MAKUX 1
1
Lox Sidiex Yohan
(Mat 3:1-12; Luk 3:1-18; Yo 1:19-28)
1Dee jah lox bwan gaux rhawm Yesux Khrit, Kawn Siyiex awm hoik tiiem daux lai Cao jhai Isayax. 2“Jhak heue, Aux ploi kawncau Aux hu sivoe Maix, pa tak sang cox krax Maix heue.#Mat 3:1 3“Lox kaw pa kok yo daux tiagtu ah nin cox krax Siyiex leeing ju, yuh krax Nawh rahsee heue.”#Isa 40:3 4Yohan cao cubcom hoek daux tiag mai sidiex gau grawng krax cubcom pa doh keud ka phimap tom pon luan khaing daux phimap heue. 5Pui meung Yudax, pui veng Yerusaliem khawmuik, hu ka nawh. Kix krai doh phimap tix mai Yohan cubcom kix daux klawng ting Yawdan heue. 6Yohan ceep kraung hauk kala-uk mai nhawt maox hak ka nyoi tix #2Sim 1:8 mai ih sido mai rawm hia tiag heue. 7Nawh sidiex ah nin, “Khaix in, pa nie ting khaing aux, tix kaux tak sang hoek, pie maox kiep Nawh, ang aux keung nom ti kah, 8Aux cubcom pex ka daux rawm, viang mawh nan Nawh tak cubcom pex ka daux Khuan singax heue.”
Yesux Kham Geu Pa Nyaw Glaw
(Mat 3:13—4:11; Luk 3:21-22, 4:1-13)
9Daux bawg yam singaix an, Yesux kaoh khaing veng Nazariet, meung Galilie mai hoek cubcom tix daux tawm taix Yohan ka daux klawng Yawdan, 10Yam lih Nawh khaing daux rawm dom mawx dom an, Nawh yaox baoh raoma mai Khuan lih awm sikaux piang Nawh heue. 11Lox lih khaing raoma ah nin, “Maix mawh kawn pa moh Aux, pa khaw caw rhawm Aux heue.”#Isa 42:1; Mat 12:18, 17:5; Mak 9:7; Luk 9:35
Yesux Kham Geu Pa Nyaw Glaw
(Mat 4:1-11; Luk 4:1-13)
12Dom mawx dom an, Khuan Cao grheu Nawh hu ka daux tiag tu heue. 13Nawh ot ka daux tiag tu tixpon ngaix mai kham geu pa nyaw Satan, Nawh ot daux tiag, Kawncau Siyiex khankix khan kheu ka Nawh Cao heue.
Yesux Kok Pui Teei Kax
(Mat 4:12-22; Luk 4:14-15, 5:1-11)
14Khaix hoik sau Yohan daux thawng Yesux hoek ka daux meung Galilie mai sidiex gau lox bwan gaux rhawm pa dex dawd mai Siyiex. 15Ah nin, “Bawg yam hoik naog mai meung Siyiex dex sang hoek,#Dan 2:44 doh keud ka phimap#Mat 3:2 mai yum rhawm ka lox bwan gaux rhawm heue.” 16Yam Nawh hoek dex rawm nhawng Galilie, Nawh yaox Simon mai Andare pux Simon, ploi rub ka daux rawm nhawng, kheu kiex mawh pui pa teei kax heue. 17Yesux ah nin ka kiex, “Hawt khaix Aux heue, Aux tak sang kieh pax lih mawh pui pa teei pui heue.” 18Dom mawx dom an kiex prah rub khankix tan mai hawt khaix Nawh. 19Nawh hu sivoe ceeix mai Nawh yaox Yakop, kawn Zebedie mai pux nawh Yohan, ot daux reu mai cox rub tan. 20Nawh kok kiex dom mawx dom an mai kiex prah keeing kiex Zebedie mai pui cang caing khankix ka daux reu mai hawt khaix Nawh.
Yesux Grheu Phi Lih
(Luk 4:31-37)
21Kix hu ka veng Kapeniom mai dom mawx dom an ngaix twah Nawh laig ka daux nyiex sidiex mai sidiex gau tan heue. 22Kix daox deng ka lox sidiex gau Nawh Cao, kheu lox gau Nawh awm pui pa koe sibrawm mai ang awm pui tiiem lai khankix heue.#Mat 7:28-29 23Daux nyiex dee sidiex kix tan, koe pui pa laig phi pa seeing tix kaux, nawh kok yo ah nin, 24“Yesux Pui veng Nazariet eue, ex koe pa yuh mai Maix ceu patix. Maix hoek ti yuh ex laux lie? Kaw pa Singax Singeh Siyiex eue, aux hoik tawng mawh Maix pui mawx.” 25Yesux ah ka nawh yuh nin, “Paw nye, lih hu khaing daux nawh heue.” 26Phi pa seeing an, kieh pui an goh mai kok lox sinum lih hu khaing daux nawh heue. 27Pui khawmuik khawm leeing daox deng kah, kix tom chawk paox tix, tix kaux lai tix kaux ah nin, “Lox sidiex gau pa khraox pa koe sibrawm In mawh patix? Nawh tawx lox ka phi pa seeing kawx, kix nghiet lox Nawh heue.” 28Grawh grawng Nawh Cao tah hu ka sivie siveng meung Galilie ku dah dee tan heue.
Pai Miex Moeng Petrux Moi
(Mat 8:14-17; Luk 4:38-41)
29Dom mawx dom an yam lih kix khaing nyiex sidiex, Yakop mai Yohan hu laig tau mai kix ka daux nyiex Simon, Andare heue. 30Miex moeng Simon kied saux mai it, dom mawx dom an kix krai grawh grawng kiex ka Nawh Cao heue. 31Nawh hu giex taix kiex yaog kiex kaoh mai jhawm saux kiex grai dom mawx dom an mai kiex khan kheu ka kix heue.
Pai Pui Saux Tom Nie Plakbo
(Mat 8:16-17; Luk 4:40-41)
32Yam klip singaix, yam ponbo kix viex pui pa koe jhawm saux mai pui pa laig phicaox khawmuik hoek ka Nawh. 33Pui veng khawmuik khrawm paox tix ot praok sivie tan heue. 34Nawh Cao cox pui pa koe jhawm saux kuceu kieh kix moi mai Nawh grheu phicaox lih tom nie, Nawh ang kieh phicaox khankix sikah, kheu kix hoik tawng Nawh heue.
Yesux Hu Sidiex Ku Dah dee
(Luk 4:42-44)
35Yam ponngawb yam ang praix bax mung riang, Nawh kaoh hu ka daux tiag tix dah mai rawg bwan dee an. 36Simon mai pui pa ot tau mai nawh khankix hawt Nawh heue. 37Kix yaox Nawh mai ah nin ka Nawh, “Pui khawmuik sawg Maix heue.” 38Nawh Cao ah nin ka kix, “Ex hu tang dah tang dee, ka daux tang yaong tang vie, yuh ka mawx viang mawh tan kawx Aux ka pon tix sidiex, kheu Aux hoek son ceu in heue.” 39Nawh Cao laig sidiex ka daux nyiex sidiex kix khankix daux meung Galilie ku dah dee mai Nawh grheu phicaox khankix lih hu heue.#Mat 4:23, 9:35
Kieh Pui Sipawg Singax
(Mat 8:1-4; Luk 5:12-16)
40Pui sipawg tix kaux hoek ka Nawh Cao, grux ngawng khyox khaw ka Nawh ah nin, “Phan Maix koe rhawm ti cox aux kieh aux singax Maix chix heue.” 41Yesux caux rhawm ka nawh mai nyeu taix tix teeh ka kaw an, ah nin ka nawh, “Aux koe rhawm heue. Kieh maix singax heue.” 42Jhawm saux sipawg an grai dom mawx dom an mai nawh singax heue. 43Nawh Cao kieh kaw an lih hu, khaix hoik tawx Nawh lox. 44Pa ah nin ka nawh, “Rien rhawm tix paw vi krai tix ceu kawx ka pui tix kaux kawx, viang mawh nan hu mai jhi cao giex kaing li yaox ka tokaux tix mai tan kheu hoik singax maix, awm ceu pa hoik nhie Mose,#Krub 14:1-32 sonsang mawh mhai rug ka kix heue.” 45Kaw an lih hu jah ti krai grawh grawng ceu in tom nie, tah ku dah dee, tom Yesux ang pon ti laig ka daux veng sidawng. Nawh ot ka plak praix daux tiag mai pui ku dah dee hoek ka Nawh Cao heue.
Nke Ahọpụtara Ugbu A:
MAKUX 1: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012