Actes 6
6
Bi lēē binib biluli bí nīn yàkatī tijin
1Iwiin gbanti poonee Yeesu boonnooliibi wíiŋŋu nìn gbéeǹ, ní Juuda yab bin gbìl̀ Greeki sooŋyee bíi gbùkum̄ nì Juuda yab bin pée bí bi-dumpu dooooyee, yii baa tìì bíǹ kpiipoobi tiwan tin bi yàkatī kutaa sá kamaayee kii bi nín tìì bin béeyee puee. 2Ní Yeesu kpambaliŋ saalaa nì alee yíiń biboonnooliibi kɔkɔ, ní ki bí-bi yii: «An kaa máaǹ tí yàntī Unimbɔti bɔti disoondi kí nīn kpèé tijin laŋki. 3Míǹ puee, nnabiyaamu, lēēmaan ni-kansikin bininjab biluli bin pu báà ŋma nyí yii bi sá binimɔntiibee nì bin ni Circir Fam gbí tiŋanee, binib bin cáá iciinee, tí dū ditundi gbanti kí ŋúbiǹ-bi. 4Mimmee, timbi kāntí mpaan kí dū ti-yuntiŋu kɔkɔ kí mèè ŋwimmeem kí sòoǹ Unimbɔti bɔti tin sá ti-tundee.» 5Tibɔti gbanti mɔ́ɔkiǹ samaa kɔkɔ, ní bi lēē Eetiyeen, un nìn fōō ki kíí tikpil Circir Fam bí u-ni tiŋan puee, nì Fiiliipi nì Prookɔɔr nì Niikanɔɔr nì Tiimɔn nì Paameenasi nì Niikoolaa un sá Antiyɔɔsi ki fōō Juuda yab marabee. 6Bi cáań-bi ki dàkā Yeesu kpambaliŋ, ní akpambalee mēē Unimbɔti ki tīī-bi, ní ki dū bi-ŋalii ki páaǹ bi-pu. 7Unimbɔti nyɔɔbundi mɔ̀tīi gbìtī ajan kɔkɔ, ní Yeesu boonnooliibi mɔ̀tīi wīintí tikpil Jeerusaleem tiŋkin, ki kpáaǹ bisaraaŋaliibi tikpil nìn fòol̄ Yeesu bɔti ki kíikí.
Bi cúú Eetiyeen
8Unimbɔti nìn pú Eetiyeen diyimɔɔl nì mpɔn tikpil, ní u nìn ŋáań maamaacikpaambi nì tidaandi samaa kansikin. 9Dikitil din bi nìn yíì iyumbu in bi líìyee kitilee nib nìn yíkì ki bíi kpākantí Eetiyeen. Bi nìn sá Juuda yab bin nyánní Siireen nì Aleekisandirii nì Siilisii nì Asiiyee ní. 10Ama baa nìn ŋūǹ kí sòoǹ kí líí-u, iciin in Circir Fam nìn yàntī u sòoǹee pu. 11Míǹ puee bi tīī njapaamu mubɔ tiba dibalin bí lì yii: «Ti gbìl̄ u sòoǹ tibɔti ki bíiĺ Mooyiisi nì Unimbɔti yindi#6.11 Dūú ŋmàntī nì Maat 26.59-61, Maar 14.55-58..» 12Ní an cúú kunipaauee poon ki kūtì ki kpáaǹ bitindaŋkpilib nì bimaradakaliibi, ní bi cūtìi cúuń-u mpɔn ki cáań bibɔsoonliibi kitil nimbiin. 13Ní bi yāntì binib biba mɔ́ntì nnyimɔn u-pu yii: «Uninja nee pée sòoǹ kaa gbèentí ki bíiĺ kunimbɔtidii nee nì Mooyiisi marab, 14kun puee timbi gbìl̄ u bí yii Yeesu Naasaareeti yɔu nee làá kpìtī kunimbɔtidii nee kí kpántí akoobil ŋin Mooyiisi nìn tīī ti-naanjabee.» 15Bibɔsoonliibi bin nìn kēe kɔkɔ dū bi-nimbikpeeŋu ki báaǹ Eetiyeen pu, ní ki ká yii u-nimbiin kpántì kii Unimbɔti tuuŋŋu nimbiinee.
Nke Ahọpụtara Ugbu A:
Actes 6: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.