Malko 5
5
Yesu waposha ntu wa fiwa
(Mt 8:28-34; Lk 8:26-39)
1Yaya umbalama yi yemba, yafika un-nsi ya aGelasi. 2Na pano wika um-wato, liyo kwene akomengana nu ntu wino wafuma ku malindi, ali ni chiwa ichiipe. 3Uwikalo waakwe wali ku malindi, kutali untu nanti wenga wino angannyepa, nanti ku minyololo. 4Kuna walile wanyepwa maila tupu ku choze ni minyololo; aiputula iminyololo ni chose kwene, nga kutali untu wa maka ya kunnuta. 5Na manda yoshi usiku nu nsanya wawanga uku malindi nu ku myamba, angalwangula nu kuichembola-chembola na mafinga. 6Nga pano wawine Yesu ukutali, wituka ulwilo, wamfukamila. 7Wangula ku maka, waati: “Ndi na chani newe, Yesu, Mwana wi Leesa alu mwiyulu. Nakulafya kuli Leesa utachi nchuzya.” 8Kuno wannena, ukuti: “We, chiwa chiipe, fuma uku ntu wi!” 9Wamtondosya, waati: “Isina lyako weni?” Wannena, waati: “Isina lyane ne Legio, kuno tuli tupu.” 10Nga apapata nkani kuti atayatwala ukunsi ya nsi ilye. 11Na palye pa mwamba pali ufyo unkulu wi yakapoli yalulya. 12Imyenzo ya viwa yapapata, yaati: “Tutwale muli yakapoli, twingile.” 13Wafisumile. Imyenso ya fiwa yafuma, ingila muli yakapoli, Ngufyo onsi utentenkela uku lwilo ichaponga, ingila muli yemba; nayo yali elfu siili, yanwela muli yemba.
14Nga achemi nayo yituka, yaya yalimvya amaswi umunsi num-vyalo; antu yafuma ukuyulola ichatunka. 15Yaya kuli Yesu, yannola untu wilye uwali ni myenso ya viwa, atensi aswite umwenda, ali na malango yaakwe ningo, nawe uwino wali Legio; ingofi shayalema. 16Na yalye yano yaile yalola yayalandila fino chaombike uku ntu wilye uwa viwa, ni syi yakapoli. 17Yatampa ukumpapata atine un-nsi yao. 18Nawe pano wakwela um-wato, wino wali ni viwa wampapata, ukuti awe ponga nawe. 19Leelo wakana, wannena, waati: “Pita uku ng'anda ukwako, uku yanyonko; ukayasundi ifintu uli fikulu fino Mwene wakuchitila na fino wakulolela inkumbu.” 20Nga apita, atampa ukusunda um-Dekapoli ifintu vikulu fino Yesu wanchitila; antu yoshi yasunguka.
Mwana-kachi wi Yailo na mama wino waswanga wasi
(Mt 9:18-26; Lk 8:40-56)
21Na pano Yesu walamba kaili um-wato ku mbalama, iumba ikulu lyakongana kunali, nawe wali umbali yi yemba. 22Awiza wikolo wenga uwa ng'anda yi Leesa, isina lyaakwe Yailo, nga pano wannola, wapona pa mulu yaakwe. 23Wapapata nkani, waati: “Umwanane nnono kachi ali pa lufu; ndukulomba uwize, umwikile ikasa lyako apa nkola, ukuti apole nu kwikala.” 24Nga wapita ponga nawe, niumba ikulu lyannondela, lyamfyenenkezya.
25Nu mwanachi wenga wazwanga wazi imyaka ikumi na yiili, 26nga wachulila ivinji um-makasa yi yasing'anga tupu, nga wasumba ifintu vyonsi fino ali navyo, nu kupola atapola, nanti uche! Leelo ulwale waakwe usya unji inkolelo. 27Pano wapulika amaswi yi Yesu, wapisile mwiumba uku chisila, wemye umwenda wakwe. 28Kuno waatile: “Ngi nemya imyenda yaakwe sile, nampola.”
29Liyo kwene kafukoka wa wazi waakwe ankama, nawe amanya um-mwili waakwe fino wapola indwala iyo. 30Liyo kwene Yesu amanya um-mwili waakwe fino amaka yafuma, wasenuka pakasi yiumba, waati: “Uwini wino wangemya imyenda yane?” 31Alondeshi yaakwe yannena, yaati: “Chene! Utawine maumba fino yalukufyenka, nawe usyuti: uwini wangemya?” 32Walolekesya konsi, kuti alole wino achisile chintu chii. 33Umwanachi wiyo ingofi zyannema nu kutetema, amanya chino chiombike kunali, wiza wapona apa nkola, wannena ningo fino chili. 34Wannena, waati: “Mwana, usumilo wako wakupozya; pita lumi; uwe mpuma uku ndwala yako.”
35Pano achili aluvwanga, yiza antu kufuma kwa wikolo wa ng'anda yi Leesa, yaluti: “Mwanako kachi atafwa, kuni chani ukuchuzya Kasambilizya?” 36Leelo Yesu atalanga mweso, wanena uwikolo wa ng'anda yi Leesa, waati: “Utachopa, taila.” 37Walesizye antu yoshi kunnondela, siku Petlo na Yakobo na Yoane unnina wi Yakobo. 38Yaya ku ng'anda ya wikolo wa ng'anda yi Leesa, wasana impoma na antu yalulila nu kulosya nkani. 39Pano wingila ayanena, ati: “Uku chani umuchita impoma nu kulila? Mwana atafwile, leelo awizi sile.” 40Yansekelela nkani. Nga pano wayafumya yoshi apanzi, asenda isi na nyina wa mwana wiyo, na yalye yano yali ponga nawe, wingila ukukasi mnali umwana. 41Walema umwana ikasa, waati: “Talita kumi.” ali kuti: “Nsungu nakunena, katuka!” 42Liyo kwene awimilila nsungu wiyo wampita, kuno wali ni myaka ikumi na yiili. Liyo kwene yasunguka leka. 43Wayalesya yatanena umwi ifintu fi; nga alanda kuti yampe umwana ichakulya.
Nke Ahọpụtara Ugbu A:
Malko 5: FNT1988
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
New Testament in Fipa © United Bible Societies, 1988. Bible Society of Tanzania.