ᐅᐸᓓᑭᔅ ᒫᑎᐤ 22
22
ᓇᔅᐱᑐᐌᐎ ᐋᑕᓗᑳᓐ ᐎᑭᑐᐎ ᒪᑯᔐᐎᓐ
(ᓘᒃ 14:15–24)
1ᒋᓴᔅ ᒫᑲ ᐁ ᓇᔥᑴᐗᔑᐃᐌᑦ ᒥᓇ ᑮ ᐋᔭᒥᐁᐤ ᓇᔅᐱᑐᐌᐎ ᐋᑕᓗᑳᓂᒃ, ᐁ ᐃᑗᑦ ᒫᑲ, 2ᑭᒋᑭᔑᑳᐎ ᐅᑭᒫᐎᐎᓐ ᐃᑌᓕᑖᑾᓐ ᑖᐱᔅᑯᒡ ᐯᔭᒃ ᑭᒋᐅᑭᒫᐤ, ᑳ ᐎᑭᑐᐋᑦ ᐅᑯᓯᓴ, 3ᑮ ᐃᔑᑎᔕᐌᐤ ᒫᑲ ᐅᑦ ᐊᑑᔅᑫᓛᑲᓂᒪ, ᑭᒋ ᓇᑐᒫᓕᒋ ᐊᓂᐃ ᑳ ᑮ ᐎᑯᒥᒥᒋ ᐎᑭᑐᐎᓂᒃ: ᓇᒪᐎᓚ ᒫᑲ ᐎ ᐯᒋ ᐃᑐᑌᓕᐗ᙮ 4ᒥᓇ, ᑮ ᐃᔑᑎᔕᐌᐤ ᑯᑕᑭᔭ ᐊᑑᔅᑫᓛᑲᓇ, ᐁ ᐃᑗᑦ, ᐎᑕᒫᑯᒃ ᐊᓂᑭ ᑳ ᐎᑯᒫᑲᓂᐎᒋᒃ, ᒫᑎᑲ, ᓂ ᑮ ᐋᔦᔅᑳᐎᑖᓐ, ᓂ ᒥᒋᓱᐎᓐ; ᓂ ᒥᔅᑐᓱᒪᒃ ᓀᔥᑕ ᓂ ᑖᒋᐳᐋᑲᓇᒃ ᑮ ᓂᐸᐋᐗᒃ, ᒥᓯᐌ ᑫᒀᓇ ᒫᑲ ᐋᔦᔅᑳᐎᑕᓂᐗᓋ: ᐯᒋ ᐃᑑᑌᒃ ᐎᑭᑐᐎᓂᒃ᙮ 5ᒫᑲ ᑮ ᐋᑕᐌᓕᑕᒸᒃ, ᑮ ᐃᑐᑌᐗᒃ ᒫᑲ, ᐯᔭᒃ ᐅ ᓂᑖᐎᑭᒋᑲᓂᒃ, ᑯᑕᒃ ᒫᑲ ᑮ ᓈᑕᒻ ᐅᑦ ᐊᑖᐙᑲᓇ᙮ 6ᑯᑐᑭᔭᒃ ᒫᑲ ᑮ ᐅᑎᓂᒣᐗᒃ ᐅᑦ ᐊᑑᔅᑫᓛᑲᓂᒪ, ᑮ ᐊᔅᐱᐁᐗᒃ ᒫᑲ, ᓀᔥᑕ ᑮ ᓂᐸᐁᐗᒃ᙮ 7ᒫᑲ ᐃᔅᐱ ᑭᒋᐅᑭᒪᐤ ᐱᐁᑕᒃ, ᑮ ᐊᑯᓚᐌᓯᐤ: ᑮ ᐃᔑᑎᔕᐌᐤ ᒫᑲ ᐅ ᓄᑎᓂᑫᒪ, ᑭᒋ ᓂᔑᐗᓈᒋᐋᓕᒋ ᐊᓂᐃ ᐅᓂᐸᔨᐌᐗ, ᓀᔥᑕ ᑭᒋ ᒑᑳᔅᑭᓴᒸᓕᒋ ᐅᑦ ᐃᑖᐎᓂᓕᐤ᙮ 8ᐁᑯ ᐃᑖᑦ ᐅᑦ ᐊᑑᔅᑫᓛᑲᓂᒪ, ᐎᑭᑐᐎᓐ ᐋᔦᔅᑲᐗᔅᑌᐤ, ᒫᑲ ᐊᓂᑭ ᑳ ᐎᑯᒫᑲᓂᐎᒋᒃ ᓇᒪᐎᓚ ᑌᐸᑫᓕᑖᑯᓯᐗᒃ᙮ 9ᐃᑐᑌᒃ ᒫᑲ ᑭᒋ ᒣᔅᑲᓈᒃ, ᓀᔥᑕ ᒥᓯᐌ ᑫ ᒥᔅᑲᐌᑾᒃ, ᐎᑯᒥᑯᒃ ᐎᑭᑐᐎᓂᒃ᙮ 10ᐊᓂᑭ ᐊᑑᔅᑫᓛᑲᓇᒃ ᒫᑲ ᑮ ᐃᑐᑌᐗᒃ ᑭᒋ ᒣᔅᑲᓈᒃ, ᑮ ᒫᐗᒋᐁᐗᒃ ᒫᑲ ᒥᓯᐌ ᑕᑐ ᑳ ᒥᔅᑲᐙᒋᒃ, ᑖᐱᔅᑯᒡ ᑳ ᒪᒋᑣᓕᒋ ᓀᔥᑕ ᑳ ᒥᓗᑣᓕᒋ: ᐎᑭᑐᐎᓂᒃ ᒫᑲ ᑮ ᐃᑖᐗᒃ ᐊᓂᑭ ᑳ ᐎᑯᒫᑲᓂᐎᒋᒃ᙮
11ᐃᔅᐱ ᒫᑲ ᑭᒋᐅᑭᒪᐤ ᐱᐁᒋ ᐱᑐᑫᑦ ᑭᒋ ᐙᐸᒫᑦ ᑳ ᐎᑯᒥᒥᒋ, ᐁᑯᑕ ᐎᐋᐸᒫ ᐯᔭᒃ ᐃᓕᓕᐗ ᐁᑳ ᐁ ᑭᑭᔥᑲᒥᓕᒋ ᐎᑭᑐ ᐎᓛᒋᑲᓂᓕᐤ: 12ᐃᑌᐤ ᒫᑲ, ᓂᑐᑌᒻ, ᑖᓀᑭ ᐌᒋ ᐅᑕ ᐯᒋ ᐱᑕᑫᔭᓐ ᐁᑳ ᐁ ᑭᑭᔥᑲᒪᓐ ᐎᑭᑐ ᐎᓛᒋᑲᓐ? ᓇᒪᐎᓚ ᒫᑲ ᐅᒋ ᑭᑐ᙮ 13ᐁᑯ ᑭᒋᐅᑭᒪᐤ ᐁᑖᑦ ᐊᑑᔅᑫᓛᑲᓇ, ᒫᒫᒋᑯᐱᑎᒃ ᐅᒋᒋᒃ ᓀᔥᑕ ᐅᓯᑎᒃ, ᑭᑐᑕᐃᒃ ᒫᑲ, ᐌᐱᓂᒃ ᒫᑲ ᐗᓚᐎᑎᒥᒃ ᐁ ᐃᔑ ᐗᓂᑎᐱᔅᑳᓕᒃ: ᐁᑯᑕ ᑫ ᐃᑕᑾᒃ ᒫᑐᐎᓐ ᓀᔥᑕ ᑫ ᐃᔑ ᒫᑗᐋᐱᑌᔑᓂᓈᓂᐗᒃ᙮
14ᐌᓴ ᒥᒉᑦ ᓇᑐᒫᐗᒃ, ᒫᑲ ᒐᑲᐙᔑᔥ ᐙᐌᓛᐸᒫᐗᒃ᙮
ᒋᓴᐢ ᐁ ᑲᑴᒋᒪᑳᓂᐎᑦ ᑎᐯᓕᒋᑫᐎ ᔓᓕᐋᓇ ᐅᒋ
(ᒫᕐᒃ 12:13–17; ᓘᒃ 20:20–26)
15ᐁᑯ ᑫᑐᑌᒋᒃ ᐸᕋᓯᔭᒃ, ᑮ ᐋᔭᔭᒥᐃᑐᐗᒃ ᒫᑲ ᑖᓂ ᑫ ᐃᔑ ᐋᓉᑲᐙᒋᒃ ᐅᑦ ᐋᔭᒥᐎᓂᓕᒃ᙮ 16ᑮ ᐃᔑᑎᔕᐊᒪᐌᐗᒃ ᒫᑲ ᐅ ᑭᔅᑭᓄᐊᒪᐙᑲᓂᐙᐗ ᐊᓯᒋ ᐦᐁᕈᑎᔭᓇ, ᐁ ᐃᑗᓕᒋ, ᐅᑭᔅᑭᓄᐊᒫᑫᐤ, ᓂ ᑭᔅᑫᓕᑌᓈᓐ ᐁ ᑖᐺᔭᓐ, ᓀᔥᑕ ᐁ ᑭᔅᑭᓄᐊᒫᑫᐗᑦ ᑭᒋᒪᓂᑐ ᐅᑦ ᐃᔑᑣᐎᓐ ᑖᐺᐎᓂᒃ, ᐁᑳ ᓀᔥᑕ ᐊᐌᓇ ᐁ ᑯᔅᑕᑦ; ᐌᓴ ᓇᒪᐎᓚ ᑮ ᐱᓯᔅᑫᓕᑕᒸᓐ ᐃᓕᓕᐗᒃ ᐁ ᐃᔑᓈᑯᓯᒋᒃ᙮ 17ᐎᑕᒪᐎᓈᓐ ᒫᑲ, ᑖᓐ ᐁᑌᓕᑕᒪᓐ? ᐅᓚᔓᐌᓕᑖᑾᓐ ᓈ ᑭᒋ ᒪᓛᑲᓂᐎᑦ ᓯᓴᕐ ᑎᐯᓕᒋᑫᐎ ᔔᓕᐋᓇ, ᓀᔥᑕᐱᑯ ᐁᑳ?
18ᒫᑲ ᒋᓴᔅ ᑮ ᓂᓯᑕᐌᓕᑕᒬᐤ ᐅ ᒪᒋᑣᐎᓂᓕᐤ, ᑮ ᐃᑗᐤ ᒫᑲ, ᑖᓀᑭ ᐌᒋ ᑲᑴᒋᐃᔦᒃ? ᑭᓚᐗᐤ ᐅᑕᔭᒥᐁᑳᓱᑐᒃ? 19ᐙᐸᑎᓕᒃ ᑎᐯᓕᒋᑫᐎ ᔔᓕᐋᓐ᙮
ᑮ ᐯᑐᐌᐗᒃ ᒫᑲ ᐯᔭᒃ ᔔᓕᐊᓈᐱᔅᑯᔕ᙮ 20ᐃᑌᐤ ᒫᑲ, ᐊᐌᓇ ᐅᑦ ᐃᔑᓈᑯᓯᐎᓐ ᐅᒪ, ᓀᔥᑕ ᐊᐌᓇ ᑳ ᒪᓯᓇᐃᑳᓱᑦ ᐅᑕ?
21ᐃᑌᐗᒃ, ᓯᓴᕐ᙮
ᐁᑯ ᐁᑖᑦ, ᒥᓕᒃ ᓯᓴᕐ ᐊᓂᐃ ᐌᑖᔮᓂᑦ ᓯᓴᕐ, ᓀᔥᑕ ᑭᒋᒪᓂᑐ ᐊᓂᐃ ᐌᑖᔮᓂᑦ ᑭᒋᒪᓂᑐ᙮
22ᐃᔅᐱ ᐅᐅ ᐋᔭᒥᐎᓇ ᑳ ᑮ ᐯᑕᑭᒃ, ᑮ ᒫᒪᔅᑳᑕᒶᒃ, ᑮ ᓇᑲᑌᐗᒃ ᒫᑲ, ᓀᔥᑕ ᑮ ᑭᑐᑌᐗᒃ᙮
ᓵᑦᔫᓯᔭ ᑲᑴᒋᒥᑯ ᒋᓴᐢ ᑖᓐ ᑫ ᐃᑭᓂᓕᒃ ᐗᓂᔥᑳᓂᐙᑫ
(ᒫᕐᒃ 12:18–27; ᓘᒃ 20:27–40)
23ᐁᐗᑯ ᑫᔮᐸᒡ ᐁ ᑭᔑᑳᓕᒃ ᑮ ᐯᒋ ᓈᑎᑯ ᓵᑦᔫᓯᔭ, ᓇᒪ ᐃᑕᑾᓐ ᐗᓂᔥᑳᐎᓐ ᑳ ᐃᑗᒋᒃ, ᑮ ᑲᑴᒋᒥᑯ ᒫᑲ᙮ 24ᐁ ᐃᑎᑯᑦ, ᐅᑭᔅᑭᓄᐊᒫᑫᐤ, ᒧᓯᔅ ᑮ ᐃᑗᐤ, ᑮᔥᐱᓐ ᐃᓕᓕᐤ ᓂᐱᑌ, ᐁᑳ ᒫᑲ ᐁ ᐅᑦ ᐊᐙᔑᒥᔑᑦ, ᐎᒋᔖᓇ ᑲᑕ ᐎᑭᒣᓕᐗ ᐎᐗ, ᑭᒋ ᓂᑖᐎᑭᑕᒪᐙᑦ ᐊᐙᔑᔕ ᐎᒋᔖᓇ᙮ 25ᐯᔭᑾᐤ ᐅᑕ ᑮ ᐃᑖᐗᒃ ᓂᔂᔅ ᑳ ᐎᒋᔖᓂᑐᒋᒃ: ᐊᓇ ᓃᔥᑕᒻ ᒫᑲ, ᐃᔅᐱ ᑳ ᑮ ᐎᑭᒫᑦ ᐎᐗ, ᑮ ᓂᐱᐤ, ᓀᔥᑕ, ᐁᑳ ᐁ ᐅᑦ ᐋᐙᔑᒥᔑᑦ, ᑮ ᓇᑲᑕᒪᐌᐤ ᐎᒋᔖᓇ ᐊᓂᐃ ᐎᐗ: 26ᐊᓇ ᓂᔓ ᓀᔥᑕ, ᓀᔥᑕ ᐊᓇ ᓂᔅᑐ, ᐱᓕᔥ ᒥᓯᐌ ᓂᔂᔅ᙮ 27ᒫᒋᒡ ᒫᑲ ᐊᓇ ᐃᔅᑴᐤ ᓀᔥᑕ ᑮ ᓂᐱᐤ᙮ 28ᐁᐗᑯ ᒫᑲ ᐅᒋ ᐃᔅᐱ ᐗᓂᔥᑳᓂᐗᑫ, ᐊᐌᓇ ᑫ ᐎᐎᑦ ᐅᐅ ᐃᔅᑴᐗ ᐊᓂᑭ ᓂᔂᔅ ᐁ ᐃᑕᓯᒋᒃ? ᐌᓴ ᒥᓯᐌ ᑮ ᐋᔭᐌᐗᒃ᙮
29ᒋᓴᔅ ᒫᑲ ᐁ ᓇᔥᑴᐗᔑᐃᐌᑦ, ᑮ ᐃᑌᐤ, ᑭ ᓇᔅᐹᒡ ᐃᑌᓕᑌᓇᐗᐤ, ᐁᑳ ᐁ ᑭᔅᑫᓕᑕᒣᒃ ᑭᒋ ᒪᓯᓇᐃᑫᐎᓇ, ᐁᑳ ᓀᔥᑕ ᐅ ᑲᔥᑭᐅᐎᓐ ᑭᒋᒪᓂᑐ᙮ 30ᐌᓴ ᐗᓂᔥᑳᓂᐗᑫ ᓇᒪᐎᓚ ᐎᑭᑐᓈᓂᐗᓐ, ᓇᒪ ᓀᔥᑕ ᐎᑭᑐᐃᐙᓂᐗᓐ, ᒫᑲ ᓇᔅᐱᑕᐅᒣᐗᒃ ᑭᒋᒪᓂᑐ ᐅᑦ ᐁᓐᒐᓕᒪ ᑭᒋᑭᔑᑯᒃ᙮ 31ᒫᑲ ᑖᐺ ᐁ ᐗᓂᔥᑳᒋᒃ ᑳ ᓂᐱᒋᒃ, ᓇᒪ ᓈ ᑭ ᑮ ᐅᒋ ᐋᔭᒥᑖᓇᐗᐤ ᐊᓂᒪ ᑳ ᐃᑎᑖᒃ ᑭᒋᒪᓂᑐ, ᐁ ᐃᑗᑦ, 32ᓂᓚ ᓂᑦ ᐋᐎᓐ ᐁᑉᕃᐋᒻ ᐅ ᑭᒋᒪᓂᑐᒪ, ᓀᔥᑕ ᐋᐃᓯᒃ ᐅ ᑭᒋᒪᓂᑐᒪ, ᓀᔥᑕ ᒉᑲᑉ ᐅ ᑭᒋᒪᓂᑐᒪ? ᑭᒋᒪᓂᑐ ᓇᒪᐎᓚ ᐅ ᑭᒋᒪᓂᑐᒥᐙᐗ ᑳ ᓂᐱᒋᒃ, ᒫᑲ ᑳ ᐱᒫᑎᓯᒋᒃ᙮
33ᐃᔅᐱ ᒫᑲ ᒥᔮᒫᐎᒥᒉᑎᒋᒃ ᐃᓕᓕᐗᒃ ᐅᒣᓕᐤ ᐱᐁᑕᑭᒃ, ᑮ ᒫᒪᔅᑳᑕᒬᐗᒃ ᐅ ᑭᔅᑭᓄᐊᒫᑫᐎᓂᓕᐤ᙮
ᒫᐗᒋ ᑭᒋ ᑲᑫᔅᑴᐎᓐ ᐅᓚᓱᐌᐎᓂᒃ
(ᒫᕐᒃ 12:28–34; ᓘᒃ 10:25–28)
34ᒫᑲ ᐃᔅᐱ ᐸᕋᓯᔭᒃ ᑳ ᐯᑕᑭᒃ ᐁ ᑮ ᑭᐳᑐᓇᐙᑦ ᓵᑦᔫᓯᔭ, ᑮ ᒫᐗᒋᐃᑐᐗᒃ᙮ 35ᐁᑯ ᐯᔭᒃ ᐁ ᐃᑕᓯᒋᒃ, ᑳ ᐅᓚᔓᐌᐎᓕᓕᐎᑦ, ᑮ ᑲᑴᒋᒣᐤ, ᐁ ᑲᑴᒋᐋᑦ, ᐁ ᐃᑗᑦ ᒫᑲ, 36ᐅᑭᔅᑭᓄᐊᒫᑫᐤ, ᑖᓂᒪ ᒫᐗᒋ ᑭᒋ ᑲᑫᔅᑴᐎᓐ ᐅᓚᔓᐌᐎᓂᒃ?
37ᒋᓴᔅ ᑮ ᐃᑌᐤ, ᑭ ᑳ ᓵᑭᐊᐤ ᐅᑎᐯᓕᒋᑫᐤ ᑭ ᑭᒋᒪᓂᑐᒻ ᒥᓯᐌ ᑭᑌᐃᒃ ᓀᔥᑕ ᒥᓯᐌ ᑭᑦ ᐊᒑᑯᒃ, ᓀᔥᑕ ᒥᓯᐌ ᑭ ᒥᑐᓀᓕᒋᑲᓂᒃ᙮ 38ᐁᐗᑯ ᐅᒪ ᓃᔥᑕᒻ ᓀᔥᑕ ᑭᒋ ᑲᑫᔅᑴᐎᓐ᙮ 39ᐊᓂᒪ ᓂᔓ ᒫᑲ ᓇᔅᐱᑐᐌᒪᑲᓐ, ᑭ ᑳ ᓵᑭᐋᐤ ᑮᒋᐃᓕᓕᐤ ᑖᐱᔅᑯᒡ ᐁ ᐃᔑ ᓵᑭᐃᑎᓱᔭᓐ᙮ 40ᐅᑕ ᐅᐅ ᓂᔓ ᑲᑫᔅᑴᐎᓇ ᐊᑯᑌᐗ ᒥᓯᐌ ᐅᓚᔓᐌᐎᓐ ᓀᔥᑕ ᑳ ᐃᑗᒋᒃ ᐅᑭᔅᑭᐙᐃᑫᐗᒃ᙮
ᐊᐌᓈᓇ ᑳ ᐃᑖᑲᓂᐎᑦ ᙭
(ᒫᕐᒃ 12:35–37; ᓘᒃ 20:41–44)
41ᒣᒀᒡ ᐸᕋᓯᔭᒃ ᑳ ᒪᐗᒋᐃᑐᒋᒃ, ᑭ ᑲᑴᒋᒥᑯᐗᒃ ᒋᓴᓴ, 42ᐁ ᐃᑗᑦ, ᑖᓐ ᐁᑌᓕᒣᒃ ᙭? ᐊᐌᓇ ᐅᑯᓯᓴ?
ᐃᑌᐗᒃ, ᑌᐱᑦ ᐅᑯᓯᓴ᙮
43ᐃᑌᐤ ᒫᑲ, ᑖᓀᑭ ᐌᒋ ᒫᑲ ᑌᐱᑦ ᐊᒑᑯᒃ ᐅᑎᐯᓕᒋᑫᐤ ᐃᔑᓂᑳᑖᑦ, ᐁ ᐃᑗᑦ, 44ᐅᑎᐯᓕᒋᑫᐤ ᑮ ᐃᑌᐤ ᓂ ᑎᐯᓕᒋᑫᒪ, ᐊᐱ ᑭᓚ ᓂ ᑭᒋᓂᔅᑮᒃ ᐹᑎᒫ ᑭ ᑐᑕᒫᓀ ᑭᒋ ᐅ ᑕᑯᔅᑲᒋᑲᓂᔭᓐ ᐊᓂᑭ ᑳ ᐸᒀᑎᔅᑭᒃ? 45ᑮᔥᐱᓐ ᒫᑲ ᑌᐱᑦ ᐅᑎᐯᓕᒋᑫᐤ ᐁᔑᓂᑳᑖᑴ, ᑖᓐᑌ ᐌᒋ ᐅᑯᓯᓯᑦ?
46ᓇᒪᐎᓚ ᐊᐌᓇ ᒫᑲ ᑮ ᑲᔥᑭᑕᐤ ᐙᔦᔥ ᑭᒋ ᓇᔥᑴᐗᔑᐊᑦ, ᓇᒪᐎᓚ ᓀᔥᑕ ᐊᐌᓇ ᐊᓂᒪ ᐁ ᑭᔑᑳᒃ ᐅᒋ ᑮ ᐃᔅᐱᒋ ᓱᑭᑌᐁᐤ ᑫᒀᓕᐤ ᑭᒋ ᑲᑴᒋᒫᑦ᙮
Pilihan Saat Ini:
ᐅᐸᓓᑭᔅ ᒫᑎᐤ 22: MCNT91
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The text of the Bible in Moose Cree is in the public domain.
Moose Cree New Testament © Canadian Bible Society, 1991.
