Maki 1
1
Yoniʼa aniʼmo faleno apateʼniya vekamoʼmo aeno hakalo huno hapa paiʼniya gemae
(Mt 3:1-12; Lu 3:1-9,15-17; Yo 1:19-28)
1Alagepa faigoko geʼamo Yesu Kalaisi Goti mafaʼneʼamo ava gemo ina kava huno aepa faiʼniye. 2#Mal 3:1; Mt 11:10Gotitegati gemo alini eʼana aeʼana hakalo huʼana hapa nepaiʼa vekalaʼmoganimo ani hogoteno aepa faiʼniya kavafeʼmo ava gemo huʼana avoʼmo kae maleʼnaʼae. Mago vekamoʼmo hunoʼaeʼmo, Gotiʼa hunoʼaeʼmo,
ago, huno, apa vekaʼnimo esiya kaʼmo valino atesiyafeʼmo aliʼna atesugeno uno hogotegaiye, huno huʼniye,
huno avoʼmo kae maleʼnigeno mago vekamoʼmo hunoʼaeʼmo,
3 #
Aiy 40:3
Mago vekamoʼmo kaʼme kotega maiʼneno alopa gefatiʼmo ge hunoʼaeʼmo, Ala kava neʼmo kaʼmo valita ateyo. Esiya kaʼmo api kaʼmo valita ateyo, huno huʼniye,
huno avoʼmo kae maleʼniye. 4#Ap 13:24; 19:4Inagi Yoniʼa kaʼme kotegamo afole aiteno aniʼmo faleno apateʼniye. Yoniʼa hunoʼaeʼmo, lapaipamo alita afe letetapa aniʼmo falegenoʼao Gotiʼa hosu kavatapimo alino ataleno, huno aeno hakalo huno hapa paige hapa paige huno maiʼniye. 5Asole vayaʼmo agaetegamo Yutiya kotegatiʼmo uge Yulusalemu taonifatiʼmouge huʼa uʼa huʼniya gemo afiʼnae. Apakaemo hosu kavaʼapieʼmo aeʼa hakalo huʼnagenoʼaeʼmo Yoneni anipiʼmo aniʼmo faleno apateʼniye. 6#2 Kin 1:8; Mt 11:8Yoni kukena yaʼamo kamo afumo ayokatetiʼmo alo hu maleʼnaya kukenamo vaiteno afafaleʼmo kamo agufaletiʼmoalohumaleʼnaya mapaluʼmo aeteno akenuʼe afela lumemo anuʼeʼmo neno maiʼniye. 7#Ap 13:25Agaemo hunoʼaeʼmo, nagae nakame huno neʼeya vekamoʼmo aeno naga seʼniye. Alagi ago aeno naga seʼniyaʼmofeʼmo afaʼa ape huʼna maiʼneʼna suʼamo nofiʼmo afaʼa hakalu hesuva agufa kavaʼmo huʼna oʼmaiʼnove. 8Nagaemo aniʼaletikeʼmo faleʼna nelapatovaʼmonanafa Goti aote Aunemeʼaletiʼmo faleno lapategaiye, huno aeno hakalo huno hapa paino maiʼniye.
Yoniʼa Yesuʼmo aniʼmo faleno atetegenoʼaeʼmo Sataniʼa amalageka huʼniya gemae
(Mt 3:13-17; Lu 3:21-22)
9Ani afinaʼmo Yesuʼa Galeliya kotega Nasalasa taonifatiʼmo ataleno eʼnigeno Yoniʼa Yoneni anipiʼmo aniʼmo faleno ateʼniye. 10Yesuʼaanipatiʼmo eno haineno ageyana kokuʼnaʼmo halo aiʼnigeno Goti Aunemeʼamo kaugoyavegana huno agaetegamo emineʼnigeno ageʼniye. 11#Sam 2:7; Aiy 42:1; Mt 12:18; Mk 9:7Mago vekaʼmoʼmo kokuʼnapatiʼmo ge hunoʼaeʼmo, lusi kava huno neʼnahaiya mafaʼneʼnimo maiʼnane. Amuse huʼna nekatove, huno huʼniye. 12Huno huʼnigenoʼaeʼmo malage huno Goti Aunemeʼamoʼmo kame kotegamo avalelino uʼniye. 13#Sam 91:11-13Uno fotiʼa afinaʼmo maiʼnigenoʼaeʼmo Sataniʼaamalageka huʼniye. Ani kotega afela afuʼe yagagafaʼeʼmo maiʼnaya kotegamo uno maiʼnigeʼapaeʼmo enisole vayaʼmogimo emi eʼa yagaiʼa ateʼnae.
Yesuʼa loleʼe loleʼe vayaʼmogi noyame neʼaliya vayaʼaifeʼmo eta nakame hiyo, huno ge huʼniya gemae
(Mt 4:12-17; Lu 4:14-15)
14 #
Mk 6:17
Apakaemo ani afinaʼmo Yoniʼa ago kalavusi huʼa ateʼnageno maiʼnigenoʼaeʼmo Yesuʼa Galeliya kotegamo uno Gotiʼa yagaino apatesiya kavafeʼmo alagepa faigoko gemo aeno hakalo huno hapa paiʼniye. 15#Mt 3:2; Ga 4:4Hapa painoʼaeʼmo, ani afinaʼmo ago afole aiʼniye. Gotiʼa vayaʼaiteʼmo yagaino apatesiya afinaʼmo alagi hogo huʼniyanagi lapaipamo alita afe letetapa alagepa faigoko geʼaeʼmo lapakesamo afita fatago hiyo, huno huʼniye. 16Inagi Yesuʼa Galeliya kotegamo alopa ani kotu agiʼnaleʼmo umenitata nehunoʼaeʼmo ageyana Saimoniʼe aganaʼamo Etaluʼeʼmo noyame neʼaliʼa vekalaʼmo umeniʼanimo anipiʼmo yaga auʼana neʼmalaʼageno anakeʼniye. 17-18#Mt 13:47; Lu 5:1-11Anaketenoʼaeʼmo noyamemo alitana apavayu hulitana neʼaʼa kavaʼmo hutana vayaʼmo nagaetega apavalelitana esaʼafeʼmo aliʼna lanaya malegauvanagi etana nakame hiʼao, huno hana paiʼnigeʼana umeniʼanimo ataleʼeʼana akame huʼnaʼae. 19Agaemo aiseʼamo uno ageyana lole konagalaʼmo Yemisiʼe Yoniʼeʼmo Sepeti mafaʼnelaʼmo sipifiʼmo maiʼneʼana umeniʼanimo nefakaniʼageno anakeʼniye. 20Anaketenoʼaeʼmo ge huʼnigeʼana sipifiʼmo afoʼanimoʼe aliʼyaʼamo neʼaliya vayaʼeʼmo apataleʼeʼana akame huʼnaʼae.
Yesuʼa mago vekamo aipafatiʼmo hosu aune vekamo alino hafaino ataleʼniya gemae
(Lu 4:31-37)
21 #
Mt 4:13
Yesuʼe geʼamo neʼafiya vayaʼeʼmo Kapeneyamu taonifiʼmo uʼa maiʼnageno Sapati afinaʼmo afole aiʼnigeno Yesuʼa Yu vayaʼai mono nopiʼmo uno haino alino apaya maleʼniye. 22#Mt 7:28-29Keʼaepa gemo avoʼmo kaeʼa aliʼa apaya neʼmalaya vayakana huno alino apaya oʼmaleʼniyaʼmonanafa himamuʼaletiʼmo alino apaya maleʼnigeʼa afiteʼapaeʼmo hapau aiʼnae. 23Mago vekamo aipafiʼmo hosu aune vekamo maiʼniya vekamo mono nopiʼmo maiʼnenoʼaeʼmo, 24#Mk 5:7Nasalasa kotega vekamo Yesuo, huno, lagaetegamo na agufa kava hisanafeʼmo eʼnane. Alika lagoʼya faika latalegefeʼmo eʼnapiye. Afaʼa lato. Kageʼnovana Goti aote vekamo maiʼnane, huno alopa gefatiʼmo huʼniye. 25Yesuʼa hunoʼaeʼmo, Ge osuʼneka aipafatiʼmo emikeno, huno lokiya ge huno ha paiʼnigenoʼaeʼmo 26#Mk 9:26hosu aune vekamoʼmo agufaleʼmo alino uti uti aino ateteno alopa gefatiʼmo kagegage huteno aipafatiʼmo emineʼniye. 27Vayaʼmogi ageteʼa hapau aiteʼa huʼapaeʼmo, na agufa kavaʼmo nehiye. Haiya agufa saufa geletiʼmo alino apaya neʼmale. Agaemo himamuʼaletiʼmo ge nehigeʼapaeʼmo hosu apaune vayaʼmogi geʼamo afiʼnae, huʼa huteʼa hapau aiʼnae. 28#Mt 4:24Ina kava huʼnigeno malage huno Yesufeʼmo ava gemoʼmo aino atagu faeno muki Galeliya kotegamo uneno huʼniye.
Yesuʼa muki vayaʼmo kaitaʼmo alino hapageno apateʼniya gemae
(Mt 8:14-15; Lu 4:38-39)
29Yesuʼe geʼamo neʼafiya vayaʼeʼmo mono nopatiʼmo emi eʼapaeʼmo Yemisiʼagi Yoniʼagi huʼa Saimonigani Etalugani nopiʼmo uʼa haiʼa maiʼnae. 30Saimoni ayemoʼamoʼmo amuko kaitaʼmo hauʼnigeno havaeno maiʼniye. Yesuʼa uno haino maiʼnigeʼapaeʼmo, kaita hauʼnigeno havaeno maiʼniye, huʼa ha paiʼnageno 31uno ayateʼmo alino he tino ateʼnigeno amuko kaita hauʼniya yaʼamo hageʼnigeno uno neʼyaʼmo yagita huno apateʼniye. 32Yegemo uno lamino faleʼnigeʼapaeʼmo mago vayaʼmogi Yesutegamo kaita hapauʼniya vayanagi hosu apaune vayaʼmo apaipafiʼmo maiʼnaya vayanagi huʼa apavaleliʼa eʼnae. 33Muki ani taonifiʼmo maiʼnaya vayaʼmo eʼa kipateʼmo aliʼa anupa huʼa maiʼnae. 34#Mk 3:11-12Inagi Yesuʼa muki alu kaita alu kaitaʼmo hapauʼniya vayaʼmo alino hapageno apatege hosu apaune vayaʼmo vayaʼai apaipafatiʼmo alino hapa faino apatalege huno maiʼniye. Hosu apaune vayaʼmogimo ageʼnayaʼmofeʼmo agaemo hunoʼaeʼmo, ge osiyo, huno hapa paiʼniye.
Yesuʼa Galeliya kotegamo umenitata huno Goti gemo aeno hakalo huno hapa paiʼniya gemae
(Lu 4:42-44)
35 #
Mt 14:23; Mk 6:46 Egamo gotigefeʼmo huʼnigenoʼaeʼmo Yesuʼa he tino taonifatiʼmo atalenuno vaya oʼmaiʼnaya haopalegamo nunumuʼmo huʼniye. 36-37Nunumuʼmo huʼnigeʼapaeʼmo Saimoniʼe avagi huʼa uʼnaya vayaʼeʼmo kahauya huliʼuʼa ageteʼapaeʼmo, muki vayaʼmogimo kagesayafeʼmo kahauya nehae, huʼa ha paiʼnae. 38Ha paiʼnagenoʼaeʼmo ataleta, alu taonifilagamo vigetao. Muki taoniʼafi taoniʼafiʼmo umenitata huʼna aeʼna hakalo huʼna hapa paisuvafeʼmo eʼnove, huno hapa paiʼniye. 39#Mt 4:23; 9:35Huno huteno muki Galeliya kotegamo umenitata huno muki asole mono nopiʼmo aeno hakalo huno hapa paige hosu apaune vayaʼmo alino hapafaino apatalege huʼniye.
Yesuʼa lepolosi kaitaʼmo hauʼniya vekamo alino hageno ateʼniya gemae
(Mt 8:1-4; Lu 5:12-16)
40Mago lepolosi kaitaʼmo hauʼniya vekamo Yesutegamo eno mopafiʼmo aleʼya faiʼnenoʼaeʼmo, kahao ke hovanagi kahauʼnisiyana afaʼa alika nahageka nategane, huno huʼnigenoʼaeʼmo 41Yesuʼa hau huno atetenoʼaeʼmo ayaʼmo alino ataleno agufaleʼmo maleʼnenoʼaeʼmo, nahauʼniyanagi afaʼa alagepa huka maiyo, huno ha paiʼniye. 42Ha paiʼnigeno lepolosi kaitaʼamo alagi hageʼnigeno afa agufamo hamaleʼniye. 43-44#Mk 3:12; 7:36; Mon 14:1-32Yesuʼa lokiya ge huno ha painoʼaeʼmo, afiyo, huno, mago vekaeʼmo uka ha opaika mono huno neʼapateya vekalegageʼmo ugenoʼao kagufamo ageno. Kagufamo afaʼa haneʼninageʼa agesayafeʼmo Moseseʼa laginago vayaʼaifeʼmo hunoʼaeʼmo, ofalinimo alinituta amiyo, huno huʼniya ofalinimo alinikuka amiyo, huno huteno alino ategeno uʼniye. 45Ani ge huʼniyaʼmonanafa neʼunoʼaeʼmo muki vayaʼaifeʼmo hapa pai male hapa pai male hulino uʼniye. Ina kavaʼmo huʼniyaʼmofeʼmo Yesuʼa muki vayaʼai apaulagaleʼmo taonifiʼmo afaʼa oʼuʼniye. Vayaʼmo oʼmaiʼnaya kotegamo uno maiʼnigeʼapaeʼmo agaetegamo muki haopalegatiʼmo ete ete huʼnae.
Nke Ahọpụtara Ugbu A:
Maki 1: kyg2013
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2013, Wycliffe Bible Translators, Inc. All rights reserved.