Yoh 12
12
Mininga asii Yesus mbòn a Betania
Mt 26,6-13; Mk 14,3-9
1Mëlu mësaman osusua Paska, ndò Yesus angasò a Betania, e hom Lazarus angabë; Lazarus te ṅnyè Yesus angahëlë a bëkon. 2Ndò bëngabò nyè dina hala, Marta asye a tëbëlë bidi, Lazarus atoa mbòg ya e bod bëdzaag ai nyè. 3Ndò Maria anòṅ etun kila mbòn mësan otoa abui mòni, angawòbò wò Yesus a mëkol, afimiṅi nyè mëkol ai esil dzie. Nda edzie fò ai enyum mbòn. 4Yudas Iskariot, mbòg ya bëyègè boe, -ṅnyè angabë na ayi kuan ai nyè- nyè na: 5A dze bandzëki kuan ai mbòn vi minsaṅ mintèd milè, bëvëë mimbubua? 6Angabë adzoo nala, së ki mbol adaṅa mvaman ai mimbubua, dzam da, mbol angabë ṅwuwub, ṅnyè fë abëlë nkòb, ndò akadëgë dzib e dzi bafudi ete. 7Yesus nyè na: Dzoge nyè, abòò dò asu amos edzëb-mbim dzama. 8Amu mibëlë mimbubua kòm esë abë mina, dzam da, miabëlë ki ma kòm esë.
Bayili na bayi woe Lazarus
9Abui nkunda ya Yuden bëngayëm na anë hala, ndò bëngasò, së hm ki hë asu Yesus etam, dzam da asu yë na ba bëyen e Lazarus ya angahëlë a bëkon. 10Ndò bëfada bënen bëngabui esòg na bëwoe fë tò Lazarus, 11amu abui dzam bëngabë kodogo a Yuden, bëngayëbë Yesus hë etòm dzie.
Yesus anyian a Yerusalem ai abui duma
Mt 21,1-11; Mk 11,1-11; Lk 19,28-40
12Amos otsaag hala, nkunda osë ongasò a abog, bëngayi wog na Yesus azu a Yerusalem, 13bënòṅò mëbui mëlen, bëngakë toban ai nyè, bëbama na: Osanna, aluguban, e nyò azu a dzoe Nti#12,13 Sal.118, 25-26, nkukuma Israel.#12,13-22 Biayëm fë nlaṅ hi abë Mateus, Markus ai Lukas na Yesus atsidan bëkuan bë byem a tempel. Aha, Yesus afubu tempel esya a mëtari më esye dzie.
14Yesus ayënë man ozele, atòbò nyè a yob, akyaè anë ntilan na:
15Të wakòn wòṅ, a ngòn Sion,
Yënë sik, nkukuma woe azu,
atoa ngal ozele a yob#12,15 Zak.9,9.
16Bëyègè boe bandzëki wog dzam te etye etye, dzam da, eyòṅ Yesus angabëlë duma, ndò bazu tsog na dzam te angabë ntilan atyan ai nyè, ai na bëngabò nyè dò. 17Nkunda ya ongabë ai nyè eyòṅ angaloe Lazarus a sòṅ a nsëṅ, ahëlë nyè a bëkon, ongabòòlò fò. 18Asu te nkunda ozaag toban ai nyè, amu bëwogo e ndëm angabò nyi. 19Bëfarisea bëngadzo a zaṅ bò bò na: Nga miayen na miasëki ai mfi? Bod bësë batoṅ nyè!
Bëgrek bëziṅ bayi na bayen Yesus
20Bëgrek bëziṅ bëngabë ai e bod bëngabed na bazu a abog. 21Ndò bakë abë Filipus ya Betsaida ya Galilea, ndò badzo ai nyè na: A moe, biayi na biayen Yesus. 22Ndò Filipus akë kad Andreas, Andreas ai Filipus bësòò kad Yesus. 23Yesus nyè ai bò na: Awola asò ya na mòn mod abëlë olugu. 24Bëbëla emen, makad mina na: ngë e fes mvòṅ yaku a si ebò të wu, yatòbò etam. Ngë ewu, yayi vë abui bibuma. 25E nyò adiṅ enyiṅ dzie, adzèè dzò, ndò e nyò afëm enyiṅ dzie a e si nyi, ayi dzò baala a enyiṅ kòm. 26Ngë mod ziṅ asye ma, ayi ma toṅ, ndò fë, e hom osë mayi tòbò, nsye wama nyè ayi fë tòbò ete. Ngë mod ziṅ asye ma, Tara ayi nyè vë olugu.
Bayean bede mòn mod a yob
27Etoa dzi, nnëm wakòn ma; ndò mëkë dzo ya? Yë na: A Tara, kodëge ma a awola di? Ma mëngasò asu awola di! 28A Tara, vaa dzoe doe olugu. Ndò kiṅ engasò a yob na: Mëvë ya olugu, ndò fë mayi dugan vë. 29Nkunda ongabë otëlë, owogo, bò na: zeyan nyili! Bëvòg bò na: Englès ahë kòbò ai nyè. 30Yesus nyè na: E kiṅ nyili endzëki bòban asu dama, ebòban asu daan. 31Eyòṅ dzi, ntol e si nyi wazu tsigëban; etoa dzi, ndzoe ya e si nyi azu woaban a nsëṅ. 32Mfag wama, eyòṅ mayi bedëban a si, mayi dudu bësë abë ma. 33Angakòbò nala atyan ai akyaè awu ayigi wu. 34Nkunda ai nyè na: Bia, bingawog a mvende na Kristus alaṅan a kòm, ndò eyë wadzo ya na mòn mod ayean bedëban a yob? Mòn mod te anë za ben? 35Yesus nyè ai bò na: Mfyè ongënë ai mina man eban. Wulugan ntye mibëlë mfyè, asu yë na të dibi ladilan mina. Ndò, e nyò awulu a dibi, ayëm ki mfag akë. 36Ntye mibëlë mfyè, yëbëgan mfyè, asu yë na mibò bòn bë mfyè.
Alèd-nnëm Yuden
Yesus angayi mana kòbò nala, ndò akë, asòbò bò. 37Afyaṅan bò na angabò eyëgan abui biyëṅ bi mam a zaṅ dzaban, bò tègè nyè yëbë, 38asu yë na ebug profèt Isaias dzi etoban na:
A Nti, za angayëbë nkòbò wama?
Za ki mbo-nnomo Nti angakulëban#12,38 Is.53,1?
39Asu te bëngabë ki dzam yëbë, amu Isaias adzo fë na:
40Angakub bò ndim a mis,
Amana bò yëm minnëm,
asu yë na të bayen ai mis,
bò të wog ai nnëm,
asu yë na bëzaa vëṅan, mësye bò#12,40Is.6,10.
41Isaias angadzo nala amu angayen duma die, ndò angakòbò atyan ai nyè. 42Tò hm të nala, abui bëvòg ya bëdzoe bëngayëbë nyè, dzam da, asu bëfarisea, bò të nyè mëm asu yë na bëzaa kuli bò a nda-bikoan a nsëṅ. 43Amu bëngabë diṅi olugu ya asò a bod alodo olugu Zamba.
Ebug Yesus yayi tsig ntol
44Ndò Yesus akòbò a yob ete, nyè na: E nyò ayëbë ma, së ki ma ayëbë, ayëbë e nyò angalom ma, 45ndò fë e nyò ayen ma, ayen e nyò angalom ma. 46Ma mëngasò anë mfyè a si, asu yë na e nyò osë ayëbë ma abë tòbò a dibi. 47Ndò ngë mod ziṅ awog bibug biama, dzam da, të biè baala, së ki ma matsig ntol woe. Amu mandzëki sòṅ na madzòs si, dzam da asu yë na makode si. 48E mod abyandi ma, të nòṅ bibug biama, abëlë e mod adzòs nyè. Ebug mëngakòbò, yayi nyè dzòs a amos mvua. 49Amu makòbò ki ai mamen, dzam da, e Tara angalom ma ṅnyè angavë ma mvende e dzom makòbò ai e dzi mayi dzo. 50Ndò mayëm na mvende dzie enë enyiṅ kòm. E mam makòbò, akyaè ya Tara angakad ma, nala ngò makòbò.
Nke Ahọpụtara Ugbu A:
Yoh 12: NTE12
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
MKPAMAṄ AMVOE Nouveau Testament en langue Ewondo © Bible Society of Cameroon, 2012.