ᐅᐸᓓᑭᔅ ᒫᑎᐤ 23
23
ᐁᑳᐎᓚ ᓇᔅᐱᑕᑯᒃ ᐅᑕᑐᔅᑫᐎᓂᐙᐧᒃ ᐅᒪᓯᓇᐃᑫᐗᒃ ᓀᔥᑕ ᐹᕈᓯᔭᒃ
(ᒫᕐᒃ 12:38–39; ᓘᒃ 11:43, 46; 20:45–46)
1ᐁᑯ ᒋᓴᔅ ᐁᔭᒥᐋᑦ ᒥᔮᒪᐎᒥᒉᑎᓕᒋ ᐃᓕᓕᐗ, ᓀᔥᑕ ᐅ ᑭᔅᑭᓄᐊᒪᐙᑲᓇ, 2ᐁ ᐃᑗᑦ, ᐅᒪᓯᓇᐃᑫᐗᒃ ᓀᔥᑕ ᐸᕋᓯᔭᒃ ᐊᐱᐗᒃ ᒧᓯᓴ ᐅᑦ ᐊᐱᐎᓂᓕᒃ: 3ᐁᐗᑯ ᐅᒋ ᒥᓯᐌ ᑫᒀᓇ ᑳ ᐎᑕᒫᑖᑾᒃ ᑭᒋ ᓈᑲᑕᐌᓕᑕᒣᒃ, ᐁᐗᑯ ᓈᑲᑕᐌᓕᑕᒧᒃ ᓀᔥᑕ ᑐᑕᒧᒃ; ᒫᑲ ᐁᑳᐎᓚ ᓇᔅᐱᑖᑯᒃ ᐅᑦ ᐊᑑᔅᑫᐎᓂᐙᒃ; ᐌᓴ ᐃᑗᐗᒃ, ᓇᒪᐎᓚ ᒫᑲ ᑐᑕᒶᒃ᙮ 4ᐌᓴ ᒫᑯᐱᑕᒶᒃ ᐁ ᑯᓯᑾᓂᓕᑭ ᐎᐗᔑᐎᓇ, ᓀᔥᑕ ᐁ ᐋᓕᒪᓂᓕᑭ ᑭᒋ ᐎᐗᔑᓈᓂᐗᓂᓕᑭ, ᐊᔅᑕᐗᒃ ᒫᑲ ᐃᓕᓕᐗ ᐅᑎᑎᒪᓂᓕᒃ; ᒫᑲ ᐎᓚᐗᐤ ᑫᒋᐙᒃ ᓇᒪᐎᓚ ᐋᑎᓇᒶᒃ ᐯᔭᒃ ᐅᓕᓕᑭᒋᒑᓂᐗᐤ ᐅᒋ᙮ 5ᒫᑲ ᒥᓯᐌ ᐅᑦ ᐊᑑᔅᑫᐎᓂᐙᐗ ᑐᑕᒶᒃ ᑭᒋ ᐙᐸᒥᑯᒋᒃ ᐃᓕᓕᐗ: ᐋᓚᑲᔥᑭᑖᐗᒃ ᐅ ᑭᔅᑭᓄᐙᒋᐅᐎᓂᐙᐗ, ᒥᔖᑖᐗᒃ ᓀᔥᑕ ᐁ ᐃᔅᒀᔦᑲᓂᓕᑭ ᐅ ᐎᓛᒋᑲᓂᐙᐗ, 6ᓵᑭᑖᐗᒃ ᒫᑲ ᑳ ᑭᔅᑌᓕᑕᑾᓂᓕᑭ ᐊᐱᐎᓇ ᐁ ᒪᑯᔖᓂᐗᒃ, ᓀᔥᑕ ᑭᒋ ᑌᑕᐱᐎᓇ ᐋᔭᒥᐁᐎᑲᒥᑯᒃ, 7ᓀᔥᑕ ᐊᑕᒥᔅᑳᑯᓯᐎᓇ ᐃᑌ ᐁ ᐊᑖᒥᑐᓈᓂᐗᒃ, ᓀᔥᑕ ᕌᐸᐃ, ᕌᐸᐃ, ᑭᒋ ᐃᑎᑯᒋᒃ ᐃᓕᓕᐗ᙮ 8ᒫᑲ ᐁᑳᐎᓚ ᑭᓚᐗᐤ ᓇᑕᐌᓕᑕᒧᒃ ᕌᐸᐃ ᑭᒋ ᐃᑎᑳᐎᔦᒃ: ᐌᓴ ᐯᔭᑯ ᑭᑦ ᐅᑭᒫᒥᐗᐤ, ᙭ ᐅᑎ; ᒥᓯᐌ ᑭᓚᐗᐤ ᒫᑲ ᑭ ᐎᒋᔖᓂᑐᓇᐗᐤ᙮ 9ᐁᑳᐎᓚ ᓀᔥᑕ ᐊᐌᓇ ᓄᑖᐎᓈᓐ ᐃᑎᒃ ᐅᑕ ᐊᔅᑮᒃ: ᐌᓴ ᐯᔭᑯ ᑯᑕᐎᐗᐤ, ᑭᒋᑭᔑᑯᒃ ᑳ ᐃᑖᑦ᙮ 10ᐁᑳᐎᓚ ᓀᔥᑕ ᓇᑕᐌᓕᑕᒧᒃ ᐅᑭᒫᐤ ᑭᒋ ᐃᑎᑳᐎᔦᒃ; ᐌᓴ ᐯᔭᑯ ᑭᑦ ᐅᑭᒫᒥᐗᐤ, ᙭ ᐅᑎ᙮ 11ᒫᑲ ᐊᓇ ᑳ ᒫᐗᒋ ᑭᔅᑌᓕᑖᑯᓯᑦ ᐁ ᐃᑕᔑᔦᒃ, ᐁᐗᑯ ᑫ ᐅᑦ ᐊᑑᔅᑫᓛᑲᓂᒥᔦᒃ᙮ 12ᐊᐌᓇ ᒫᑲ ᑫ ᑭᔅᑌᓕᒥᑎᓱᑴ ᑲᑕ ᒪᒉᓕᒪᐤ; ᐊᐌᓇ ᒫᑲ ᑫ ᑕᐸᑌᓕᒥᑎᓱᑴ ᑲᑕ ᑭᔅᑌᓕᒪᐤ᙮
ᒋᓴᔅ ᐋᑕᐌᓕᒣᐤ ᐅᑕᔮᒥᐁᑳᓱᔅᑲᒃ
(ᒫᕐᒃ 12:40; ᓘᒃ 11:39–42, 44, 52; 20:47)
13ᒫᑲ ᑭ ᑳ ᑲᒀᑕᑭᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑳᓱᑐᒃ!! ᐌᓴ ᑭ ᑭᐸᐁᓇᐗᐤ ᑭᒋᑭᔑᑳᐎ ᐅᑭᒫᐎᐎᓐ ᐃᓕᓕᐗᒃ ᐁᑳ ᑭᒋ ᐱᑐᑫᒋᒃ: ᐌᓴ ᑭᓚᐗᐤ ᓇᒪᐎᓚ ᑭ ᐱᑐᑳᓇᐗᐤ, ᓇᒪᐎᓚ ᓀᔥᑕ ᑭᑦ ᐃᓕᓇᐗᐗᐗᒃ ᑭᒋ ᐱᑐᑫᒋᒃ ᐊᓂᑭ ᐙ ᐱᑐᑫᒋᒃ᙮ 14ᑭ ᑳ ᑲᒀᑕᑫᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑲᓱᑐᒃ! ᐌᓴ ᑭ ᒣᔅᑎᓇᒸᓈᐗᐤ ᑭᑎᒪᑭᔅᑴᐗᒃ ᐎᑭᐙᐗ, ᓀᔥᑕ ᐙᔦᔑᐃᐌᐎᓂᒃ ᑭ ᑭᓄᑖᓇᐗᐤ ᑭᑦ ᐋᔭᒥᐋᐎᓂᐗᐗ: ᐁᐗᑯ ᐅᒋ ᑭ ᑳ ᐋᔮᓇᐗᐤ ᐊᐙᓯᑌ ᓂᔑᐗᓈᒋᒥᑯᓯᐎᓂᓕᐤ᙮
15ᑭ ᑳ ᑲᒀᑕᑭᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑳᓱᑐᒃ! ᐌᓴ ᑭ ᐙᔅᑳᔅᑫᓇᐗᐤ ᑭᒋᑲᒥ ᓀᔥᑕ ᐊᔅᑭ ᐯᔭᒃ ᐊᐌᓇ ᑭᒋ ᑴᔅᑳᑎᓯᔦᒃ, ᐃᔅᐱ ᒫᑲ ᑳ ᑴᔅᑳᑎᓯᔦᑯ, ᑭᑦ ᐃᔑᐋᐗᐤ ᓂᔡᐤ ᐊᐙᓯᑌ ᒪᒋ ᐃᔥᑯᑌᓕᐤ ᑭᒋ ᐅᑦ ᐊᐙᔑᒥᔑᒥᑯᑦ ᐃᔥᐱᔥ ᑭᓚᐗᐤ᙮
16ᑭ ᑳ ᑲᒀᑕᑭᓯᓇᐗᐤ, ᐁᑳ ᐎᐋᐱᔦᒃ ᐋᑕ ᐁ ᑭᔅᑭᓄᑕᐃᐌᔦᒃ, ᑳ ᐃᑗᔦᒃ, ᐊᐌᓇ ᐁ ᑭᒋᐃᑗᑦ, ᑫ ᐊᔅᐱᒧᑴ ᑭᒋᐋᔭᒥᐁᐎᑲᒥᑯᓕᐤ, ᓇᒪᐎᓚ ᐙᔦᔥ ᐃᑌᓕᑖᑾᓐ; ᒫᑲ ᐊᐌᓇ ᐁ ᑭᒋᐃᑗᑦ ᑫ ᐊᔅᐱᒧᑴ ᐅᓵᐎᔔᓕᐊᓈᐱᔅᑾ ᑭᒋᐋᔭᒥᐁᐎᑲᒥᑯᒃ, ᐅᒪᓯᓇᐃᑲᓂᒥᐤ! 17ᑫᑫᐹᑎᓯᔦᒃ ᓀᔥᑕ ᐁᑳ ᐎᐋᐱᔦᒃ; ᐌᓴ ᑖᓂᒪ ᐊᐙᓯᑌ ᐁ ᑭᒋᐃᑌᓕᑖᑾᒃ, ᐅᓵᐎᔔᓕᐊᓈᐱᔉ, ᓀᔥᑕᐱᑯ ᑭᒋᐋᔭᒥᐁᐎᑲᒥᒃ ᑳ ᐅᒋ ᐸᓓᑫᓕᑖᑯᓯᑦ ᐅᓵᐎᔔᓕᐊᓈᐱᔉ? 18ᓀᔥᑕ ᒫᑲ, ᐊᐌᓇ ᐁ ᑭᒋᐃᑗᑦ ᑫ ᐊᔅᐱᒧᑴ ᐸᑭᒋᑲᓈᐱᔅᑲᓕᐤ, ᓇᒪᐎᓚ ᐙᔦᔥ ᐃᑌᓕᑖᒀᓐ; ᒫᑲ ᐊᐌᓇ ᐁ ᑭᒋᐃᑗᑦ ᑫ ᐊᔅᐱᒧᑴ ᒥᓕᐌᐎᓂᓕᐤ ᐁᑯᑕ ᑳ ᐊᔅᑌᓕᒃ, ᐅᒪᓯᓇᐃᑲᓂᒥᐤ᙮ 19ᑫᑫᐹᑎᓯᔦᒃ ᓀᔥᑕ ᐁᑳ ᐎᐋᐱᔦᒃ: ᐌᓴ ᑖᓂᒪ ᐊᐙᓯᑌ ᐁ ᑭᒋᐃᑌᓕᑖᑾᒃ, ᒥᓕᐌᐎᓐ ᓀᔥᑕᐱᑯ ᐸᑭᒋᑲᓈᐱᔉ, ᑳ ᐅᒋ ᐸᓓᑭᓕᒋᑳᑌᒃ ᒥᓕᐌᐎᓐ? 20ᐁᐗᑯ ᐅᒋ ᐊᐌᓇ ᐁ ᑭᒋᐃᑗᑦ ᑫ ᐊᔅᐱᒧᑴ ᐸᑭᒋᑳᓇᐱᔅᑯᓕᐤ, ᐊᔅᐱᒧ ᐁᐗᑴᓕᐤ ᓀᔥᑕ ᒥᓯᐌ ᑫᒀᓇ ᐁᑯᑕ ᑳ ᑌᑕᔅᑌᓕᑭ᙮ 21ᐊᐌᓇ ᒫᑲ ᐁ ᑭᒋᐃᑗᑦ ᑫ ᐊᔅᐱᒧᑴ ᑭᒋᐋᔭᒥᐁᐎᑲᒥᑯᓕᐤ, ᐊᔅᐱᒧ ᐁᐗᑴᓕᐤ, ᓀᔥᑕ ᐊᓂᐃ ᐁᑯᑕ ᑳ ᐎᑭᓕᒋ᙮ 22ᐊᓇ ᒫᑲ ᐁ ᑭᒋᐃᑗᑦ ᑫ ᐊᔅᐱᒧᑦ ᑭᒋᑭᔑᑯᓕᐤ, ᐊᔅᐱᒧᐌᐤ ᐅᑦ ᐅᑭᒪᐗᐱᐎᓂᓕᐤ ᑭᒋᒪᓂᑐᐗ, ᓀᔥᑕ ᐊᓂᐃ ᐁᑯᑕ ᑳ ᑌᑕᐱᓕᒋ᙮
23ᑭ ᑳ ᑲᒀᑕᑭᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑳᓱᑐᒃ! ᐌᓴ ᑭ ᐸᑭᑎᓀᓇᐗᐤ ᐯᔭᒃ ᐁ ᑮ ᒥᑖᑐᑖᑲᓂᐎᑭ ᓇᓈᑲᐤ ᓂᑖᐎᑭᑖᑲᓂᔕ; ᓇᒪᐎᓚ ᒫᑲ ᑭ ᑮ ᑐᑌᓇᐗᐤ ᐊᓂᐃ ᐊᐙᓯᑌ ᑳ ᑭᒋ ᐃᑌᓕᑖᑾᑭ ᑳ ᒪᓯᓇᐃᑳᑌᑭ ᐅᓚᔓᐌᐎᓂᒃ, ᑎᐹᔅᑯᓂᑐᐎᓐ, ᔕᐌᐎᓕᒋᑫᐎᓐ ᓀᔥᑕ ᑖᐺᔦᓕᑕᒧᐎᓐ: ᐅᐅ ᑭ ᑳ ᑮ ᑐᑌᑕᐗᐤ, ᓀᔥᑕ ᐊᓂᐃ ᑯᑕᑭᔭ ᐁᑳ ᑭᒋ ᓇᑲᑕᒧᒃ ᐁᑳ ᐁ ᐅᒋ ᑐᑕᒣᒃ᙮ 24ᑭᓚᐗᐤ ᐁᑳ ᐎᐋᐱᔦᒃ ᐋᑕ ᑭᔅᑭᓄᑖᐃᐌᔦᒃ, ᐊᐱᔅᑕᒪᓂᒍᔥ ᑳ ᐅᒋ ᔖᑆᔑᑳᐎᑖᔦᒃ ᑫᒀᓐ, ᑳ ᑯᒋᐸᓕᔦᒃ ᒫᑲ ᑳᒥᓪ᙮
25ᑭ ᑳ ᑲᒀᑕᑭᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑳᓱᑐᒃ! ᐌᓴ ᑭ ᐸᔦᑭᑖᓇᐗᐤ ᐗᔅᑮᒡ ᒥᓂᑾᑲᓐ ᓀᔥᑕ ᐅᓛᑲᓐ, ᒫᑲ ᐱᒋ ᓴᑲᔅᑭᓀᐗ ᒪᔅᑲᒋᐃᐌᐎᓐ ᓀᔥᑕ ᐅᓵᒥᐃᓱᐎᓐ᙮ 26ᑭᓚ ᐁᑳ ᐎᐋᐱᔭᓐ ᐸᕋᓯ, ᓃᔥᑕᒻ ᐹᔦᑭᑕ ᐊᓂᒪ ᐱᒋ ᒥᓂᒀᑲᓂᒃ ᓀᔥᑕ ᐅᓛᑲᓂᒃ, ᐗᔅᑮᒡ ᓀᔥᑕ ᑭᒋ ᐹᔦᑲᒃ᙮
27ᑭ ᑳ ᑲᒀᑕᑭᓯᓇᐗᐤ, ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑳᓱᑐᒃ! ᐌᓴ ᑖᐱᔅᑯᒡ ᐁ ᐙᐱᐃᑳᑌᑭ ᒋᐹᔨᑲᒥᑾ ᑭᑦ ᐃᔑᓈᑯᓯᓇᐗᐤ ᑳ ᐋᑕ ᒥᓗᓈᑾᑭ ᐗᓚᐎᑌᒥᒃ ᐱᒋ ᒫᑲ ᓴᑲᔅᑭᓀᐗ ᐅᔅᑲᓂᐙᐗ ᑳ ᓂᐱᒋᒃ, ᓀᔥᑕ ᒥᓯᐌ ᑫᒀᓇ ᑳ ᐎᓕᐹᑭ᙮ 28ᐁᑯ ᓀᔥᑕ ᑭᓚᐗᐤ ᐁᔑ ᒥᓦᑎᓯᑳᓱᔦᒃ ᐁ ᐙᐸᒥᑖᑾᒃ ᐃᓕᓕᐗᒃ, ᐊᑖᒥᒃ ᒫᑲ ᑭ ᓵᑲᔅᑭᓀᓇᐗᐤ ᐋᔭᒥᐁᑳᓱᐎᓐ ᓀᔥᑕ ᒪᒑᑎᓯᐎᓐ᙮
ᒋᓴᔅ ᓃᑳᓂᐐᑕᒻ ᑫ ᐃᔑ ᑲᒀᑕᑭᐊᑳᓂᐎᒋᒃ
(ᓘᒃ 11:47–51)
29ᑭ ᑳ ᑲᒀᑕᑭᓯᓇᐗᐤ ᐅᒪᓯᓇᐃᑫᑐᒃ ᓀᔥᑕ ᐸᕋᓯᔨᑐᒃ, ᐅᑕᔭᒥᐁᑳᓱᑐᒃ! ᐌᓴ ᑭᑦ ᐅᔑᑕᒸᓇᐗᐤ ᐅ ᒋᐹᔨᑲᒥᑯᐙᐗ ᐅᑭᔅᑭᐙᐃᑫᐗᒃ, ᓀᔥᑕ ᑭ ᐙᐌᔑᑕᒸᓇᐙᐤ ᐅ ᒋᐹᔨᑲᒥᑯᐙᐗ ᐅᒀᔭᔅᑭᑖᑎᓯᐗᒃ᙮ 30ᑭᑦ ᐃᑣᓇᐗᐤ ᒫᑲ, ᑮᔥᐱᓐ ᑭ ᐱᒫᑎᔭᒃ ᒣᒀᒡ ᑳ ᐅ ᑭᔑᑳᒥᒋᒃ ᓄᑖᐎᓈᓇᒃ, ᓇᒪᐎᓚ ᓂ ᑳ ᑮ ᐎᒋᐋᑕᓈᓇᒃ ᐁ ᓯᑲᐊᒸᒋᒃ ᐅᑭᔅᑭᐙᐃᑫᐗᒃ ᐅᒥᑯᓕᐤ᙮ 31ᐁᐗᑯ ᐌᒋ ᑎᐹᒋᒥᑎᓱᔦᒃ, ᐁ ᐅᑦ ᐊᐙᔑᒥᔑᒥᑖᑾᒃ ᐊᓂᑭ ᑳ ᑮ ᓂᐸᐋᒋᒃ ᐅᑭᔅᑭᐙᐃᑫᐗ᙮ 32ᓵᑲᔅᑭᓇᑖᐙᒃ ᒫᑲ ᑯᑖᐎᐙᐗᒃ ᑳ ᐃᔅᐱᒋ ᒪᒑᑎᓯᒋᒃ᙮ 33ᑭᓚᐗᐤ ᒥᔑᑭᓀᐱᑭᑐᒃ, ᑭᓚᐗᐤ ᐋᔮᓂᔅᑫ ᑫᓀᐱᑯᐎᔦᒃ, ᑖᓂ ᑫ ᐃᔑ ᒥᔮᔥᑲᒣᒃ ᓂᔑᐗᓈᒋᒥᐌᐎᓐ ᒪᒋ ᐃᔥᑯᑌᒃ? 34ᐁᑯᔑ ᒫᑲ, ᒫᑎᑲ, ᑭᑦ ᐃᑎᔕᐊᒫᑎᓇᐗᐤ ᐅᑭᔅᑭᐙᐃᑫᐗᒃ ᓀᔥᑕ ᑫᑫᑕᐌᓕᑕᑭᒃ ᐃᓕᓕᐗᒃ ᓀᔥᑕ ᐅᒪᓯᓇᐃᑫᐗᒃ; ᐋᑎᑦ ᐁ ᐃᑕᓯᒋᒃ ᒫᑲ ᑭ ᑳ ᓂᐸᐋᐗᐗᒃ ᓀᔥᑕ ᒋᔅᑖᔅᑯᐙᐙᐗᒃ; ᐋᑎᑦ ᐁ ᐃᑕᓯᒋᒃ ᒫᑲ ᑭ ᑳ ᐸᐸᓴᔅᑌᐙᐗᐗᒃ ᑭᑦ ᐋᔭᒥᐁᐎᑲᒥᑯᐗᒃ, ᓀᔥᑕ ᒥᓯᐌ ᐃᑖᐎᓂᒃ ᑭ ᑳ ᑲᒀᑕᑭᐊᐙᐗᒃ᙮ 35ᑭᒋ ᐅᑎᑎᑯᔦᒃ ᒥᓯᐌ ᒀᔭᔅᑭᑖᑎᓯᐎ ᒥᑯ ᑳ ᑮ ᓯᑲᐃᑳᑌᒃ ᐊᔅᑮᒃ, ᐅᒀᔭᔅᑭᑖᑎᓯᐤ ᐁᐱᓪ ᐅᒥᑯ ᐅᒋ, ᐱᓕᔥ ᐅᒥᑯ ᓵᑲᕌᔭᔅ ᑖᕋᑲᔭᔅ ᐅᑯᓯᓴ, ᑳ ᑮ ᓂᐹᔦᒃ ᑕᔅᑕᐎᒡ ᑭᒋ ᐋᔭᒥᐁᐃᑲᒥᑯᒃ ᓀᔥᑕ ᐸᑭᒋᑲᓈᐱᔅᑯᒃ᙮ 36ᑖᐺ ᑭᑦ ᐃᑎᓇᐗᐤ, ᒥᓯᐌ ᐅᐅ ᑫᒀᓇ ᑲᑕ ᐅᑎᑎᑯᐗᒃ ᐅᑯ ᐊᓄᒡ ᑳ ᐱᒫᑎᓯᒋᒃ᙮
ᒋᓴᔅ ᐁ ᐃᔑ ᓵᑭᑖᑦ ᒋᕉᓴᓚᒻ
(ᓘᒃ 13:34–35)
37ᐅ ᒋᕉᓴᓚᒻ, ᒋᕉᓴᓚᒻ, ᑳ ᓂᐸᐊᒋᒃ ᐅᑭᔅᑭᐙᐃᑫᐗᒃ, ᓀᔥᑕ ᑳ ᐱᒶᓯᓇᐗᒋᒃ ᐊᓂᑭ ᑳ ᐃᑎᔕᐊᒫᑲᐎᔭᓐ, ᑖᓐ ᐁᔅᐱᒋ ᒥᒉᑣᒃ ᑫ ᐎ ᒪᐗᓴᑲᓇᒀᐸᓐ ᑭᑦ ᐊᐙᔑᒥᔕᒃ, ᑖᐱᔅᑯᒡ ᐹᑲᐋᒀᓐ ᐁ ᒪᐗᓴᑲᓇᑦ ᐅ ᐹᑲᐋᒀᓂᔑᒪ ᔑᐹ ᐅ ᑕᑾᑾᓂᒃ, ᓇᒪᐎᓚ ᒫᑲ ᑭ ᐯᑌᓇᐗᐤ! 38ᒫᑎᑲ, ᑭ ᐙᔅᑲᔨᑲᓂᒥᐗᐤ ᑭ ᓇᑲᑕᒫᑲᐎᓈᐗᐤ ᐁ ᓂᔑᐗᓈᑕᒃ᙮ 39ᐌᓴ ᑭᑦ ᐃᑎᓇᐗᐤ, ᓇᒪᐎᓚ ᑭ ᑳ ᐅᒋ ᑭᑣᒻ ᐙᐸᒥᓇᐗᐤ, ᐹᑎᒫ ᐃᑗᔦᑴ, ᔕᐌᓕᑖᑯᓯᐤ ᐊᓇ ᑳ ᐯᒋ ᐃᑐᑌᑦ ᐅᑎᐯᓕᒋᑫᐗ ᐅᑦ ᐃᔑᓂᑳᓱᐎᓂᓕᒃ᙮
Pilihan Saat Ini:
ᐅᐸᓓᑭᔅ ᒫᑎᐤ 23: MCNT91
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The text of the Bible in Moose Cree is in the public domain.
Moose Cree New Testament © Canadian Bible Society, 1991.
