Genesis 24
24
Aisak, Rebeka ele aa ewau beya daapiɗ
1Amu haen Abraham nug wanppa oiyeye, Yawe Nug nuhig keeke ohnu itittom. Itittette amu, Abraham nug kaino meum. 2Kaino ma, nug nuhig maɗi nid okkai nug Abrahamnu keeke oh gumadttom ele amu, nug nug amegppa aum. “⌊Na ihinig kobol nai ɠagattag qa anaknu, na kobol amu dim lamidna⌋ na eppen da tuɗil waappa mena, 3na Yawe, Nug hab aabppanu Kayak, wanppanu Kayak ele daatte amu, na Nug onigppa nahip nai ɠagattag qena, na da bekkal wau Kanan danab, da ag oolagppa oittem, na ahilagppanu da bekkalnu ah laa ii aomna. 4Iitta! Na da appal diigppa gona, da mamel buɗubppanu Aisaknu ah aokkutnu a!” awa aum.
5Abraham anam a amu, maɗi nid nug oɗeppa awa oɗ mettom. “Ah amu nug wan imuppa uɗiaknu oo ii dayeb amu, da na bekkat laih na appanu uɗime amu, da uppa omale gokkulte?” awa aum. 6Awa a amu, Abraham nug aum. “Iittanab! Na da bekkal aib omalna, appa gome! 7Yawe, Nug hab aabppa Kayak amu, Nug he, da appal diig, amu da mamelad ele uuadmi; Yawe Nugib da amelppa inam hekkunu nuhig nai ɠagattag qetta, inam aum. ‘Da na buɗunadppa wan imu oh madakkul.’ Nug anam aum amunu, Nug engel nuhig meeb, na noomppa anuqa ukka, keeke oh babaitteb, na Aisaknu ah laih uppanu aokkut. 8Amge ah amu nug ippa uɗiak uueb amu, da hei, na hekkutnu nahip nai ɠagattag qettan ame imu amu, nai amuam na ii qakkidma. Amge dabme! Keeke laippu aakkuib, na da bekkal laih uppa aib omalna gome,” awa aum. 9Abraham anam a amu, maɗi nid nug ⌊ahilag kobolppa⌋ nug eppeg, nuhig okkai Abraham tuɗi waappa ma, nug amu hekkunu nuhig nai ɠagattag qetta aum.
10Aa anam heya maloya amu, maɗi nid nug Abrahamnu kamel eblaih tanig ele, keeke ena ena kuɗum laa elele diiatta, nug aha ukka ukka, nug Mesopatemia, Nahor appagppa ukkom. Abraham Nahor ele, aa am eamag. 11Ukka te, deɗ amuppa tueb meeme, nug aab beeppa, le itak abenppa ta dayaya, nug he, kamel heɗep nena daappig. Tueb amu ah le awak haen.
12Maɗi nid nug anam dayaya, nug Yawe inam unuqittom. “O Yawe, na dahil okkainu Kayak, na da ehaniɗkkutnu, na dahil okkai Abrahamnu oo mauhaknab ele dookkutnu ool daatte. 13Antte! Da le moɗ gukkuitten daattem, amu aabppan ah makkun ag le itaglagnu uɗitteb 14amunu, da na oɗ inam medattem. Ah makkun laa nug neeb, da nuhig hanakppanu lenu oɗ medappi, nug da amelppa, ‘Na lappe, da kamel dilag ele itakkul,’ ab amu, da dookkul, na ah amu nahip maɗi nid Aisak wau daakkunu tituanme. Amu amuppa da na dahil okkainu oo mauhaknab doottem, da amu dookkul,” awa aum.
15Aria, maɗi nid amu nug anam unuqittette, Rebeka nug hanak gugappa mawa neum. Nug Betuel aɗeg. Betuel anig Milkah amu, nug Nahor wau. Abraham, Nahor ele am eamag. 16Rebeka nug ah makkun, iɗu tuqaknab. Nug danab laa ele nakok ii oipiɗ. Nug le moɗppa noa, hanakppa le ita, mawa beum. 17Mawa be amu, maɗi nid amu nug paha gumitta wana, nug amegppa aum. “Na le nakok nahip hanakppa meɗappe lakkulnu oɗ medattem,” awa aum. 18Awa a amu, Rebeka nug amegppa aum. “Danab okkai dahil, le iikkude la!” awa aum. Ana amu, nug paha hanak le ele awa, honap aɗa, le mettom. 19Nug le mettowa amu, nug amegppa aum. “Da le kamel dilag ele itappi, elele lakkulag,” awa aum. 20Anam ana amu, nug paha le hanakppa dayom amu gokkaɗe, doɗ dilag tappiɗppa no, eɗua le moɗppa ukka, bau itom. Anam heehe, kamel oh le elele lappig. 21Nug anam heehe, maɗi nid nug dabmettatta, neekkitta dayom. Aɗinu? Yawe he, uɗat nuhig meu elele bettetai, amu anidkkunu heum.
22Kamel ag le lana malaeg, danab nug gagah laippu, amu enag eppelag baagppanu aɗit ele, keeke amu oh amu golppa hak, amu uug ahilag am 115 gram, nug amu awa, Rebeka mettom. 23Awa mettowa amu, nug Rebeka oɗ mettom. “Na am danab aun aɗeg, amu ig nug laugppa daagnignu elelete?” awa aum. 24Danab anam a, amu Rebeka nug oɗeppa awa aum. “Da am Milkah, Nahor ele bekkalah Betuel aɗeg,” awa aum. 25Anana, nug tuɗitta aum. “Ig launigppa kamel dilag ee, amu ahilag niiaknu keeke ele elele daatteb. Na niikkutnu aben amu ele daatte,” awa aum. 26Nug anam aum amunu, Abrahamnu maɗi nid nug gomela, dup noa Yawe binag ma inam aum. 27“Ig Yawe onig humagnig. Nug am danab okkai dahil Abrahamnu Kayak. Nug Abrahamnu oo mauhaknab kobol, amu Nug oo metta ii uuak kobol ele nuhignu dim lamidtte. Nug da ele ehaniɗom amunu, da Abrahamnu tiig laippu laugppa tutukku uɗimi,” awa aum.
28Nug ana male, Rebeka nug laippun nug anig laugppa ukka, keeke amu ohnu mattiom. 29-30Rebeka, nug awag laa ele onig Laban, amu maɗi nid nug kamel ele le moɗppa daaegeg amu, Laban nug enag aɗit Rebeka eppegppa daapiɗ, amu gagah ele antta, nai nuhig oh ele doya, nug aha, qaiqaɗ maɗi nid gumitta ukka, amegppa aum. 31“O naɗi, Yawe na itittom daatte. Na ippa daakkutnu amu, da ool ii daatte. Da laul na daakkutnu babaitten, amu kamel ag daaglagnu aben ele bapaidmi amunu, ahappe goɗu!” awa aum.
32Laban anam a amu, maɗi nid nug laugppa ukke, kamel keeke mawadppig ele amu hipaeg ne, aria ag ee, amu niiaknu keeke ele kamel mattona, ag maɗi nid, nuhikkud daup ele baelag ihaglagnu le madappig. 33Le mattaeg, ⌊baelag ihan malaeg,⌋ ag ee aon dona madappig, amge maɗi nid nug aum. “Da nai dahil tatam madippi dooppeg, dimppaib da ee lakkul,” awa aum. Awa a amu, Laban nug aum. “Enade, anam he!” awa aum. 34Laban anam a amu, maɗi nid nug aum. “Da am Abrahamnu maɗi nid. 35Yawe Nug dahil okkai Abraham keeke ohnu itittom amunu, nug enub kuɗum ele; sipsip, makau, kamel, donki, silwa, gol, maɗi nid maɗi ah ele. 36Aria, dahil okkai wau Sarah nug kaino dayaya, nug gamunu nid danab menue, Abraham nug nuhig keeke oh nug mettom. 37Amu danab okkai dahil nug he, da hekkulnu ɠagattag qetta anak nai, nug aum bia ami. Nug da inam hekkulnu aum. ‘Na da bekkalnu ah ippanu aib aon mettame. Da Kanan danab oolagppa oittem, amge nuhig ah ahilagppanu aib aome. 38Na gona, da mamel buɗubppanu, aab ikki dahilppanu ah nuhig aokkut,’ awa aum. 39Anam a amu, da nug oɗ mettami. ‘Ah amu nug ippa uɗiaknu oo ii dayeb amu, da attem hekkul?’ awe oɗ mettami. 40Da anam ai amu, nug aum. ‘Yawe Nug da ele oittep amu, Nug engel nuhig meeb, na ele goya ehanidkku amunu, na da mamel buɗub, aab ikki dahilppa ah aokkutnu elele. 41Amu haen na dahiladppa gona, ami amubia heppe amu, nai ɠagattag qetta anak imuam ii qakkidma. Genab, na anam heppe, ag ah amu ii medappeg amu, nai ɠagattag qetta anak imu da hei mattime amu, nai amuam ii qakkidma.’ Nug anam aum.
42Aria, gemu haen da le moɗppa uɗien dayeye amu, da Yawe unuqidmi. ‘O Yawe, danab okkai dahil Abrahamnu Kayak, na ehaniɗppe, oiyak imu da aakku hemi ele amu, nuhig meu pehettak bekkunu oɗ medattem. 43Antte, da le moɗppa daattem, amu ah makkun laa nug neeb, da nug amegppa, “Da le nakok nahip hanakppanu meɗappe lakkulnu oɗ medattem,” appi, 44nug, “Na lappe, da kamel dilag ele itakkul,” ab amu, aria amuppa da na nug dahil okkai bekka Aisaknu ah daakkunu tituanme dookkulnu oɗ medattem.’ 45Da anam unuqittitti amu, Rebeka nug hanak nuhig gugappa mawa noum. Noa amu, le ita be, da nug le meɗakkunu oɗ mettami. 46Da oɗ mettai, nug pahanab hanak gugappanu awa, eppegppa aɗa, ‘Na lappe, da kamel dilag ele itakkul,’ aum. Awa a, da lai, nug kamel dilag ele itom. 47Le ite amu, da nug oɗ mettami. ‘Na am danab aun aɗeg?’ Oɗ mettai amu, nug aum. ‘Da am Nahor, Milkah ele bekkalah Betuel aɗeg,’ awa aum. Anam a amu, da gagah nug noobppa mewoya, enag aɗit eppeg baag laih laih ele memi. 48Mewoya amu, da gomelen, dup noin Yawe binag memi. Nug am dahil okkai Abrahamnu Kayak, amu da Nug onig okkai mettami. Nug da ehaniɗe, da ib genabppa Nahor laugppa, nug alag Rebeka, Aisaknu ah daakkunu aokkulnu uɗimi. Abraham Nahor ele aa am eamag. 49Aria, ag dahil okkainu oo mauhaknab dootteb dayeb, ag nuhignu oo metta ii uuak kobol hekkulagnu oolag daatte dayeb amu, ag appeg dookkul. Iitta dayeb amu, ag amu ele appeg doyen, da eɗuen, ib laa anidkkulnu ool maidkku,” awa aum.
50Maɗi nid nug anam a amu, Laban, Betuel ele aa apiɗ. “Yawe nukka keeke imu heum amunu, i nai laa akkunihnu am iitta. 51I Rebeka, nahip okkai Abraham bekka Aisak wau daakkunu, Yawe aum bia medattep. Na aon ukke!” aoya apiɗ. 52Laban, Betuel ele anam aeh, maɗi nid nug Yawe noobppa gateg qaun o, gomela, ikki wanppa meum. 53Nug anam ha, nug gol, silwa, amu lamen ele awa, Rebeka mettom. Mettowa, nug keeke laala ahilag nob okkai ele amu awa, Rebeka anig, awag ele matom. 54Keeke oh matte, nug, amu nuhikkud daup ele ag ee, le ele lawona niippig. Niiona amu, wagɗe buttua ag ahan, maɗi nid nug aum. “Heppeg, da eɗue, paha dahil okkai toppa gokkulnu ool daatte,” awa aum. 55Nug anam aum, amge Rebeka anig, awag ele aa apiɗ. “I oonih anam ii daatte. Rebeka nug i ele deɗ 10 keeke dayeb, dimppa aon gokkutnu oonih daatte,” aoya apiɗ. 56Aa anam apiɗ, amge maɗi nid nug aum. “Aa aib da qakkiɗpiɗ. Yawe da ehaniɗeɗe, da uɗat hekkulnu uɗimi amu, elele hemi amunu, aa hepeɗ, da okkai dahil toppa gokkulnu ool daatte,” awa aum. 57Nug anam a amu, aa apiɗ. “Ii Rebeka oɗ medapput, nug aɗi ab doognih,” aoya apiɗ. 58Aa anam awoya amu, aa Rebeka onigppa eeh, nug do, aa oɗ inam medapiɗ. “Na danab imu ele gokkulahte?” oɗ medapiɗ. Oɗ mettaeh amu, nug aum. “Da gokkul,” awa aum.
59Nug anam a, aa aeh, Rebeka, nug ah laa nug Rebeka dabmedette, ena meum ele, amu Abrahamnu maɗi nid, nuhikkud daup ele ag oh goppig. 60Amu tatam ag Rebeka itidyaya apiɗ.
“O lai ihinih, na buɗunad ag kuɗumnab bekkulagnu oonih daatte.
Ao, na buɗunad ag kekeɗ ahilag ele tabappeg noob, ahilag keeke aoglagnu oonih daatte,” aoya apiɗ.
61Aa itittak ena mettaya malaeh amu, Rebeka, nuhikkud maɗi ah ele ag kamel attan tatteg, Abrahamnu maɗi nid nug ag omalatta ukkom.
62Ag anam heegeg, amu Aisak nug Ber Lahai Roinu eɗua, Negeb ukkom. Aɗinu? Nug Negeb appa dayom. 63Deɗ laa tueb Aisak nug ukka, dad okkaippa dabmak unuqag aokkunu oiyaya, nug neekke ukke, kamel anattom. 64Rebeka ele nug neekka, Aisak antta, nug kamel attannu oola honap na, 65maɗi nid oɗ mettom. “Danab umu dad okkaippa oiyaya, uɗanig tekkunu ig gumikka uɗitte amu, nug am aun?” awa oɗ mettom. Oɗ mette, nug aum. “Nug am danab okkai dahil,” awa aum. Awa a amu, Rebeka nug lamen teppu iitta awa, iɗu hautom.
66Nug iɗu haute, ag nug uɗa tena, maɗi nid nug keeke oh heum amu, nug amunu Aisak amegppa aum. 67Nug nai mattia male, Aisak nug Rebeka omala, anig Sarahnu peh lakka ukka, appa me dayeye, aa ewau matulak aopiɗ. Rebeka nug Aisak wau daye, Aisak nug Rebekanu oo mauhom. Tatam nug anig Sarah mauhe, nug oo huan doyom, amge nug Rebeka awowa, nug oo mak doyom.
Pilihan Saat Ini:
Genesis 24: NB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2022, Wycliffe Bible Translators, Inc. All rights reserved.