Genesis 23
23
Makpelre Sarawakʼ topa
1-2Sara do mitʼsae bargel eae bochor jiwetʼe tahekan tayom Sara do Kanan disạm reakʼ Kiriath-Arba nagrahareye gocʼena. Noa nagraha do ńitokʼ Hebronko metakʼkana. Sarae gocʼen khan Abraham do sara lạgitʼ homor halaṅe ehopʼena. 3Uni do acʼren gocʼakan bạhu ṭhen khon beretʼkate onḍe Hethrenkoe metatʼkoa, 4#Ibr 11.9,13; Apos 7.16“Iń do eṭakʼ disạm khon upriạ lekate apeko talareń girobasokʼ kana. Ona iạte dayakate topa ṭạnḍi benao lạgitʼ ape talare thoṛa jaega aṛakʼ ạńpe jemon ińren bạhuń topa daṛeae.” 5Hethrenko menkeda, 6“Aleakʼ katha ańjomme. Am do nonḍe ale talare Isorren ojokʼicʼ mitʼṭen mukhiyạm hoyakana. Aleakʼ joto khon mońj utạrakʼ toparege amren bạhu do topakaeme. Amren bạhu topaye lạgitʼ aleko modre okoehõ acʼakʼ topa ṭhạ̃i aṛag do bae baron mea.”
7Unre Abraham doe beretʼena ar ona ṭoṭharen Hethren hoṛkoe ḍobokʼatʼkoa. 8-9Ona tayom uniye menkeda, “Ińren bạhu nonḍeń topaye iạte apeakʼ jãhãn tạkicʼakʼ bạnukʼ khan tobe do dayakate ińakʼ mitʼṭecʼ katha ańjomtińpe. Ape do iń ńutumte Sohar hopon Ephron noa nehõraepe jemon uni do acʼakʼ jumi reakʼ ses simạnare Makpelare okaṭakʼ dander menakʼ ona baṛeye aṛakʼạń. Ar ona do ape samaṅrege purạ damtegeń kirińa.”
10-11Onḍe do eṭakʼ Hethrenko sãote Ephron hõe duṛupʼ akan tahẽkana. Uni do Abraham roṛ ruạṛadeteye metadea, “Baṅ, baṅ, am do dayakate ińakʼ katha ańjomme. Iń bõsren hoṛko samaṅre ona jumi ar ona tala reakʼ dander do begor damtegeń emama; ar amren bạhu do onḍegem topa daṛeaea.” Unre Hethrenko hõ nagraha reakʼ phaṭok duạr ṭhenko tahẽkana ar onko hõ Ephronakʼ noa kathako ańjomkeda.
12Abraham do otre ombakʼkate arhõ onkoe ḍobokʼatʼkoa. 13Ona tayom joto hoṛ jemonko ańjom ńam onkage Ephrone metadea, “Bam baṅle khan dayakate ińakʼ katha ańjomme. Jumi do damtegeń hataoa. Onate dayakate jumi reakʼ dam do hataome jemon ińren bạhuń topa daṛeae.”
14Ephron do Abrahame metadea, 15“Am do ińakʼ katha ańjomme. Ona jumi reakʼ dam do ponsae sekel rupạ, menkhan iń ṭhen se am ṭhen ona do cetʼge baṅkana. Am do boroṅ senkate onḍege amren bạhu topakaeme.”
16Ephronakʼ katha ańjomkate Abraham do bạnij beparkoakʼ soṅ lekate pon keji irạl sae gram rupạ uniye soṅadea. Ephron do Hethrenko samaṅre noa pon keji irạl sae gram rupạ reakʼ kathae menleda. 17-18Mamre nagraha ṭhen Makpelare Ephronakʼ oka jumi tahẽkan ona jumi ar ona reakʼ dander ar jumi beṛhaeteakʼ dareko do Abraham ṭhen sompotti lekateye ạkhrińkeda. Ar okoe Hethrenko nagraha reakʼ phaṭok duạr ṭhenko tahẽkan onko samaṅrege uni do onae kirińkeda. 19Noa tayom Abraham do Kanan disạm reakʼ Mamre nagraha ṭhen, metakʼme Hebron ṭhen Makpela reakʼ danderre acʼren bạhui topakedea.
20Nonkate Makpela reakʼ ona dander sudhạ jumi do topa thạ̃i lekate Hethrenko ṭhen khon Abrahamakʼ tire hecʼena.
Nke Ahọpụtara Ugbu A:
Genesis 23: SBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Santali Bible © Bangladesh Bible Society, 2021.