MATEU 16
16
Bafariseu ni Basaduseu yep upibanaani
(Mar 8.11-13; Lúk 12.54-56)
1 #
Mat 12.38; Lúk 11.16 A Bafariseu ni Basaduseu tsëp di Yeesu. Pa pëgunganul, a ba yepul na piban bukul upibanaani un pëni wi batsi. 2A na yankës bukul, aja: “Uyër-unu, ndë ja, ucaak waree wink, par batsi jankan. 3A bëfa, ndë ja, ukëk ka ci ntsari, par batsi jank a ba jínëf. Nda me pëja nda win bënaam batsi, ndë yil jakëntsën ko wi kan ci wi, maa nda yëlaants pëjaakëntsën ngëpibanaani ngëwal! 4#Mat 12.39; Lúk 11.29Ban ntsari, ko wi ba kaalam wi te bë mets Nasien-batsi, a bu yep upibanaani ank! Kaats upibanaani wi ka wëla wi bukul, un cits wi wi Jonas wun.” A uu ba, a na ruk bukul, a na pën atsëp.
Bëko Bafariseu bëlëntsëntsaani
(Mar 8.14-21)
5Bi bafetsul kë tsëp bi kalutar kacints kun, a ba fin pëtsëpand upom. 6#Lúk 12.1A Yeesu ja bukul: “Nda rukan ibats mak tsi uleka bëko Bafariseu bëlëntsëntsaani ni bi Basaduseu.” 7A ba wejatsar, a ba jaalar përim pi: “Aci bi ngë tsijatsi bi upom.” 8A Yeesu me ko wi bu kë ñakanaan wi, a na ja: “Ko wi nda tiesëts wi uwak! We ka wun nduu ñakan uleka bi nda tsijatsi bi upom? 9#Mat 14.17-21Nda netse me këme-a? Nda lesats këpom kañan kan faa kunk bañaan ngëmiil kañan a (5.000)? A këcaa um ki nda tsëpand kun. 10#Mat 15.34-38A nin nda lesats këpom ka wëla kunk bañaan ngëmiil ngëbaakër (4.000), a këcaa um ki nda tsëpand kun? 11Um di nda meets run u cits uleka upom wi n ñakanaan ind wun? Maa, nda rukan ibats mak tsi uleka bëko Bafariseu bëlëntsëntsaani ni bi Basaduseu.” 12Din, a ba ru me u cits uleka bëko-bëlëntsëtsaani upom wi na ro wu n ja, ba ruk ibats; maa aci uleka bëjukan Bafariseu ni Basaduseu.
Per aja, Yeesu ci-un Këristu
(Mar 8.27-33; Lúk 9.18-22; Joŋ 6.66-69)
13Bi Yeesu band bi pëboos Seesareeya Filip, a na yepar bafetsul aja: “Yën ni bañaan kë ja un Abuk ñaan-najin aci?” 14#Mat 14.1,2; Mar 6.14,15; Lúk 9.7,8A ba yankësul aja “Balon ka ja, Joŋ-namijan; a bacints, Eliyas; a balon, Jeremias oo nalon tsi bayëlia.” 15A na ja bukul: “Maa ind, yën ni nda ja un man ci?” 16#Joŋ 6.68,69A Simon Per ja: “Wi ci-un Këristu, Abuk Nasien-batsi nayësal.” 17A Yeesu ñakan kak ajaul: “M naak, Simon, abuk Jonas; par cits uyamats ni pëñaak pibanu ngun ko wan, maa aci Asin nji nan cii di batsi. 18A nji, ma njau: M ci Per, a tsi bulaak bëmënts bi, mán niew Ngëriisia nji, te ilëman mcäts di ka pe ngul uyëlan. 19#Mat 18.18; Joŋ 20.23Mán wëlu inigësaani pësien batsi: Ko wi m tan wi ba këtan tsi utsia, wii tana buts di batsi; a ko wi m pac wi ba këpac tsi utsia, wii pacaa di batsi buts.” 20Din, a na ja bafets ba rits leents koon këleents ñaan ne nul ci-un Këristu.
Yeesu añakan uleka unoorul, ni pëcätsul, ni pënatseeul di pëcäts
(Mar 8.31—9.1; Lúk 9.22-27)
21Tsi uwal umënts wun, a Yeesu kur pëpiban bafetsul na ka pëtsëp Jerusalem, di nii unoor ri mak tsi bawiak Bajudeu, ni bawiak-bajakan, ni bapican-ulua, në fiŋaa, në natsee di pëcäts tsi unu uwaajantsan. 22A Per kikësaanda Yeesu apatsand, a na ci tsi pëleentsarul koo jaul: “Aa-a, Ajug! Ko wan di ka baandë-niu!” 23Maa, a Yeesu witsësa, a na ja Per: “Pënan lawanin, Useetaani! M ci natsuin pëyër, par ngëwejatsu cits ngi Nasien-batsi, maa ngi bañaan-bajin.”
Ñaan, në lap kruusul
(Mar 8.34—9.1; Lúk 9.23-27)
24 #
Mat 10.38; Lúk 14.27 Din, a Yeesu ja bafetsul: “Na ŋali pëfetsin, na bëran ngiicul; në lapan kruusul, nuu fetsin. 25#Mat 10.39; Lúk 17.33; Joŋ 12.25Par, na ŋali pëbueran ubiiraul, ka niaman; maa na niamani ubiiraul undo nji, nii wini. 26We kat wun koon ñaan pëpe umundu upëban, maa na niaman beenul? Oo we wi ñaan kë wël wun, pa pëtsëtsëlaan ubiiraul? 27#Mat 25.31 Iya 62.13; Roo 2.6Par, Abuk ñaan-najin, kee bi ni ngëwaanjuul di përëmb Asin; uja kara ñaan, në lukul ngi na ro ngi ka ro. 28Mán leents ind ucär: Aka balon tsi ba nats biki tsi, ba dits biki kacikëndën pëcäts aa bu ka tsënkëna ka win Abuk ñaan-najin, ubiul di pësienul.”
Nke Ahọpụtara Ugbu A:
MATEU 16: KPKNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Le Nouveau Testament en langue Manjaku © Alliance Biblique du Sénégal, 2020.