Keriben 11
11
XI
O Dešujekto Šero
1He o Bičhade h’o phrala, have ehas andri Judea šunde, kaj o gāǧe l’ile mre Devleskro Lav.
2Kana o Petros avl’as andri Jeruzalema, o bibolde košenas pes leha.
3Phende, Tu gēl’al maškar o bičhinde manuša, he xahas lentsa.
4Uva o Petros phend’as odova savoro pāle karthar o najanglūno lav, he sikavelas savoro jek pal āver, he phend’as.
5Me somas andro foros Jopa, mangavas man, he andro sūno dikl’om jek khoro, so perelas, har jek bāro poxtan, muklo tēle kathar o uprūno devel štāre sukentsa, he avl’as odova ke ma.
6He kana pr’odova dikl’om mre jakhentsa, pēl’om pre gōd’i kaj dikhavas e phuvakren štāreprrengren, h’e vešeskre ǧivipnaskren, he sapen, he čiriklen.
7He šund’om vika, havi phend’as mange, Ušt’i, Petrona, mudār he xa!
8Me phend’om, Na auka, Raja, Či, so ehi gaǧikāno vaj so ehi mel’alo na perela ñikana andre mro muj.
9H’e vika phend’as mange pāle kathar o uprūno devel, So mro Devel kerd’as šukar, ma phen, kaj ehi gaǧikāno.
10Adava ehas kerdo trinvar, he savore ehas l’ile upre ke mro Devel.
11He dikh! najekvar avle trin manuša andro kher kaj me somas, bičhade andral e Kezaria ke ma.
12H’o Vōd’i vičind’as man te ǧav lentsa, te na darav. He avle mantsa šov phrala, he gēl’am andro kher akada manušeskro.
13Jov sikavelas amenge har dikl’as e devleskre bičhadones andre leskro kher, havo terd’il’as, he phend’as leske, Bičhav e manušen andri Jopa! he vičin e Šimonos, so leskro dadeskro nav ehi Petros!
14Adava phenela tuke lava, he tu, he savoro tro kher avena ǧide.
15He har l’il’om te vakerel, o devleskro Vōd’i pēl’as pre lende, auka har angleder pr’amende.
16Pales leperavas mange o Rajeskro Lav, har phend’as. O Janos čāčes bolelas e pāñeha, uva tumen avena bolde e devleskre Vōd’eha.
17Odoleske mro Devel diñas len adeso lāčiben, auka har amen, have pat’ahas e Rajeske Ježišiskre Kristoske. So me somas, kaj te kerav mamuj mro Devel?
18Har odova šunde, na vakerenas, hašārenas e Devles, he phenenas. Auka mro Devel diñas e gāǧenge, so pes laǧanas, kaj te šaj aven ǧide.
19Ak akanak, adala, have ehas čhivrdine, kana ehas pal e bilāči būt’i, so pes kerd’as vaš o Štefanos, phirenas andre Fenika, andro Kipros, andro Antioxos, he na vakerenas o Lav ñikaske, korkoro e biboldenge.
20He varehave manuša lendar ehas andral o Kipros, h’andral i Kirena, have, kana avle andri Antioxia vakerenas e Junānentsa, he sikl’ārenas pal o Raj Ježišis.
21He o vast e Rajeskro ehas lentsa, h’o bāro ginipen pat’alas, he gēl’as pāle ko Raj.
22O lava akada but’endar avle ki Kangeri, havi ehas andri Jeruzalema; he jon bičhade avri e Barnabāšis kaj te ǧal andri Antioxia.
23Kana avl’as, dikl’as e Devleskro lāčipen, hašārelas pes, he vičind’as savoren kaj te pes ikeren lāče jileha mre Rajeha.
24Jov ehas lāčo manuš, pherdo e devleskre Vōd’eha, he pat’avibnaha, he but manuša ehas kedine ko Raj.
25Pales gēl’as avri o Barnabāšis andro Tarzos, kaj te rodel e Savlos.
26Kana les rakl’as, and’as les andri Antioxia. He auka jek berš ikerenas pes ke Kangeri, sikl’ārde but manušen, he o Sikl’ārde bučonas o najanglūno var »Kristoskre« andri Antioxia.
27Andr’akada d’ivesa avle e Devleskre Manuša andral i Jeruzalema andri Antioxia.
28He ušt’il’as lendar jek, so bučolas Agabāšis, he sikad’as e vōd’eha, kaj avela bāri bokh pal savori phuv. Odova avela andre Klaudiuskre Thagāreskre d’ivesa.
29Pales, o Sikl’ārde, sako manuš har ǧānelas, pēl’as pre gōd’i kaj te bičhavel buter zor odole phralenge, have bešenas andri Judea.
30Auka kerde; bičhade adava ko Najphureder manuša e Barnabāšiskre h’e Savloskre vastentsa.
Nke Ahọpụtara Ugbu A:
Keriben 11: MOR1936
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
First published by the British and Foreign Bible Society in 1936.