Lug 1
1
Aton ane àŋwàʼrì azo̰
1Wə̀d kyen Tìyofilòs, bəd ndan ndàn fə ghì ìwɔb ika ni ŋwàʼrì imbə̀ʼ inug mbe ne ya du inga ìfa fìghàra. 2Mbɔb ŋwàʼrì kwàʼ icheg ne tì ya zughi abə bəd mbe ne ya bàri inug mbe ijìm nɔ̀ʼ ane nyùmə̀ ne Yeso ya ko àze àfàʼì. À ya bəd ne ya bə̀ fàʼ ni chètì ikən chɔm we. 3Wə̀d kyen Tìyofilùs, icheg ne mə fə nwḛ inug mbo̰ ijìm kwàʼ igun ibɔʼì, nɔ̀ʼ ane mbi ya ko ko, mə bə̀ kɔ̀ndi gha mə ŋwaʼra ine kwàʼ icheg ne mbi ya du. 4Mə ŋwàʼrì anìŋ ni gha àghò kyeri tesiʼ we ne yaʼi inga inug ijìm mbe ne mbi gha ine.
Inug imbə̀ʼ icheg ne mbi biri gwi Jɔn ne nàʼà mənib
5Anyumə̀ we ne Erɔ̀d ya yaʼi ifɔn a Jùdeyà, wə̀d mbàn Ŋwiye mɔ̀ʼɔ ya yaʼ angu inga iwaŋ àfàʼì Àbijà ne ikum məd ya Zàkàriyà. Iweg məd ya yaʼ Àlisabèd, aghaŋ inga inəbi Eròn. 6Mbɔb məjìm ya təm kòʼ imbìghè abə Ŋwiye. Mbɔb yaya zùgrə tikə bə̀ nɔ̀ŋɔ̀ mə̀nɔ̀ʼɔ̀ Anɔŋisəg kwàʼ ane icheg ne koʼi. 7Si ya gha, chəyi mbi ya beri ŋwan imbə̀ʼ icheg ne Àlisabèd ya yaʼ kɔ̀m àyi. Mbɔb məjìm ya fə bə̀ nùn.
8Aneg mɔ̀ʼɔ, Zàkàriyà yaya fàʼà inga mbàn Ŋwiye ane nyùmə̀ àfàʼì məd imbə̀ʼ icheg ne mbi yaya fàʼà akəri akəri. 9Icheg ne mə̀nɔ̀ʼɔ̀ bəd mbàn Ŋwiye ya chwi, mbi ya buʼri tikaʼì chɔʼ Zàkàriyà gha wì nyi inga mbàn Anɔŋisəg tɔ̀n ìnen. Ane, wì ya nyi. 10Nyùmə̀ we ne məd ya yaʼi inga tɔ̰̀ ìnen, inɔ̰ bəd we ne ya yaʼi isəg yaya chàʼrà Ŋwiye.
11Angirə̀ Anɔŋisəg ya dù ibo imbìghè, təm aba abo jəghi ane ikwijə̀ŋ ìnen. 12Anyumə̀ ne Zàkàriyà ya bàri aməd, tiwḛ ya gwì, wì bìnde, bɔ. 13Angirə̀ ya si ghà ibo gha, “Zàkàriyà, imbə̀ʼ àghò bɔ awe. Ŋwiye fə zug àze àdìghì. Ìwe iweg Àlisabèd biri gwi ŋwan mbaŋà. Àghò chubə aməd ane Jɔn. 14Àghò biri ya taŋ gyènde. Bəd ndan ndàn biri ya bə̀ gyènde imbə̀ʼ icheg ne mbi gwi aməd. 15Wì biri yaʼ ijiʼi wə̀d imbìghè abə Anɔŋisəg. Imbə̀ʼ wì no yi mənoʼ ka ka ka. Azwighi Ŋwiye biri sweg inga məd ni ko ane nyùmə̀ ne mbi biri gwi aməd. 16Wì biri ghì bəd Izre nɔʼ nɔʼ bə̀ndì yèʼe abə Ŋwiye, ìwɔb Anɔŋisəg. 17Wì biri chè imbìghè abə Anɔŋisəg tì azwighi fɔrɔ ika we ne Wə̀dkə̀n Ŋwiye Èlayijà ya bèri. Wì biri ywiri fɔti mə̀mbaʼ tì bɔn. Wì biri ghì bəd tìzughə̀ bə̀ŋì fìŋ, si bèrì ikɔndi icheg bəd ne təmi kòʼ. Wì biri ghì bəd chuʼri nyɔd se ghɔ̀mɔ̀ Anɔŋisəg.”
18Zàkàriyà ya biri abə angirə̀ we gha, “Mə kə ghi kyeri iye gha anug azo̰ ne àghò gha ya anug tesiʼ? Mə fə nùn. Ìmə iweg fə bə̀ nùn.”
19Angirə̀ ya ywìtì ibo gha, “Mo ya Gabìriyà ne tə̀mə imbìghè Ŋwiye. Ŋwiye tɔm amə gha mə yeʼe ghàm ine bə̀ ghà ikən chɔm gho̰ ine. 20Icheg ne àghò jə̀mi ikən gho̰, chəyi àghò biri ywiri ghàm. Àghò biri chim tizi ghò pè ane aneg ne anug azo̰ ne Ŋwiye kàʼi biri dù.”
21Icheg ne Zàkàriyà yaya ghàmà tì angirə̀ we ane, inɔ̰ bəd we ne ya yaʼi isəg yaya ghɔ̀mɔ̀ gha nji Zàkàriyà dù. Chəyi wì du. Mbi yaya se kɔ̀ndɔ gha, “Àkə aghə ghi wì si tàn inga mbàn Ŋwiye anìŋ?” 22Anyumə̀ ne wì ya du, chəyi wì yaya ywìrè ghàmà. Wì yaya se mə̀tə̀ inug inɔb ane ibo. Mbi ya kyeri gha wè bàd anatì njə̀m ne Ŋwiye ghàmi ibo inga mbàn Ŋwiye.
23Ane nyùmə̀ àfàʼì məd inga mbàn Ŋwiye ya mèghi, wì ya kurə ghò a achan. 24Chəyi agha ya sa, iweg məd, Àlisabèd bɔŋ ibum. Wì ya chughi inə̀mbi inga nəb ane aməg ata̰. 25Wì yaya se gha, “Anɔŋisəg wètì amə, chì tìnìrètog igun inum inga bəd.”
Angirə̀ ghà icheg ne mbi biri gwi Yeso
26Nyùmə̀ we ne Àlisabèd ya si tì ibum ane aməg tìfughə, Ŋwiye ya tɔm angirə̀ Gabìriyà a Nazarèd. Nazarèd ya asiŋi ne yaʼi inga Galìli. 27Wì ya tɔm aməd abə Mèri. Mèri ya ŋwan àyi ne chəyi wì ya kiri kyeri mbaŋà. Wì ya fə taŋ inam tì wə̀d mɔ̀ʼɔ ne ikum məd ya Jòseb. Jòseb ya aghaŋ inga inəbi ifɔn Dèvid. 28Angirə̀ ya pè ghà abə Mèri gha, “Mə chàʼrì awe. Anɔŋisəg we tì ine. Ŋwiye ghì ìchɔ̀mì ine tì icha inga.”
29Icheg ne wì ya ghàmi ane, anug ya taŋ chè Mèri. Wì ya kɔndi inga fìŋ gha, “Àkə iku àchàʼrì weg gho̰?” 30Angirə̀ ya ghà ibo gha, “Mèri, imbə̀ʼ àghò bɔ awe. Ŋwiye ghì ìchɔ̀mì ine tì icha inga. 31Nḛ! Àghò biri bɔ̀ŋ ibum, gwi ŋwan mbaŋà, chùb aməd ane Yeso. 32Məd biri yaʼ kwàʼ ijiʼi wə̀d. Bəd biri ya kàrà aməd gha Ŋwan Ŋwiyekɔʼ. Ŋwiye ne yaʼi Anɔŋisəg biri zɔʼ aməd ane ifɔn icheg ne wì ya zɔʼi mbaʼ kyen məd, Dèvid. 33Məd biri yaʼ ifɔn igun aghaŋ inəbi àzi Jàkɔb ane ighə̀m imɔʼ. Chəyi anug ìfɔ̀n məd biri nɔʼ nwḭ̀yḛ̀.”
34Mèri ya biri abə angirə̀ we gha, “Mo ya ŋwan àyi ne chəyi mə̀ kiri kyeri mbaŋà, anug azo̰ kə ghì chè iye?” 35Angirə̀ ya ywìtì ibo gha, “Azwighi Ŋwiye biri yeʼe igun ine. Ika Ŋwiyekɔʼ biri bə kəndi awe. Ane, bəd biri se kàrà ŋwan ìzḛzḛ gho̰ ne àghò biri gwi, ane Ŋwan Ŋwiye. 36Àghò wendi àze afud Àlisabèd. Bəd yaya gha məd ya kɔ̀m àyi ne chəyi wì biri gwi. Si ya gha, məd we tì ibum ane aməg tìfughə, ka wì fə jiʼì nùn. 37Àzo̰ ya ni chwi gha chəyi anug mɔ̀ʼɔ ka, ne ka chè Ŋwiye ni fàʼ.”
38Mèri ya ywìtì gha, “Mo ya wə̀d àfàʼì abə Anɔŋisəg. Ŋwiye faʼa anug azo̰ inum icheg ne àghò gha.” Angirə̀ we ya si nɔ̀ʼ ghò yi.
Mèri ghò mùg tì Àlisabèd
39Anyumə̀ ne Angirə̀ ya ghàmi tì Mèri, chəyi agha ya sa, Mèri ya nɔ̀ʼ zàmbì kɔʼ ghò inga aben mɔ̀ʼɔ ne yaʼi inga tiwum te a Jùdeyà. 40Wì ya pè, nyi inga nəb Zàkàriyà, chàʼrì Àlisabèd. 41Kwàʼ anyumə̀ ne Àlisabèd ya zughi ichaʼri ìwi Mèri, ŋwan ya nəki ibo inga fibum. Azwighi Ŋwiye ya bə̀ sweg inga Àlisabèd. 42Àlisabèd ya si kyen kwàʼ ane gì ka ka gha, “Ŋwiye zì àbɔrɔ̀bɔd igun ine chè mə̀yi məjìm, bə̀ zì àbɔrɔ̀bɔd igun Ŋwan we ne àghò biri gwi. 43Mo kə we ne Ŋwiye ghumni, ghì gha àghò, ngɔb ìwi Anɔŋisəg yeʼe mùg amə? 44Kwàʼ anyumə̀ ne mə̀ kə zùghi ìwe ichaʼri, ŋwan we ne inum inga fibum gyèndi nəg. 45Ŋwiye zì àbɔrɔ̀bɔd igun ine ne bḛ gha anug ze ne Anɔŋisəg gha biri dù ane tesiʼ.”
Mèri ghùmni Ŋwiye ane ikyeg
46Anyumə̀ ne Àlisabèd ya gha ane, Mèri ya si gha,
“Ìmə fìŋ ze ghùmnə Anɔŋisəg.
47Àmə azwighi ze bə̀ gyènde tì Ŋwiye ne pùmnə amə.
48Ŋwiye wèndi amə, anatì wə̀d àfàʼì məd icheg inum.
Nɔ̀ʼ tèchɔ̀ŋ, tiwaŋ bəd tijìm biri se ghà gha, mo ya àyi àbɔrɔ̀bɔd,
49imbə̀ʼ inug kyen kyen mbo̰ ne Atumbisəg fə ghi inum.
Məd ya Ŋwiye ne ikum məd zḛ mànì.
50Inga tiwaŋ bəd tijìm, Məd we bèrè àsɔ̀mnəfiŋ abə bəd mbe ne ghùmnə aməd.
51Wè ghì iyeti inug ane àzi abo,
ta bəd mbe ne nɔ̀ nyɔd bə̀ chìkì ìtɔb tikɔndi.
52Wè swi məfɔn kyen kyen aseg, chì igun ìmbɔb itən,
si nɔ̀ inatì bəd ikaŋ.
53Wè nàʼ ighi chɔm abə bəd njèg,
si kàmni bəd ighi, mbi ghò ibo zɔbi.
54Wè fàʼ anug ze ne wì ya kàʼi abə ìmba mə̀mbaʼ kyen,
bə̀ chwi àsɔ̀mnəfiŋ abə wə̀d àfàʼì məd, Izre.
55Wè wèndi ni bèrì àdìgrì abə Abràham bə̀ fɔrɔ abə aghaŋ inəbi məd ane ighə̀m imɔʼ,
icheg ne wì ya kàʼi ìmba mə̀mbaʼ kyen.”
56Mèri ya chughi abɔ̀ʼ Àlisabèd icheg ane aməg atad bɔŋ si bə̀ndì ghò a achan.
Mbe gwi Jɔn we ne yaya nàʼà mənib
57Ane nyùmə̀ ya kòʼi abə Àlisabèd ni gwi, wì ya gwi ŋwan mbaŋà. 58Bəd iban achan fɔrɔ ifud məd ya zug ìchɔ̀mì gho̰ ne Anɔŋisəg ghi igun məd. Ane, mbɔb məjìm ya se gyènde abɔ̀ʼ məd.
59Anyumə̀ ne ŋwan we ya yaʼi ineg ìfàmi, mbi ya yeʼe ni ŋwed aməd. Mbi yaya se kə̀bə̀ ni chùb ikum məd ane Zàkàriyà, ne ya ikum mbaʼ məd. 60Si ya gha, ngɔb məd ya gha, “Indèʼ! Ikum məd ya Jɔn.” 61Mbi ya ghà ibo gha, “Chəyi wə̀d mɔ̀ʼɔ inən inga inəbi ne beri ikum we.” 62Mbi ya ghàm abə mbaʼ ŋwan ane ibo gha, “Àghò biri chùb ikum ŋwan ane we?” 63Wì ya ghàm ane ibo, bìri aba tafìrè. Mbi ya nàʼ aba tafìrè ibo. Məd ya ŋwàʼrì igun gha, “Ikum ŋwan ya Jɔn.” Anug ya chè bəd məjìm ne ya yaʼi angu. 64Kwàʼ anyumə̀ we, wì ya ywìrì ko se ghàmà, se nàʼà ighumni abə Ŋwiye. 65Bəd məjìm mbe ne yaya chùghə iban inɔb ya bɔ. Mbi ya ghàm inug mbo̰ ijìm ghò pè fɔrɔ inga iba aben məJùdeyà ne yaʼi ikaŋ tiwum. 66Wə̀d ijìm ne ya zughi anug azo̰, ya kɔndi inga fìŋ bə̀ se bìre gha, “Ŋwan gho̰ kə ghum yaʼ iku ŋwan weg?” Ze ya fə dù zen gha ika Anɔŋisəg we igun məd.
Zàkàriyà ghùmni Ŋwiye ane ikyeg
67Azwighi Ŋwiye ya sweg inga Zàkàriyà, mbaʼ ìwi Jɔn, wì ghà ikən Ŋwiye gha,
68“Ighumni yaʼ abə Anɔŋisəg, ne ya Ŋwiye mə̀Izre,
imbə̀ʼ icheg ne məd yèʼe ni wètì ìmbi bəd bə̀ zèri awɔb.
69Məd fə nàʼ wə̀d ne beri ika ne pùmnə awa,
Tengàŋ ya ŋwan ane aghaŋ inəbi ifɔn Dèvid, ne ya wə̀d àfàʼì Ŋwiye.
70Ŋwiye ya fə ghùm chè inga bədkə̀n ìzḛzḛ ghàm
71gha wì biri pumni awa chì inga ikye abo abə ìmba bəd ìpàb,
fɔrɔ ikye abo abə bəd mbe ne bà̰ awa.
72Wì ya bə̀ gha, zìye biri chwi àsɔ̀mnəfiŋ abə ìmba mə̀mbaʼ aneg,
bə̀ wèndi ikan ìzḛzḛ məd,
73ikan we ne wì ya sɔbi tì Abràham, ìwa mbaʼ aneg
74ni ghì gha tè pum ikye ibo abə ìmba bəd ìpàb,
bə̀ ghì gha tè fàʼà ibo ne chəyi ibɔ,
75ni ghì gha tì yaʼ inga ìzḛzḛ bə̀ təm kòʼ imbìghè abə Ŋwiye
ane ìmba ineg ijìm.
76Ane, àghò, ìmə ŋwan, bəd biri ya kàrà awe gha Wə̀dkə̀n Ŋwiyekɔʼ,
imbə̀ʼ icheg ne àghò biri chè imbìghè abə Anɔŋisəg
ni tangi inɔnjì məd.
77Àghò biri chwiti abə bəd gha Ŋwiye biri pumni awɔb
ane wì waʼi ìmbɔb inug tibɔ̀ŋ.
78Ìwa Ŋwiye ya bɔ̀tɔ bə̀ bèrè àsɔ̀mnəfiŋ.
Wì biri ghì gha aneg ni pumni bəd ze zuʼ tikaŋ igun ina icheg ne ituʼ we chə̀ghə,
79ni chwi ìzḛzḛ abə bəd mbe ne kiri biri izimi
bə̀ bɔ gha mbi biri ku ne chəyi mbi kyeri Ŋwiye,
bə̀ chwi inɔnjì gha tè chughi ane àbɔrɔ̀bɔd.”
80Ŋwan we ya kweg, Azwighi sweg inga məd. Wì ya chughi inga tibad zɔbi ghò pè ane aneg ne wì ya chwi ìwi nyɔd abə mə̀Izre.
Nke Ahọpụtara Ugbu A:
Lug 1: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL