ROMANUN 1
1
1Paul, oobuhmeetahgunemun owh Jesus Christ kahnundoomind cheäpostleëwid, kahpukkakahbuhweïnd chepahbahdebahdoodung oominwahjemoowin owh Kesha‐Muhnedoo,
2(Me ewh kezhah kahwahweendahmahgad emuh oonje oodoonening oodaunwahchega‐wenenemun emuh kechetwah oozhebeëgawining,)
3Keënahjemaud enewh oogwissun Jesus Christun Tabanemenung, kahoondahdezid emuh oominekauning owh David emuh ooweyowing;
4Keënahjemind dush cheöogwissemegood enewh Kesha‐Muhnedoon emuh mushkahwezewining, kahezheähyahnid Kache‐peenezenejin oojechaugwun, uhpe kahahbejebaud oonje neboowining:
5Me suh owh kahoonjemeenegooyaung ewh shahwanjegawine‐weedookahgoowin kuhya apostle‐ahnookeewin, kuhkenuh ahnooj azheweenzoojig ahnishenahbag cheöonje‐pahbahmetuhmoowaud ewh dabwayanduhmoowin oodezhenekahzoowin oonje:
6Mahmahwe kuhya kenuhwah kahnundoomenag owh Jesus Christ:
7Oomahjebeähmahwaun kuhkenuh emuh Romeing ayahnejin, enewh suhyahgeähjin Kesha‐Muhnedoo, kahnundoomahjin chepeenezenid: Shahwandahgoozewin kuhya pezaunewawin kegahahyahnahwah oonje Kesha‐Muhnedoo Koosenaun, kuhya Tabanemenung Jesus Christ.
8Netum, Nemahmooyahwahmah owh Nekesha Muhnedoom oonje Jesus Christ ewh kenuhwah kuhkenuh, kedabwayanduhmoowinewah wahweenjegahdag mezewa uhkeeng.
9Nekekanemik muh Kesha‐Muhnedoo, owh bameetuhwug emuh ninjechaugoong meekinduhmaun ewh oominwahjemoowinene enewh oogwissun, wekah poonetoosewaun wahweenduhmaun kedoonoozoowinewah uhpe anuhmeähyaunin;
10Nundoodahmaun, kishpin menoo‐bahbahmahdezewaunan gaguhpe ananemegwan Kesha‐Muhnedoo cheoodissinuhgoog.
11Nekeche‐nunduhwandum gooshah chewahbuhmenuhgoog, cheoonje‐meenenuhgoog oojechaugoowine‐meegewawin, cheöonjesoongekahbahweëgooyag;
12Me ewh, cheöonjemenoodaäshkahgooyaun mahmahwe kedabwayanduhmoowinenaun kenuhwah kuhya neen.
13Kahween, nindenanduhse chekekanduhsewag, nejekewaëdoog, ewh nuhningim ahnoo keënanduhmaun chepenaunzekoonenuhgoog, (ningeöondummeëgoo nahnauzh noongoom) cheähyahmaun gagoo menewin kenuhwah anduhzhe‐ahyahyag, debishkoo anduhzheähyahwaud ahnind mayuggezejig.
14Nemuzzenuhahmoowaug muh egewh Greekug, kuhya egewh buhgwuj‐ahnishenahbag; egewh nabwahkahjig, kuhya egewh nabwahkahsigoog.
15Menik dush kushketooyaun, nekeezheetah chewahweenduhmoonenuhgoog kenuhwah kuhya emuh Romeïng ayahyag ewh minwahjemoowin.
16Kah muh nindahgujjetunseen ewh oominwahjemoowin owh Christ: me muh ewh ahyahwunenig oomushkahwezewin owh Kesha‐Muhnedoo cheöonjebemahjeïndwah kuhkenuh egewh duhyabwayandungig; netum owh Jew, menuhwah dush owh Greek.
17Me muh emuh wahweenjegahdag ooquuhyuk‐ezhewabezeëwawin owh Kesha‐Muhnedoo emuh dabwayanduhmoowining wanjeemahguk, dabwayanduhmoowining anuhkukkayah, debishkoo azhebeëgahdag, Owh quuhyuk‐wahdezid dabwayanduhmoowining tahoonjebemahdeze.
18Oonishkahdezewin muh owh Kesha‐Muhnedoo wahweenjegahda ewede keche‐kezhegoong oonje azhenishkandung kuhkenuh anegookwahnig oomujje‐ezhewabezewinewah egewh enenewug kabishkungig ewh dabwawin emuh mujjeëzhewabezewining;
19Ewh suh oodezhetwahwin owh Kesha‐Muhnedoo menik enandahgwuk chekekanduhming kemezheshuhwesin emuh ooweyowewaung; Kesha‐Muhnedoon muh oogewahbunduhegoowaun.
20Puggukkanjegahdanewun suh enewh wuhyahbuhmenahgwussenoonenigin ooduhyeemun akoo‐oozhechegahdag uhkee, enewh wazhechegahdagin wanjekekanjegahdanig ookahgega‐mushkahwezewin kuhya oo‐Kesha‐Muhnedoowandahgoozewin; kah dush gagoo oodahyaunsenahwah kaëkedoowaud:
21Ahnoo muh kekekanemahwaud enewh Kesha‐Muhnedoon, kahween Kesha Muhnedoong oogeëzhepeshegan-dahgooähsewahwaun, kah kuhya oogemegwachewanemahsewaun; kekuhkebahdezewug dush emuh oodenanduhmoowinewaung, kuhya ookukkebahje‐oodaëwaun kekushketebekuddenewun.
22Nebwahkahwaninedezoowaud, kekukkebahdezewug,
23Oogeäunjetoonahwah dush oopeshegandahgoozewin owh wekah kabahnahdezesig Kesha‐Muhnedoo emuh oodezhenahgoozewining owh natuh‐bahnahdezid enene, kuhya penasheyug, kuhya nahwoo‐kahdajig ahwaseyug, kuhya pamoodajig.
24Mesuh Kesha‐Muhnedoo kahoonjepuggedenuhmoowaud cheweenezenid azhemujje‐nunduhwandumoomahgudenig tebenuhwa oodaëwaun, muhyahnahduk chedooduhmoowaud tebenuhwa weyowewaun weejindewaud:
25Keëzheäunjetoowaud oodabwawin owh Kesha‐Muhnedoo emuh kuhkenuhwishkewining, ahwahshema keähnuhmeätuhwahwaud dush kuhya kebuhmeetahwahwaud enewh kahoozheëmindjin dush ween enewh kahoozheëwanejin, owh kahyahgega‐shahwandahgoozid. Amen.
26Mesuh Kesha‐Muhnedoo kahoonjepuggedenuhmoowaud chemujje‐nunduhwanduhmenid: Pooch kuhya oodequamewaun oogekunjetoonahwah oodenahbuttezewinewah, puhkaun cheähbujjeïndwah ewh anandahgwussenook:
27Kuhya dush egewh enenewug kepoonetoowaud oodenahbuttezewinewah egewh equawug, kemujje‐nundahwanindewug; enenewug kemujjeähnookeetahwahwaud enewh weeje‐enenemewaun, quuhyuk keöodahpenuhmoowaud tebahahmahgoowin, oopukkatahwinewah oonje.
28Kah dush keminwanduhsewug cheguhnuhwanemahwaud enewh Kesha‐Muhnedoon emuh ookekanjegawinewaung, Kesha‐Muhnedoo oogepuggedenahmoowaun chekuhkebahdanduhmenid, chedooduhmenid enewh uhyeëen wanesheshinsenoogin;
29Kemooshkenashkahgoowaud kuhkenuh mujje‐ezhewabezewin, pezhigwahdezewin, kuhkebahdezewin, shoobeegoowin, mujjedoodahdewin; kemooshkenashkahgoowaud keshahwanjegashkewin, nesedewin, kekaundewin, wuhyazhingawin, kuhya kuhkuhyanezewin; kuhyaushkunuzzoojig,
30Keemooj maje‐duhzhingashkejig, shaunganemahjig Kesha‐Muhnedoon, shaungandahgoozejig, kachetwahwanemoojig, kachetwahwe‐kezhwashkejig, egewh nandoonaüngig mujje‐uhyeeweesh, bazindahwahsigoog ooneegeëgoowaun,
31Nasettootunsigoog gagoo, pahgoobetoojig oowahweendahmahgawinewah, sahyahgeëdesigoog, natuhpoonanindesigoog, natuh‐shahwanjegasigoog:
32Oogoo kakandungig ootebahkoonegawin owh Kesha‐Muhnedoo, egewh mahkindungig oonoo uhyeëen enandahgoozewug cheneboowaud, kahween atuh ezhechegasewug oonoo, oominwanemahwaun suh kuhya enewh andoodum-menejin oonoo.
Pilihan Saat Ini:
ROMANUN 1: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.