Markus 14
14
Yahudi manga bi-biri'i 'aḏi disa ngo'omo sengene 'a Yesus
(Mat. 26:1-5; Luk. 22:1-2; Yoh. 11:45-53)
1Wange ḏiḏi moju 'o Paskah ma Wangere re Roti Kama Ragi Ua ma wangere#14:1 Ngowa'a Yahudi ya si'elingi ie raḏi supu toma Mesir 'i ngadolo, 'imam-'imam ma sae'e re guru-guru 'agama ananga 'aḏi disa ngo'omo, la 'aḏi cako'o Yesus sigo-gogoro re 'u sengene Unanga.#Sup. 12:1-27 2Mada'a ananga 'aḏi makanau, “Awa ngene wa si'a'a toma 'orasa gena-ge sababu ngowa'a repe 'aḏi oḏi'i re 'i dadi kaco.”
Side-dege bou-bounu narwastu ra Yesus 'ai sae'e
(Mat. 26:6-13; Yoh. 12:1-8)
3Wakutu 'a Yesus da'a toma gamu Betania ra Simon 'ai wala, unanga gena-ge ma siḏa 'o sanga si-siḏi 'eno'o, were'a matengo mo sapolo ra Yesus. Munanga mo gasa bou-bounu narwastu kana rimoi.#14:3 Bou-bounu narwastu gena-ge 'aḏi 'a'a 'oro 'o utu'u ga'a rema bounu. Bou-bounu gena-ge ma ijana hali madutu. Wakutu Yesus 'o majoreke oromo, we-were'a gena-ge matolo'o kana ma camala rema masiba-ba'ala ra Yesus 'ai sae'e.#Luk. 7:37-38 4'Age rema ngowa'a nga muḏuo i'a toma ngi'i gena-ge 'aḏi porata ra munanga, re 'aḏi makanau matengo re matengo, “Ma la 'oru, bou-bounu narwastu gena-ge sihalibiru! 5Na'o bou-bounu narwastu gena-ge 'i wu'unu, ma ijana pipisi salaka#14:5 uang perak: Oḏi'i Luk. 6:37 latu ro'ange pai'i.#14:5 gena-ge ma tero sa'olo gaji musungu rimoi pai'i. Re ma pipisi 'i sipula'a toma ngowa'a ma dinga'unu ua!” Ḏua ananga 'aḏi ngamo munanga.
6Mada'a Yesus 'o ḇangata, “I'a sa'olo ngini nimi sikangela munanga 'ami 'akala re sinyingara? Sieanga i'a ḇato! Munanga mo 'a'a 'ori i'a ma la-la di'a mo silamo'o Ngoi. 7Ngowa'a ma dinga'unu ua, ananga 'aḏi tegoro taninga sigolona tau-taunu. Dadi na'o ngini ni riono ananga, ngau ḇato nyengara. Mada'a Ngoi to tegoro ra ngini tau-taunu ua.#Dad. 15:11 8We-were'a 'ami ga'a gena-ge sa'olo nana'o rimoi mangale 'Ari sengene: Munanga mo sidodahe 'Ari lese rami bou-bounu di'a sipalihara Ngoi; mada'a ma 'orasa 'i ngadolo nyangu. 9Ni ngaku mode-mode'e Ngoi 'ari demo nena-ne: Toma ngi'i le'a ḇato ngowa-ngowa'a 'aḏi singadolo Habari Roanga, we-were'a nena-ne 'ami ga'a ma la-la, ngowa'a ḏuanga i'a ya sijarita ḏi'i, la sidaioranga munanga awa.”
Yudas 'o pula'a ngo'omo, la ananga 'aḏi cako'o Yesus
(Mat. 26:14-16; Luk. 22:3-6)
10Togumu i'a, ngowa'a matengo ra Yesus 'ai me-mete'e nga nyagi moi re nga muḏiḏi manga sigolona, ga'a silomanga Yudas Iskariot, unanga gena-ge 'o tagi toma 'imam-'imam ma sae'e di'a 'o pula'a ngo'omo, la ananga 'aḏi cako'o Yesus. 11Wakutu ananga 'aḏi 'isene 'a Yudas 'ai demo-demo so'o gena-ge 'aḏi maroanga masala re 'aḏi sijaji pula'a unanga 'o pipisi. Dadi, Yudas 'a disa ma donga, la ananga 'aḏi cako'o 'a Yesus.
Yesus re 'Ai me-mete'e, ananga 'aḏi oromo ngo-ngoromo Paskah
(Mat. 26:17-25; Luk. 22:7-14, 21-23; Yoh. 13:21-30)
12Toma wangere ma mulaingi toma Wangere Roti kama Ragi Ua ma dara - wakutu ngowa'a 'aḏi tola'a doba Paskah - 'Ai me-mete'e 'aḏi sano ra Yesus, “Toma ngi'i le'a, No mau ngomi mi sidodahe ngo-ngoromo Paskah di'a Jou?”
13-14Ḏua Yesus 'o soma'a 'Ai me-mete'e nga muḏiḏi, “Ni tagi toma limau. I'a da'a, ni ma'u sanga na-nau'u matengo, 'o gasa tampayanga rimoi ma dara rema ḇanyo re ni mete'e unanga gena-ge singadolo 'o osama toma wala, kara ni sano toma wala ma dutu, ‘Minga Guru 'o sano: Toma ngi'i le'a Unanga re ngomi 'Ai me-mete'e mi oromo ngo-ngoromo di'a Paskah?’ 15Wala ma dutu gena-ge 'o sijumu ma ngi'i lamo'o rimoi da'u toma re'u. Toma ngi'i gena-ge 'age rema 'alata ti-tiai. Ngini ni sidodahe ngo-ngoromo di'a ngene.”
16Ḏua ananga nga muḏiḏi gena-ge 'aḏi tagi toma limau. I'a da'a ananga ya sanga re ya oḏi'i 'i ma tero sa'olo Yesus 'o kanau ra ananga. Ḏua ananga 'aḏi sidodahe ngo-ngoromo Paskah.
17Ma lobi'i tala, Yesus re 'Ai me-mete'e nga nyagi moi re nga muḏiḏi 'aḏi ngadolo toma wala gena-ge. 18Wakutu ananga 'aḏi majoreke re 'aḏi oro-oromo, Yesus 'o kanau, “Ni ngaku mode-mode'e 'Ari demo-demo nena-ne: 'Age rema ngowa'a matengo taninga sigolona ga'a 'o oromo mamete'e ra Ngoi nange-ne; ḏuanga i'a 'o pula'a ngo'omo, la ngowa'a 'aḏi cako'o Ngoi.”#Nya. 41:10
19Ya 'isene so'o gena 'ai me-mete'e manga 'akala re sinyingara 'i kangela. Dadi matengo re matengo 'aḏi sano ra Yesus, “Ma Jou, tantu ḇato ngoi ua?!”
20Yesus 'a sangoro, “Unanga gena-ge, ra ngini nga nyagi moi re nga muḏiḏi ninga sigolona re 'a sitono 'ai roti toma sawo'o mamete'e ra Ngoi. 21Mode'e Ngoi, Manusia ma Ngowa'a Nau'u, balasu to sengene ma tero sa'olo 'i silefo ḏua toma Boku 'Ofi-'Ofi ma dara. Mada'a ngowa'a ga'a sipula'a Ngoi, Manusia ma Ngowa'a Nau'u, unanga gena-ge 'o sanga bahala lamo'o! Jobilaha unanga gena-ge ma ngina mo sibuoro awa ḇato!”
Yesus 'ai perjamuan
(Mat. 26:26-30; Luk. 22:14-20; 1Kor. 11:23-25)
22Wakutu ananga 'aḏi oro-oromo Yesus 'o 'oro roti re 'O sibere ie murasa ma la ra Ma Jou'ongu Madutu, kara Unanga 'a poti-poti ma roti gena-ge re 'O pula'a Tai me-mete'e re 'O kanau, “ 'Oro re na oromo, nena-ne Ngoi 'ari lese.”
23Gena ḏua, Unanga 'o 'oro sawo'o ma dara 'anggur re 'O sibere ie murasa ma la ra Ma Jou'ongu Madutu re 'A sipula'a Tai me-mete'e, kara ananga mo-moini ya ka'e. 24Yesus 'o kanau, “Nena-ne, Ngoi 'ari ngaunu ga'a sitotomo Ma Jou'ongu Madutu 'ai jaji. 'Ari ngaunu nena-ne 'i pa'ala di'a singi-ngiranga ngowa'a repe manga ḏosa.#Sup. 24:8; Yer. 31:31-34 25Ni ngaku mode-mode'e 'Ari demo-demo nena-ne: Ngoi to ka'e riwara 'anggur nena-ne singadolo ḏuanga i'a Ma Jou'ongu Madutu 'ai Pareta ri ngadolo, kara ta ka'e 'anggur ma su-sungi mamete'e ra ngini.”
26Gena ḏua, ananga 'aḏi manyanyi rimoi di'a puji re silamo'o Ma Jou'ongu Madutu. Togumu i'a ananga 'aḏi tagi toma Polono Zaitun.
Nubuata mangale 'a Petrus masoloto ra Yesus
(Mat. 26:31-35; Luk. 22:31-34; Yoh. 13:36-38)
27Ḏua Yesus 'o kanau ra ananga, “Ngini mo-moini ḏuanga i'a ni wiḏi re ni sisoi'i tala Ngoi sababu toma Boku 'Ofi-'Ofi ma dara Ma Jou'ongu Madutu 'o kanau so'o ne:#Za. 13:7
‘Ngoi ḏuanga i'a Tu sisengene 'Ari sowohi, re 'Ai doba-doba 'i matai are.’
28Mada'a wakutu Ngoi dadunu to 'ahu moju, Ngoi to tagi siḏa toma daeraha Galilea.”#Mat. 28:16
29Petrus 'o sangoro, “Kalaha ananga mo-moini 'aḏi sisoi'i tala Jou, ngoi tini sisoi'i tala yoḏu'u!”
30Yesus 'o kanau, “No ngaku mode-mode'e 'Ari demo-demo nena-ne: Toma utu nange-ne ḏua, namo 'i solene soi ḏiḏi nyangu, ngana masiretene no soloto Ngoi soi ro'ange ḏua.”
31Petrus 'o sangoro re 'o matoro, “Soi moi i'a mai ua, ngoi to masoloto re to kanau, ‘Ngoi to nana'o Jou ua’ singadolo ngoi to sengene mamete'e ra baba.”
Re 'Ai me-mete'e ma lelegu 'aḏi kanau so'o gena ḏi'i.
Yesus 'o manyiata toma ngi'i Getsemani
(Mat. 26:36-46; Luk. 22:39-46)
32Ananga 'aḏi ngadolo toma ngi'i rimoi ma lomanga Getsemani, Yesus 'o kanau i'a Tai me-mete'e, “Ni tegoro 'ane ngomasa moi, Ngoi to i'a da'a re to manyiata.”
33Ḏua Yesus 'o sigaro'o 'a Petrus, Yakobus re 'a Yohanes, ananga 'aḏi mete'e Unanga. Unanga mulaingi 'o basono 'Ai 'akala re sinyingara 'i kangela masala. 34Yesus 'o kanau i'a ra ananga, “ 'Ari 'akala re sinyingara 'i kangela masala singadolo Ta basono sa'i To sengene. Tegoro 'ane-ne re ni ma'istiari!”
35Yesus 'o tagi i'a da'a masai'i ra ananga kiḏanga siḏi ua, kara 'O ruba paga-pagara 'Ai biono tala toma tana'a, sababu 'Ai 'akala re sinyingara 'i kangela masala, re 'O manyiata. Tai nyiata ma dara Unanga 'o golo'o na'o nyengara sangisara so'o nena-ne 'a silalo'o ra Unanga, 36Dadi Unanga 'o kanau, “ 'Ari Ḇaḇa! 'Ori i'a rimoi ua, 'i osama 'akala ua ra Ḇaḇa. Na silalo'o sangisara nena-ne ra Ngoi. Mada'a mete'e Ngoi 'ari mau awa, mete'e Ḇaḇa 'ani mau ḇato.”
37Togumu i'a, Yesus 'o maḏibo i'a ra ananga re 'O sanga i'a 'Ai me-mete'e 'aḏi matai otu. Yesus 'o kanau ra Petrus, “Simon, no otu? Pa'i jam rimoi ḇato ngana nga'unu ua no matahana ma'istiari?!” 38Yesus 'o kanau ra ananga, “Ni ma'istiari re ni manyiata, la awa ngini ni sanga bo-baja. Mode-mode'e ninga roh mau 'a'a 'ori i'a ma banari; mada'a ngini ni nga'unu ua sababu ngini pai'i manusia ḇato dadi ni lamahana.”
39Soi moi moju, Yesus 'o tagi re 'O manyiata ma betongo so'o nange-ge ḏi'i. 40Togumu i'a, Unanga dadunu 'o maḏibo i'a ra ananga re 'O sanga i'a ananga 'aḏi otu moju sababu ananga 'aḏi kakadungu masala. Ḏua, ya waro ua 'oru balasu 'aḏi kanau ra Yesus. Gena ḏua, Yesus 'o tagi re 'O manyiata moju.
41Wakutu Yesus 'o maḏibo ino ra ananga ma soi ro'ange, Unanga 'o kanau, “Ni mangomasa re ni otu moju? Ngadolo nena-ne, ma 'orasa 'i ngadolo ḏua, Ngoi, Manusia ma Ngowa'a Nau'u, sipula'a toma ngowa'a baraḏosa. 42Momi'i, ino ngene wo tagi. Oḏi'i! Unanga ga'a 'o sipula'a Ngoi toma ngowa'a baraḏosa re unanga gino!”
Ananga 'U cako'o Yesus re 'U sitalaḏi toma Mahkamah 'Agama
(Mat. 26:47-56; Luk. 22:47-53; Yoh. 18:3-12)
43Wakutu Yesus 'o ka-kanau moju, Yudas 'o sapolo, unanga 'o osama nyo-nyoimi ra Yesus 'ai me-mete'e nga nyagi moi re nga muḏiḏi. Ngowa'a manga repe 'aḏi sapolo mamete'e ra Yudas. Ananga gena-ge 'aḏi sanga soma'a toma Mahkamah 'Agama (Yahudi-Yahudi manga sae'e, 'imam-'imam ma sae'e re guru-guru 'agama) ananga 'aḏi gasa manga samaranga re bu-butulu. 44Nyangu moju, 'a Yudas 'o pula'a nana'o rimoi ra ananga re 'o kanau, “Ngowa'a ga'a ngoi tu dume, Unanga gena-ge ngini nu cako'o, nu gasa, re nu jaga la-la ino.”
45Re wakutu Yudas 'o sapolo, unanga 'o jau i'a ra Yesus re 'o kanau, “Rabi!”#14:45 “Rabi” toma demo Yunani “Guru” di'a ngowa'a ga'a 'o sayanga ma jingi'i. Gena ḏua, unanga 'o dume Yesus 'ai bobongolo. 46Ḏua, ananga 'aḏi mamete'e ra Yudas nange-ge 'aḏi jau i'a cako'o 'a Yesus. 47Mada'a 'age matengo 'a tuono 'ai samaranga toma sarumu kara 'a cafa 'imam 'agung 'ai budaka 'ai ngau'u singadolo 'i tola'a! 48Ḏua Yesus 'o kanau i'a ra ananga, “I'a sa'olo ngini ni sapolo re ninga samaranga re bu-butulu di'a ni cako'o ngoi ma tero sa'olo ngowa'a ma jira?! 49Ma wangere ma jelele i'a, ngoi to osama ra Ma Jou'ongu Madutu 'ai Wala re to pula'a do-doto'o taninga biono, mada'a ngini rini cako'o Ngoi ua. Mada'a balasu so'o nena-ne ḏua, la 'i mete'e 'oru 'i silefo pasala ḏua toma Boku 'Ofi-'Ofi.”#Luk. 19:47, 21:37
50Yesus 'ai me-mete'e 'aḏi wiḏi mo-moini re 'U sisoi'i tala Unanga.
51-52Ngowa'a tubaie matengo 'o mete'e Yesus, unanga gena-ge 'o mapake pa'i ḇa'a bela moi 'o masiḇaro ino tai lese. Ngowa'a repe 'aḏi mamete'e ra Yudas nange-ge 'aḏi cako'o unanga ḏi'i. Mada'a unanga 'o masigagoso singadolo 'ai ḇa'a palasara ḏua 'o wiḏi mawa-watolo.
Yesus 'U sitalaḏi toma Mahkamah 'Agama
(Mat. 26:57-68; Luk. 22:54-55, 63-71; Yoh. 18:13-14, 19-24)
53Yesus, ananga 'U gasa toma 'imam 'agung 'ai wala. I'a da'a Yahudi-Yahudi manga sae'e, 'imam-'imam ma sae'e re guru-guru 'agama mo-moini, ananga 'aḏi to-tororumu. 54Petrus, unanga 'o tu-tuu'u toma giḏanga ra Yesus singadolo siosama toma 'imam 'agung 'ai wala ma soana. I'a da'a unanga 'o masebanga i'a toma u'u, 'o tegoro marasu'u re 'o marimoi ra ananga ngowa-ngowa'a jaga.
55'Imam-'imam ma sae'e re Mahkamah 'Agama mo-moini, ananga 'aḏi ringiti ya disa Yesus 'ai sala. Na'o ya sanga, ananga 'u singeta'a hukumu sengene ra Unanga. Mada'a ananga ya sanga 'ai sala dola moi i'a mai ua! 56Sakisi sa-sakala manga repe ananga ya'u 'aro'o. Mada'a ananga manga demo 'i ma'u rapu matengo re matengo.
57-58'Age rema ngowa'a nga muḏuo i'a 'aḏi made-de'oso re 'aḏi pula'a sakisi sa-sakala 'aḏi da'awa Yesus. Ananga 'aḏi kanau, “Ngomi mi 'isene Unanga nena-ne 'o kanau, ‘Ma Jou'ongu Madutu 'ai Wala, manusia ya simomi'i, Ngoi ta ruba. Toma wangere ro'ange togumu i'a, Ngoi ta simomi'i Ma Jou'ongu Madutu 'ai Wala ma lelegu, mada'a manusia ma munara ua.’ ”#Yoh. 2:19
59So'o gena ḏiḏi, sakisi-sakisi manga demo 'i ma'u rapu matengo re matengo.
60Ḏua 'imam 'agung 'o made'oso i'a ra ananga manga biono re 'o sano ra Yesus, “I'a sa'olo Ngana no sangoro ua ananga manga gamamu gena-ge ra Ngana?”
61Mada'a Yesus pa'i 'o masiogoro ḇato. Unanga 'a sangoro ceka'a i'a mai ua. Ḏua 'imam 'agung 'o sano soi moi moju ra Unanga, “Ngana nena-ne mode-mode'e 'O Kristus, Ma Jou'ongu Madutu 'ai Ngowa'a Nau'u bolo ua?”
62Yesus 'a sangoro, “Ngoi nena-ne Unanga. Ngini ḏuanga i'a ni oḏi'i Ngoi, Manusia ma Ngowa'a Nau'u, to tegoro ra Ma Jou'ongu Madutu 'ai giama ma kuwiḏa i'a, Unanga gena-ge 'Ai kuasa ma pari cua. Re to sapolo da'u ra Ma Jou'ongu Madutu tala toma ngawa-ngawa da'u diwanga tala!”#Dan. 7:13
63-64Gena ḏua, 'imam 'agung 'a 'acingi 'ai juba masiretene sababu 'o porata re 'o kanau, “Ngini mo-moini ni 'isene masiretene Unanga 'o kanau ‘Unanga re Ma Jou'ongu Madutu marimoi!’ Dadi, Unanga 'o je-jengere Ma Jou'ongu Madutu. Paralu sakisi riwara! Dadi, ninga 'akala ma sanga sa'olo?” Ananga mo-moini 'aḏi kanau, “Yesus 'o sala. Dadi unanga balasu sanga hukumu sengene.”#Im. 24:16
65Ḏua, ananga nga muḏuo i'a ya obi'i Yesus re ya damunu 'ai la'o re 'U sata. Ḏua ananga 'aḏi kanau, “Na'o Nabi, i'a na siajele 'a guna ni sata Ngana?” Ngowa-ngowa'a jaga ḏi'i simete'e 'U sata.
'A Petrus 'o masoloto Yesus
(Mat. 26:69-75; Luk. 22:56-62; Yoh. 18:15-18, 25-27)
66-67Wakutu Petrus dau toma wala ma soana moju, 'a 'imam 'agung 'ai falalomu we-were'a matengo mo sapolo ino re mo oḏi'i Petrus 'o marasu'u. Ḏua munanga mo jau i'a unanga, mo tailako 'ai biono re mo kanau, “Ngana nena-ne ḏi'i no mamete'e ra Yesus, ngowa'a Nazaret gena-ge!”
68Mada'a Petrus 'o masoloto re 'o kanau i'a toma we-were'a gena-ge, “Ngoi tu nana'o Unanga ua! Ta sahe ua ngana ni maksudu!” Ḏua unanga 'o tagi i'a toma ngo'omo toma 'imam 'agung 'ai wala ma ngalana. [Toma 'orasa gena-ge, namo 'i solene.]
69So-soma'a we-were'a gena-ge mo oḏi'i Petrus re mo kanau i'a ra ananga, “Unanga ḏi'i osama nyo-nyoimi ra Yesus 'ai me-mete'e.” 70Mada'a Petrus masoloto moju.
Ti'ara mai nyangu, ananga mo-moini 'aḏi kanau, “No masoloto rawara, ngana ḏi'i no osama nyo-nyoimi ra Yesus 'ai me-mete'e, sababu ngana ngowa'a Galilea.”
71Ḏua, 'a Petrus 'o masisasi re 'o kanau, “ 'A guna ngini ni kanau nange-ge, ngoi tu nana'o ua!”
72Gena ḏua, namo 'i solene re ma soi ḏiḏi, kara Petrus 'o ma'elingi 'au ngau i'a Yesus 'o kanau pasala ḏua ra unanga, “Namo solene soi ḏiḏi nyangu, ngana no soloto Ngoi re soi ro'ange ḏua.” Ḏua Petrus 'o 'aḏi jomo-jomo.
Nke Ahọpụtara Ugbu A:
Markus 14: SNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2015 © Indonesian Bible Society