LUKE 19
19
Jesu leh Zacchaeus
1Jesu Jerichoa khanga kasea kathleng thang jo. 2Khana khan ramsêr kaṭhei kalenpen arahming Zacchaeus inti mikahaotak inkhat leika-om. 3Ama’n Jesu kha tu achang hmu nger rong tia aleimandon, tâk ama kha mi kasin inkhat leikae khana mipui kâra inphut Jesu kha leihmu tor mak. 4Khava jâra Jesu hmuna sik a mipui hma leikatlâna anhongna sik hlampanga theipōng kung inkhat chunga leikake jo. 5Khana Jesu’n khava hmun kha aheiphâk pha, a-entoua ahnenga, “Eh Zacchaeus! inranga jōng ṭum roh, ajârchu tuning kei na-inna akatlung nger sik eng kae,” ati.
6Zacchaeus inrangtak a jōng kaṭuma, inpâktak a ama aralama kae. 7Akahmu mi rakip kachōr inphut heia, “Ama mikase inkhat inna akatlung sik a kase jo,” anti.
8Zacchaeus kangirsōt a Rōngpu hneng, “Enroh, apu, ke’n kanei aṭim sarahei kapek sik, khana ke’n mi inkhat nei dik loa kaleilo a-om inum aja 4 a kamale sik,” ati.
9Jesu’n ahnenga ati, “Tuning hiva innshunga hukmanhringna jōng katlung jo; ajârchu hiva mipa hi’m Abraham sōn inkhat kae. 10Mihring Sapa kha a’nhmanghei kajong leh kahuk sik a akajōng kae.”#Mt 18.11
Sana Sêrching Tekâk
(Mt 25.14–30)
11Mihe’n aṭong kha anlei rangeilai Jesu’n tekâk inkhat ahri pek hei. Tûnchu ama’n Jerusalem aphâkvet jo, khana anmani’n Pathen Rengram kha a’nlârbei sik joa anleimandona kae. 12Khava jâra ama’n ati, “Pha khat a phung kalen mi inkhat leika-om; ama kha ram kahlatak a reng hmun kalo sik a leikase, khava sōa ahong inle sik a le’ntluk. 13Ama ase mak hma asōk 10 abek heia sana sêr cheng khat et apek hei, anhnenga, ‘Kasesōt shunga hivahin invei theina lei-en ruh,’ ati. 14Tûnchu, ama mikhet he’n anleihōt jo, khava jâra reng hmun kapek sikpa hneng tirle antira, ‘Ama kanreng kachang sik a madu mak ung’ anva manti jo.
15“Akinna mipa kha reng inkhat a hong inle jo. Khavatak a asōk-hei anhong inlârna sik ṭong apek jo hei, heija sâm mo antamanpung manhretna sik a kae. 16Hma inkeipa kahonga ahnenga, ‘Apu, ke’n 10 kaman pungsa,’ ati. 17Ama’n ahnenga, ‘Kaṭha natlo jo, nang sōk kaṭha che kae! Neinâk katlômtek chunga nang taksenthei nachang jâra, khōpui 10 chunga vai kamanrôn sik che,’ ati. 18Sōk 2 tluknapa kahonga ahnenga, ‘Apu, nang in napek eng vâng khan sana chêng 5 kaman pungsa’, ati. 19Hivapa hneng hin ama’n ati, “Nang in khōpui 5 chunga vai narôn sik kae.”
20“Sōk ahlop inkhat kha kahonga, ‘Apu, napek eng sêr kha pōnhar vâng kakhit a kathup; hin ka-om. 21Nang kaṭit che, ajârchu mi kakhôk inkhat che kae. Nata kachangmak kha nang in nachom, khana navormak kha nang in na-ât,’ ati. 22Ama’n ahnenga: ‘Sōk kaṭhamak nang, nabeisō khet ṭong vânga khan kamaset sik che kae. Nang in mi kakhôk kachang namanhret, kata kachangmak kachom, kavor mak ka-ât namanhret. 23Kha achang inchu kaṭha jo, heisa mo kasêr kha sêr dana bank a nava damak? Naleida achang inchu kei kahe’nle pha hin athōi leh kahmu sik kae,’ ati.
24“Khava pha anhnenga akangir hei hnenga ama’n, ‘Ama hnenga sana sêr chêng khat kha lo una 10 kaneipa hneng pesa ruh,’ ati hei. 25Anmani’n anhnenga anmasôna, ‘Apu, ama chu 10 aneidek jo kae!’ anti. 26Ama’n amasôn hei, ‘Ke’n kahri pek chei kae tu achang inum akanei mi kha a’npesa sik kae, tâk akaneimak mi kha ajingte anei kapha kha’m a’nlosōt pek sik kae.#Mt 13.12; Mk 4.25; Lk 8.18 27Tûn ke’n reng kachang sik ani-indumak kakadōi hei kha hin kahmai kunga heiṭhōi hei una that hei ruh,’ ati.”
Kalûrtak a Jesu Jerusalema Ahlut
(Mt 21.1–11; Mk 11.1–11; Jn 12.12–19)
28Jesu’n kha ahrisōa anhma Jerusalemting leikase jo. 29Ama’n Bethphage leh Bethany hneng aphâkna sik ahnai jo pha Olive Tlânga asonle 2 anhma atir heia 30ṭong aleimanthei hei, “Nanhma khōa son se ruh; nangni nanhlut lim leh, tûte talachōng mak shakōrtungte inkhat a’nkhit nanhmu sik. Vasōt una hin heiṭhōi ruh. 31Khana mi’n, ‘Heisa mo nantasōt’ anti chei inchu, ‘Rōngpu’n hmang hnōmna anei,’ ti ruh,” ati hei.
32Anmani kase heia Jesu’n ahri pek hei kapōa heirakip anmani’n anvahmua kae. 33Anmani’n shakōrtungte kha ansōt pha, akapupa’n, “Heisa mo nantasōt?” ati hei.
34Anmani’n anmasôn, “Rōngpu’n hmang hnōmna anei,” anti. 35An-mani’n Jesu hneng anṭhōi jo. Khana anmani’n shakōrtungte chunga anpōn anpha a Jesu achunga anmanchōng jo. 36Khanga achōng pha hlam a anmani’n anpōn anphapek a kae.
37Ama’n Jerusalem ajōn manhnai jo pha, Olive Tlânga jōng ṭum sukna hlam a inphut asonle mi katamtak in aṭōn kalen tlohei rakip anhmu jâra rasa inhnaktak a Pathen manpâkna leh ama choi ka-ânna anphut jo: 38“Rōngpu rahminga akajōng rengpa kha Pathen in mahâmṭhat pek rasoh! Marvâna mōngna om rasoh khana Pathen kha chunghnung pena lûrṭhak rasoh,” anti.#Hl 118.26
39Khava sōa mipui kâra Pharisee ṭhahrep in Jesu hneng anhei hri, “Oja, nasonlehei hi andai hngerna sik rakôk hei roh!”
40Jesu’n amasôn hei, “Anmani andai hnger inchu, hlunghei hi ahong ka-ôngsōt sik hei kae.” ati.
Jesu’n Jerusalem Chungchânga Ṭajai Asui
41Ama’n khōpui kha ahei hnai jo, aheihmu pha ṭajai asuikhum jo, 42hinga ati, “Tuning hin lungmōng chenna sik a heimo arangei kha namanhret inchu nu! Tâk-kha nang in khahei kha hmutor mak che. 43Nare he’n nakimvea ankakurkhum sik che, nahlam rakip ankhâr sik a kha rekur antuk khumna sik che kani alajōng katlung sik kae. 44Anmani’n nang leh nakur bang shunga ka-om mi seng ansuksetpet sik; hlung inkhatbek um a-omna hmun a khan indahlon mak ning, ajârchu nakahuk inhring Pathen ajōngna sik pha leimanhret mak jo che.”
Jesu Bek-inna Ase
(Mt 21.12–17; Mk 11.15–19; Jn 2.13–22)
45Jesu Bek-inn shunga kahlut a, neinâk kajōrhei kha hnongsōt aphut jo, 46anhnenga ati, “Pathen in aleihri kha ṭong inthenga hinga inzet, ‘Ka-inn hi derna inn a’nti sik kae. Tâk-kha nangni’n inruhei inthupna khur nanmanchang jo!’”#Is 56.7; Jer 7.11
47Jesu’n ani tina Bek-inna aleimanthei hei. Thempu kalenhei leh Dân ojahei, khana hlamkakei he’n ama anleithat hnōm jo,#Lk 21.37 48tâk khava tlona sik hlam leihmu tor mak hei, ajârchu mi rakip in aṭong hri kha rahme khatbek manhmang loa anlei rangeia kae.
Nke Ahọpụtara Ugbu A:
LUKE 19: KOMRBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.