Mag 16
16
Yeso fə zweme ane iwu
(Mat 28:1-8; Lug 24:1-12; Jɔn 20:1-10)
1Ane aneg àzwètì mə̀Ju ya fə che, Mèri Màdàlen tì Mèri ngɔb Jem tì Sàlomè ya zon titeti ni ghò zɔʼ awu àze Yeso angu. 2Isusu Sɔndè, ne nyùmə̀ ya fə tòʼo, mbi ya ghò atog iseg ze. 3Mbi yaya yḛ̀ nè ghà mbɔb mbɔb gha, “Àkə we biri bìŋi iteg kyen we ne ichug iseg?” 4Anyumə̀ ne mbi ya se tìnde iban iseg we, mbi ya nèn, si bàd gha mbi fə bìŋi iteg kyen we chì. 5Anyumə̀ ne mbi ya nyi inga iseg we, mbi ya bàd ajɔŋ mɔ̀ʼɔ ne ya chughi aba abo jəghi. Wì ya zì ndwi se se ne fu fu. Mbi ya bàd ane, anug chè awɔb.
6Ajɔŋ ze ya ghà inɔb gha, “Imbə̀ʼ anug azo̰ chè yi awən. Mbə kə kə̀bə̀ Yeso we a Nazarèd, ne mbi ya kɔ̀mbi igun azed abaʼri? Chəyi məd aŋa! Wì fə zweme ane iwu! Mbə̀ nḛ, aŋa ya asiŋi ne mbi ya nɔ̀ŋì aməd angu. 7Mbə̀ ghò yaʼ abə mə̀mə̀nənùg məd fɔrɔ abə Pità pè ghà inɔb gha Yeso we ghò inɔb imbìghè a Galìli. Mbə̰ biri bàd aməd angu kwàʼ icheg ne wì ya fə gha inən.”
8Mə̀yi mbe ya binde, Anug ya chè awɔb, mbi si dù inga iseg we nòrò nè bìnde. Chəyi mbi ya gha anug mɔ̀ʼɔ abə wə̀d imbə̀ʼ icheg ne mbi yaya bɔ.
Yeso ya chwi ìwi nyɔd abə Mèri Màdàlen#16:9 Chəyi ìŋwàʼrì anun mɔ̀ʼɔ beri ikwiti yiyi mbo̰ 9 - 20.
(Mat 28:9-10; Jɔn 20:11-18)
9Anyumə̀ ne Yeso ya zweme ane iwu isusu Sɔndè, wì ya bì chwi ìwi nyɔd abə Mèri Màdàlen we ne wì ya chi izwighi tibɔ̀ŋ ìsàmbe inga məd. 10Mèri ya bàd aməd si nɔ̀ʼ ghò ghà abə bəd mbe ne ya yaʼi tì Yeso ne mbi yaya sɔ̀mnɔ̀ bə̀ dèghè. 11Si ya gha, anyumə̀ ne mbi ya zughi gha Yeso we izɔm, bə̀ zug gha Mèri fə bàd aməd, chəyi mbi ya bḛ.
Yeso ya chwi ìwi nyɔd abə ìmbi mə̀mə̀nənùg məbe
(Lug 24:13-35)
12Ane nyùmə̀ mɔ̀ʼɔ ya che, Yeso ya chwi ìwi nyɔd abə ìmbi mə̀mə̀nənùg məbe ane iku inɔnjì ndəŋ. Mə̀mə̀nənùg mbe yaya ghò inɔb inga aben. 13Anyumə̀ ne mbi ya bàri gha à ya məd, mbi ya ywìrì bə̀ndì ghò ghà abə mbin tì mə̀mə̀nənùg. Si ya gha, chəyi mbin tì mə̀mə̀nənùg ya bḛ anug ne mbi yaya ghà.
Yeso chwi ìwi nyɔd abə mə̀mə̀nənùg mbe ìghum chɔ̀b imɔʼ
(Mat 28:16-20; Lug 24:36-49; Jɔn 20:19-23; Ìfà 1:6-8)
14Yeso ya si nwḭ̀yḛ̀ chwi ìwi nyɔd abə mə̀mə̀nənùg mbe ìghum chɔ̀b imɔʼ ne mbi yaya jə̀ghə. Wì ya ghàm kyen inɔb imbə̀ʼ icheg ne chəyi mbi ya beri ibḛfiŋ bə̀ fɔrɔ imbə̀ʼ icheg ne ìtɔb fìŋ ya tu. Wì ya ghì ane imbə̀ʼ icheg ne chəyi mbi ya bḛ inug mbe ne bəd mbe ne ya bàri aməd ane wì ya fə zweme ane iwu, ya gha. 15Wì ya ghà inɔb gha, “Mbə̀ gho inga isəg ijìm, ghò ghà ikən chɔm abə bəd məjìm. 16Wə̀d ne bḛ, niŋ mənib, wì biri pum. Àsi wə̀d ne chəyi wì bḛ, Ŋwiye biri zì isaʼi igun məd. 17Bəd mbe ne bḛ biri ghì ineni inug mbo̰: Mbi biri kamni izwighi tibɔ̀ŋ chì inga bəd ane ìmə ikum; mbi biri ghàm tìngam iben ndəŋ; 18mbi biri nyimi jo ane ìmbɔb ibo; anyumə̀ ne mbi no iniʼi, chəyi wì biri ghì aghi mɔ̀ʼɔ inɔb; mbi biri nɔ̀ŋì ìmbɔb ibo igun bəd aghɔn, ighɔn mèg.”
Ŋwiye ya niŋ Yeso ikaŋ àbɔ̀ŋɔ
(Lug 24:50-53; Ìfà 1:9-11)
19Anyumə̀ ne Anɔŋisəg Yeso ya fə ghàmi abə mə̀mə̀nənùg mbe, Ŋwiye ya niŋ aməd ikaŋ àbɔ̀ŋɔ. Wì ya pè chùghi aba abo jəghi Ŋwiye. 20Mə̀mə̀nənùg mbe ya dù ghò ghà ikən chɔm we isiŋi ijìm. Anɔŋisəg yaya fàʼà tì inɔb icheg ne wì ya nàʼi ika inɔb mbi nè ghìyə̀ inug yeti. Wì ya nàʼ ika we inɔb ane ni chwi gha inug mbe ne mbɔb yaya ghà ya tesiʼ. À ya ane.
Nke Ahọpụtara Ugbu A:
Mag 16: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL