maṯa 26
26
asa 26
ḏikaiya ḏeḏi ɽinyɩḏa yecuŋ
mks. 14:1-2, lk. 22:1-2
1gwune na yecu ṯɩmi ŋuɽuna ŋeno wei nuuməḏɩjo calɩmis juŋun nuleicɩno, 2nyalilɩŋiḏi na ḏa ŋwamon ŋwɩmete ŋwɩttən gɩmuri gaje ge ḏouwɩrico, na ŋaɽe ŋeḏi liji ŋəḏəḏini alɽinye gi luɽi lun lɩmalɩḏo ganu.
3na kaja kono na jɩsis jun jɩbuḏo na liji lun luɽun aɽuwaḏa ldu gi ḏɩgaɽa ganu ḏeḏi gwele gweḏi jɩsis gwun gwan kaiyaba, 4naluməḏəṯe laginŋu nalnyinyiməḏeice yecuŋ nalarno gwalməṯo alɽiye; 5nalmɩni arno, gwate gwilməṯo gi lamon leḏi gimuɽi no, i liji lar lijɩnwɩrlani ganu.
gwa gwuwɩrṯi yecuŋ yila ye beṯiniya
mks. 14:3-9, ywn. 12:1-8
6gwune na yecu je beṯiniya kwu dunu gweḏi simian gwun gwiṯi ŋilo, 7na gwa gwete wila nuapa lɩbi lun lɩkədɩnu gowe ge, ləṯi ŋila ŋun ŋiro ŋɩḏini ŋun ŋutu jilɩnya, nuldoije gi lɽa elo luŋun gwune nuje gi ḏiṯa. 8na gwune na calɩmis juŋun aŋu nalɽe ganu nalarno, gwudaro gəko na ŋila keḏe ga dino? 9gi gwune ŋəṯi ŋɩma ŋiḏɩlini ŋila ŋeno əlŋɩrucə yutu yilḏəḏə liji lun late ləṯi ŋɩdio no. 10gwune na yecu lɩŋe nuleicɩno, gwudaro gəko nanyaɽi gwa ganu? gwinyiəpijo ŋɩru ŋiŋir; 11gi gwune liji lun late ləṯi ŋɩdio no laṯanyalije bubruṯ, namɩni nyi ilate laṯɩje lagalo bubruṯ no. 12ḏa minyidoije ŋila ŋeno ŋiro ŋɩḏini kaŋɩnu yinyi ŋugelu ŋan ḏɩkwumo ḏinyi. 13gwerkwe ganu nyi gweiceijɩno, kalo wei geḏi gɩḏilio gun gaṯɩje gan liji umə ŋuɽuna ŋeno ŋiŋir ŋeḏi elo, nalumə dino ŋuɽuna ŋeno ŋɩmal gwa ape, naṯɩl liji aḏɩŋane.
ŋuɽun ŋun ŋɩki ŋeḏi yauḏa
mks. 14:10-11, lk. 22:3-6
14na gwete gweḏi calɩmis jun jiɽo di na gwuttən, gwun gwan yauḏa iskariyuṯi nuwele gi jɩsis jun jɩbuḏo 15nuleicɩno, nyaliḏəḏə aŋe kani ŋwajiḏəḏə? nalḏəḏə əlgiɽucə ŋiro gi kaiyari ḏuji ṯəɽɩl, 16na uro kaja kono nubunyi lamon lun liŋiɽ gwaliḏəḏə.
ḏiṯa gia ḏun ḏiro gɩdo ḏeḏi yecu
mks. 14:12-26, lk. 22:7-23, ywn. 13:21-30, 1 kur. 11:23-25
17na gi lamon lun liro lɽa leḏi gimuɽi geḏi gia gun gaicɩwa, na calɩmis wila ḏi yecu naleicɩno, ŋa gwaɽno laŋagico gala ga ka ge ḏiṯa ŋɩḏio ŋeḏi gimuɽi ge ḏouwɩrico? 18nuleicɩno, wiḏɩl kamɩrɩgen kwiji gwədi nyeicɩno, mualɩm gwarno, gaja ginyi go gɩṯo, anar naʼe ŋɩḏio ŋeḏi gimuɽi lugwuŋa calɩmis je jinyi. 19na calɩmis arre gi gwune uməḏijɩne yecu, nalgico ŋɩdio wei muma ŋeḏi gɩmuri.
20gwune na galo ro garage naljiga calɩmisŋale jun jiro di na gwuttən; 21na gwune jilga gi ḏiṯa nuleicɩno, gwerkwe ganu nyi gweiceijɩno, gwete gwo lagalo gwar gwɩnyɩḏəḏə ilɽinye. 22nalrone gworki, naṯi gwete gwete lagin arno, gwele, nyi gwiro a? 23nulwɩrlijo ŋuɽuna nuleicɩno, ŋu gwun gwanagwiṯiwaḏaice nanu kɩɽudo ŋu gwiɽo gwun gwiḏəḏə. 24ŋaɽe ŋeḏi liji ŋele gi gwune ŋulinu ŋan ŋu, namɩni ŋɩki kwijiŋu gwun gwəḏəḏə ŋaɽe ŋeḏi liji. gwiŋir kwiji kweno ḏa gwate malɩŋini no. 25na yauḏa gwun gwiḏəḏi wɩrlijo ŋuɽuna nueicɩno, gwele gwəri, nyi gwiro a? nueicɩno, ŋa gwiro gwame dino.
26na gwune jilga gi ḏiṯa na yecu ape gia nuuməḏɩjo eloŋu sukran nubɩleṯɩnya ganu, nuḏəḏə calɩmis juŋun nuleicɩno, apul nyaʼe; keno aŋɩnu yinyi ŋiro. 27nuaɽu nuape kɩɽuḏa nueico eloŋu sukran, nulḏəḏə nuleicɩno, yulo nyaŋa wei; 28gi gwune ŋeno ŋiro ŋuwən ŋinyi ŋeḏi ŋuɽun ŋun ŋiya ŋun ŋɩkaiilo eloŋun ŋirijo liji lutu kani ŋulɩnəbɩrijo ŋuɽun ganu ŋun ŋɩki. 29namɩni nyi gweiceijɩno, uro gwunne nyi gwate gweyu ŋau ŋeno ŋeḏi jaɽe jun jiro ŋi ḏuɽuṯ kəbe gi lamon lun lilyu nyaŋale ŋiya ŋele ŋeḏi baba gwi.
30na gwune nalelɩŋe ḏelɩŋa ḏeḏi elo naltu nalwele ŋi lirgwom lun lan seitun.
yecu gwuməḏi ŋuɽuna gwan calɩmis walane gwerre ŋuɽun ŋate ŋɩmila no
mks. 14:27-31, lk. 22:31-34, ywn. 13:36-38
31nal yecu uməḏɩjo nuleicɩno, nyaŋa wei nyalobɩlkəḏɩni lugwi gilio keno gi gwune ŋulinu, nyi gwapi gwaɽa na joŋol jouwɩreḏelo; 32namɩni ḏa nyimadiɽi gi ḏaiya nyi gwajidara nyi gwele jalil. 33na buṯrus wɩrlijo ŋuɽuna nueicɩno, ḏa luŋa lɩmobɩlkəḏɩni lugwuŋa wei, namɩni nyi gwate gwobɩlkəḏɩni no. 34na yecu eicɩno, gwerkwe ganu nyi gweicaŋano, gilio keno gwerre lɩgwugiɽe late lɩməri gwula no, ŋa gwinyidonye ŋwamon ganu ṯəɽɩl. 35namɩni buṯrus eicɩno, ḏa nyi gwimar alai, nyi gwate gwaŋadonye ḏuṯ no. na calɩmis wei are dino.
yecu gwo jeṯisamɩni
mks. 14:32-42, lk. 22:39-46
36na yecuŋa ṯɩmi luŋaŋale kalo gun gan jeṯisamɩni, nueico calɩmis juŋun no, jilga ŋɩne kəbe nyiele nyiuməḏɩjo eloŋu ŋɩnəwei. 37nugwulo buṯrusŋ na nyaɽe nyeḏi jebəḏi nyun nyiro nyɩttən nurone gworki na ḏugwor ouwce ganu. 38nuleicɩno, ḏugwor ḏinyi ḏouwci ganu gworki, kəbe nyi gwar gwai. jilga ŋɩne nyadɩmini ga. 39nudɩka galo mɩce nuiḏi kwɩnyəm, nuje gi ḏuməḏɩjo eloŋu, nueicɩno, baba gwi, ḏa ŋɩmandro dino ouwɩrico kɩɽuda keno ŋwudarane lugwi; nalmɩni ro ŋun ŋate ŋibunyilnyi no, nalmɩni ro ŋun ŋɩbunyaloŋa. 40nuaɽuwa gi calɩmis nulbuje liḏɩro, nueico buṯrusŋ no, əgeye, ŋa gwate gwəṯi ŋɩma gwadɩmini ga sa jetɩḏo na? 41aṯanyadɩmini ga nyuməḏɩjo eloŋu kani nyate nyəḏi ŋuɽun ŋe ḏɩḏeijo no. gwerkwe gwuɽɩwə gwubɩɽe gi jei, namɩni aŋɩnu yowa gi jei. 42nuaɽuwe mɩna nuuməḏɩjo eloŋu nueicɩno, baba gwi, ḏa kɩɽudo keno ŋate ŋɩmadare lugwi ḏa nyi ŋate gimiyu no, ŋaro gi gwune ŋɩbunyalo. 43nuaɽuwa mɩna nulbuje liḏɩro, gi gwune liṯɩlo ŋwar jei. 44nunwalane nuwele mɩna, nuuməḏɩjo eloŋu ŋwamon ŋwun ŋwaduji gworo ṯəɽɩl ŋuɽuna ŋiro gi gworo. 45nuaɽuwa gi calɩmis juŋun nuleicɩno, nya lore liḏɩro na nyalar lobɩḏa uwə gwe a? eʼe, sa jo gɩṯo, na ŋaɽe ŋeḏi liji ŋəḏəḏini gi ḏi deḏi liji lun lɩki. 46ḏiɽil ilele. eʼe, ŋu gwun gwiḏəḏɩnyi gwo gɩṯo.
yecu malməṯo wɽi
mks. 14:43-50, lk. 22:47-53, ywn. 18:2-11
47na kaja gun guməḏɩlge, eʼe, yauḏa, gwun gwiro gwete gweḏi calɩmis jun jiro di na gwuttən, nalwila lijiŋale lutu cɩwiḏ je na jurləlo je gi jɩsis jun jɩbuḏo na lun luɽun leḏi liji. 48na gwiji gwun gwiḏəḏulo nulaŋijo ŋuɽuna nuleicɩno, ŋu kwe gwun gwamɩɽənyo ŋu gwiro; məṯɩl. 49nuwila ḏi yecu nueicɩno, ŋa gwiŋir a, mualɩm gwi? numɩɽənyo. 50na yecu eicɩno, məḏəri, gwudaro gəko na wila? nalwila nalməṯo yecuŋ di de. 51na eʼe na gwete lagin leno lun lijil yecuŋale, nukuwa ḏi ḏuŋun nuwala kɩwiḏio guŋun; nugimɩɽi wainya gweḏi gwele gweḏi jɩsis nuɽə gəni ga. 52na yecu eicɩno, wəɽeico kɩwiḏio guŋa kalo gun gapane, na wei lun lapo cɩwiḏio lai cɩwiḏ je. 53nyaluməḏɩnu nyalarno, nyi gwate gwəṯi ŋɩma gwaɽoṯəḏɩjo babaŋ gwi gwunnɩno, nuŋwiəpijo liji leḏi kanyin lutəno gi alɩb ḏuɽi kwoɽoṯəɽɩl na gwuttən na? 54na dino galakwe ŋuɽun ŋeḏi gɩḏam geḏi elo ŋəṯɩmi ŋun ŋarɩŋe arram ŋandro dino? 55na gi sa ceno na yecu eico liji no, nyaltuḏiji cɩwiḏ je na jurləlo je gi gwun gwiro gwuɽam nyalɩməṯo a? ŋwamon wei ilaṯɩ jiga nialɩmide kwu dunu gweḏi elo gwun gwubuḏo, nate ninyilməṯo no. 56namɩni ŋuɽun ŋeno wei ŋɩmila kani nalṯɩmi ŋuɽuna ŋeḏi gɩḏam geḏi elo ŋeḏi nebɩŋa. nan calɩmis wei walane nalabɩre.
əcərio yeḏi yecu gi jei ganu jeḏi gwele gweḏi jɩsis
mks. 14:53-65, lk. 22:54-55,63-71, ywn. 18:12-14,19-24
57na luŋa lun lɩməṯi yecuŋ nalgwuloḏa ḏi kaiyaba gwun gwiro gwele gweḏi jɩsis, kalo gun gaṯɩn jalgaṯɩm na lun luɽun aɽuwaḏe ldu. 58namɩni buṯrus nugwujane uro gɩdo kəbe nuṯɩmi gi ḏɩgala ganu ḏeḏi gwele gweḏi jɩsis; nuəḏi gidəno gwe, naljiga jaḏam je lar laŋu ŋuɽuna ŋun ŋila ŋɩḏo. 59na jɩsis jun jɩbuḏo na lele wei leḏi əcərio yin yɩbuḏo yeḏi liju nalbunyi ḏugɩḏio ḏi yecu gwar gwalɽinye, 60nate nalbuje ŋetɩdo no, i nan luŋa wila lutu. na gɩdo na luŋa wila lɩttən, 61naleicɩno, iyo kweno gwarno, nyi gwəṯi ŋɩma gwaki duno gweḏi elo gwun gwubuḏo, na ŋwamon ṯəɽɩl gwiuṯe 62na gwele gweḏi jɩsis diɽo nueicɩno, ŋa gwate gwanuməḏo nuɽuna ŋədi na? gwudaro gəko naŋalcɩgi? 63namɩni yecu je nyɩkwom; na gwele gweḏi jɩsis nuwɩrlijo ŋuɽuna nueicɩno. iyi gwaŋərɩmi elo gwe gwun gwumiḏo ŋijiuməḏɩjo ḏa ŋa maro kɩrisṯo, ŋaɽe ŋeḏi elo. 64na yecu eicɩno, ŋa gwame; namɩni iyi gweijeicɩno, uro gwunnɩno nyalaŋu ŋaɽe ŋeḏi liji ŋijoga gi ḏi ḏun ḏiro ḏiŋir ḏeḏi ŋele, na ŋaɽuwa gi jəbɩɽu jeḏi kanyin. 65na gwele gweḏi jɩsis ṯɩrṯa jiria juŋun ganu nueicɩno, ŋu gwiḏerɩḏi, gwudaro gəko nilbunyu lun lɩteijo ga lutəno? eʼe nyamadiŋɩni ḏɩḏenɩḏia ḏuŋun. 66nyaluməḏɩnu nyalarau? nalwɩlijo ŋuɽuna naleicɩno, gwai.
67nalgwoginya gi jei juŋun, nabi ŋwuɽudo ŋwe, na liro kaja pi nɩrɩge ne, 68naleicɩno, lɩŋiḏijo, ŋa kɩrisṯo, əḏi gwiro gwun gwimɩɽiḏaŋa?
ḏidonyɩḏa ḏeḏi burus yecuŋ
mks. 14:66-72, lk. 22:56-62, ywn. 18:15-18,25-27
69namɩni buṯrus gwijoga kɩluḏo gi ḏɩgara ganu. na ŋera wila luŋwun ŋun ŋiro gaḏam nueicɩno, nyaljo yecu gwe dino gweḏi jalil. 70nudonye gi jei ganujeḏi liji wei, nueicɩno, nyi ŋate ŋilɩŋiḏilo ŋun ŋuməḏəlo no. 71nuduḏo kouwɩr elo, na ŋela ŋiro kaja aŋu nuleico lun lijo ŋɩnəwei no, gwiji kweno gwijɩl yecu gwe dino gweḏi nasɩra. 72nudonye mɩna ḏɩḏenɩḏia ḏe, nueicɩno, nyi gwate gwilɩŋiḏi gwəmɩnyəŋe kweno no. 73nalijiga mɩce na liji wila lun lɩḏuḏɩnu ga, naleico buṯrusŋ no, gwerkwe ŋa dino ŋa gwiro gwete lagin, na ŋuɽun ŋuŋa ŋilɩŋinu. 74numɩni luḏe nuərɩmi nuarno, nyi gwate gwilɩŋiḏi gwəmɩnyəŋe kweno no. na cou na lɩgwugiɽe əri gwula, 75na buṯrus aḏɩŋane ŋuɽuna ŋeḏi yecu ŋun ŋeicuŋeno, gwerre lɩgwugiɽe late lɩməri gwula no, ŋa gwinyidonye ŋwamon ganu ṯəɽɩl. nudu kɩluḏo nuəri gwula gwɩɽi cicer.
Nke Ahọpụtara Ugbu A:
maṯa 26: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.