Genesis 23
23
Sarah mauhom
1Amu Sarah nug maɗ 127 ele dayaya, 2nug Kanan wanppa aab onig Kiriat Arba onig laa Hebron, nug appa mauhom. Mauhe amu, Abraham nug Sarah mahidkkunu ukkom.
3Abraham nug Sarah mahittowa, nug aha ukke, Hit danab ele nai mattina, nug aum. 4“Da am aab diig danab iitta, da uɗien, ag oolagppa daattem; da wan laihnu danab amunu, da wan nakok laa imuppa ah dahil boumkkulnu daden mekkulnu ool daatte,” awa aum. 5Abraham anam a amu, Hit danab ag amegppa appig. 6“O danab naɗi, doye! Na ippa danab anuqak ig oonigppa daattem amunu, na ah nahip men oɗe enanag, laa oh eɗattakppa boumkkut. Ig oh na ah nahip men oɗe ihinigppa boumkkutnu aɗitai laa ii amata,” aon appig. 7Aon aeg amu, Abraham nug aha, wan amuppan danab, ag Hit danab, nug ag noolagppa gomela, 8nug ag amelagppa aum. “Ag da ah dahil boumkkulnu oolag dayeb amu, ag dahil nai doona, da oɗel aon, Sohar bekka onig Epron, 9nug men oɗe nuhig onig Makpela, oɗe amu nuhig wan daugppa daatte ele amu, da wan amu daden tutukku medakkulnu hettem amunu, ag nug amunu oɗ mettaglagnu oɗ madattem. Nug elele ab, da dahilad boumak aben ag oolagppa daakkunu daden medakkul,” awa aum.
10Abraham anam a amu, Epron, nug Hit danab oolagppa dayeye, Hit danab ag aab okkainu aɗnu odppa daappig ele amu, ag daulag human daaegeg, Epron nug Abraham oɗeppa awa aum. 11“O danab naɗi dahil, iittanab. Na dahil nai doye! Da danab imu oh noolagppa na wan amu men oɗe ele hamu medattem. Na ah nahip amuppa boume,” awa aum. 12Awa a amu, Abraham nug baula wan amuppan danab noolagppa gomela, 13ag daulag human nai doon daaegeg, Abraham nug Epron amegppa aum. “Na oot heeb amu, na nai dahil dookkutnu oɗ medattem. Da ah dahil boumkkulnu elele daakkulnu amu, da wan amunu nob daden mein, na da eppelppan aokkutnu oɗ medattem,” awa aum. 14Abraham anam a amu, Epron nug oɗeppa awa aum. 15“O danab naɗi dahil, doye! Wan amu nuhig nob am 4.5 kilogram silwa, amge da, na ele, ii gamanihppa amu, keeke amuam keeke iitta bia. Na ah nahip amuppa boume,” awa aum. 16Awa a, Abraham nug nai amu doya, nug 4.5 kilogram silwa Epron aum bia, amu Hit danab noolagppa elele metta, Epron mettom. Keeke laihnu awa dadennu mak danab ag silwa men doɗo amunu, nuhig noob gane doon, maɗi ahilag heppig amu, Abraham amu dim lamitta heum.
17Abraham nug Epronnu wan amu, men oɗe ele oh daden meum. Wan amu onig Makpela, amu Mamre guguittak dayom. Nug wan amu, ad oh wan amuppa dayom ele, nug amu oh awom. 18Nug Hit danab noolagppa ag aab okkainu aɗnu odppa daanna, am genab nuhignu awom. 19Abraham wan amu awowa, nug ah nuhig Sarah wan men oɗe onig Makpela, amuam Kanan wanppa, Mamre guguittak, Mamre onig laa am Hebron amu, nug appa boumom. 20Abraham, Hit danab ele ag anam heppig amunu, wan amu, men oɗe ele, boumaknu moɗ daakkunu Abraham eppegppa dayom.
Pilihan Saat Ini:
Genesis 23: NB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2022, Wycliffe Bible Translators, Inc. All rights reserved.