maṯa 27
27
asa 27
yecu gwuḏuḏɩnu gi jei ganu jeḏi bilaṯus gwun gwiro muḏir gwiro gwiji gweḏi rumiya
mks. 15:1, lk. 23:1-2, ywn. 18:28-32
1gwune na gal uɽe jɩsis wei jun jɩbuḏo na liji lun luɽun uməḏəṯe laginŋu ḏi yecu gwalɽinye; 2nalgaki nalgwuloḏa nalḏəḏə bilaṯusŋ gwun gwiro mudir.
ḏaiya ḏeḏi yauḏa
3gwune na yauḏa gwun gwiḏəḏɩlo nuaŋu yecuŋ gwakɩminu, nuwɩrla ga ŋuɽun ŋuŋun ŋun ŋərrulo nuwəɽɩjo jɩsis jɩbuḏo na liji lun luɽun əlŋɩrucə ŋiro gi kaiyiri ḏuɽi ṯəɽɩl, 4nuleicɩno, nyi mape ŋuɽuna ŋɩki ŋi gwune nyi mugɩḏi ŋuwən ŋun ŋate ŋapo ŋuɽuna ŋɩki no. nabicɩno, aŋ gwiro lagəri? apɩloŋa. 5nuwini əlŋɩrucə ye yun iro gi kaiyiri kwu dunu gweḏi elo gwun gwubuḏo ki nuwele, nuiḏeije gwula gwuŋun. 6na jɩsis jun jɩbuḏo ape əlŋɩrucə yeŋiro gi kaiyiri naleicɩno, ŋate ŋiŋir ŋiliŋele kalo geḏi əlŋɩrucuyeḏi dunu gweḏi elo no, gi gwune ŋiro jili jeḏi ŋuwən. 7nauməḏəṯe laginŋu naleḏɩla ḏɩri ḏeḏi lɩbarṯo leḏi niḏi, ki naṯɩlakwuro liji leḏi jɩmɩrɩgen jiro kaja. 8na dino ḏɩri ṯeno ḏan ɩri ḏeḏi ŋuwən, uro kaja kono kəbe gwunne. 9na kaja kono nalṯɩmi ŋuɽuna ŋun ŋarɩŋe irimiya gwun gwiro nebi gwune ərune, nalape əlŋɩrucə ŋiro gi kaiyiri ḏuɽi ṯəɽɩl yun yiro jili jeḏi ŋu jun jigelɩlo liji leḏi isreiyil, 10nalḏəḏə lɩbarṯaŋe leḏi niḏi naleḏɩla ḏɩri, gi gwune uməḏɩjinyine gwele gwun gwiro elo.
yecu gwuḏuḏɩnu gi jei ganu jeḏi bilaṯus
mks. 15:2-15, lk. 23:3-5,13-25, ywn. 18:33—19:16
11na yecu ḏuḏɩni gi jei ganu jeḏi mudir, na mudir ɽoṯəḏɩjo nueicɩno, ŋa gwiro gwele gweḏi liju a? na yecu eicɩno, ŋa gwame. 12na gaja gun gicɩgige jɩsis jun jɩbuḏo na liji lun luɽun, nate nanuməḏo ŋuɽuna ŋədi no. 13na bilaṯus eicɩno, ŋa gwate gwudiŋɩnu ŋuɽuna ŋun ŋuməḏəṯaŋalɩni elo ŋutu na? 14namɩni gwate manuməḏo ŋuɽuna ŋədi no, na dino mudir nuobaga ṯuṯ gworki.
15na kɩmuri naṯi mudir kədə lɩbabunya galo lete lun laṯɩlbunyi. 16na kaja ko naləṯi lɩbabunya lete lɩki gworki lun lan barabas. 17na dino kaja gun gaɽuwaḏɩlge ldu nal bilaṯus eicɩno, əḏi gwiro gwubunyanya gwajikədəḏɩjo ga? barabas i yecu gwun gwan kɩrisṯo a? 18gi gwune nulɩŋe gwalḏəḏə gi gwune lɩkijo yecuŋ dugwore. 19na gwune juga kɩḏoɽ geḏi ḏakɩmiḏa na gwa gwuŋun wəje lugwun nueicɩno, ŋa gwo gwanəjico kwiji kweno gwun gwɩpiḏo pɽul ŋuɽuna ŋəḏi, gi gwune gwunanyene nyi gwəṯi ŋwuɽeḏɩnya ŋwutu ŋwume gwan ŋu. 20namɩni jɩsis jun jɩbuḏo na liji lun luɽun nalidi liji nanu gi ḏiɽoṯeḏa barabasŋ almɩnɽinye yecuŋ. 21nal mudir wɩrlijo ŋuɽuna nuleicɩno, əḏɩŋa liro lun liro lɩttən gwun gwubunyanya gwajikədəḏɩjo ga? naleicɩno, barabas. 22nal bilaṯus eicɩno, nyalar nyi gwəpijo yecuŋ aŋe gwun gwan kɩrisṯo? na wei naleicɩno, ouwɩrico ilɽɩnye gi luɽi lun lɩmalɩḏo ganu. 23nal mudir eicɩno, gwarra? gwapaŋe gwɩki? naləriene gwula nalarno, ouwɩrico ilɽinye gi luɽi lun lɩmalɩḏo ganu. 24gwune na bilaṯus aŋu gwate gwəṯi ŋɩma lulḏami ŋuɽun ŋe ŋədi no, nalmɩni are ŋɩrəkwənəŋe, nuapa ŋau nuwei di duŋun gi jei ganu jeḏi liji, nuleicɩno, nyi miŋir nanu ŋuwən ŋe ŋeḏi gwiji kweno gwun gwiŋir. arrɩlo nyana. 25na liji wei wɩrlijo ŋuɽuna naleicɩno, ŋuwən ŋuŋun ŋaje lagəri na nyaɽe uyəri. 26nulkədəḏɩjo barabasŋ galo na gwune nupi yecuŋ, nulḏəḏə gwalɽinye gi luɽi lun lɩmalɩḏo ganu.
ḏiɽinyɩḏa ḏeḏi yecu gi hiɽi lun lɩmalɩḏo ganu
mks. 15:16-32, lk. 23:26-43, ywn. 19:17-27
27na ajana yeḏi mudir gwulo yecuŋ gi ḏɩgara ganu, nalwəɽeice ajana wei ldu. 28nalwala ŋɩdio wei ŋuŋun nalgaki giria gun gure; 29nalɽenyo jugi gi laḏe nalgaki gi lja elo luŋun, nalŋele iṯa gi ḏi ḏuŋun ḏun ḏiro ḏiŋir; nalculɩjo ŋwurko ŋwe nalaki jumo naleicɩno, ŋa gwiŋir ŋa gwele gweḏi liju a? 30nalgwoginya nanu, nalape iṯa nalpi kɩɽelo. 31na gwune akɩlo jumo nalwala giria gun gure, nalgaki jiria juŋun, nalgwuloḏa gi ḏiɽinyɩḏa gi luɽi lun lɩmalɩḏo ganu.
32na gaja gun gituḏɩlge nalbuje gwəmɩnyəŋe gweḏi gerawan gwun gwan simian. gwuremeṯeḏeicɩlo gi ḏapa luɽi luŋun lun lɩmalɩḏo ganu. 33gwune nalwila kalo gun gan juljuṯa, jun jarno, kalo geḏi gwunə, 34nalici ŋau ŋan kal ŋuɽuḏɩlo ganu mur gwe namɩni gwune nulɩŋaico ŋulmɩni donye gi ŋulyu. 35na gwune nalabuje gi luɽi elo lun lɩmalɩḏo ganu, nalgəginyeḏe jiria juŋun ganu naljimɩɽi gwumara. kani nalṯɩmi ŋuɽuna ŋun ŋarɩŋe nebi, nalgəginyə jiria jinyi ganu lagin, naljimɩɽi gwumara kalo geḏi luŋa linyi. 36naljiga naldɩme ŋɩnəwei. 37nalŋele ŋuɽuna ŋun ŋulinu luɽi nanu kɩɽelo lugwun ŋun ŋicɩgilɩŋe ŋarno, kweno gwiro yecu gwele gweḏi liju.
38nalɽinye luɽama lɩttən yecuŋale ŋwuɽi ŋwun ŋwɩmalɩḏo ganu, gwete gi ḏi ḏun ḏiro ḏiŋir, na gwete ḏi ḏun ḏiro ḏouwɩr. 39na liji lun laṯtḏara galo ŋwaṯdḏene naṯɩlirəri ŋwuɽa galo ŋwagin, 40naleicɩno, ŋa gwun gwara gwaki duno gweḏi elo gwun gwubuḏo namɩni arno gwowuṯe ŋwamon ṯəɽɩl, kədəḏi gwula gwuŋa ga ḏa ŋa maro ŋaɽe ŋeḏi elo, gwuləḏo ga gi luɽi lun lɩmalɩḏo ganu. 41na dino naṯi jɩsis jun jɩbuḏo nalaki jumo jalgaṯɩmŋale na lun luɽun, naleicɩno, 42gwaṯɩkədə liji liro kaja ga; namɩni gwate gwəṯi ŋɩma gwakədəḏə gwula gwuŋun ga no. ḏa ŋu maro gwele gweḏi isreiyil ouwɩrico nugwuləḏa ga gwunnɩno gi luɽi lun lɩmalɩḏo ganu na anəmɩnyi. 43nuəmɩnyi eloŋu, ouwɩrico elo kədə ga na ḏa miŋir ḏugwore lugwun, gi gwune gwarno, nyi gwiro ŋaɽe ŋeḏi elo. 44na luɽam dino lun lijille ŋwuɽi elo ŋwun ŋwɩmalɩḏo ganu nalaki jumo ŋuɽun ŋun ŋiro dino.
ḏaiya ḏedi yecu
mks. 15:33-41, lk. 23:44-49, ywn. 19:28-30
45na uro anyino ganu na gɩḏilio rimi ganu wei kəbe na sa ro ṯəɽɩl. 46na gwune na sa ro ṯəɽɩl ca, na yecu əri gwula ŋwal ŋwɩbuḏo, nueicɩno, eloi, eloi, lama sabakṯani? ŋuɽun ŋeno ŋarno, elo gwi, elo gwi, gwudaro gəko nuŋinwalane? 47na liji kworo lun lɩḏuḏɩnu ga, gwune naldiŋɩni ŋuɽuna ŋeno, nalarno, ŋu gwo gwumiḏo iliyaŋ. 48na cou gwete lagin enede nuapa sawinja jun jɩməṯi ŋau, nuenyeje ŋau ŋun ŋan kal, nuəḏɩje kiṯa, nuabuje elo nuici dino. 49na lun lɩṯanu naleicɩno, ḏuḏɩnu ilaŋu ḏa iliya mara mila gwukədə ga. 50na yecu əri gwula mɩna ŋwal ŋwɩbuḏo nukuwa gwuɽɩwə gwuŋun. 51na giria geḏi dunu gweḏi elo gwun gwubuḏo ṯɩrṯəḏɩni ganu gi ḏiɽil ḏeḏi elgwogwo ke nuobeḏe kalo gi ḏiɽil ḏun ḏijo gelio, na kwɩnyəm ubəga, na ŋwoɽi ṯɩrṯaḏe ganu, 52na nil iḏini na jiŋɩno jeḏi liji lutu lun lɩpiḏo pɽul lun liḏɩro nalḏiɽi; 53naltuḏə gi nil, na gwune nuḏiɽi naləḏi kamɩrɩgen yun yɩpiḏo pɽul, nulaŋinijo lutu. 54na gwele gweḏi ajana yun yiro ḏuɽi di na liji lun lijille naldɩme yecuŋ, nalaŋu ḏubaga, na ŋuɽun ŋun ŋaŋinu naldonye gworki nalarno, gwerkwe ganu kweno gwiro ŋaɽe ŋeḏi elo. 55na la lijo lutu nalɩnŋalaḏe uro ŋɩnəwei lun lɩgwuje yecuŋ uro jalil naləpijo ŋɩru. 56na kworo lagin mariam majdaliya, na mariam gwun gwiro nana gweḏi yagub na yusi, na nana gweḏi nyaɽe nyeḏi jebəḏi.
ḏɩkwura ḏeḏi yecu
mks. 15:42-47, lk. 23:50-56, ywn. 19:38-42
57na gwune na galo ro garage, na gwəmɩnyo wila gwun gwəṯi ŋɩdio ŋutu gweḏi rama gwun gwan yusib, na ŋu dino gwiro ṯalɩmis ḏeḏi yecu. 58nuwele ḏi bilaṯus nuɽoṯəḏɩjo aŋɩna yeḏi yecu. na bilaṯus uməḏɩjo gwarno gwalḏəḏə aŋɩna. 59gwune na yusib ape aŋɩna numɩɽi nanu giria ge gun gimɩḏe gun giŋir nanu. 60nuḏɩrɩ kil guŋun gun giya gun gikwurinu kɩmu ganu, nuḏeḏiɽejo gɩḏolia gun gibuḏo kouwɩr yeḏi gil, ki nuwele. 61na mariam majdaliya na mariam gwun gwiro kaja lijiga gɩṯo kil.
62na giləganu gwiro lamon lun ligwujano lamon le ḏigela ŋɩdio muma ŋeḏi sabiṯ, na jɩsis jun jɩbuḏo na lɩbarisi aɽuwaḏa ldu ḏi bilaṯus, 63naleicɩno, gwele gwəri, anaḏɩŋane iyoŋ kweno gwun gwiro gwuwɩɽɩgal gwune gwore gwumiḏo gwarno, na ḏa ŋwamon ŋwɩmete ṯəɽɩl nyi gweḏiɽi. 64na dino ŋaŋele ŋuɽuna alaŋiṯi gil muma kəbe na lamon ete lun liro ṯəɽɩl, i gwəṯi calɩmis juŋun wila gilio nalape ŋuɽama, naluməḏɩjo liji nalarno, madiɽi gi ḏaiya; na dino ŋuɽun ŋe ḏɩrdeijo ganu ŋeḏi gɩdo ŋakene kworo gweḏi gwerre. 65nal bilaṯus eicɩno, nya ləṯi ajana yun yaṯɩḏɩme. wiḏɩl nyalaŋiṯi; gi gwune əṯanya ŋɩma. 66nalwele nalaŋiṯi gil nalauce gɩḏolia ŋaijo ŋe, nalŋele ajana yun yaṯɩdɩme gil.
Nke Ahọpụtara Ugbu A:
maṯa 27: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.