Markus 15
15
Yesus 'U sitalaḏi ra Pilatus
(Mat. 27:1-2, 11-14; Luk. 23:1-5; Yoh. 18:28-38)
1Da-daini i'a moju, Mahkamah 'Agama#15:1 Mahkamah 'Agama: 'imam-'imam ma sae'e, guru-guru 'agama re Yahudi manga sae'e mo-moini jau-jau 'aḏi masigaro'o re mafakati. Ananga 'aḏi soma'a piri'u Yesus re 'U gasa i'a ra gubernur Pilatus. 2Pilatus 'o sano ra Yesus, “Ngana nena-ne, ngowa'a Yahudi manga 'olana, bolo ua?”
Yesus 'o sangoro, “Tero mode'e sa'olo ngana no kanau.”
3'Imam-'imam ma sae'e 'aḏi singadolo manga da'awa ma repe 'aḏi kalaki 'a Yesus. 4Ḏua Pilatus 'o sano ra Unanga, “I'a sa'olo, Ngana no sangoro ua? No 'isene manga da'awa ma repe ya singadolo ra Ngoi, 'aḏi kalaki Ngana.”
5Mada'a Yesus kama sangoro ceka'a i'a mai ua, singadolo Pilatus 'o heranga masala.
Singeta'a hukumu sengene ra Yesus
(Mat. 27:15-26; Luk. 23:13-25; Yoh. 18:39—19:16)
6Wakutu 'o Paskah ma Wangere, biasa ḏua 'a Pilatus balasu 'o sibebasa ngowa'a bui matengo, mete'e ngowa'a repe manga go-golo'o. 7Toma 'orasa gena-ge 'age rema ngowa'a matengo toma bui 'ai lomanga Barabas. Unanga 'o osama nyo-nyoimi toma pamarenta ma lawana re 'o sengene ngowa'a toma kaco ma dara. 8Ngowa'a repe 'aḏi malomu re 'aḏi golo'o ra Pilatus 'o sisupu ngowa'a matengo mete'e ananga manga go-golo'o sa'olo biasa. 9Pilatus 'o sano ra ananga, “Ngini nyengara ngoi to sisupu ngowa'a Yahudi manga 'Olana gena-ge?” 10'A Pilatus 'o kanau so'o gena-ge, sababu 'a waro ḏua 'imam-'imam ma sae'e re Yahudi manga bi-biri'i, ananga 'aḏi sipula'a Yesus ra unanga, sababu manga 'akala re sinyingara 'i go-goḏi.
11Mada'a 'imam-'imam ma sae'e 'aḏi babata ngowa'a repe 'aḏi golo'o ra Pilatus di'a 'o sibebasa 'a Barabas. 12Ḏua 'a Pilatus 'o kanau i'a toma ngowa'a repe, “Na'o so'o gena, ngoi balasu to 'a'a 'oru ra Yesus, ngini ni si'aro'o Unanga 'o Yahudi manga 'Olana?”
13Ananga 'aḏi kanau ya siduga-duga, “Sisalib Unanga.”
14Pilatus dadunu 'o sano i'a ra ananga, “Unanga 'ai ta-sala 'oru?”
Mada'a ananga ganapu poa'a ya siduga-duga, “Sisalib Unanga.”
15Ḏua Pilatus 'o sibebasa 'a Barabas, la 'a sisanangi ngowa'a repe manga 'akala re sinyingara. Gena ḏua, unanga 'o soma'a 'ai sordado 'aḏi sipo Yesus re Pilatus 'U sipula'a i'a, la ananga 'U sisalib.
Sordado-sordado 'aḏi je-jengere Yesus
(Mat. 27:27-31; Yoh. 19:2-3)
16Sordado-sordado 'U gasa Yesus ra gubernur Pilatus 'ai kadato#15:16 Ma siḏa kadato 'Olana Herodes Lamo'o bolo Antonia 'ai Benteng ma dara. Ḏua ananga 'aḏi 'aro'o sordado mo-moini 'aḏi malomu. 17Togumu i'a, ananga mulaingi 'aḏi je-jengere 'a Yesus. Ananga 'U sipake Yesus reo juba 'ungu, kara 'aḏi 'oro ate ma umanga rema dodowo'o ya tuhu sa'olo lastari kara ya siteru ra Yesus 'ai sae'e, Unanga gena-ge sa'olo 'o 'Olana. 18Gena ḏua, ananga 'aḏi je-jengere pula'a tabea ra Unanga re 'aḏi kanau, “Suba, Yahudi manga 'Olana.” 19Ananga 'aḏi ca'olo 'a Yesus 'ai sae'e re didiki re 'aḏi obi'i Unanga re 'aḏi je-jengere maḏipolono ra Unanga. 20Wakutu ananga 'aḏi je-jengere 'a Yesus togumu i'a, ananga ya woi'i 'ai juba 'ungu nange-ge kara ya singali i'a 'Ai baju masiretene. Ḏua ananga 'aḏi sisupu Unanga ra Pilatus 'ai kadato re 'aḏi gasa toma ngi'i di'a 'U sisalib.
Sordado-sordado 'aḏi sisalib Yesus
(Mat. 27:32-44; Luk. 23:26-43; Yoh. 19:17-27)
21Toma ḏo-ḏagi ma dara, sordado-sordado 'aḏi oḏi'i 'age rema ngowa'a matengo 'ai lomanga Simon 'o tola'a ino. Unanga gena-ge da'a gamu ino 'o si'a toma limau. Unanga 'ai 'asala toma limau Kirene#15:21 Limau lai lamo'o toma nagara Libia toma Afrika kore sara. ino, Aleksander re Rufus manga ḇaḇa.#Rm. 16:13 Ananga 'aḏi simau-mau Simon 'a doiti Yesus 'ai salib. 22Ananga 'aḏi gasa Yesus toma ngi'i rimoi, ma lomanga Golgota (gena-ge ma ngale: Ḏoḏowi ma Ngi'i). 23Toma ngi'i gena-ge ananga 'aḏi pula'a 'o 'anggur sicapuru reo mur ra Unanga, mada'a 'O oḏu'u 'A ka'e. 24Gena ḏua, ananga 'aḏi sisalib Unanga, re sordado-sordado 'aḏi sibalangu 'Ai pakeanga nyangu, ananga 'a'a loterei, la siwaro 'a guna 'a sanga 'Ai pakeanga gena-ge.#Nya. 22:19
25Ananga 'aḏi sisalib Yesus ca'olo siworo da-daini i'a. 26Tai sae'e ma re'u toma salib co-cori ma tubu, sordado 'aḏi sipaku i'a papanga 'i silefo Mahkamah 'Agama manga da'awa ra Unanga ma betongo so'o ne:
“Unanga nena-ne,
ngowa'a Yahudi manga 'Olana.”
27Ngowa'a to-tori'i nga muḏiḏi re 'a Yesus, ananga 'aḏi salib simete'e: matengo Tai kuwiḏa re matengo Tai kuḇali. [28Enanga 'i dadi, sababu silefo pasala ḏua toma Boku 'Ofi-'Ofi so'o ne: “Ananga 'U capu Unanga ma tero ngowa'a ma jira ḏi'i.”]#Yes. 53:12
29Ngowa'a ga'a 'aḏi tola'a i'a toma ngi'i gena-ge, ananga ya elala manga sae'e re 'aḏi je-jengere, “Hei, Ngana nena-ne ga'a no mau siruba Ma Jou'ongu Madutu 'ai Wala re Na simomi'i moju pa'i ma di'ara wangere ro'ange,#Nya. 22:8, 109:25; Mrk. 14:58; Yoh. 2:19 30No 'uci toma salib gena-ge re No sisalamata 'Ani diri masiretene!”
31So'o gena ḏi'i, 'imam-'imam ma sae'e re guru-guru 'agama 'aḏi je-jengere Yesus re 'aḏi ma'u kanau matengo re matengo, “Unanga 'o sisalamata ngowa'a lelegu; momongolo ua 'Ai diri masiretene, Unanga 'a sisalamata yoḏu'u! 32Na'o Ngana 'O Kristus, Israel manga 'Olana, No 'uci toma salib gena-ge, la ngomi mi oḏi'i re mi ngaku Ngana.”
Ngowa'a nga muḏiḏi gena-ge, sisalib simete'e ra Yesus, ananga 'aḏi je-jengere 'a Yesus ḏi'i.
Yesus 'o sengene
(Mat. 27:45-56; Luk. 23:44-49; Yoh. 19:28-30)
33Re wakutu ca'olo nyagi moi re romoḏiḏi wangere 'olona tala, wangere ma la'o 'i taḏusu, re daeraha gena-ge mo-moini 'i dadi hafu-hafu singadolo ca'olo ro'ange wangere so'o ne'o. #Am. 8:9 34Toma ca'olo ro'ange wangere so'o ne'o, Yesus 'o poa'a 'a siduga-duga, “Eloi, Eloi lama sabakhtani” ma ngale: “ 'Ari Jou'ongu Madutu, 'Ari Jou'ongu Madutu, i'a sa'olo No sieanga Ngoi?”#Nya. 22:2
35Wakutu ngowa'a nga muḏuo i'a toma ngi'i gena-ge ya 'isene Yesus 'ai iḏingi so'o gena-ge, ananga 'aḏi kanau, “Isene! Unanga 'o 'aro'o 'a Elia!” 36'Age matengo tamanga sigolona, jau-jau 'o lalara re 'o 'oro bunga karang#15:36 bunga karang ma tero sa'olo spon ga'a 'i ḇowisi ḇanyo 'a tono toma 'anggur ko-kowi'i re 'a sitopo'o toma ḏu-ḏubo ma dere, kara 'a situbo ie ra Yesus 'ai 'uḏu ma betu'u di'a Unanga 'a cono'o re 'o kanau, “Toma si, ino ngene wa oḏi'i wari i'a si 'a Elia 'o sapolo 'U siguci Unanga toma salib nena-ne.”#Nya. 69:22
37Ḏua Yesus 'o poa'a 'a siduga-duga kara 'Ai sangagara 'i togumu.
38Ngalana ma da-daku kole-kole#15:38 Ngalana ma da-daku 'i kole-kole la ngowa'a lelegu osama yoḏu'u ra Ma Jou'ongu Madutu 'ai Wala ma dara pa'i 'imam 'agung ḇato. ra Ma Jou'ongu Madutu 'ai Wala ma dara, enanga 'i raca kaci ḏiḏi da'u ngadolo dau.#Sup. 26:31-33 39Sordado ma sae'e 'o made-de'oso toma salib ma biono, unanga 'o oḏi'i re 'o tailako Yesus 'o sengene re 'o kanau, “Unanga nena-ne, mode-mode'e Ma Jou'ongu Madutu 'ai Ngowa'a Nau'u!”
40'Age ḏi'i rema we-were'a nga muḏuo i'a ananga ya oḏi'i i'a toma giḏanga. Tamanga sigolona gena-ge, 'age ngo Salome, Maria Magdalena re ngo Maria (tubaie matengo Yakobus re Yoses manga ngina).#Luk. 8:2-3 41We-were'a ananga gena-ge, ga'a 'aḏi mete'e re 'aḏi de-de'oso 'a Yesus wakutu Unanga toma Galilea. Re 'age ḏi'i rema we-were'a ma lelegu manga repe 'aḏi sapolo toma ngi'i gena-ge. Nyangu moju ananga 'aḏi ma'u mete'e ra Yesus 'aḏi tagi toma Yerusalem.
Palihara Yesus
(Mat. 27:57-61; Luk. 23:50-56; Yoh. 19:38-42)
42-43Ma wangere sa'i ri lobi'i, 'a Yusuf, ngowa'a Arimatea, 'o sapolo ra gubernur Pilatus. Unanga gena-ge 'o osama ḏi'i nyo-nyoimi toma Mahkamah 'Agama re 'o sayanga ma jingi'i. Unanga ḏi'i 'o totoma Ma Jou'ongu Madutu 'ai 'orasa 'o parenta sa'olo 'Olana.
Ma wangere gena-ge, wangere ma sadia (Sabata ma wangere sa'i ri ngadolo). Sababu gena-ge, Yusuf 'a sinau'u 'ai 'akala re sinyingara 'o talaḏi ra Pilatus re 'o golo'o 'a Yesus 'ai maiyeti. 44Pilatus 'o heranga 'o 'isene Yesus ro sengene. Ḏua 'a Pilatus 'o 'aro'o ino sordado ma sae'e re 'o sano, “Mode-mode'e, Yesus ro sengene?” 45Sordado ma sae'e 'a sangoro, “Yesus ro sengene,” kara Pilatus 'o nyengara Yusuf 'a 'oro 'a Yesus 'ai mayeti. 46Ḏua, Yusuf 'o tibo ḇa'a lenan kara 'u siguci Yesus 'ai maiyeti re 'U sisao rema ḇa'a gena-ge. Gena ḏua, unanga 'U singosama maiyeti gena-ge toma kubu ma aḏu'u. [Nyangu moju ananga 'aḏi tuso'o maḏi toma bawata ma gagoro.] Togumu i'a, unanga 'o lulu maḏi rimoi 'a sidaku. 47Toma 'orasa gena-ge ngo Maria Magdalena re ngo Maria (Yoses 'ai ngina) ananga ya tailako mayeti gena-ge ya gare le'a.
Nke Ahọpụtara Ugbu A:
Markus 15: SNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2015 © Indonesian Bible Society