Evvan 5
5
Isõs pueʹrad Beetsata läädd åʹrnn
1Mâŋŋa tõʹst Isõs mõõni Jerusaaʹlma måtam juudlažniiʹǩǩi prääʹznka. 2Jerusaaʹlmest lij Sauʒʒuustõõǥǥ luʹnn lädd, koon hebreaǩiõllsaž nõmm lij Beetsata, di tõn kuâŋŋsest liâ vitt väʹʒʒemčuõkku, kooi peällsin liâ pääʹʒʒelm. 3Päʹʒlmi kuâŋŋsin lieʹšše jiânnai puõʒʒi, čââʹlmteeʹm, rääʹmb da viõmmšõõvvâm oummu, kook vuõʹrdde čääʹʒʒ likkâm. 4Aaiʹji mieʹldd luâšttõõđi vuäinak aʹŋǧǧel vuâlas laddu da joorti čääʹʒʒ. Mâŋŋa čääʹʒʒ joorteeʹmest kååʹtt vuõssmõssân lauʹǩǩii tõzz, son šõõddi tiõrvâs, puõʒʒi-ba muʹvddem kõõv täättas.
5Da tåʹben leäi ååum, kååʹtt leäi puõccâm kolmmlokääuʹc eeʹǩǩed. 6Ko Isõs vuõiʹni suu liâššâm da tiõʹđi suu, što son leäi puõccâm juʹn kuuʹǩǩ ääiʹj, cieʹlǩi son suʹnne: «Täättak-a puârrned?» 7Puõcci vaʹsttii suʹnne: «Šurr, muʹst iʹlla ni ǩii, kååʹtt viiǥǥči muu laddu, ko čääʹcc lij koolǥtum, da mon ǥo leäm mõõnnmen, lauʹǩǩad nuʹbb tõõzz ooudbeäʹlnn muʹst.» 8Isõs cieʹlǩi suʹnne: «Kaggõõđ, vääʹld assjääd da väʹʒʒel.» 9Ååum tâʹles puârrni, ǩiõzzi assjees da aaʹlji väʹʒʒed. Leša tõt leäi pâʹsspeiʹvv.
10Tõn diõtt juudlažneeʹǩǩ cieʹlǩǩe pueʹruum ooumže: «Ååʹn lij pâʹsspeiʹvv, ij tuʹst leäkku lååʹpp kueʹdded assjääd.» 11Son vaʹsttii siʹjjid: «Leša tõt, kååʹtt pueʹrii muu, cieʹlǩi: ’Vääʹld assjääd da väʹʒʒel’.» 12Sij kõʹčče suʹst: «Ǩii lij tõt ååum, kååʹtt cieʹlǩi tuʹnne: ’Vääʹld assjääd da väʹʒʒel’?» 13Leša puârrnam ååum ij teâttam, ǩii tõt leäi, tõnt ko Isõs leäi vuâlggam, ko tõʹst leäi jiânnai narod. 14Mâŋŋa tõʹst Isõs vuõiʹni suu ceerkvest da cieʹlǩi suʹnne: «Ǩiõčč, ton leäk puârrnammaž; jeäʹl teäʹnab rieʹǩǩ tuõjju, što ij tuʹnne mii-ne veâl hueʹnben šõõddče.» 15De ååum mõõni meädda da cieʹlǩi juudlažniiʹǩǩid, što Isõs leäi suu pueʹrääm.
Vuâsppååʹd Pääʹrn viõkk
16Da tõn diõtt juudlažneeʹǩǩ aʹlǧǧe vâjjeed Isõõzz, ko son pueʹrii pâʹsspeeiʹv. 17Leša Isõs cieʹlǩi siʹjjid: «Muu Eʹčč tuejjad pâi tuâj, da nuʹt še mon tuejjääm.» 18Tõn diõtt juudlažneeʹǩǩ veâl jeäʹnab viõǥǥtõʹlle suu kåʹddem diõtt, ko son ij pâi kååʹmtam pâʹsspeeiʹv, leša še Vuâsppååʹd cieʹlǩi jiijjâs Eʹččen da nuʹt raaji jiijjâs Vuâsppååʹden. 19De Isõs vaʹsttii da cieʹlǩi siʹjjid: «Mon ceälkam tiʹjjid, što Päʹrnn ij vueiʹt ni mâiʹd tuejjeed jiijjâs täättast, pâi tõn, mõõn son vuäinn, što mâiʹd Eʹččes tuejjad. Mâiʹd Eʹččes tuejjad, tõn Päʹrnn še tuejjad. 20Eʹčč rääʹǩǩast Pääʹrn da čuäʹjat suʹnne puk, mâiʹd son jiõčč tuejjad. Son čuäʹjat Pärnnses veâl šoorbid tuâjaid, koiʹd tij vuäǯǯveʹted õõmtõõššâd. 21Seämmanalla ko Eʹčč cåunn jaaʹmjid da rääjj jieʹllʼjen, de nuʹt še Päʹrnn rääjj jieʹllʼjen, ǩeäiʹd son tätt. 22Eʹčč ij suud ni ǩeän, son lij ouddam puk suudâmvääʹld Pärnnses, 23što puk ciʹsttjeʹčče Pääʹrn seämmanalla, ko sij ciʹsttje Eeʹjj. Kååʹtt ij ciʹstte Pääʹrn ij ciʹstte ni Eeʹjj, kååʹtt lij suu vuõlttääm.
24Mon ceälkam tiʹjjid, što tõt, kååʹtt kooll muu saaʹnään da åskk suu, kååʹtt lij muu vuõlttääm, vuäǯǯ âʹǩǩpâjjsaž jieʹllem. Suu jeät suudu, pâi son lij piâssâm jaaʹmmjest jieʹllma. 25Tuõđi, tuõđi mon ceälkam tiʹjjid, što puätt äiʹǧǧ da lij juʹn puättam, kuäʹss jaaʹmi koʹlle Vuâsppååʹd Pääʹrn jiõn, da kook tõn koʹlle, vuäǯǯa jieʹlled. 26Eʹčč lij ouddam Pärnna seämma jieʹllemuʹvddi viõǥǥ, mii suʹst jijstes lij. 27Son lij ouddam Pärnna suudâmvääʹld, ko tät lij Oummu Päʹrnn. 28Jeäʹlled õõmtõššu: puätt veâl podd, kuäʹss puk jaaʹmi, kook liâ aauʹdin, koʹlle suu jiõnâs. 29Siʹjjid coounât, da sij puäʹtte åålǥas, tõk, kook liâ tuejjääm pueʹr, vuäǯǯa jieʹlled, leša tõk, kook liâ tuejjääm ǩeähn, jåuʹdde suud vuâlla.
Isõõzz tuõđšteei
30Jiõm mon vueiʹt tuejjeed ni mâiʹd jiõččan täättast. Mon suudam tõn mieʹldd, mäʹhtt Eččam ceälkk. Tõk liâ vuõiggâd, ko mon jiõm tuejjad jiõččan täätt mieʹldd, pâi suu täätt mieʹldd, kååʹtt lij muu vuõlttääm. 31Jõs mon jiõčč tuõđštam jiõččan peäʹlnn, ij muu tuõđštõs tuõʹlle. 32Leša muu peäʹlnn lij nuʹbb, da teâđam, što suu tuõđštõs lij tuõʹllʼjeei. 33Tij vuõltteem oummu jiõʹlle kuullmen Evvan, da son tuõđšti tuõđšvuõđâst. 34Jiõm mon taarbâž ni ǩeän tuõđštõõzz, leša ceälkam tän, što tij vuäitčid vuäǯǯad kaʹjjõõzz. 35Evvan leäi mâʹte čuõvvânji puõʹlli läämpa, koon čuõvâst tij täättaid pâi occnja ääiʹj vuässõõttâd. 36Leša muʹst lij jijstan ravvsab tuõđštõs ko Evvnest. Tuâj, mâiʹd Eʹčč lij ouddam muʹnne tuejjeem diõtt, tuõđšte, što Eʹčč lij muu vuõlttääm. 37Seämmanalla še Eʹčč, kååʹtt lij muu vuõlttääm, tuõđašt muu peäʹlest. Tij jeäʹped leäkku ni kuäʹss kuullâm suu jiõn, jeäʹped-ǥa vuäinnam suu muâđaid. 38Suu sääʹn tij jeäʹped vääʹld vuâstta, ko tij jeäʹped ååsk suu, koon Eʹčč lij vuõlttääm.
39Tij tuʹtǩǩeʹped Pââʹss ǩeeʹrj ǩeeʹrjtõõzzid da juʹrddveʹted, što kaunnveʹted tõin âʹǩǩpâjjsaž jieʹllem, da sami tõk tuõđšte muʹst. 40Tij jeäʹped täätt pueʹtted muu årra, što vuäǯǯčid jieʹllem. 41Jiõm mon ooʒʒ oummi späʹssebvuõđ. 42Toobdam seâža tiʹjjid: tij jeäʹped rääʹǩǩest Vuâsppååʹd. 43Mon leäm puättam Eččan nõõmâst, leša tij jeäʹped vääʹld muu vuâstta; ko mâka ǩii-ne nuʹbb puätt jiijjâs nõõmâst, suu tij kâʹl väʹlddveʹted vuâstta. 44Mäʹhtt tij vuäitčid åskkad, ko väʹlddveʹted ciist kueiʹmm kueiʹmsteed, leša jeäʹped ooʒʒ tõn ciist, kååʹtt puätt pâi Vuâsppååʹdest.
45Jeäʹlled jurddu, što mon tiʹjjid viârtam Eeʹjj ooudâst. Tij viârteei lij Moʹssai, ǩeäzz leäʹped naʹddjõõttâm. 46Ko mâka tij leeiʹd åskkad Moʹssja, leeiʹd åskkad muʹnne še, tõn diõtt, što sami muʹst son lij ǩeeʹrjtam. 47Leša ko jeäʹped ååsk suu ǩeeʹrjtõõzzid, mäʹhtt vuäitčid åskkad muu saaʹnään?»
Nke Ahọpụtara Ugbu A:
Evvan 5: SKOLT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Lää´dd Pipliaseä´rvv; Suomen Pipliaseura; Finnish Bible Society 1988