Génesis 26
26
Jix Toocan Naj Isaac Yul Yet Txꞌotxꞌ Guerar
1Jaꞌ yet jun tiempoal tuꞌ, jix jul jun miman wail bꞌey yul yet txꞌotxꞌ Canaán, jaxca yutenaj yet stiempoal naj Abraham. Yu jun tuꞌ xin, jix toocan naj Isaac yul yet Guerar, bꞌey eyecꞌ naj Abimélec sreyal ebꞌ Filisteo. 2Jaꞌ tituꞌ jix xꞌox sbꞌa Jehová tet naj, jix yalon jaxca tiꞌ: Manche jaach too bꞌey Egipto, canan cꞌal bꞌey chi wal ey jaach tiꞌ. 3Jaꞌ tinaniꞌ watxꞌ ja we bꞌey jun conobꞌ tiꞌ, ey jin cꞌal ecꞌ ja wetoj, catuꞌ oj wakꞌon cꞌal jin yaxilal ey jaach, yutol jaꞌ masanil jun txꞌotxꞌ tiꞌ oj wakꞌ ey jaach cꞌal tet masanil ebꞌ ja wicꞌaal, yet watxꞌ chi eloc masanil jaxca jix yun walon can tet naj ja mam, jaꞌton Abraham. 4Oj wakꞌ chꞌibꞌ sbꞌisil ebꞌ ja wicꞌaal jaxca weycan bꞌey satcan, catuꞌ oj wakꞌon masanil jun txꞌotxꞌ tiꞌ ey jaach. Yetoj pax oj, yu cꞌal ebꞌ ja wicꞌaal tuꞌ, catuꞌ oj ẍaꞌon masanil jin yaxilal ebꞌ conobꞌ. 5Yutol jaꞌ Abraham jix sjije masanil tzet jix walaꞌ, jix sjije masanil jin chejbꞌanil, cꞌal jin ley, yetoj cꞌal cuybꞌanile jix wal tet naj, ẍi Jehová tet Isaac.
6Yu jun tuꞌ xin, jix cancan naj Isaac bꞌey txꞌotxꞌ Guerar. 7Jaꞌ yet jix skꞌanlen ebꞌ naj caan bꞌey jun conobꞌ tuꞌ, tzet yeoc ix Rebeca yetoj naj Isaac. Yutol chi xiw naj yalon tet ebꞌ ta tol yistil naj yeoc ix, yuxan jix yalaꞌ tol yanabꞌ naj yaloni, yutol caw watxꞌ yili oc ix Rebeca tuꞌ. Yuxan jix snaꞌ Isaac tala chi makꞌle cam naj yu ebꞌ, syaꞌiloj yistil tuꞌ.
8Jix ecꞌ cꞌal tiempo yu ebꞌ bꞌey jun conobꞌ tuꞌ, ey jun cꞌual jix yileltoj naj rey Abimélec bꞌey yul swentanail sna, tol caw chi tzala oc naj Isaac yin ix Rebeca tuꞌ. 9Yu jun tuꞌ xin, jix bꞌet iꞌletej naj Isaac tuꞌ, jix yalon naj rey Abimélec tuꞌ jaxca tiꞌ:
—Tuxa jix wilaꞌ, ilaꞌ tol ja wistil ix ix tiꞌ, ¿yel mi ma cꞌamaj? ¿Tzet yuxan jix ja walaꞌ tol ja wanabꞌ ix? ẍi naj.
Jix yalon naj Isaac jaxca tiꞌ:
—Jix jin naꞌ an tala cꞌuxan chin makꞌle cam syaꞌiloj ix, jin chi an, ẍi naj.
10Jix yalon naj rey Abimélec tet naj jaxca tiꞌ:
—¿Tzet yuxan jaxca tuꞌ jix yun ja walon ey jon, jon? Niꞌanxane wal ma cu eyqꞌuey yin spenail ja wu jon. Kꞌinaloj ey junoj naj jix wey yetoj ix ja wistil tiꞌ, ja wu cꞌal chi oc cu penail jon, ẍi naj.
11Jix lawi tuꞌ xin, jix yalon jun chejbꞌanile naj rey Abimélec tet masanil conobꞌ:
—Ta tol ey junoj mactxequel chi txꞌemon jun winaj tiꞌ ma yistil, asan tol chi cami.
12Jaꞌ yet jun abꞌil tuꞌ, jix yaw tiriw naj Isaac bꞌey jun txꞌotxꞌ tuꞌ, caw watxꞌ jix yun smulnail naj, laonebꞌ quintal sat yawo tuꞌ jix yiꞌ yin junjun almu jinat, yutol caw jix yakꞌ syaaxilal Jehová yibꞌan. 13Yu jun tuꞌ xin, caw miman stumin naj jix yamchai, catuꞌ miman cꞌal tzet ey tet naj. 14Caw miman sbꞌisil smeꞌ, ey swacax, ecꞌal ebꞌ yakꞌomal servil naj; yu cꞌal jun tuꞌ, caw jix chichon oc scꞌul ebꞌ naj Filisteo tuꞌ yin naj. 15Jaꞌ yet iquisto ecꞌ smam Isaac tuꞌ, jaꞌton naj Abraham, jix sjoton can wan kꞌobꞌ jaꞌ ebꞌ ẍejabꞌ bꞌey chi yucꞌ jaꞌ noꞌ jobꞌbꞌeal noꞌ. Jaꞌ ebꞌ naj Filisteo jix mujon wan kꞌobꞌ tuꞌ yetoj txꞌotxꞌ. 16Jix yalon naj Abimélec tet naj Isaac:
—Elan cu xol tiꞌ jon, yutol yel xacꞌal bꞌeom jaach ey jon, jon, ẍi naj.
17Catuꞌ jix too Isaac, jix apni oc bꞌey spananil stiꞌ sjobꞌeal txꞌotxꞌ Guerar, jaꞌ tituꞌ jix caey ecꞌoj. 18Catuꞌ jix sjoton pax junelxa wan kꞌobꞌ jaꞌ, wan jotbꞌilcan yu camom smam yet peyxa, jaꞌton jaꞌ smujbꞌil can yu ebꞌ naj Filisteo yet jix cam naj Abraham tuꞌ. Jaꞌ sbꞌi jaꞌ ey can oc yu smam tuꞌ, jacꞌalaꞌ sbꞌi jaꞌ jix yaoc naj Isaac tuꞌ junelxa. 19Ey jun cꞌual, jaꞌ ebꞌ naj yakꞌomal servil naj Isaac, lalan sjoton jun kꞌobꞌ jaꞌ ebꞌ bꞌey jun acꞌal, jaxa jix yunne jix ilcha oc jun jaꞌ snukꞌ jaꞌ yu ebꞌ naj. 20Jaꞌ ebꞌ naj ilom meꞌ a conobꞌ Guerar chi ecꞌ bꞌey jun acꞌal tuꞌ, jix yakꞌon jowal ebꞌ naj yetoj ebꞌ naj yilomal smeꞌ naj Isaac tuꞌ, yutol chi yal ebꞌ naj tol yet ebꞌ naj jun jaꞌ tuꞌ. Yuxan jix yakꞌ naj Isaac tuꞌ yij sbꞌi jaꞌ jaꞌ tuꞌ, “Cajlebꞌail,” yutol jix scajle sbꞌa ebꞌ naj yin jaꞌ. 21Jix lawi tuꞌ xin, catuꞌ jix sjoton junxa kꞌobꞌ ebꞌ yakꞌomal servil Isaac tuꞌ. Jacꞌalaꞌ jix scajlen pax a sbꞌa ebꞌ naj junelxa yin jaꞌ, yuxan jix yakꞌon yij sbꞌi, jaꞌ “Acꞌulal”.
22Yu jaxca tuꞌ, yuxan naat jix too caey naj Isaac. Jaꞌ tituꞌ jix sjot pax junxa kꞌobꞌ jaꞌ ebꞌ, cꞌamxa mactxequel jix yakꞌle jowal yin jaꞌ tuꞌ, yuxan jaꞌ “Jajbꞌil Eloj” jix yij can sbꞌi yu naj Isaac. Jajbꞌil jin el yu Jehová yet chin jobꞌon jin bꞌa titiꞌ, ẍi naj.
23Jix lawi tuꞌ jix el naj Isaac tituꞌ, jix aapnoj bꞌey Beerseba. 24Jaꞌ yet jun akꞌbꞌal tuꞌ, jix xꞌox sbꞌa Jehová tet naj, jix yaloni:
Jain sDiosal jin ja mam Abraham. Manche jaach xiwi, ey jin oc ja wetoj. Yu cꞌal jin chejabꞌ Abraham yuxan oj wakꞌ syaaxilal ja wibꞌan, caw ecꞌal oj yun sbꞌisil ebꞌ ja wicꞌaal, ẍi Jehová.
25Jaꞌ naj Isaac tuꞌ, jix swaꞌne a jun yet xaambꞌal tituꞌ, jix oc yin eyilal tet Jehová. Jaꞌ tituꞌ jix caey ecꞌ ebꞌ. Jaꞌ ebꞌ yakꞌomal servil naj jix sjoton pax junxa kꞌobꞌ jaꞌ ebꞌ.
Jaꞌ Swa kꞌane Naj Isaac Yetoj Rey Abimélec
26Ey jun cꞌual, jix tit naj rey Abimélec bꞌey Guerar, jix julecꞌ kꞌanabꞌ yetoj naj Isaac. Ey jun swatxꞌil ánima jaꞌjun yetoj chi yij Ahuzat, yetoj naj Ficol, yaaw yeoc naj xol ebꞌ soldado naj. 27Jix skꞌanlen naj Isaac tet ebꞌ.
—¿Tzet yuxan chin jul je yilaꞌ, tumi cꞌam chin je yoche yuxan oj jin je yujte eltoj sat je txꞌotxꞌ tiꞌ? ẍi tet ebꞌ.
28Catuꞌ jix takꞌwi ebꞌ tet naj:
—Tuxa jix kil jon tol eyoc Jehová ja wetoj, yuxan jix cu naꞌ jon tol smoo chi cu waꞌne junoj cu wa kꞌane ja wetoj. Jaꞌ jun cu wa kꞌane oj cu waꞌne ja wetoj tiꞌ, jaꞌton tiꞌ: 29Tol cꞌam ojabꞌ bꞌakꞌin chon ja wetne, yutol jaon tiꞌ man penaoj jix kute cu naꞌbꞌal ja win. Jaꞌ tiꞌ ket tol xaan jix jaach kilaꞌ, yin cꞌal tzalacꞌulal jix jaach cu chejeloj. Chi kilaꞌ tol ey cꞌal syaaxilal Jehová ey jaach, ẍi ebꞌ.
30Yet jix lawi skꞌanabꞌ ebꞌ xin, jix yaoc jun kꞌin naj Isaac, jix low ebꞌ jix yuqꞌuen jaꞌ ebꞌ yin tzalacꞌulal. 31Jaꞌ yet junxa cꞌu, sebꞌ jix a waan ebꞌ yet skꞌinibꞌalil, jix yakꞌon can stiꞌ ebꞌ tet junjun. Jix lawi tuꞌ, jix stakꞌele can sbꞌa ebꞌ yin tzalacꞌulal, catuꞌ jix pax toj ebꞌ bꞌey sconobꞌ.
32Jaꞌ yet jun cꞌual tuꞌ, jix jul ebꞌ yakꞌomal servil naj Isaac tuꞌ, yu jul yalon ebꞌ tet naj yu jun kꞌobꞌ jotbꞌilcan yu ebꞌ naj, tol eyxa jaꞌ jaꞌ yul. 33Yuxan, “Sebá” jix yij can sbꞌi jun kꞌobꞌ tuꞌ yu naj Isaac. Jaꞌ jun conobꞌ ey tituꞌ jaꞌ chi yij pax Beerseba tinaniꞌ.
34Cawinajxa abꞌil skꞌinal naj Esaú, catuꞌ jix nupi yetoj ix chi yij Judit, scutzꞌin naj Beerí Hitita. Jix yiꞌon pax ix Basemat naj, scutzꞌin junxa naj Hitita chi yij Elón. 35Jaꞌ ebꞌ ix cawan tiꞌ jix akꞌle cus scꞌul Isaac yetoj ix Rebeca yu ebꞌ.
Pilihan Saat Ini:
Génesis 26: knj
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2016, Wycliffe Bible Translators, Inc. All rights reserved.