LUKE 18
18
Hmeithai leh Ṭong Katanpa Tekâk
1Khava sōa anmani’n malung tlâklo hêra ahei tik a anderna sik Jesu’n hiva ṭong tekâk hi amanthei heia kae. 2Jesu’n ahri, “Khōpui inkhat a Pathen kaṭitmak, mihe’m kajana kaneimak, ṭongkatan inkhat leika-om. 3Khava khōpuia khan renghmeinu inkhat leika-om, amanu kha ṭong katanpa hneng kahong ṭhak a ama inhrung theina sik a avahri, “Ani ka-en kada heia inphut ahuk roh!” ati. 4Pha bongkhat chu leihnōm pek mak; tâk hnunga chu ama’n amandona, ‘Ke’n Pathen kaṭitmak a heitea kasak mak inum, 5hiva renghmeinu hin akachok ṭhak jo eng adikna kha achenna sik enpek jo parong, kha achangmak inchu kahong ṭhak sik a kha thōktor mak jo ning,’ ati.”
6Khana Rōngpu khan ahrisa, “Akadik mak ṭongkatan pa’n ahri kha rangei ruh! 7Tûn Pathen mihe’n sûn leh jân inthōpuina sik a akaṭap hei kha donloa ada sik hei mo? Anmani inthōpuina sik ama a’n-êng sik mo? 8Ke’n kahri pek chei kae, ama’n anmani hukna sik ṭong atan sik khana inrangtak a atlo sik. Tâk-kha, Mihring Sapa kha ajōng pha leh raleichunga akataksen mi ahmu sik hei nâk mo?”
Phariseehei leh Ramsêr Kaṭheihei Tekâk
9Anbinga mikadik a a’nhlamrin hei, milak chu heitea kateimak hei hneng um Jesu’n hiva ṭong tekâk hi ahri nôk: 10“Mi 2 akader sik a bek-inna kase hei, mi inkhat kha Pharisee kae, inkhat kha ramsêr kaṭhei kae.
11“Pharisee kha abinga inkârjap a kangira hinga ader, ‘Pathen kamanpâk che, kei milak-hei kapōa akajông, akadik mak, mihei kapōa phâmrai kase changmak eng, kamanpâk che ti chu kei hi sosonna aka-om ramsêr kaṭheipa kapō’m changmak eng. 12Kani vekhat a vōi 2 thlai kahngōi, kanei rakip sem sôm kapek a kae,’ ati.
13“Tâk-kha ramsêr kaṭheipa kha kahlajap a kangira marvânting kapha’m ahmai mahe tor loa, a-ôp akabena, ‘Pathen, kei mikaset eng kae, aheilungset roh!’ ati. 14Jesu’n ati, “Ke’n kahri pek chei kae, Pharisee changloa, ramsêr kaṭheipa kha a-inna a’nle pha Pathen hneng dikna achen jôk a kae. Ajârchu, binga a’nchoi inshâng rakip kha insu-inhnem sik, tâk binga a’nsinsak rakip kha choi manshâng sik kae.”#Mt 23.12; Lk 14.11
Jesu’n Naipanghei Mahâmṭhat Apek
(Mt 19.13–15; Mk 10.13–16)
15Mi ṭhahrep in naipanghei Jesu’n anchunga akut adapek sik a anheiṭhōi hei. Sonle he’n anhmu heia anleirasei hei, 16tâk Jesu’n naipanghei kha ahnenga abek heia ati, “Naipanghei kha kahnenga heimanhong hei ruh, khâm mak hei ruh, ajârchu Pathen Rengram kha hiva kapō hei chen kae. 17Hivahi mandon ruh! Tu enum hiva naipanghei inkhat kapōa Pathen Rengram inhlângmak mi kha khana khan hlut hêrmak ning.”
Mikahaopa
(Mt 19.16–30; Mk 10.17–31)
18Jehudi hlamkakei inkhat in Jesu ader, “Oja kaṭha, kumsôt hringna kachen theina sik heimo katlo sik?
19Jesu’n ahnenga ati, “Heisa mo akaṭha nati eng? Pathen teilo tûte akaṭha om mak. 20‘Jông mak roh, mi that mak roh, inru mak roh, maleisei sâkhi tlomak roh, nanu napa kaja roh,’ ti ṭongpek-hei kha namanhret a kae,” ati.#Sōk 20.12-16; Dân 5.16-20
21Mipa khan amasôn, “Hiseng hi kasinlaia inphut kahei jui jo hei kae.”
22Jesu’n kha athei pha, ahnenga, “Nang in natlo sik inkhat alavât; nanei rakip vajōr ina, nasêr kha sara khōdeng katheihei vasempek hei roh, khan chu marvâna karōi nanei sik, khana hong ina kakahnung ajui roh,” ati. 23Tâk-kha ama’n kha athei pha amalung inrim jo, ajârchu ama mikahaotak inkhat kae.
24Jesu’n amalung inrim kha ahmu pha ati, “Mikahao he’n Pathen Rengram anhlut sik hi heituk a a’ntak jo mo! 25Mikahao inkhat Pathen Rengram ahlut sik kanek a ṭimphōi kōr a sharîngsei ahlut sik kabei jôk.”
26Aṭong kathei mihei khan ahnenga ander, “Khan chu tu hmen hukmanhring akachang tor sik?”
27Jesu’n amasôn hei, “Mihring sik a akae tor mak kha Pathen sik a tlohla heite om mak.”
28Khava pha Peter in ahri, “Enroh keini’n kan-inn kandahlona nakahnung kanjuia kae.”
29Jesu’n anhnenga, “Kadiktak a hi kahri pek chei kae. Tu enum Pathen Rengram sik jâra a-inn, anuhmei, asōpui, anu, apa, asahei kadahlon mi khan 30tûnlai pha hin akatamchet ahmu sik, khana alakahong sik kum a kumleikōa hringna kha ahmu sik kae,” ati.
Jesu’n Vōithum Tlukna Athi sik Ṭong Ahri
(Mt 20.17–19; Mk 10.32–34)
31Jesu’n sonle 12 hei ahlop a aṭhōi heia ati, “Rangei ruh! Mihring Sapa chunga sânkathem talei mazet rakip huitlungna sik hmun Jerusalem kajōna eini akase sik me kae. 32Ama Jât-hlop hei kut chunga anpek sōt sik, anmani’n sem tlona annei sik, anmachi thlōn sik. 33Anmani’n anvōk sik a kha anthat sik, tâk ni 3 ning ama akathōisōt sik a kae.”
34Sonlehei khan hihei seng hi heite leimanhret mak hei; khava ṭong inhri kha anmani hneng a’n-ip achang jâra, Jesu’n ahri ṭong kha anmani’n leilothei mak hei.
Jesu’n Kut Indo Hmitkacho Inkhat Amandam
(Mt 20.29–34; Mk 10.46–52)
35Jesu Jericho hnenga kahonga, hlampanga kut indo hmitkacho inkhat le’n onga ka-om. 36Mipui anhong kha athei pha ama’n ader hei, “Heijo mo?”
37Anmani’n ahnenga, “Nazareth Jesu akahong kae,” anti.
38Khana ama’n a-ôna, “David Sapa, Jesu! Kei alungset roh!” ati.
39Ahma aka-om mihei khan anrasei, “Sip katia omhnâm roh.” Tâk-kha ama’n inhnakchet a a-ôna, “David Sapa, kei alungset roh,” aleiti.
40Khava jâra Jesu kangira hmitkachopa kha ahnenga anta heiṭhōi sik a ṭong apek hei. Ama anhnenga ahong pha, Jesu’n ahnenga, 41“Heimo katlo pek sik che namadu?”
Ama’n amasôn, “Apu, ke’n khō kahmu hnōm nôk.”
42Khava pha Jesu’n ahnenga ati, “Khō hmu jo roh; nataksen in amandam jo che.”
43Khavatak a khō ahmutor jo khana ama’n Pathen amanpâk a, Jesu kahnung ajui jo. Mipui he’n kha anhmu pha, ankhenga Pathen anchoi ka-ân jo.
Nke Ahọpụtara Ugbu A:
LUKE 18: KOMRBSI
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.