Lug 8
8
Mə̀yi ne yaya yḛ̀ abɔ̀ʼ Yeso
1Chəyi agha ya sa, Yeso yaya yḛ̀ iben iben nè chètè ikən chɔm bə̀ nè ghà anug ìfɔ̀n Ŋwiye. Bədtɔm məd mbe ìghum chɔ̀b ibe yaya yḛ̀ abɔ̀ʼ məd. 2Mə̀yi mɔ̀ʼɔ yaya bə̀ yḛ̀ abɔ̀ʼ. Mə̀yi mbo̰ ya mbe ne Yeso ya ghù ìmbɔb ighɔn bə̀ kàmni izwighi tibɔ̀ŋ chì inga inɔb, icheg Mèri Màdàlen. Mə̀yi mbo̰ yaya: Mèri we ne izwighi tibɔ̀ŋ ìsàmbe ya du inga məd. Mbi yaya bə̀ kàrà aməd ane Màdàlen. 3Tì Jòwanà iweg ìwi Chuzà. Chuzà gho̰ ya yaʼ wə̀d àfàʼì kyen inga nəb Erɔ̀d. Sùsanà fɔrɔ mə̀yi ndəŋ ndan ndàn yaya bə̀ angu. Mə̀yi mbo̰ yaya wètè Yeso tì mə̀mə̀nənùg məd inga ìmbɔb ìbàn.
Ngam məgri imbə̀ʼ fitam ngwèd
(Mat 13:1-9; Mag 4:1-9)
4Bəd ya nɔ̀ʼ iben iben fète iban Yeso. Icheg ne inɔ̰ bəd yaya kwèghe, Yeso ya ghàm ìngam məgri gha, 5“Wə̀d mɔ̀ʼɔ ya ghò a mben ni nwḭ̀ fitam ngwèd. Icheg ne wì yaya nwḭ̀yḛ̀ fitam, ìti mɔ̀ʼɔ ya fendi igun inɔnjì. Bəd chè yèn igun. Tìnən yeʼe pè gwe mèrì. 6Ìti mɔ̀ʼɔ ya fendi igun igho. Ti ya fu si zɔm imbə̀ʼ icheg ne chəyi yaya mənib. 7Ìti mɔ̀ʼɔ ya bə̀ fèndi inga agyen njəŋ. Ti ya fu, agyen njəŋ ze kweg nìmni. 8Ìti mɔ̀ʼɔ ya bə̀ fèndi igun ìseg chɔm. Ti ya fu, kweg icheg chɔm, bə̀ ko titam achug iki chè inun ne mbi ya nyɔ̀ʼi.”
Yeso ya ghàm ane si ghà inɔb gha, “Wə̀d ne beri àtɔ̀ŋi wì zug.”
Aton ane tìngam məgri
(Mat 13:10-17; Mag 4:10-12)
9Mə̀mə̀nənùg ya biri aton ane ìngam məgri gho̰ abə Yeso. 10Wì ya ywìtì inɔb gha, “Ŋwiye fə fìʼì àzən atog ni kyeri inug imbə̀ʼ anug ìfɔ̀n ikaŋ. Àsi abə mbin tì bəd, mə ya ghàmà yaʼ ìngam məgri inɔb. Anìŋ ya ni ghì gha, ‹Mbi biri nèn, chəyi mbi biri bàd. Mbi biri bə zug, chəyi mbi biri bə kyeri.›
Yeso tòʼrì ìngam məgri imbə̀ʼ fitam ngwèd
11Aŋa ya aton ane ìngam məgri we. Fitam ngwèd fe ya Ìngam Ŋwiye. 12Titam te ne ya fendi igun inɔnjì ya chwìye bəd mbe ne zùghə Ìngam Ŋwiye chəyi mbe bḛ. Aton ya gha, wə̀d ìpàb ya chìyè Ìngam Ŋwiye we inɔb inga fìŋ ni ghì gha imbə̀ʼ mbi bḛ, ghum nɔ̀ʼ pum. 13Titam te ne ya fendi igun igho ya chwìye bəd mbe ne mə̀ zug Ìngam Ŋwiye, mbi niŋ ati ati ane igyendi. Si ya gha, chəyi Ìngam Ŋwiye taŋ nyi inɔb inga fìŋ. Mbɔb ya bèrè ibḛfiŋ məyi ane nyùmə̀ kwa kwa. Àkwàʼrì mə̀ yeʼe, mbi waʼ ìwɔb ibḛfiŋ. 14Titam te ne ya fendi inga ìjə̀ŋì ya chwìye bəd ne zughi Ìngam Ŋwiye bḛ. Si ya gha, icheg ne nyùmə̀ we chè, anug ni nwìʼì nyɔd imbə̀ʼ ighi igun isəg tì anug ni nwìʼì nyɔd imbə̀ʼ ikab fɔrɔ anug ne ghì ighi mbe ne nyàmnyɔd ze ghə̀ʼrə̀ ya kɔ̀rɔ awɔb bə̀ ghìyə̀ chəyi mbɔb mbe kwèghe kà ane anug Ŋwiye. 15Titam te ne ya fendi igun ìseg chɔm ya chwìye bəd mbe ne beri fìŋ chɔ̀m. Mbɔb ya zùghə Ìngam Ŋwiye, nìŋə nyìme icheg chɔm, nyìʼè fìŋ ni fàʼ anug ne Ìngam Ŋwiye gha.”
Ngam məgri imbə̀ʼ anam
(Mag 4:21-25)
16Yeso ya ywìrì chè imbìghè ni gha, “Chəyi wə̀d mɔ̀ʼɔ ne che anam kùbrə aton akwiye. Chəyi wə̀d mɔ̀ʼɔ ne bə̀ che anam chà aton abaʼ. Mbi ya mə̀ che anam, mbi nɔ̀ŋì asaŋ igun atən anam ni gha ze biri zen bəd ne nyḭ̀yḛ inga nəb ya bàrà isiŋi.
17Mbə̀ kyeri gha chəyi aghi mɔ̀ʼɔ ne yaʼ inə̀mbi ne chəyi mbi biri ghì ze dù asaŋ. Chəyi ìsə mɔ̀ʼɔ ne biri ghum chughi witì mbi ghì wi gwè asaŋ.
18Ane, mbə̀ taŋ zì atog ni zug inug mbe ne mə ghà inən. Bəd ne beri ìmbɔb ighi, mbi biri yètì ighi inɔb. Wə̀d ne chəyi wì beri ighi, ka à ya bè àze kwa kwa ze ne wì kɔ̀ndi gha zìye bèrì, mbi biri niŋ ibo.”
Ngɔb ìwi Yeso tì Məfi ìmbi Yeso
(Mat 12:46-50; Mag 3:31-35)
19Ngɔb ìwi Yeso tì məfi ìmbi Yeso ya yeʼe ni bàd aməd. Icheg ne bəd ya nɔʼi, chəyi icheg ya yaʼi ni pè iban məd. 20Wə̀d mɔ̀ʼɔ ya ghà ibo gha, “Ìwe ngɔb tì ìmbe məfi mbe isəg kə̀bə̀ ni bàd awe” 21Yeso ya ywìtì inɔb gha, “Ìmə ngɔb tì ìmbum məfi ya bəd mbe ne zùghə Ìngam Ŋwiye bə̀ fàʼà icheg ne we ghà.”
Yeso tə̀mni afim.
(Mat 8:23-27; Mag 4:35-41)
22Aneg mɔ̀ʼɔ, Yeso ya ghà abə mə̀mə̀nənùg məd gha, “Tè bani atəŋ kyen kyen azo̰ gho injḭ igyi ìywin.” Ane, mbi ya nyi inga abaŋ igyi ko gu ghò. 23Icheg ne mbi yaya bàna atəŋ kyen kyen ze, Yeso ya fḛ angwḛ. Afim ka ka ya ko gu chè igun igyi ghì àwàwà nɔ̀ʼ se nyḭ̀yḛ inga abaŋ igyi. Abaŋ igyi ze yaya se swìʼe kə̀b nyi aton igyi. Mbi yaya se bɔ gha mbɔb biri ku. 24Mə̀mə̀nənùg ya ghò nɔ̀ aməd ghà ibo gha, “Masà, Masà, tì ya anìŋ ichug iwu!”
Yeso ya nɔ̀ʼ angwḛ kyen abə afim ze fɔrɔ abə àwàwà ze. Afim ya sɔbɔ, àwàwà bə̀ zù. Isiŋi si nyiʼì bɔd gwèd. 25Yeso ya si bìri abə mə̀mə̀nənùg məd gha, “Ìwən ibḛfiŋ kə aya?” Ane, mbɔb ya binde, bə̀ se yète bə̀ se ghàmà mbɔb mbɔb gha, “Àkə iku wə̀d weg gho̰ ne ghàmà, afim fɔrɔ àwàwà zùghə məd?”
Yeso ghù wə̀d ne izwighi tibɔ̀ŋ ya yaʼi inga məd
(Mat 8:28-34; Mag 5:1-20)
26Yeso tì mə̀mə̀nənùg məd ya bàni atəŋ kyen kyen ze a Galìli ghò injḭ ìywin aba aben ze a Gèrasenè. 27Kwàʼ icheg ne Yeso ya dù inga abaŋ igyi tə̀ʼ aghog igun adiŋi igyi, wə̀d mɔ̀ʼɔ inga aben ze ne izwighi tibɔ̀ŋ ya yaʼi inga məd ya ghò bɔ̀mbì tì Yeso. Agha ya fə sa ne wə̀d gho̰ yaya yḛ̀ tì ìkyèri ikye. Chəyi wì yaya ywìrè chùghə inga nəb. Wì yaya se chùghə yaʼ inga tìseg ne mbi to inga tìgho. 28Anyumə̀ ne wì ya bàra Yeso, wì ya gùg ibo imbìghè, dèg, si kyen ane gì ka ka gha, “Yeso Ŋwan Ŋwiyekɔʼ, àkə aghə ne àghò ya kə̀bə̀ ni ghì tì inum? Mə boʼ ibo ine, imbə̀ʼ àghò chə awe awum?” 29Wì ya dèg ane imbə̀ʼ icheg ne Yeso ya kyen abə azwighi tibɔ̀ŋ ze gha ze duwə inga məd. Mà nyumə̀ ijìm ne azwighi azo̰ nɔʼi inga məd, ka mbi kɔd ibo fɔrɔ ighog ane mə̀chen, nɔ̀ŋì wə̀d ne kyèʼè məd, wì mənyìʼ tə̀ndi mə̀chen mbe bə̀ bu. Azwighi tibɔ̀ŋ azo̰ yaya ghìyə̀ wì gho inga tibad zɔbi.
30Anyumə̀ ne wə̀d we ne azwighi tibɔ̀ŋ ya yaʼi inga məd ya ghàmi ane, Yeso ya biri ibo gha, “Ìwe ikum kə we?”
Wì ya ywìtì gha, “Tì ya inɔ̰!” Wə̀d we ya ywìtì ane imbə̀ʼ icheg ne izwighi tibɔ̀ŋ nɔʼ nɔʼ ya yaʼ inga məd. 31Izwighi tibɔ̀ŋ mbe ya boʼ ibo abə Yeso aghəm nɔʼ nɔʼ gha, “Imbə̀ʼ àghò cha awe awa inga ibighi kyen we ne chəyi ìnwḭ.” 32Inɔ̰ ìkuŋə mɔ̀ʼɔ ya yaʼ aba iwum ze jə̀ghə. Ane, izwighi tibɔ̀ŋ mbe ya boʼ ibo abə Yeso gha wè saŋa awɔb mbɔb nyi inga ìkuŋə mbe. Yeso ya sàŋì awɔb gha mbe nyi inga ìkuŋə mbe. 33Izwighi tibɔ̀ŋ mbe ya dù inga wə̀d we nyi inga ìkuŋə mbe. Mbi ya ghì inɔ̰ ìkuŋə we ijìm swiʼi aba iwum we, sùyə̀ ibə̀m kəŋ, fen inga atəŋ kyen ze, si fum.
34Bəd mbe ne yaya jə ìkuŋə mbe ya bàd anug ne du. Mbi ya sàkà nòrò ghò nè ghà anug ne dù abə bəd məjìm inga aben fɔrɔ abə bəd ndəŋ inga isiŋi mbe ne yaʼi iban iban. 35Bəd ne ya zughi ya ghò ni bàd anug ne du. Anyumə̀ ne mbi ya pe iban Yeso, mbi ya bàd wə̀d we ichughi, aseg, imbìghè abə Yeso, ne wì zi ìti ndwi, bə̀ se tì ìwi iwe chɔm. Mbɔb məjìm ya bɔ. 36Bəd ne ya bàri anug ne ya du, ya mə̀tì icheg ne Yeso ghù wə̀d we ne izwighi tibɔ̀ŋ ya yaʼi inga məd abə mə̀mbin. 37Ibɔ ka ka ya gwì bəd mbe aba aben ze, mbi si ghà abə Yeso gha, “Dùyə awe inga àza aben.” Icheg ne mbi ya gha ane, Yeso ya nyi inga abaŋ igyi ghò yi. 38Bɔŋ wì ya se ghò, wə̀d we ne izwighi tibɔ̀ŋ ya du inga məd ya boʼ ibo abə Yeso, ghà ibo gha, “Àghò si mə̀ yeʼe abɔ̀ʼ ine.” Yeso ya ton ghà ibo gha. 39“Àghò bəndə ghò ine achan, ghò ghà iyeti inug ne Ŋwiye ghi ine.”
Wə̀d we ya ghò nè ghà iyeti inug ne Yeso ghi igun məd inga aben ijìm.
Yeso zwemni ŋwan wì Jarùs bə̀ ghù àyi we ne yaya ghɔ̰̀ iseg
(Mat 9:18-26; Mag 5:21-43)
40Anyumə̀ ne Yeso ya bə̀ndì ghò injḭ atəŋ ìywin, bəd ya gyendi ni niŋ aməd. Mbi ya gyendi ane imbə̀ʼ icheg ne mbɔb məjìm yaya se ghɔ̀mɔ̀ aməd ghɔmi. 41Wə̀d mɔ̀ʼɔ ne ikum məd ya Jarùs ya ghò ibo. Jarùs gho̰ ya yaʼ atog wə̀d inga ichamì Ŋwiye we inga aben ze. Wì ya pè imbìghè abə Yeso, swàrà aseg, gha, “Mə boʼ ibo, àghò yeʼe inum inga nəb. 42Ìmə ŋwan àyi ne mə beri məyi we imɔʼ we ghɔ̰̀ se ane ati ni ku.” Ŋwan we ya yaʼ tituʼ ìghum chɔ̀b ibe.
Yeso ya nɔ̀ʼ ko ghò abɔ̀ʼ məd. Inɔ̰ bəd ne nyəmə nyə̀mə̀ kad Yeso chuʼ ya bə̀ bèni abɔ̀ʼ məd. 43Àyi mɔ̀ʼɔ ya yaʼ inga inɔ̰ we ne yaya ghɔ̰̀ ìseg. Wì ya fə zə̰ ngəʼ ane tituʼ ìghum chɔ̀b ibe. Wì ya fə chìkì ikab ijìm abə mə̀dɔgtà. Chəyi dɔgtà mɔ̀ʼɔ ne tì wì ya ghù aməd. 44Wì ya chè inga inɔ̰ bəd we anene pè anjìm abə Yeso, nyiʼì bètì ibog ndwi məd. Kwàʼ ati ati, ìseg ze sɔ̀bɔ. 45Yeso si bìri gha, “Wə̀d ne bèti amə àkə we?”
Wə̀d ijìm ya to̰ yi . Pità si gha, “Masà, bəd nyə̀mə̀ nyə̀mə̀ igun ine kad awe chuʼ.”
46Yeso ya ywìrì kɔ̀mbi gha, “Wə̀d mɔ̀ʼɔ bètì amə imbə̀ʼ icheg ne ika dù igun inum.” 47Àyi we ya kyeri gha mbe kyèri gha à ya zìye, wì si bìnde, dù ìwi ìfe asaŋ, gɔ̀m itog inwḭ aseg imbìghè abə Yeso. Wì ya mə̀tì aton ne wì bèti Yeso imbìghè abə bəd məjìm, bə̀ mə̀tì icheg ne aghɔn ze meghi kwàʼ ati ati. 48Yeso ya si ghà ibo gha, “Abo, ìwe ibḛfiŋ fə ghì àze aghɔn mèg, si ghò ane àbɔrɔ̀bɔd.”
49Kwàʼ icheg ne Yeso we kiri ghàmà, wə̀dtɔm mɔ̀ʼɔ nɔ̀ʼ inga nəb Jarùs pè ghà abə Jarùs, atog wə̀d ze inga ichamì Ŋwiye gha, “Ìwe ŋwan àyi fə ku yi. Imbə̀ʼ àghò ywiri chə awe Àchwitìnùg.” 50Yeso ya zug ikən we, si ghà abə Jarùs gha, “Indèʼ! Imbə̀ʼ àghò bɔ awe. Àghò bere ibḛfiŋ, wì biri bɔ̀ti.” 51Anyumə̀ ne Yeso ya pe inga achan àze Jarùs, chəyi wì ya sàŋi gha bəd nyi inga nəb. Wì ya sàŋì məyi Pità, tì Jɔn, tì Jem, fɔrɔ mbaʼ ŋwan tì ngɔb ŋwan. 52Bəd məjìm mbe ne ya yaʼi angu yaya zə̀ʼə̀ awɔb, dèghè ŋwan we. Yeso ya ghà inɔb gha, “Imbə̀ʼ mbə̰ dèghe awən, Chəyi wì ku. Wì ya gwḛ yi gwḛ.”
53Wì ya ghàm ane, inɔ̰ bəd we se chə̀ʼə aməd imbə̀ʼ icheg ne mbi ya kyeri gha ŋwan we fə ku. 54Yeso ya nyimi abo abə ŋwan we, ghàm ibo gha, “Ìmə ŋwan, nɔ̀ʼɔ!”
55Azwighi məd ya bə̀ndì nyi inga məd, wì nɔʼ təm titighe kwàʼ ati. Yeso ya si ghà inɔb gha, “Mbə̀ kəbə aghi mɔ̀ʼɔ nàʼ ibo wì jəg.”
56Anug ya chè mbaʼ ŋwan fɔrɔ ngɔb ŋwan. Yeso si pàti awɔb, ghà inɔb gha, “Imbə̀ʼ mbə̰ gha awən anug ne du abə wə̀d mɔ̀ʼɔ.”
Nke Ahọpụtara Ugbu A:
Lug 8: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL