Malko 4
4
Unnumbe wi kapela-mbezu
(Mt 13:1-9; Lk 8:4-8)
1Nga kaili atampa kusambilizya umbali yi yemba. Yankonganila iumba ikulu nkani. Chaleka wakwela um-wato wikala muli yemba, niumba lyonsi lyali umbali yi yemba. 2Ayasambilisha ifintu tupu uku milumbe, wayanena um-masambilisho yaakwe, ati: 3“Pulikisyini, lolini, kapela wafumile ukuyupela. 4Nga pano wapelanga, imbesu simwi syaponile umbali ya nzila. Ifyuni viza fyakompa. 5Zinina shapona apifinga pano pasi unsili tupu; wene shamela suwa, kuno unsili wachepa. 6Na pano unsanya wawala, shapya, fino sisi ni misisi; shanyala. 7Zinina syapona apa myonga; Imyonga yiyi yamela, yasifyenka, zyaula kufukula. 8Zinina zyapona apa nsili wa ningo, shamela nu kukula, shafukula nu kusêka; yonga makumi yatatu, yonga makumi sita na yonga umwanda.” 9Alanda, ati: “Ali na makutwi ya kupulikila, apulike.”
10Nawe pano wali wenga, antu yalye yano yannizizye na yalye ikumi na yaili, yamtondosizye amaswi ya milumbe ilye. 11Ayanena, ati: “Mwemwi mwapiwa ukumanya amelengwe ya wene-wi-Leesa; leelo kuli yalye alukunzi, vyonsi viluombeka uku milumbe. 12Ukuti:
‘ndi yalola,
yalole yatamanya;
na ndi yapulika,
yapulike yatamanya,
yaatiza yavipele
nu kwelelwa.’ ”
13Wayanena, waati: “Mutamanyile unnumbe uu? Mungamanya uli imilumbe yoshi? 14Kapela wiyo akulupela iswi. 15Eya yano yali umbali ya nzila, pano lipezilwe iswi, nayo ngi yapulika, awiza Shetani, alitisya liyo iswi lino lipezilwe um-myenzo yao. 16Fiyo kwene nayo yano yapezilwe apa mafinga, yano ndi yapulika iswi lili, liyo kwene yalipokelela uku kuchimba. 17Leelo unkasi unjakola yasi ni misisi, leelo yikala kazimbo kache; ndi pano malanda na machulo yaloleka ukwiswi liyo kwene, liyo kwene yampona. 18Nayo yalye apezilwe apa myonga, antu alupulika iswi liyo. 19Ni vya kuno ukunzi na mazosyo ya vyuma nu kulangilila umweso ifintu vinina, vingila vilifyenka iswi liyo, lintuza. 20Na yano yapezilwe apa nsili uli ningo, antu yano yalupulika iswi liyo nu kulipokelela, nu kusêka ivisêke, wenga amakumi yatatu, na wenga amakumi sita, na wenga umwanda.”
Ikozya ni chilingilo
(Lk 8:16-18)
21Wayanena, waati: “Mwalola uli? Chene! Ikozyo yakuleta kuti yaliwike un-chiyo nanti umwizungu? Asi kuti yawika apa chilemelo chakwe? 22Kuno kusi iswi nanti chino chafisama, leelo kuti chivumbululwe, nanti chafisama, leelo mpaka chimanyike apatiswe. 23Untu ngali na makutwi ya kupulikila, apulike.”
24Wayanena, waati: “Lolini, fino mulupulika. Ichilingilo chino mululingila, ali chino mululingliwa na kaili mulongeziwa. 25Kuno wino ali ni chintu, alupiwa, na wino asina chimwi, na chilye chino ali nacho alupokwa.”
Milumbe apa wene-wi-Leesa
26Walanda, waati: “Uwene-wi-Leesa, unnumbe waakwe chikoline na ntu wino wanyampa imbezu apansi. 27Awa lulala nu kukatuka, usiku nu nsanya, imbezu zyamela nu kukula, fino atamanyile. 28Kuno insi ilukuzya inkola, itangula imezya ifwa, kaili untwe apano ni impeche zya ngano uku ntwe. 29Na ndi zyacha, liyo kwene ayu kuyusakata, kuno imbezu zizikoma.”
30Walanda, waati: “Tuukolanye na chani uwene-wi-Leesa? nanti tuutele un-nnumbe uli? 31Ukoline nu lupeche lwa Aladadi, luno lulupelwa pansi, nanti fino ulunono ukuluta impeche zyonsi, 32leelo ngi lwapelwa lukukula nkani kuluta vimela vyonsi ivya n-chalo ivya visêke, ichita matai amakulu, apalinji ni vyuni vya nchundu vimwa nu kwikala un-chisau chakwe.”
33Uku milumbe tupu ndi fi wavwangaa nayo iswi lyaakwe fino yangapulika. 34Leelo pasu nnumbe atayafwansyanga, leelo ayalolwela alondeshi yaakwe unkola ifintu fyonsi uku mbali.
Yesu wamyalasha chipupu
(Mt 8:23-27; Lk 8:22-25)
35Uwanda ulye pano yawa mangusi wayanena, waati: “Tulambe umbalama.” 36Yasha iumba, yansenda fifi kwene finali um-wato; na mato manina yali ukuli konga nawe. 37Ngi chipunga chikulu chikatuka, na maimbi yumu wato, watangula kushula mansi. 38Nu nkola wala pi pinda lya wato, angatalala pa nsamilo. Yannansha yannena, yaati: “Kasambilisha, chisi chimwi kuli wewe, fino tukufwa?” 39Walanka, waukalipila unza, wanena yemba, waati: “Tusha, uwikale chele!” Unsa wansila, kwawa chele. 40Wayanena, waati: “Ifino muli ni ngofi? Muchili musumile nali kwene?” 41Ingofi shayalema nkani, yanenana, yaati: “Uwini wi leelo, wino unsa na yemba filumpulika?”
Nke Ahọpụtara Ugbu A:
Malko 4: FNT1988
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
New Testament in Fipa © United Bible Societies, 1988. Bible Society of Tanzania.