Lug 9
9
Yeso tɔm ìmbi mə̀mə̀nənùg mbe ìghum chɔ̀b ibe
(Mat 10:5-15; Mag 6:7-13)
1Yeso ya kàrì ìmbi mə̀mə̀nənùg mbe ìghum chɔ̀b ibe, nàʼ ika inɔb bə̀ chà awɔb gha mbe kamni izwighi tibɔ̀ŋ bə̀ ghù aku aghɔn ajìm. 2Wì ya tɔm awɔb gha mbe gho nè chètè anug ìfɔ̀n Ŋwiye bə̀ ghù bəd ne ghɔ̰̀. 3Wì ya ghà inɔb gha, “Icheg ne mbə̰ mbe ghò ane igha̰ gho̰, imbə̀ʼ mbə̰ niŋə awən aghi mɔ̀ʼɔ ghò tì àzewən: Ka à ya ìmbàŋì kə̀ àbàn kə̀ ngə̀ŋ kə̀ ikab. Imbə̀ʼ wə̀d nìŋə yi ndwi ndəŋ. 4Mbə̰ mə̀ pè inga aben mɔ̀ʼɔ, mbə̀ chughi inga achan ne bəd niŋə awən pè ane aneg ne mbə̀ biri dù inga aben ze. 5Mbə̰ mə̀ pè nyi inga aben mɔ̀ʼɔ chəyi mbi niŋi awən, anyumə̀ ne mbə̰ mbe dùwə̀ awən, mbə̀ kutə agwi ane ìmbən ighog. Àze biri yaʼ aneni ni chwi gha mbɔb to̰ awɔb ikən chɔm.” 6Icheg ne Yeso ya màni ni ghàm, mə̀mə̀nənùg mbe ya dù ghò iben iben nè chètè ikən chɔm bə̀ nè ghùyə̀ bəd ne ghɔ̰̀.
Atog abə Erɔ̀d bùrə̀
(Mat 14:1-12; Mag 6:14-29)
7Anyumə̀ ne Erɔ̀d we ne yaya sàʼa Galìli ya zughi inug ne yaya dùwə̀, atog məd ya bùrə̀ imbə̀ʼ icheg ne bəd mɔ̀ʼɔ yaya gha à ya Jɔn we ne yaya nàʼà mənib fə zweme ane iwu. 8Mbi mɔ̀ʼɔ tì bəd yaya gha à ya Èlayijà ywirì yèʼe. Mə̀mbin yaya gha à ya wə̀dkə̀n abɔ̀ʼ mbe te aneg fə zweme ane iwu. 9Erɔ̀d ya gha, “Imbə̀ʼ àkə mo ya sɔbi atog abə Jɔn? Ghò̰ tì wə̀d ne mə zùghə inug imbə̀ʼ aməd àkə we?” Wì ya chè imbìghè se kə̀bə̀ icheg ni bàd Yeso.
Yeso jə bəd chuʼ ita̰
(Mat 14:13-21; Mag 6:30-44; Jɔn 6:1-14)
10Anyumə̀ ne mə̀mə̀nənùg ìmbi Yeso ya bə̀ndi ane igha̰ we ne wì ya cha awɔb, mbi ya mə̀tì inug ijìm mbe ne mbɔb ya fàʼi ibo. Wì ya niŋ awɔb mbi ghò məyi mbɔb mbɔb a Bèsayidà. 11Anyumə̀ ne inɔ̰ bəd ya zughi gha mbɔb mbe a Bèsayidà, mbi ya beni abɔ̀ʼ məd. Wì ya niŋə awɔb ghàm anug ìfɔ̀n Ŋwiye inɔb. Wì ya bə̀ ghù bəd aghɔn ne yaya kə̀bə̀ gha wì ghuyə awɔb.
12Anyumə̀ ne ituʼ ya se fḭ̀yḛ, mə̀mə̀nənùg mbe ìghum chɔ̀b ibe ya ghà ibo gha, “Àghò kyèri gha tì ya aŋa inga asiŋi zɔbi, ane, cha bəd mbo̰ mbe gho inga iben fɔrɔ inga isiŋi mbe ne yaʼi iban iban. Mbe gho kə̀b tijəg fɔrɔ asiŋi ni neg.”
13Yeso ya ywìtì inɔb gha, “Mbə̰ inən, mbə̀ naʼa aghi mɔ̀ʼɔ inɔb mbe jəg.” Mbɔb ya si ywìtì gha, “Tì bèrì məyi chiŋ ngə̀ŋ tita̰ tì su tibe. Àghò kə gha tè gho zon tijəg abə inɔ̰ bəd gho̰ ijìm?” 14Mbaŋà ne ya yaʼi inga inɔ̰ bəd we yaya ka chuʼ ita̰.
Yeso ya ghà abə mə̀mə̀nənùg məd gha, “Mbə̀ ghiyə bəd chughi aseg ane tikoʼi ka icheg bəd ìghum ita̰ inga ikoʼi ifibì.”
15Mbi ya ghì bəd chughi aseg icheg ne wì ya gha. 16Yeso ya si niŋ chiŋ ngə̀ŋ te tita̰ tì su te tibe, nɔ̀ àzi atog ikaŋ nàʼ məyakà abə Ŋwiye, si bə̀ʼri nàʼ abə mə̀mə̀nənùg məd gha mbe ghapa abə bəd. 17Wə̀d ijìm ya jəg kɔd, àbùʼì bùʼ. Mə̀mə̀nənùg ya si fèti ibəʼri ngə̀ŋ mbe, mbi sweg inga tiko ìghum chɔ̀b ibe.
Pità ghà wə̀d ne Yeso yaʼi ìwiwən
(Mat 16:13-19; Mag 8:27-29)
18Aneg mɔ̀ʼɔ, Yeso ya sàŋì inɔ̰ bəd ghò se chàʼrà Ŋwiye tèzìʼì. Mə̀mə̀nənùg məd ya ghò iban məd. Wì ya biri inɔb gha, “Bəd kə gha mo kə we?”
19Mbi ya ywìtì ibo gha, “Bəd mɔ̀ʼɔ mbe gha àghò ya Jɔn we ne yaya nàʼà mənib. Mbi mɔ̀ʼɔ mbe bə̀ gha àghò ya Èlayijà. Mə̀mbin mbe bə̀ gha àghò ya wə̀dkə̀n Ŋwiye mɔ̀ʼɔ abɔ̀ʼ mbe te aneg ne zweme ane iwu.”
20Yeso ya si bìri inɔb gha, “Àsi mbə̰! Mbə̀ kə gha mo kə we?”
Pità ya ywìtì gha, “Àghò ya Wə̀d we ne Ŋwiye zɔ̀ʼi.”
Yeso gha zìye biri ku ywìrì zwème ane iwu
(Mat 16:13-19; Mag 8:27-29)
21Yeso ya pati awɔb gha imbə̀ʼ mbi nɔ̀ʼ mə̀tì wə̀d ne məd yaʼi ìwiwən abə wə̀d mɔ̀ʼɔ ka. 22Wì ya si chè imbìghè gha, “Ŋwan Wə̀d biri zə̰ ngəʼ ne nɔʼi igun isəg aŋa. Itog bəd inga aben tì itog bəd mbàn Ŋwiye fɔrɔ mə̀chwitì mə̀nɔ̀ʼɔ̀ biri to̰ awɔb məd. Mbi biri bə zweti aməd, si ya gha, ineg biri pè ane itad, Ŋwiye zwèmne məd ane iwu.”
Anug ni bèʼì azed abaʼri bèni abɔ̀ʼ Yeso
23Yeso ya ghà inɔb mbɔb məjìm gha, “Wə̀d mə kə̀b ni beni abɔ̀ʼ inum, tengàŋ to̰ yi inug mbe ne nyàmnyɔd məd ze ghə̀ʼrə̀. Tengàŋ bèʼe àze azed abaʼri mà ineg ijìm bèni abɔ̀ʼ inum. 24Aton ya gha wə̀d ne kèmbè ìwi ìtḛ̀, tengàŋ biri sam ìtḛ̀ we. Àsi wə̀d ne sàŋi ìwi ìtḛ̀ ni fàʼ inum, tengàŋ biri jəg ìtḛ̀ we. 25Wə̀d kə mə̀ bèrì ighi ijìm igun isəg aŋa si sam ìwi ìtḛ̀, chùd ne angu àkə azeg? 26Wə̀d ne beri tìnìrètog imbə̀ʼ amə fɔrɔ ìmə ìngam, tengàŋ kyeri gha Ŋwan Wə̀d biri bə bèrì tìnìrètog imbə̀ʼ aməd. Wì biri bèrì tìnìrètog imbə̀ʼ tengàŋ anyumə̀ ne wì biri yeʼe ighəm ndəŋ tì ighumni we ne mbaʼ məd tì mbè angirə̀ ìzḛzḛ nàʼi ibo. 27Mə gha kwàʼ tesiʼ inən gha, bəd mɔ̀ʼɔ mbe aŋa ne chəyi mbi biri ku witì mbi bàd anug ìfɔ̀n Ŋwiye.”
Yeso kɔ̀pɔ se njàndi njandi
(Mat 17:1-8; Mag 9:2-8)
28Yeso ya ghàm inug mbo̰ inɔb ineg chè icheg ineg ìfàmi, wì niŋə Pità tì Jɔn fɔrɔ Jem, mbɔb kɔʼ ghò ikaŋ iwum mɔ̀ʼɔ ni chàʼra Ŋwiye. 29Icheg ne Yeso yaya chàʼrà Ŋwiye, ìfe məd ya kɔpɔ. Ndwi məd ya bə̀ kɔ̀pɔ se njàndi njandi icheg àŋwàŋwaŋ. 30Mbi ŋa zə̰ mbaŋà mɔ̀ʼɔ tìbe dù inɔb imbìghè. Mbaŋà ìto̰ tìbe yaya Muse tì Èlayijà. 31Mbɔb yaya fùyə njàndi njandi. Mbi yaya ghàmà tì Yeso. Mbi ya ghàm inug imbə̀ʼ icheg ne Yeso biri ku a Jèrusalèm icheg ne Ŋwiye ya fə gha. 32Pità tì bəd mbe ne ya yaʼi abɔ̀ʼ məd ya fen angwḛ. Anyumə̀ ne mbi ya nɔ̀ʼi angwḛ, mbi ya bàd icheg ne Yeso yaya njànda bə̀ bàd mbaŋà te tìbe ne yaya ghàmà tì məd. 33Anyumə̀ ne mbaŋà te tìbe ya sàŋi Yeso se ghò awɔb, Pità si ghà abə Yeso gha, “Masà, ze bɔ̀ŋ icheg ne tì yaʼi aŋa. Tì biri kɔd izuŋ itad; amɔʼ ine, amɔʼ abə Muse, amɔʼ abə Èlayijà.” (Chəyi Pità ya kyeri anug ne wì yaya ghà.)
34Icheg ne Pità yaya ghàmà ane, pàʼ mɔ̀ʼɔ ya swiʼi ikaŋ kə̀ndi awɔb, mbi se bɔ. 35Gì mɔ̀ʼɔ ya si ghàm inga pàʼ ze gha, “Aŋa ya ìmə Ŋwan ne mə chɔʼi. Mbə̀ zug anug ne we ghà.” 36Anyumə̀ ne gì ze ya ghàmi mànì, mə̀mə̀nənùg mbe ya si bàra Yeso tèzìʼì. Mbɔb ya nɔ̀ŋì inug mbo̰ ne mbɔb ya bàri inga ìtɔb fìŋ. Chəyi mbɔb ya gha anug mɔ̀ʼɔ abə wə̀d mɔ̀ʼɔ anyumə̀ we.
Yeso ghù ŋwan mbaŋà mɔ̀ʼɔ ne azwighi tibɔ̀ŋ yaʼi inga məd
(Mat 17:14-18; Mag 9:14-27)
37Isu abɔ̀ʼ, Yeso tì mə̀mə̀nənùg ya swiʼi ikaŋ iwum we. Inɔ̰ bəd mɔ̀ʼɔ ne ya yaʼi kwàʼ ìwi kyen ya kɔti Yeso. 38Wì ŋa zə̰, wə̀d mɔ̀ʼɔ kyen inga inɔ̰ we, kàrì aməd ghà ibo gha, “Masà, mə boʼ ibo nàʼ ine, ghùyə ìmə ŋwan mbaŋà gho̰ nàʼ inum. À ya ŋwan ne mə beri məyi gho̰ imɔʼ. 39Azwighi mɔ̀ʼɔ ze sàʼà gwìyè məd, wì se kyḛ. Ze ya mə̀ gwì aməd mèʼì aseg, wì se bìnde krìg krìg krìg. Mbi tìnjɔ ya bə̀ se dùwə̀ ibo ichug. Chəyi ze bḛ ni sàŋì aməd. Ze ya anìŋ chìkə̀ aməd. 40Mə kə̀ boʼ ibo abə ìmbe mə̀mə̀nənùg gha mbe kamni azwighi tibɔ̀ŋ ze chì. Ze chè awɔb.”
41Yeso ya ywìtì gha, “Mbə̰ ya kwàʼ iwaŋ bəd àpiye ne chəyi mbi beri ibḛfiŋ. Mə kə nɔʼ chughi tì inən, bèrì inyimbifiŋ ane nyumə̀ ne sa iye?” Anyumə̀ ne wì ya ghàmi ane, wì ya si ghà abə mbaŋà ze gha, “Niŋ ìwe ŋwan we yèʼe.”
42Kwàʼ icheg ne ŋwan mbaŋà we yaya kiri gho gho abə Yeso, azwighi tibɔ̀ŋ ze ya ywìrì gwì tum aseg, wì se bìnde krìg krìg krìg. Si ya gha, Yeso ya kyen abə azwighi tibɔ̀ŋ ze gha ze che du inga məd. Wì ya bə̀ ghù ŋwan we, si ghà abə mbaʼ məd gha, “Niŋ ìwe ŋwan.” 43Anug azo̰ ya chè bəd məjìm icheg ne mbi bàri ika Ŋwiye.
Yeso ywìrì ghàm anug imbə̀ʼ iwu məd
(Mat 17:22-23; Mag 9:30-32)
Ane bəd yaya kiri yete inug mbe ne Yeso yaya fàʼà, wì ya ghà abə mə̀mə̀nənùg məd gha, 44“Mbə̀ zug anug azo̰ ne mə ghà inən kwàʼ icheg chɔm. Mbi biri fèn Ŋwan Wə̀d abə bəd.” 45Mbɔb ya zug, si ya gha, chəyi mbɔb ya kyeri anug ne wì yaya ghà. Ŋwiye ya ghì gha imbə̀ʼ mbi kyeri awɔb aton ane ìngam gho̰ ne Yeso ghàmi. Mbɔb ya bə̀ bɔ awɔb ni biri aton ane ìngam we.
Wə̀d kyen inga anug ìfɔ̀n Ŋwiye
(Mat 18:1-5; Mag 9:33-37)
46Mə̀mə̀nənùg Yeso ya ko se sìmnè ìkyen. 47Yeso ya kyeri ìtɔb tikɔndi, niŋ ŋwan kwa kwa mɔ̀ʼɔ ghì wì təm iban məd. 48Wì si ghà inɔb gha, “Wə̀d ne niŋi ŋwan kwa kwa gho̰ gha à ya mo cha, tengàŋ fə niŋ amə. Wə̀d ne niŋi amə, wì fə bə̀ niŋ wə̀d we ne cha amə.” Mbə̀ kyeri gha à ya wə̀d kwa kwa yaʼi ìwi kyen abɔ̀ʼ inən mbə̰ məjìm.
Wə̀d ne chəyi we zɔ̀ŋɔ̀ awən, wì ya tì inən
(Mag 9:38-40)
49Jɔn ya ywìtì gha, “Masà, tè kə̀ bàd wə̀d mɔ̀ʼɔ ndəŋ we bə̀ ghìyə̀ izwighi tibɔ̀ŋ dùwə̀ inga bəd ane ìwe ikum. Tè kə̀ kə̀b inɔnjì ni təmni aməd imbə̀ʼ icheg ne chəyi məd abɔ̀ʼ ina.” 50Yeso ya ghà inɔb gha, “Imbə̀ʼ mbə̰ təmnə awən məd. Mbə̀ kyeri gha, wə̀d ne chəyi we zɔ̀ŋɔ̀ awən, wì ya abɔ̀ʼ inən.”
Bəd inga asiŋi mɔ̀ʼɔ inga Sàmarìyà to̰ awɔb Yeso
51Ane nyùmə̀ ya se tìnde abə Ŋwiye ni ghì gha Yeso yeʼe ikaŋ, Yeso ya nɔ̀ŋì inga fìŋ ni ghò a Jèrusalèm. 52Wì ya chà bədkə̀n gha mbe gho imbìghè, inga asiŋi mɔ̀ʼɔ inga Sàmarìyà gho chùʼri inug bɔŋ məd se pè. 53Chəyi bəd inga isiŋi mbe ya niŋi aməd imbə̀ʼ icheg ne ze ya fə dù zen inɔb gha wì ya anìŋ ghò yi a Jèrusalèm. 54Anyumə̀ ne Jem tì Jɔn, ne yaʼi mə̀mə̀nənùg məd ya bàri anug azo̰, mbi ya biri abə Yeso gha, “Anɔŋisəg, àghò kə̀b gha tì gha Ŋwiye cha iywid we swiʼi ikaŋ àbɔ̀ŋɔ tɔ̀n bəd mbo̰?”#9:54 Ìŋwàʼrì anun mɔ̀ʼɔ yètì gha, Icheg ne Èlayijà ya ghi? 55Mbi ya ghàm ane, Yeso ghàbri gaŋ awɔb.#9:55 Ìŋwàʼrì anun yètì gha wì gha, Chəyi mbə̀ kyeri iku azwighi ne mbə̀ beri. Chəyi Ŋwan Wə̀d ya yeʼe ni chìkì ìtḛ̀ bəd. Wì ya yeʼe ni pum ìtḛ̀ abə bəd. 56Ane, mbi ya si chè ghò inga asiŋi ndəŋ.
Anug ni beni abɔ̀ʼ Yeso
(Mat 8:19-22)
57Icheg ne Yeso tì mə̀mə̀nənùg yaya yḛ̀ igun inɔnjì, wə̀d mɔ̀ʼɔ ya ghà ibo gha, “Isiŋi ijìm ne àghò ya ghò, mə biri beni abɔ̀ʼ ine.”
58Yeso ya ywìtì ibo gha, “Ìchɔb bèrì ìmbɔb isiŋi neghi, tìnən bə̀ bèrì ìtɔb kàn. Àsi Ŋwan Wə̀d, chəyi wì beri asiŋi ni zəʼrə.”
59Wì ya ghà abə wə̀d ndəŋ gha, “Beni abɔ̀ʼ inum.” Wə̀d we ya ywìtì gha, “Anɔŋisəg, àghò si mə̀ bi ghò twə̀ŋi ìmə mbaʼ.”
60Yeso ya ywìtì ibo gha, “Àghò saŋa iwu bəd mbe twəŋi mbɔb iwu bəd.” Àsi àghò, ndò ghò chètì ikən imbə̀ʼ anug ìfɔ̀n Ŋwiye.
61Wə̀d ndəŋ ya bə̀ gha, “Anɔŋisəg, mə biri beni abɔ̀ʼ ine. Si ya gha, àghò si mə̀ bi ghò inga achan ghò nàʼrì abə ìmbum bəd.”
62Yeso ya ywìtì ibo gha, “Wə̀d ne nyimi aso ni ghù ibon ywìrè nè ghàbra nḛ̀ anjìm, chəyi wì kòʼi ane anug ìfɔ̀n Ŋwiye.”
Nke Ahọpụtara Ugbu A:
Lug 9: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL