MAKUX 2
2
Pai Pui Yum Taix Caong
(Mat 9:1-8; Luk 5:17-26)
1Khaix an tix ngaix Nawh Cao baox deeh laig ka daux veng Kapeniom, yam mhong kix grawh grawng ot Nawh Cao ka daux nyiex tix nyiex, 2pui haoh pui hun khrawm paox tix tan, tom ang dee ot koe tom dex ka mai siviex Nawh krai kix mhong gumlox bwan heue. 3Yam an pui pon kaux klawm ti viex pui pa koe jhawm saux pa yum taix caong tix kaux hoek ka Nawh Cao heue. 4Yam an kheu cub pui hun kix ang pon hoek dex ka Nawh Cao, kix tom yieh braux nyiex piang dee ot Nawh mai khaix hoik yieh kix braux nyiex kix teei ku it kaw pa yum taix caong an mai kix ploi lih dee an heue. 5Yesux yaox krax yum rhawm kix mai Nawh ah nin ka kaw pa yum taix caong an, “Kawn eue, hoik pluat phimap maix heue.” 6Pui tiiem lai tix blah ngawm tan mai kix keud daux rhawm tix yuh nin, 7“Kheu Pui in ah lox yuh nin, Nawh salao ka Siyiex heue. Lheu khaing Siyiex tix kaux khaing, pui mawx chix ploi phimap?” 8Dom mawx dom an Yesux tawng ka daux rhawm tix, grawh grawng pa keud kix daux rhawm kix mai ah nin ka kix, “Pex lai keud ceu in khankix ka daux rhawm pex yuh ka mawx? 9Lox yuh ka mawx lheu yie ti ah, ka kaw pa koe jhawm saux pa yum taix caong, Hoik pluat phimap maix heue, yie ti ah lie? Phan ang mawh nan Kaoh, viex kraung it maix mai hu heue, yie tix ah lie? 10Kheu sonsang tawng pex grawh grawng Kawn kawn pui chix pluat phimap piang haktiex. Nawh ah nin ka kaw pa koe jhawm saux pa yum taix caong, 11Aux krai ka maix kaoh, viex kraung it maix mai deeh ing ka nyiex maix heue.” 12Kaw an kaoh dom mawx dom an mai teei kraung it tix lih hu sivoe ngai pui khawmuik, tom kix khawmuik daox deng kah mai yaogyaw Siyiex, ah nin, “Ex ang sax yaox pa yuh nin tix bawg kawx.”
Kok Ka Lewix
(Mat 9:9-13; Luk 5:27-32)
13Nawh Cao deeh hu ka dex praok rawm nhawng tix bawg mai cub pui hun khawmuik hoek ka Nawh mai Nawh Cao sidiex gau ka kix heue. 14Yam hu krax Nawh Cao yaox Lewix kawn simex Alaphie, ngawm daux nyiex koh mau mai Nawh Cao ah nin ka nawh, “Hawt Aux heue.” Nawh kaoh mai hawt khaix Nawh Cao heue. 15Khaix an yam ngawm neung Nawh dex pheen ka daux nyiex kaw an, pui koh mau mai pui koe phi map khankix ngawm neung tau mai Yesux mai kawncau Nawh khankix, kheu kix, pui hun hawt khaix Nawh Cao heue. 16Pui tiiem lai mai Pharishie khankix yaox yam sawm Nawh tau mai pui pa koh mau mai pui koe phimap khankix, kix ah nin ka kawncau Nawh khankix, “Nawh lai sawm tau mai pui koh mau mai pui koe phimap khankix yuh ka mawx?” 17Yam mhong Yesux, Nawh ah nin ka kix, “Pui pa nyawm ot, ang lo ka pui pa chix sidah, mawh pui pa koe jhawm saux khaing pa lo ka pui chix sidah. Aux hoek sonsang kok pui pa rahsee ang mawh, hoek ti kok pui pa koe phimap heue.”
Twah Pa Ih
(Mat 9:14-17; Luk 5:33-39)
18Bawg yam an kawncau Yohan mai Pharishie khankix twah pa ih mai kix hoek mai ah nin ka Nawh Cao, “Kawncau Yohan mai kawncau Pharishie khankix twah pa ih, yuh ka mawx kawncau Maix lai ang twah pa ih?” 19Yesux chawk kix ah nin, “Yam yuh pui ka paox ot tau mai paox grawm nawh khankix, kix chix twah pa ih lie? Yam yuh pui ka paox, kawn ot mai kix, kix ang tau ti chix twah pa ih. 20Bawg yam singaix tak sang hoek, yam tak sang teei kaw pa yuh ka paox khaing kix, ka daux ngaix an kix tak sang twah pa ih heue. 21Pui tix kaux kawx ang sax teei man pa khraox blaox kraung ceep pa prim, phan yuh nan kienie, man pa khraox pa hoik blaox daux griah tak kieh pa prim laux mai daux griah tak nie vieh khaing phao ka heue. 22Pui tix kaux kawx ang sax teei rawm plix siiet pa khraox sau ka daux hau hak pa prim, phan yuh nan kienie, rawm plix siiet pa khraox tak kieh hau hak an bih mai khawm rawm plix siiet mai khawm hau hak tak laux tak nai kah heue. Viang mawh nan kix sau rawm plix siiet pa khraox ka daux hau hak pa khraox heue.”
Mawh Simiang Ngaix Twah
(Mat 12:1-8; Luk 6:1-5)
23Ka daux ngaix twah tix ngaix yam hu preeng Nawh Cao daux ma nghox ca, kawncau Nawh khankix caik ti teei sigleem nghox ca heue. 24Pharishie khankix ah nin ka Nawh Cao, “Jhak heue, yuh patix kix lai yuh pa ang khaw mai beenli ngaix twah?” 25Nawh Cao baox pawk lox mai ah nin ka kix “Ang pex sax phat grawh grawng pa yuh Davit yam lo nawh, pui ot tau mai nawh kied cai rhawm lie? 26Grawh grawng yam laig nawh ka daux nyiex Siyiex, Yam mawh Abyathax cao giex kaing li pa ting mai ih blah mai tawx ka khawm pui pa ot tau mai nawh, ka pui pa ang mawh cao giex kaing li ang khaw ti ih lie?” 27Nawh Cao baox ah nin ka kix, “Ngaix twah hoik yuh son kawn pui heue. Yuh kawn pui son ngaix twah ang mawh. 28Mawh kheu in Kawn kawn pui mawh Simiang ngaix twah heue.”
Nke Ahọpụtara Ugbu A:
MAKUX 2: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012