Luka 24
24
Kufufuka kwa Jeso
(Matayo 28:1-10; Mariko 16:1-18; Johana 20:1-10)
1Tsʼiku ya mwanzo wa juma ra Ayahudi#24:1 Tsʼiku ya mwanzo wa juma ra Ayahudi ni Jumapili. na chiramuko dani-dani, aratʼu achetʼu ákwenda kuko mbirani kwa Jeso na garatʼu mavumba gokala adzigabambanya. 2Ariphofika kuko, ákwendarona ridziuswa riratʼu dziwe rokala ribinikʼizirwa mbira, na ridziikwa kʼanda ya yiyo mbira. 3Ariphophenya ndani ya mbira, kʼaalonere lulo lufu lwa Bwana Jeso. 4Ndo ariphokala acheri kwangalala mumo dzulu ya neno riro, achihendaona kare atʼu airi okala anametameta muno aimire mumo phephi nao. 5Ao achetʼu achogofyerwa muno hata achishindwa ni kwalola. Aratʼu atʼu achiaamba, “Kwadze munamutsakula mbirani mutʼu ariye ucheri moyo? 6#Mat 16:21; 17:22, 23; 20:18, 19; Mar 8:31; 9:31; 10:33, 34; Luk 9:22; 18:31-33Yiye ufufuka kʼamo mumu. Lilikanani maneno arigomwambira ukati ariphokala u kura Galilaya. 7Yiye wamwambira kukala, ni seti yiye Mutʼu yelaa dzulu alaviwe kwa adambi amugwire, na ao andamukotʼa misumari musalabani, ela tsʼiku ya hahu undafufuka.”
8Phapho ao achetʼu achigakumbikira garatʼu manenoge, 9achilaa mbirani na achendaambira aratʼu anafunzi a Jeso kumi na mumwenga, na anjine nao nguma za maneno gago gosi. 10Ao osema nguma zizo kwa ahumwa a Jeso ákala ni: Maryamu muchina Magidala, Joana na Maryamu ameye Jakobo, phamwenga na achetʼu anjine oatuwa. 11Ela ao anafunzi a Jeso achigahwalira maneno gago dza kwamba kʼagana maana, na ndo hata kʼaakuluphirire. 12Ela Pʼetero walaa, achikaza mairo hata kuko mbirani. Ariphovumbama na kutsungurira mumo ndani, achiona yiyatʼu sanza ya kitani tu hicheye, na achiuya mudzini na kwangalala dzulu ya gago gokala galairira.#24:12 Nakala zinjine kʼazina fungu ra 12.
Charo cha kwenda Emau
(Mariko 16:12-13)
13Tsʼiku yiyo mwenga, anafunzi airi a Jeso ákala anenda kadzidzi kamwenga kaihiwako Emau, phatʼu phapatapho kʼilomita kumi na mwenga kulaa Jerusalemu. 14Mumo njirani ákala anenda achigomba dzulu ya gokala galairira. 15Ndo enye vyokala anatarirana na kuuzana-uzana, Jeso mwenye achilairira achigwirikana nao. 16Ao phapho ámona na matso gao jeri, ela kʼaamumanyire ndiye.
17Jeso achiauza vivi, “Munenda muchigombani mwimwi?” Ao achiima, achinyamala zizizi, na achikunza nyusi zao kwa utsungu. 18Phapho mumwenga aihiwaye Kileopa achimuudzidza achimwamba, “Kwani we ukale u mujeni kuko Jerusalemu? Bee hata kumba u mujeni, nawe bee ndiwe mujeni hicheyo Jerusalemu yosi yetsʼimanya golairira kuko vivi dzuzi?” 19Yiye achiaudzidza achiaamba, “Ni maneno gani asena golairira kuko?” Ao nao achimuudzidza achimwamba, “Mba kuna maneno gomupata Jeso muchina Nazareti. Yiye wakala ni mugomvi wa Mulungu, yeajaliwa ni yiye Mulungu widimi wa kuhenda vilinge vinji na kufunza, na atʼu osi ákala adzimukubali. 20Tsʼo makuhani abomu na vilongozi ehu gachikala kʼagaahamira kare gago, hata achimulavya alamulwe kunyongwa, na achimukotʼa misumari musalabani. 21Ela sino hwakala hunamukuluphira kukala, yiye ndiye ariye angari kuhutivya siswi Ayahudi. Na dzulu ya gago gosi wahi, yiyi rero bee ni tsʼiku ya hahu hangu maneno gago gahendeke. 22Na achetʼu anjine a kwehu adzihwangalaza. Maana, ákwenda kuko mbirani na dani-dani, 23ela kʼenderelona lulo lufulwe. Akauya na akadzaamba kukala, álairirwa ni malaika a Mulungu odziambira kukala hangwe ufufuka hata ucheri moyo. 24Ndo anafunzi anziehu akenda kuko mbirani kwendalola, na akendaona dza godzigombwa ni ao achetʼu, mana, álola mumo mbirani, ela kʼaamonere.”
25Ndo phapho Jeso achiaamba, “Kwadze mwimwi mucheri dzizani vino na myoyo yenu ni mikomu hata kʼamukuluphira gara gosi gogombwa ni agomvi a Mulungu? 26Agomvi a Mulungu áamba ni seti yiye Kʼirisito ashononeswe, ndipho aphenye kwakwe ubomuni!” 27Ndo Jeso achanza kwaambira lwazu-lwazu maneno gosi gokala ga dzuluye kwenye Maandiko ga Mulungu, kwanzira vitabu vya Musa hata vya agomvi a Mulungu osi.
28Ariphokala anatapira karatʼu kadzidzi kokala anenda, Jeso achidzihenda dza kwamba undachira phapho aenderere na charo, 29ela ao achimulombera achiamba, “Kala phapha phamwenga naswi, mana, vivi kudzetswa na kwenenda na usiku tsʼiko kudzo.” Ndo achiphenya phapho kadzidzini, achikala phamwenga nao. 30Ariphosagala kwa arye phamwenga nao, achihwala mukahe, achimulavira mumvera Mulungu, chisha achiumega achiapʼa. 31Ndo phapho achingʼalwa ni matso achimukumbikira. Ela phapho kare achihendamona kʼapho phapho. 32Ndo achambana, “Vidze, udzikala usikiradze kuko kuhamirwa uwe musena mumo moyoni, phodzikala unahungʼazira gara Maandiko ga Mulungu kura njirani?” 33Ndo achiuka kare saa yiyo yenye achiuya Jerusalemu. Achendaaona aratʼu ahumwa a Jeso kumi na mumwenga, na aratʼu anjine okala a phamwenga nao a chirundu 34anaamba, “Bwana ufufuka jeri, kwakukala, udzimulairira Simoni!”#24:34 Simoni ni dzina rinjine ra Pʼetero. 35Ndo aratʼu anafunzi airi achiaambira garatʼu gokala gadzialairira njirani, na jisi arivyomukumbikira Bwana ukati wa kumega mukahe.
Jeso unaalairira anafunzie
(Matayo 28:16-20; Mariko 16:14-18; Johana 20:19-23; Mahendo 1:6-8)
36Ao anafunzi airi ariphokala acheri kwaambira gago, Jeso mwenye achiima kati yao, na achiaamba, “Kʼamuna utʼu? Reri yikale namwi.”#24:36 Nakala zinjine kʼazina pʼande yiyi yambayo: na achiaamba, “Kʼamuna utʼu? Reri yikale namwi.” 37Ela ao achahukwa ni myoyo, na achiphenywa ni woga achiona dza kwamba adzona tunusi. 38Ela yiye achiauza achiaamba, “Kwadze munaogofyerwa na kuyugika mwenu myoyoni? 39Lolani maganja gangu na vifumba vyangu, na mundaona ndimi yekotwʼa misumari musalabani. Nikumbani mumanye ndimi jeri, mana, tunusi kʼarina mwiri wa misoza dza munonavyo mimi.”
40Ariphogomba gago, achiaonyesa maganjage na vifumbavye. 41Ela ao achikala kʼaadzangwe kukuluphira vivyo, mana, áhamirwa na achangalala. Jeso yiye achiauza vivi, “Muna leu rorosi phano?” 42Anafunzie achimupʼa chisiku cha beshe ra kukanga. 43Achichihwala, achirya na kuno osi anamulolera. 44Chisha achiaamba, “Yiyi ndiyo maana, ya garatʼu maneno nirigomwambira ukati niriphokala nicheri phamwenga namwi. Mwimwi námwamba ni seti gachimire gosi goandikwa dzulu yangu mumo Shariyani mwa Musa, mumo vitabuni mwa agomvi a Mulungu, na mumo chitabu cha Zaburi.”
45Chisha achiaambira lwazu-lwazu, na achiaidimisa kumanya maana, ya gago Maandiko ga Mulungu. 46Jeso waamba, “Gáandikwa kukala yiye Kʼirisito undashononeswa na aulagwe, ela tsʼiku ya hahu undafufuka kulaa kuzimu. 47Na udzumbe wa kwahenda atʼu atye kwa asamehewe dambi zao waandikwa vivyo nao, na ni seti usumurirwe itsʼi zosi kwa dzinare, na undaanzira Jerusalemu. 48Mwimwi ndimwi mashaidi a maneno gago. 49#Mahe 1:4Na mimi mwenye nindamuhumira yuyatʼu ariye Baba walaga undamuhuma, ela tarizani phapha Jerusalemu kwanza hata muhewe uratʼu widimi wa dzulu.”
Jeso unahwalwa kwenda mulunguni
(Mariko 16:19-20; Mahendo 1:9-11)
50 #
Mahe 1:9-11
Jeso wauka Jerusalemu na anafunzie, achenda nao vivi hata phephi na Betania, achiunula mikonoye dzulu achiahatsʼa. 51Ariphokala unaahatsʼa, achihwalwa kwenda dzulu mulunguni, ao achiaricha. 52Ao anafunzi achanza kumwabudu,#24:52 Nakala zinjine kʼazina pʼande yiyi yambayo: achanza kumwabudu. achiuya Jerusalemu na kuno anahamirwa muno, 53na achikala ákala Hekaluni kumulika Mulungu.
Nke Ahọpụtara Ugbu A:
Luka 24: CHIDUR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye