Maki 2
2
Yesuʼa kanage kanaga osuno neʼmaiya vekamo alino alagepa huno ateʼniya gemae
(Mt 9:1-8; Lu 5:17-26)
1Aise afinaʼmo utegeno Yesuʼa atagi neno Kapeneyam taonifiʼmo noʼaleʼmo maiʼnigeʼa ageteʼapaeʼmo, noʼafiʼmo ago eno maiʼniye, huʼa hapa paiʼnageʼa afiteʼapaeʼmo 2asole vayaʼmo malage huʼa eʼa aliʼa anupa huʼa maiʼnaya nopiʼmo uʼa haiʼa maiʼa kili paeteʼa kipategaʼeʼmo mailiʼa emi eʼnageno maisaya yaʼmo ohaneʼniye. Yesuʼa Goti gemo aeno hakalo huno hapa nepaigeʼapaeʼmo 3loleʼe loleʼe vayaʼmogi kanage kanaga osuno neʼmaiya vekamo hiʼyopa aliniʼa Yesutegamo eʼnae. 4Nopiʼmo ago kili paeʼnayaʼmofeʼmo Yesuʼa maiʼniya haopaleʼmo avaleliʼuʼa ohaiʼnafa apakaemo nokatoʼmuleʼmo aliniʼa uʼa haiʼneʼa Yesuʼa maiʼniya yatetiʼmo nokatoʼmuʼmo aliʼa akai maleʼneʼa hiʼyopa kayoteʼmo nofi aeteʼa atalageno uno lamiʼniye. 5#Lu 7:48Yesuʼa apakeyana agaefeʼmo apakesamo afiʼa fatago huʼnageno apaketenoʼaeʼmo kanage kanaga osuno neʼmaiya vekaeʼmo hunoʼaeʼmo, Mafaʼneʼnimogae, huno, hosu kavakamo aliʼna ataleʼnove, huno ha paiʼniye. 6Mago vayaʼmo keʼaepa gemo aliʼa apaya neʼmalaya vayaʼmo fai maiʼneʼapaeʼmo, na kava higenoʼaeʼmo ani ge huʼniye. Gotifeʼmo huno faipa huno neʼate. 7#Aiy 43:25; 1 Yo 1:9Gotikeʼmo vayaʼai hosu kavaʼapimo afaʼa alino atalegaiye, huʼa apaipafiʼmo apakesamo afiʼnae. 8Yesuʼa apaipafiʼmo apaketenoʼaeʼmo, na kava higetapa hosu lapaipa lapakesamo neʼafiye. 9Nagaemo hosu kavakamo aliʼna ataleʼnove, huʼna huʼnovanageʼna he tika hiʼyopa kayokamo aliteka uvo, huʼna hisuvana haiya kavaʼmo lokiya kavaʼmo ohaneʼniye. 10Lapakaemo Vemo mafaʼnemoʼmo ma mopafiʼmo maiʼnenoʼaeʼmo hosu kavaʼapimo alino atalesiya himamuʼamo aliʼna lapave liguve, huno huteno kanage kanaga osuno neʼmaiya vekaeʼmo hunoʼaeʼmo, 11kaha nepauve, huno, he tika hiʼyopa kayokamo aliteka nokalegamo uvo, huno ha paiʼnigeno 12#Mt 9:33apaulagaleʼmo malage huno he tino hiʼyopa kayoʼamo aliteno uʼniye. Uʼnigeʼa ageteʼapaeʼmo hapau aiteʼa Goti agiʼaleʼmo aliʼa asaga huʼa ateteʼapaeʼmo, ani agufa kavaʼmo oʼageʼnona kavane, huʼa huʼnae.
Yesuʼa Livaifeʼmo ge huʼniya gemae
(Mt 9:9-13; Lu 5:27-32)
13Yesuʼa halate aino atagi neno Galeliya kotega ani kotutegamo uʼniye. Uno maiʼnigeʼapaeʼmo asole vayaʼmo eʼa aliʼa anupa huʼa maiʼnageno alino apaya maleʼniye. 14#Yo 1:43Apatalenuno ageyana mago takesi moni neʼaliya vekamo Livaiʼa Afiyasi mafaʼneʼmo takesi moni neʼaliya nopiʼmo fai maiʼnigeno ageʼniye. Agetenoʼaeʼmo, eka nakame huvo, huno huʼnigeno Livaiʼa he tinuno akame huʼniye. 15Henagaʼamo Yesuʼa uno Livai nopiʼmo neʼyaʼmo neʼniye. Asole vayaʼmo takesi moni neʼaliya vayanagi keʼaepa gemo akame nosaya vayanagi huʼa eʼa agaeʼe geʼamo neʼafiya vayaʼeʼmo magokepi lokaeʼa maiʼneʼapaeʼmo neʼyaʼmo neʼnae. Ani afinaʼmo asole ani agufa vayaʼmo eʼa aepa faiʼa akame huʼnae. 16#Mt 11:19; Lu 15:1-2Falasi mono vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo apakayana Yesuʼagi takesi moni neʼaliya vayanagi keʼaepa gemo akame nosaya vayanagi huʼa magokepi lokaeʼa maiʼneʼa neʼyaʼmo neʼnageʼa apaketeʼapaeʼmo geʼamo neʼafiya vayaʼaifeʼmo hapa paiʼapaeʼmo, na kava higeno ani agufa vayaʼeʼmo magokepi lokaeno maiʼneno neʼyaʼmo neʼne, huʼa ge huʼa apafi geʼnae. 17Yesuʼa ani gemo afitenoʼaeʼmo geʼapileʼmo aeno atagaina huno hapa painoʼaeʼmo, Lota vayaʼmogimo kaita ohapauʼniya vayaʼaitegamo uʼa aliʼyaʼmo noʼalifa kaita hapauʼniya vayaʼaitekeʼmo uʼa aliʼyaʼmo neʼaliye. Nagaemo alagepa vayaʼaifeʼmo eyo, huʼna ge hisuvafeʼmo emiʼnoʼmeʼnofa hosu vayaʼaifekeʼmo eyo, huʼna ge hisugeʼa eʼa apaipamo aliʼa afe lesayafeʼmo emiʼneʼnove, huno hapa paiʼniye.
Neʼyaʼmo oʼneʼa mo nesiya kavafeʼmo huʼniya gemae
(Mt 9:14-17; Lu 5:33-39)
18Mago afinaʼmo Yoni geʼamo neʼafiya vayaʼe Falasi mono vayaʼmogiʼeʼmo mono kavaʼmo akame huʼa neʼyaʼmo mo siʼnae. Mago vayaʼmo Yesutega eʼapaeʼmo, na kava higeʼa Yoni geʼamo neʼafiya vayaʼe Falasi mono vayaʼmogiʼeʼmo mono kavaʼmo akame huʼa neʼyaʼmo mo siʼnayaʼmonanafa gekamo neʼafiya vayaʼmogimo neʼyaʼmo mo nosiye, huʼa ge huʼa afi geʼnae. 19Yesuʼa hunoʼaeʼmo, aʼmo neʼaliya afinaʼmo neʼyaʼmo mo nesifiye. Haʼao a aligefe huʼniya vekamo apakaeʼeʼmo magokepi lokaeno maiʼnigeʼapaeʼmo apamogaga aiʼa neʼyaʼmo neʼnae. 20Henagaʼamo mago vayaʼmogi a aligefe huʼniya vekamo avaleliʼa visageʼapaeʼmo neʼyaʼmo mo sigae. 21Atafa lavolavomo halo neʼaigeʼapaeʼmo saufa lavolavomo sese osuʼnaya lavolavoletiʼmo lagauʼa nofakaniye. Saufa lavolavoletiʼmo lagauʼa fakanisayana sese nehisagenoʼaeʼmo atupaʼamo aino vayu hisigeno atalagauno alino avala aisigeno magoʼe huno alopa kaʼmo halo aigiye. 22Ina kava huʼa vayaʼmogimo saufa nofi alagafati aniʼmo aliʼa atafa afu agufa kepiʼmo nolakiye. Aliʼa lakisayana aniʼmoʼa atafa keʼmo aeno apalo atino asagauno aisigeno keʼaʼeʼmo alagi hosugiye. Saufa aniʼmo saufa kepiʼmo lakisagenoʼaeʼmo afaʼa hanegaiye, huno hapa paiʼniye.
Sapati afinafeʼmo huʼniya gemae
(Mt 12:1-8; Lu 6:1-5)
23Mago Sapati afinaʼmo Yesuʼe geʼamo neʼafiya vayaʼeʼmo viti hoyamo laisigana yaʼmo haneʼniya hoya folagapiʼmo uʼnae. Yesu geʼamo neʼafiya vayaʼmogimo viti alagamo lagiʼa neme neme uʼnae. 24#Loa 23:25Falasi mono vayaʼmogi Yesufeʼmo huʼapaeʼmo, Apako, huʼa, gekamo neʼafiya vayaʼmogimo Sapati afinaʼmo keʼaepa getimo amagiʼa neʼatalae, huʼa huʼnae. 25#1 Sam 21:1-6Yesuʼa hunoʼaeʼmo, Neviniʼe avagi huʼa uʼnaya vayaʼmogiʼeʼmo apaka teʼnigeʼapaeʼmo huʼnaya kavafeʼmo ava gemo lekana paita oʼafiʼnafiye. 26#Mon 24:5-9Amaiyataʼa mono huno neʼapateya vekamo maiʼnigenoʼaeʼmo Neviniʼa mono nopiʼmo uno haino Gotina ofalinimo amiʼnaya peleti mayamo alino neteno avagi huʼa uʼnaya vayaʼaina apamiʼniye. Muki vayaʼmogimo noʼnaya neʼyaʼmo haneʼnifa mono huʼa neʼapataya vayaʼamogigeʼmo nesaya neʼyaʼmo haneʼniyaʼmonanafa ani neʼyaʼmo neʼnayana hosu kavaʼmo osuʼnae. 27#Loa 5:14Gotiʼa muki vayaʼmogi Sapati afinaʼmo ha maesayafeʼmo hu oʼmaleʼnifa Sapati afinaʼmoʼa muki vayaʼaina hapa maesiyafeʼmo hu maleʼniye. 28Ina kava huʼniyaʼmofeʼmo Vemo mafaʼnemoʼmo Sapati afinateʼeʼmo yagaiʼniye, huno hapa paiʼniye.
Nke Ahọpụtara Ugbu A:
Maki 2: kyg2013
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2013, Wycliffe Bible Translators, Inc. All rights reserved.