Génesis 27
27
Yalnaj Can Watxꞌ Kꞌane Naj Isaac Yibꞌan Naj Jacob
1Jix ecꞌ cꞌal tiempo xin, caw icham winajxa naj Isaac, cꞌamxa chi skeꞌ yilwan naj. Ey jun cꞌual jix yawte jun scꞌaal chi yij Esaú, naj bꞌabꞌel winaj, jix yalon tet scꞌaal jaxca tiꞌ:
—Jaach cꞌaal, ẍi naj.
—¿Tzet ẍi mamin? ẍi naj.
2Jix yalon tet Isaac jaxca tiꞌ: Ti wal cha wilaꞌ tol caw icham winaj jin xa. Tala cꞌuxan chin cꞌamxa cꞌal yet yecal caabꞌe tiꞌ. 3Yu jun tuꞌ xin, chi woche tol chi too ja sey junoj jin chiꞌbꞌe xol-laj teꞌ. Iꞌtoj ja julbꞌal yet cha julon junoj wet. 4Catuꞌ cha waꞌnen junoj jin loꞌbꞌe caw watxꞌ, jaxca wal chi yoche jin cꞌul. Jaꞌ yet chi waꞌxi ja wu, catuꞌ cha wiꞌontej ey jin. Yajbꞌan chin lowi, catuꞌ oj walon can watxꞌ kꞌane ja wibꞌan yet cꞌamto chin cami, ẍi naj.
5Jal ix Rebeca xin, lalan yabꞌen ix tzet chi yal naj Isaac tuꞌ tet Esaú, jaꞌ yet jix too naj Esaú tuꞌ xol-laj teꞌ seyon ẍiꞌbꞌe smam tuꞌ, 6jix yalon ix tet naj Jacob, naj tzunan unin tuꞌ jaxca tiꞌ:
—Jaꞌ tinaniꞌ jaach wuneꞌ, jix wabꞌ yalon naj ja mam tet naj ja wuẍtaj Esaú jaxca tiꞌ: 7Asiꞌ sey junoj xol-laj teꞌal noꞌ jin chiꞌ, catuꞌ cha waꞌnen junoj jin loꞌbꞌe, caw watxꞌ cha wute. Yajbꞌan chin lowi, catuꞌ oj wakꞌon can syaaxilal ey jaach, cꞌal walon can watxꞌ kꞌane ja wibꞌan sattaj Jehová, yet cꞌamto chin cami, ẍi tet naj. 8Yu jun tuꞌ xin jaach wuneꞌ, jije tzet oj wal ey jaach. 9Asiꞌ bꞌey ey scolal noꞌ ja meꞌ, cha wiꞌontej cacꞌonoj noꞌ yuneꞌ chiw noꞌ caw bꞌakꞌech, catuꞌ oj jin waꞌne junoj sloꞌbꞌe naj ja mam tuꞌ, caw watxꞌ oj wute jaxca wal chi yoche scꞌul. 10Jaachxa oj toj ja wakꞌ tet, yet chi lowi, catuꞌ oj yalon can watxꞌ kꞌane ja wibꞌan, yajbꞌan cꞌamto chi cami, ẍi ix Rebeca tuꞌ tet yuneꞌ.
11Catuꞌ jix yalon Jacob tet xutx tuꞌ jaxca tiꞌ:
—Jaꞌ naj wuẍtaj tuꞌ an, ey xil yinlaj smimanil naj, jal jin xin cꞌam pax jin xil. 12Tala cꞌuxan chin smatxtene naj jin mam tuꞌ, catuꞌ chin naꞌcha el yu naj, oj mi snaꞌ tol tucꞌal chi wetne naj, jaxam wal chi yunne, jaꞌ sjowal scꞌul naj chi tit can wibꞌan an, catuꞌ man syaaxilal oj jin chaꞌ canoj, ẍi naj Jacob tuꞌ.
13Catuꞌ jix takꞌwi ix txutxe tuꞌ tet naj jaxca tiꞌ:
—Cꞌamaj jaach wuneꞌ, ta ey skꞌane naj ja mam tuꞌ chi yal can yetoj sjowal scꞌul, jaꞌ ojabꞌ wibꞌan chi tit canoj, asan tol cha jije tzet chi walaꞌ. Asiꞌ iꞌtej cacꞌonoj noꞌ yuneꞌ chiw tuꞌ, ẍi ix. 14Jix bꞌet yiꞌontej noꞌ yuneꞌ chiw naj Jacob tuꞌ, jix yakꞌon naj tet xutx, catuꞌ jix swaꞌnen jun loꞌbꞌe ix Rebeca tuꞌ, caw watxꞌ jix yun swaꞌnen ix jaxca chi yoche scꞌul naj Isaac tuꞌ. 15Jix lawi tuꞌ, catuꞌ jix yiꞌon eltej an spichil naj Esaú tuꞌ ix, an caw watxꞌ yili, an yet naj bꞌabꞌel unin, cꞌuan an spichil tuꞌ bꞌey yul sna, catuꞌ jix yaon oc ix yin naj Jacob, naj tzunan unin tuꞌ. 16Jix pichle oc stzꞌuumal noꞌ chiw yin skꞌabꞌ naj Jacob yu ix, cꞌal yin steel snukꞌ naj bꞌey cꞌam xil. 17Jix lawi tuꞌ, jix yaontoj jun secꞌ loꞌbꞌe cꞌal pan jix swaꞌne ix tuꞌ, jix yiꞌontoj naj tet smam.
18Catuꞌ jix octoj Jacob tuꞌ bꞌey eyecꞌ smam, jix yalon jaxca tiꞌ:
—Mamin, ẍi naj.
—Jay, ¿mac jaach txequel jaach cꞌaal? ẍi naj Isaac tuꞌ.
19—Jain Esaú jin, ja bꞌabꞌel cꞌaal jin. Jix jin waꞌne ja loꞌbꞌe cha walaꞌ. Aan waanoj, lowan, abꞌle wal niꞌoj ẍiꞌbꞌeal noꞌ xol-laj teꞌal noꞌ jix bꞌet jin juluꞌ, catuꞌ cha walon can watxꞌ kꞌane wibꞌan, ẍi naj.
20Catuꞌ jix skꞌanlen naj Isaac tuꞌ tet jaxca tiꞌ:
—¿Tzet wal jix ja wute michꞌcha noꞌ yin eymanil cha cꞌaal? ẍi naj.
—Jaꞌ Jehová cu Diosal jix oc wetoj, yuxan yin eymanil jix yun smichꞌcha noꞌ wu an, ẍi naj.
21Catuꞌ jix yalon naj Isaac tet jaxca tiꞌ:
—Jitztej ja bꞌa jin cꞌatan an xin, catuꞌ oj jaach jin matxtene ta yel jaach Esaú jaach, ẍi naj.
22Catuꞌ jix sjitzontoj sbꞌa Jacob scꞌatan smam tuꞌ, jix cꞌoli smatxtenele naj ta tol ey xil naj. Jix lawi tuꞌ jix yalon Isaac tuꞌ jaxca tiꞌ: Quichan wal yul snukꞌ naj Jacob chi wabꞌe, asan xin tol ey pax xil skꞌabꞌ chi wabꞌe jaxca wal yet naj Esaú, ẍi naj tet scꞌaal. 23Ma cꞌal naꞌcha el yu naj, yutol ey xil skꞌabꞌ jaxca wal yet naj yuẍtaj Esaú, yu jun tuꞌ jix yalon can el watxꞌ kꞌane yibꞌan naj cꞌaale tuꞌ. 24Catuꞌ jix skꞌanlen junelxa tet naj Jacob jaxca tiꞌ:
—¿Yel mi wal xin, tol jaach Esaú jaach? ẍi naj tet.
—Jaaꞌ, jain ton Esaú jin, ẍi naj Jacob tuꞌ.
25—Iꞌtej jin loꞌbꞌe tuꞌ jaach jin cꞌaal, yajbꞌan chin chiꞌ noꞌ chiꞌbꞌe xol-laj teꞌal noꞌ jix bꞌet ja wiꞌtej tuꞌ, catuꞌ oj walon can el watxꞌ kꞌane ja wibꞌan, ẍi naj Isaac.
Jix yakꞌon low Jacob smam tuꞌ, catuꞌ jix yiꞌon pax tej an yal uva tet naj, catuꞌ jix yuqꞌuen naj Isaac. 26Jix lawi tuꞌ, jix yalon pax tet jaxca tiꞌ:
—Jitztej ja bꞌa jin cꞌatan jaach cꞌaal, catuꞌ cha tzꞌubꞌon el jin tiꞌ, ẍi naj tet. 27Catuꞌ jix sjitzontoj sbꞌa naj Jacob scꞌatan smam tuꞌ, catuꞌ jix stzꞌubꞌon el stiꞌ naj, catuꞌ jix sukꞌtele spichil naj yu, jaxa yalon can watxꞌ kꞌane yibꞌan naj tuꞌ jaxca tiꞌ:
Jaxca wal tiꞌ yoc sabꞌ jin cꞌaal tiꞌ, jaxca wal yecꞌ sabꞌ an cꞌultaj ey xol-laj teꞌ, teꞌ akꞌbꞌil syaaxilal yibꞌan yu Jehová.
28Jaꞌ ojabꞌ Jehová oj aontej nabꞌ yibꞌan ja txꞌotxꞌ, yet watxꞌ oj yun sat ja awo bꞌey sat txꞌotxꞌ txꞌotxꞌ tiꞌ, caw watxꞌ oj yun ja tiriw yetoj pax an uva.
29Ecꞌal ánima oj jaach akꞌon servil. Masanil mimej conobꞌ oj ey kaan ey jaach. Yaaw oj ja wun yibꞌan ebꞌ ja wuẍtaj, oj ey kaan ebꞌ ey jaach. Jaꞌ ebꞌ chi alon pena kꞌane ja win, cꞌam swatxꞌil yet ebꞌ, jaꞌ ebꞌ chach alon watxꞌil, watxꞌ yet ebꞌ, ẍi naj Isaac.
30Jaꞌ yet jix lawi yalon naj Isaac masanil watxꞌ kꞌane yibꞌan Jacob, jato wal yeltoj Jacob tuꞌ bꞌey eyecꞌ smam tuꞌ, catuꞌ jix jul naj Esaú julo noꞌ. 31Catuꞌ jix swaꞌnen jun loꞌbꞌe tet smam tuꞌ, caw watxꞌ jix yute, jix yiꞌontoj tet smam, jix yalon tet naj jaxca tiꞌ:
—Aan waan xin mamin, catuꞌ cha chiꞌon noꞌ xol-laj teꞌal noꞌ jix bꞌet wiꞌtej tiꞌ, catuꞌ cha walon can watxꞌ kꞌane wibꞌan an, ẍi naj tet smam tuꞌ.
32Catuꞌ jix skꞌanlen naj Isaac tuꞌ jaxca tiꞌ:
—¿Mac jaach txequel? ẍi naj.
—Jain Esaú jin, ja bꞌabꞌel cꞌaal jin, ẍi naj.
33Caw jix qꞌueya scꞌul naj Isaac, tuxa cꞌal chi lujloni, jix yalon jaxca tiꞌ:
—¿Mac pax txequel naj jix bꞌet iꞌontej noꞌ yin sbꞌabꞌelal tuꞌ xin, catuꞌ jix jul yakꞌon jun loꞌbꞌe tuꞌ ey jin? Xax jin lowi yet cꞌamto chach jul jaach tiꞌ, tuxa jix wal can el watxꞌ kꞌane yibꞌan naj tuꞌ, tinaniꞌ yet cꞌaltaꞌ naj yeoc jun syaaxilal tuꞌ, ẍi Isaac.
34Jaꞌ yet jix yabꞌen naj Esaú masanil tzet chi yal smam tuꞌ, yelcꞌulal wal jix a yaw naj yokꞌ yin ipal, jix yalon naj jaxca tiꞌ:
—¡Al pax watxꞌ kꞌane tuꞌ wibꞌan an mamin! ẍi naj.
35Jix yalon Isaac jaxca tiꞌ tet naj:
—Jaꞌ naj ja wuẍtaj jix jin jul etnen tuꞌ, jaꞌ naj jix iꞌontoj masanil watxꞌ kꞌane, tol ja wet taꞌle yeocoj, ẍi naj.
Catuꞌ jix takꞌwi Esaú tuꞌ:
36—Aa, tumi yu jaxca tuꞌ yuxan Jacob yoc sbꞌi naj. Yin xa scael chin yetne naj tiꞌ. Yin sbꞌabꞌelal jix yiꞌecꞌ jin majul yet jin bꞌabꞌel uninal naj, jaxa pax tinaniꞌ chi yiꞌon pax ecꞌ syaaxilal naj tol tꞌinan jin chaꞌoni. ¿Cꞌamxam wal junojxa syaaxilal jix ja cꞌubꞌa can a ey jin, mamin? ẍi naj Esaú tuꞌ. 37Jix yalon naj Isaac tet scꞌaal tuꞌ jaxca tiꞌ:
—¿Tzet to wal yetal oj wakꞌ ey jaach an, cha cꞌaal? ¡Tuxa jix wakꞌ yopiso naj Jacob tuꞌ ja wibꞌan, masanil ebꞌ yuẍtaj oj oc ebꞌ ẍejabꞌoj; jacꞌalaꞌ jix jin kꞌan tet Jehová, tol caw watxꞌ oj yun masanil sat yawo naj, jaxca ixim tiriw cꞌal an uva!
38Jix oc tean naj Esaú yin smam, jix yalon jaxca tiꞌ:
—Mamin, ¡cꞌam mi wal junojxa watxꞌ kꞌane chi skeꞌ ja walon can wibꞌan an!
—Tumi jun chꞌan syaaxilal ey yul ja kꞌabꞌ xin, ẍi naj Esaú.
Catuꞌ jix cꞌoli swekꞌon el yaw naj yokꞌi.
39Yu jun tuꞌ, jix yalon naj Isaac jaxca tiꞌ:
Caw naat chach toocan sat txꞌotxꞌ txꞌotxꞌ yaax sat tiꞌ, yetoj cꞌal bꞌey watxꞌ yakꞌon nabꞌ.
40Asan chꞌen espada, oj ja waoc yipoj ja cꞌul, catuꞌ ẍejabꞌ ja wuẍtaj tuꞌ oj ja wun can ocoj; jaꞌ yet eyxa ja wip xin, catuꞌ oj ja colon ja bꞌa tet naj, ẍi naj.
Jix Ela Naj Jacob Bꞌey Eyecꞌ Esaú
41Jatax cꞌal yet tuꞌ, jix cꞌoli ẍichon oc scꞌul Esaú yin Jacob tuꞌ, yu tzet jix al-le can yibꞌan yu smam tuꞌ, catuꞌ jix snaꞌon jaxca tiꞌ: Tuxa wal oj cam jun cu mam tiꞌ jon, oj lawoj tuꞌ, catuꞌ oj jin makꞌon cam jun wuẍtaj tiꞌ, ẍi Esaú tuꞌ.
42Jaꞌ yet jix yabꞌen ix Rebeca tzet lalan snaꞌon naj Esaú tuꞌ, catuꞌ jix yawtentej Jacob, jix yalon tet naj jaxca tiꞌ:
—Jaꞌ naj ja wuẍtaj Esaú tiꞌ chi yoche naj chach smakꞌ cam yet chi yaon ecꞌ spaj ey jaach. 43Yu jun tuꞌ xin, jaach wuneꞌ, abꞌ tzet oj walaꞌ; elan titiꞌ, catuꞌ chach toocan bꞌey Harán, catuꞌ chach eyecꞌ bꞌey naj jin noo Labán. 44Chach can yetoj naj junoj tiempoal masantaꞌcꞌal chi ecꞌtoj sjowal scꞌul naj ja wuẍtaj tiꞌ. 45Jaꞌ yet xax qꞌueytoj yul scꞌul naj ja wuẍtaj tiꞌ, catuꞌ chi walontoj ja wabꞌe, jaxa ja meltzotej tuꞌ. Cꞌam chi yal jin cꞌul junne chi yun je cam je cawanil, ẍi ix.
46Jix lawi tuꞌ, jix yalon ix Rebeca tet naj Isaac jaxca tiꞌ:
—Caw chi cus jin cꞌul yu ebꞌ ix Hitita, ebꞌ ix yistil naj Esaú tiꞌ, yuxan, ta jaꞌ naj Jacob chi yiꞌle sbꞌa yetoj junoj ebꞌ ix Hitita caan bꞌey Canaán tiꞌ, watxꞌ mi tol chin cam xacꞌal an, ẍi ix.
Pilihan Saat Ini:
Génesis 27: knj
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2016, Wycliffe Bible Translators, Inc. All rights reserved.