MATHIEX 28
28
Deeh Kaoh Im
(Mak 16:1-10; Luk 24:1-12; Yo 20:1-10)
1Khaix sidah ngaix twah, yam jah praix ti riang ka daux aliah ngaix, ngaix tix, Marix Magadalax mai Marix tang kaux hoek ti jhak ka simeeig heue. 2Jhak heue, yam an kla reem ting tuk, kheu kawncau cie Siyiex tix kaux lih hoek khaing raoma mai plu plieh ti tik simaox mai ngawm piang an heue. 3Grang nawh awm plu plak praix mai kraung ceep nawh paing awm rawm rha, 4mai pui pau khankix siyaung kheu lhat ka Nawh mai lih mawh awm pui yum heue. 5Kawncau Siyiex an ah nin ka bun an, “Pax paw vi lhat, kheu tawng aux pax sawg Yesux, pa hoik tawk piang khaox lhak heue. 6Nawh Cao ang lai ot tin, kheu Nawh Cao hoik kaoh, awm pa hoik krai Nawh heue. Hoek mai jhak dee hoik it Nawh Cao. 7Nied ti hu krai ka kawncau Nawh khankix grawng hoik kaoh im Nawh Cao khaing krax yum Nawh hu sivoe pex ka daux meung Galilie mai pex tak yaox Nawh Cao tan heue. Aux hoik krai ka pax.” 8Mawh kheu nan kiex nied ti lih hu khaing simeeig mai pa lhat graung tix mai pa kied gaux rhawm mai to hu krai ka kawncau Nawh khankix heue. 9Yesux yaox kiex dom an ah nin, “Kieh pa nhim koe mai pax,” khaix an kiex hoek mai giex caong Nawh mai krub ka Nawh Cao heue. 10Yam an Yesux ah nin ka kiex, “Paw vi lhat, hu krai ka puxaik Aux khankix, nhie kix hu ka daux meung Galilie mai kix tak yaox ka Aux tan heue.”
Lox Krai Cao Pau
11Yam kawn hu kiex, pui pa pau tix blah laig ka daux veng mai krai grawng ceu pa hoik mawh khawmuik ka cao giex kaing li pa ting khankix heue. 12Yam hoik khrawm kix paox tix tau mai kuad song khankix mai hoik kum kawng, kix tawx mau tom nie ka pui naing khankix, 13ah nin, “Pex krai ka pui, Kawncau Nawh khankix hoek yam ponsawm mai briex ti teei Nawh hu, yam laig it ex, 14Phan gum lox in hoek ka yhaok simiang, ex tak kieh nawh fah rhawm mai kieh pex luan khaing krax prawng ca heue.” 15Mawh Kheu nan, kix teei mau mai yuh awm pa cau ka kix heue. Grawng in, tah hu kudah ka daux pui Yudax, tom singaix heue.
Yesux Bleeh Ka Kawncau
(Mak 16:14-18; Luk 24:36-49; Yo 20:19-23; Cau 1:6-8)
16Yam an, Kawncau kao tix kaux hu ka meung Galilie, piang gawng dee hoik krai Yesux ka kix heue. 17Yam yaox kix ka Nawh Cao, kix krub ka Nawh, viang mawh nan, tix blah ang yum rhawm kah heue. 18Yesux hoek ka kix ah nin, “Sibrawm ka daux meung raoma mai piang haktiex hoik tawx ka Aux khawmuik heue. 19Mawh kheu nan pex hu mai yuh ceu pui khawmuik mawh kawncau mau soi mai cubcom kix ka daux ceu kaux Keeing Cao, Kawn Cao mai Khuan Singax Singeh Cao heue. 20Gau kix kieh kix hawt yuh ceu pa hoik nhie Aux ka pex khawmuik, Aux tak ot tau mai pex jheung jheung, tom hoek bawg yam sidah haktiex heue.”
Nke Ahọpụtara Ugbu A:
MATHIEX 28: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012