǩi: «Mon leäm jieʹllem leiʹbb: kååʹtt puätt muu årra, ij ni kuäʹss vueiʹn nieʹlj, da kååʹtt muu åskk, ij ni kuäʹss juǥstõõv. 36Leša mäʹhtt juʹn leäm ceälkkam tiʹjjid: tij leäʹped vuäinnam muu, jeäʹped-ǥa seâža ååsk muu. 37Jueʹǩǩkaž, koon Eččam muʹnne oudd, puätt muu årrsan, jiõm-ǥa jåårǥlââʹtt meädda ni ǩeän, kååʹtt årrsan puätt. 38Jiõm mon puättam ââʹlmest tuejjeed mâiʹd jiõčč täättam, pâi suu täätt, kååʹtt lij muu vuõlttääm. 39Son tätt, što jiõm mõõnteʹčče ni õõut tõiʹn, koiʹd son lij muʹnne ouddam, pâi coounčem siʹjjid mââimõs peeiʹv. 40Eččam tätt, što jueʹǩǩkast, kååʹtt vuäinn Pääʹrn da åskk suu, lij âʹǩǩpâjjsaž jieʹllem, da mon coounam suu mââimõs peeiʹv.»
41Juudlažneeʹǩǩ aʹlǧǧe päʹnneed Isõõzz vuâstta, ko son cieʹlǩi: «Mon leäm leiʹbb, kååʹtt lij puättam ââʹlmest vuâlas». 42Sij cieʹlǩǩe: «Ij-ǥo tät leäkku Isõs Jooʹsef päʹrnn, koon eeʹjj da jieʹnn mij tobddâp? Mäʹhtt son vuäitt ceäʹlǩǩed, što lij puättam ââʹlmest?» 43Isõs vaʹsttii: «Jeäʹlled päʹnnuku. 44Ij ni ǩii vueiʹt pueʹtted muu årrsan, ko ij Eččam, kååʹtt lij muu vuõlttääm, ǩieʹzzʼže suu. Tõt, kååʹtt puätt, suu mon coounam mââimõs peeiʹv.
45Profeeʹtti ǩeeʹrjtõõzzin lij ǩeeʹrjtum: ’Vuâsppåʹd mättat pukid siʹjjid.’ Jueʹǩǩkaž, kååʹtt kooll Eeʹjj da mättai suʹst, puätt muu årrsan. 46Ij nuʹt, što ni ǩii leʹčče vuäinnam Eeʹjj; õhttu Päʹrnn, kååʹtt lij puättam Vuâsppååʹd åʹrnn, lij vuäinnam Eeʹjj. 47Tuõđi, tuõđi ceälkam tiʹjjid: kååʹtt åskk, vuäǯǯ âʹǩǩpâjjsaž jieʹllem. 48Mon leäm jieʹllem leiʹbb. 49Tij eeʹjjediʹʒʒe poʹrre poostaijânnmest manna da tõn diõtt liâ jäämmam. 50A ǥo ǩii-ne påårr tän ââʹlmest puättam leeiʹb, son ij ni kuäʹss jääʹm. 51Mon leäm ââʹlmest puättam jieʹllem leiʹbb. Tõt, kååʹtt påårr tän leiʹbb, jeäll âʹǩǩpââjas. Jieʹllem leiʹbb, koon mon ooudam, lij muu råʹpp. Mon ooudam tõn, što maaiʹlm vuäǯǯči jieʹlled.»
52Juudlažneeʹǩǩ aʹlǧǧe reeidčõõttâd kõskkneez: «Mäʹhtt son vuäitt uʹvdded rååʹppes miʹjjid poorrâm diõtt?» 53Isõs cieʹlǩi: «Mon ceälkam tiʹjjid: jõs jeäʹped poor Oummu Pääʹrn vueʹǯǯ da juuǥǥ suu võõr, tij jeäʹped vueiʹt jieʹlled. 54Tõt, kååʹtt påårr muu vueʹǯǯ da jookk muu võõr, vuäǯǯ âʹǩǩpâjjsaž jieʹllem. Mon coounam suu mââimõs peeiʹv. 55Muu råʹpp lij tuõđi porrmõš da muu võrr lij tuõđi juukkmõš. 56Kååʹtt påårr muu vueʹǯǯ da jookk muu võõr, pââšš muʹst da mon suʹst. 57Eʹčč, kååʹtt jeäll, lij muu vuõlttääm, da suʹst mon še leäm vuäǯǯam jieʹllem. Nuʹt še tõt, kååʹtt påårr muu, jeäll âʹǩǩpââjas. 58Tät lij tõt leiʹbb, kååʹtt lij puättam ââʹlmest. Tõt lij nuuʹbbnallšem ko leiʹbb, mõõn tij eeʹjjediʹʒʒe poʹrre vieʹltkâni jääʹmmem. Kååʹtt påårr tän leeiʹb, jeäll âʹǩǩpââjas.»
Âʹǩǩpâjjsa jieʹllem sääʹn
59Nääiʹt Isõs säärnai ko mättʼti Kapernaaum synagogast. 60Määŋgas suu mättʼtõspäärnain cieʹlǩǩe, täiʹd saaʹnid ko kuʹlle: «Tät lij čuuʹt kõrr maainâs.» 61Isõs tiõʹđi, što mättʼtõspäärna päʹnnee suu mainnâz diõtt, da kõõjji: «Čuõʒʒat-a tät tiʹjjid? 62Na ko mâka vueiʹnnveʹted Oummu Pääʹrn pâjjnem mååusat tåk, koʹst son leäi ouddâl? 63Jiõgg rääjj jieʹllʼjen, oummu jurddjin iʹlla ni mii aauʹǩid. Sääʹn, koiʹd sarnnum tiʹjjid, liâ Jiõgg da jieʹllem. 64Leša tij jooukâst liâ måtam, kook jiâ ååsk.» Isõs tiõʹđi aalǥâst juʹn, ǩeäk jiâ åskkam da ǩii suu ooudči õõlmâs. 65Son jueʹtǩi: «Tõn diõtt ceälkam mon še tiʹjjid, što ij ni ǩii vueiʹt pueʹtted muu årra muđoiǥo Eččan täättast.» 66Tõn diõtt måtam Isõõzz mättʼtõspäärnain vuõʹlǧǧe meädda jiâ-ǥa teäʹnab jååttam suu mieʹldd. 67«Tättveʹted-a tij še mõõnnâd meädda?», Isõs kõõjji tõn kuâtmlåkksest. 68Semman Pietar vaʹsttii suʹnne: «Šurr, ǩeän årra mij vuäitčep mõõnnâd? Tuʹst liâ âʹǩǩpâjjsaž jieʹllem sääʹn. 69Mij åskkap da tieʹttep, što ton leäk Vuâsppååʹd Pââʹss.» 70Isõs vaʹsttii: «Mon vaʹlljeem tij kuâtmlåkkaz, da tõn diõtt õhtt teeʹst lij piârgglõk.» 71Isõs säärnai Juudaazzâst, Semman Iskariot pääʹrnest. Håʹt-i tät še kuuli tõn kuâtmlåkkaz jouʹǩǩe, son ääiǥai uʹvdded Isõõzz õlmmsa.
Nke Ahọpụtara Ugbu A:
Evvan 6: SKOLT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Lää´dd Pipliaseä´rvv; Suomen Pipliaseura; Finnish Bible Society 1988