OODEZHECHEGAWINEWAH 2
2
1Uhpe dush kahtapuhgummeähyahmahguk Pentecost kezhik, pazhikwunoong keduhzhemahwunjeëdewug kuhkenuh.
2Chasekah dush keöondwawamahgud ewede Kezhegoong debishkoo kache‐muhtwayahnemukin, kuhkenuh dush kemooshkenamahgud ewh wegewaum emuh kenuhmuhduhbewaud.
3Oogewahbundahnahwah dush nesuhwahkoodanuhnewemaun ishkootang enahbuhmenahgwukkin, keähbahpish-kahgoowaud kuhkenuh anduhchewaud.
4Kuhkenuh dush oogemooshkenashkahgoowaun enewh Keche‐Oojechaugwun, kemahje‐kekedoowaud pakaunnukkin inwawinun, ewh egoo kahezhepuhgedenahmahgoowaud enewh Oojechaugwun chekekedoowaud.
5Keähyahwug suh andahjig emuh Jerusaleming, Jewyug manoo‐ahnuhmeähjig enenewug, kahoonjebahjig menik ahnahmekezhik papukkaun azheweenzoojig ahnishenahbag.
6Uhpe dush kahsuhswayahjemootahming, kepemahwunjeëdewug egewh bamahdezejig kekeche‐mahmahkahdanduhmoog dush, anduhchewaud muh enenewug oogeënetahwahwaun inwanid ewh anwawaud.
7Kemahmahkahdanduhmoog kuhya kewahwuhnan-duhmoog kuhkenuh, oo‐oo dush keëdewaud, Benuh, kah nuh ween Galileeng duhzhe wenenewesewug kuhkenuh oogoo kakedoojig?
8Ahneen dush wanjeënetuhwungwah kuhkenuh anduhcheyung inwawaud, ewh anwayung kahoonjenegeyung?
9Parthia‐wenenewug, kuhya Medug, kuhya Elamitug, kuhya egewh anduhnuhkeejig emuh Mesopotamiaïng, kuhya emuh Judæaïng, kuhya Capadociaïng, kuhya Pontusing, kuhya Asiaïng.
10Phrygiaïng, kuhya Pamphyliaïng, Egypting, kuhya Lybiaïng anuhkakummig Cyrene, Roming wanjejig mayugezejig, Jewyug kuhya kahquakeejig.
11Cretug kuhya Arabianug, kenoondahwahnahnig ewh anwayung inwawaud, debahduhduhmoowaud oomahmaundah‐ahnookewinun owh Kesha‐Muhnedoo.
12Kuhkenuh dush kemahmahkahdanduhmoog, kuhya kequenuhweenanduhmoog, oo‐oo dush keëdewaud, Wagoodoogwanedoog maunduh?
13Ahnind dush oogebahpenoodahwahwaun, oo‐oo keëkedoowaud, Oogoo enenewug oomooshkenashkahgoonahwah ewh washke‐oozhechegahdag shooweminahboo.
14Peter dush keweejekahbahwetahwaud enewh metauswe‐ahshe‐pazhik, kekechekezhewa, oo‐oo dush keënaud, Judæaing duhzhe‐enenewedoog, kuhya kuhkenuh kenuhwah wahdatooyag emuh Jerusaleming, oo‐oo kekanduhmoog, kuhya bezindahweshig akedooyaun:
15Kah gooshah oogoo kewushquabesewug, ewh ween uhyenanemagwah, pejenug muh ween nesoo‐tebahegunag noongoom kezheguk.
16Mesuh maunduh kahekedoogoobunan owh aunwahjega‐wenene Joel:
17Tahpuhgumme‐ahyahmahgud suh uhpe ishquah‐kezheguk, ekedoo owh Kesha‐Muhnedoo, ningahsegenuhmahwaug owh Ninjechaug kuhkenuh wahyahsewejig; tahaunwahjegawug dush egewh kegwissewaug kuhya kedahnisewaug, kedooshkenegemewaug oogahwahbundahnahwah enewh wazhebahbundahmoowinun, kuhya keduhkewanzeëmewaug tahenahbunduhmoog enewh enahbunduhmoowinun:
18Uhpe dush oonoo kezhegudoon ningahsegenuhmahwaug ninjechaug egewh nebuhmeetahgunemug kuhya egewh nebuhmeetahgun‐equamug, tahaunwahjegawug dush:
19Ningahwahbunduhewanun enewh mahmaundahwejegawinun ewede kezhegoong ishpeming, kuhya kekenoowahjechegunun oomah uhkeeng duhbusheesh, misqueem, kuhya ishkoota, kuhya paquanag butta:
20Tahtebikkahbuhmenahgoozeäh owh kezhike‐keezis, kuhya owh tebike‐keezis misqueeng tahezhenahgoozeäh, chepwah oojechesag ewh kache‐ahpeetandahgwuk kuhya quatahmegwuk ookezhegudoom owh Jehovah:
21Tahezhewabud dush, ahwagwan kawahweenduhmoogwan oodezhenekahzoowin owh Tabaningad me owh kabemahjeïnd.
22Israel duhzhe‐enenewedoog bezinduhmook oonoo ekedoowinun; Jesus owh Nazarething duhzhe enene, owh kahwahbundahëgooyag Kesha‐Muhnedoong cheöonjebaud, oonje mahmaundahwejegunun kuhya kekenoowahjechegunun, enewh kahezhechegad keweedookahgood enewh Kesha‐Muhnedoon emuh anduhzhe‐ahyahyag, ewh egoo azhekekanduhmag:
23Wah‐owh, pagedenegahzood oonje oodenanduhmoowin kuhya kezhah kahenahkoonegagoobunan owh Kesha‐Muhnedoo, kegetuhkoonahwah, kuhya anuhmeähsigoog ooneenjewaun ahyooyag kegeähgwahquahwahwah kuhya kegenesahwah:
24Enewh Kesha‐Muhnedoo kahahbejebahahjin, kahahbahung kahezhetuhkoobenegood ewh wahsuhgandahgwuk neboowin, kah muh ween keënandahgoozese cheminjemenegoopun.
25Owh muh David oo‐oo ekedoo duhzhemaud enewh, Negewahbuhmah owh Tabaningad kahgenig anahsuhme-kahbahweyaun, nekechenikaung muh ahyah, chemahmauzheëgoosewaun:
26Mesuh kahoonjemoojegedaäyaun, kuhya nindanuhnewh keöonjeöonahnegoozemahguk; emuh dush ahpanemoowining tahezheäunwabemahgud neweyaus:
27Kah muh kegahnuhguhnahse owh ninjechaug ewede ahnahmuhkummig, kah dush kegahpuhgedenuhmahwahse owh Pahnezid Kegwis chewahbundung ewh bahnahdezewin.
28Kegekekanduhmooh enewh bemahdezewine‐meekunun; wahbuhmenaun kaöonjemooshkenashkahgooyaun ewh moojegezewin.
29Enenewedoog nejekewaëdoog puggedenahmahweshig wawane cheguhnoonenuhgoog duhzhemug owh koosenaun David, ahzhuh suh keneboo kuhya kepuggedanemah, ahtamahgud dush oochebaguhmig oomah anduhnuhkeeyung nahnauzh egoo noongoom kezheguk.
30Keäunwahjega‐wenenewe suh, kekekandung dush kewahweendahmahgood enewh Kesha‐Muhnedoon kemushkuhwah‐kezhewanid, emuh suh kaëzheöonejahnesid kaöondenaud azheähyahmahguk weyahsemah, enewh Christun chenuhmuhduhbenid emuh oodoogemah‐wuhbewining;
31Kezhah dush kewahbundung oo‐oo oogeöonjeduhzhindaun oodahbejebahwin owh Christ, ween oojechaugwun kahween kenuhguhduhmuhwahse ewede ahnahmuhkummig, kah kuhya ooweyow kebahnahdezemahgussene.
32Me suh enewh Jesusun kahahbejebahahjin owh Kesha‐Muhnedoo, kahezhewahbunjegayaung nenuhwind kuhkenuh.
33Ookechenekahning dush enewh Kesha‐Muhnedoon keëzheoombenegahzood, kemeenegood dush enewh Wayoosemindjin enewh Keche‐Oojechaugwun, kahezhewahweenduhmahwindebun, mesuh wanje‐segenuhmahweyummingid oo‐oo noongoom wuhyahbunduhmag kuhya nwaunduhmag.
34Kah muh keche‐kezhegoong keëzheoombishkahse owh David: ween dush ween goo oo‐oo ekedoo, Owh Tabaningad oogeënaun enewh Tabanemejin, Nuhmuhduhbin keen emuh nekechenikaung,
35Peenish chepuggedenuhmoonaun, chetuhtuhkookahnudwah egewh shaunganemikig.
36Me suh kaöonjequuhyukwanduhnemid kuhkenuh enewh oonejahnesun owh Israel, owh Kesha‐Muhnedoo kepuggedenuhmahwaud enewh Jesusun kahahgwahkwahag kenuhwah, chetebaninganid kuhya Christ cheähwenid.
37Uhpe dush kahnoonduhmoowaud oonoo, kekeche‐megooshkahjedaäwug, oo‐oo dush keënahwaud enewh Peterun kuhya ahnind enewh apostleün, Enenewedoog kuhya wejekewaëmahdoog, Ahneen kaëzhechegayaung?
38Peter dush oo‐oo oogeënaun, Aunwanindezooyook, kuhya baptizooëgoozeyook kuhkenuh anduhcheyag emuh oodezhenekahzoowining owh Jesus Christ chewabenemahgooyag kemujje‐ezhewabezewinewah, kegahmeenegoom dush owh Kache peenezid‐Oojechaug.
39Kenuhwah muh kemeenegoom ewh wahweendahmahgawin, kuhya kenejahnesewaug, kuhkenuh dush egewh wahsuh ayahjig, menik kanundoomahjin owh Jehovah Kekesha‐Muhnedoomenaun.
40Keche‐nebewah dush pakaunukkin ekedoowinun oogedebahjemootahwaun kuhya keëzheguhgaunzoomaud, oo‐oo keënaud, Oonjebemahjeëgoozeyook oogoo noongoom bamahdezejig kakebahdezejig.
41Me dush egewh wawane kahoodahpenungig ewh oodekedoowin kebaptizooähwug: ewh edush goo kezheguk, kenesoo‐metauswaukoosewug egewh kahtahquahnooninjig emuh ahnuhmeähwining.
42Keäunwahjewug dush cheguhnuhwanduhmoowaud ookuhgequawinewah egewh apostleüg kuhya emuh weejekewaïndewining, kebuhquabenahwaud dush buhquazhegunun, kuhya keähnuhmeähwaud.
43Oogepuhgummishkahgoonahwah dush ewh sagezewin kuhkenuh bamahdezejig: nebewah dush mahmaundahwejegunun kuhya kekenoowahjechegunun oogeöozhetoonahwah egewh kekenooähmahgunug.
44Kuhkenuh dush egewh duhyabwayandungig keweejeendewug, mahmahwe dush oogeähyahnahwah ooduhyeemewaun;
45Oogeähtahwahganahwah dush ootebenuhwawezewinewah kuhya ooduhnookahjegunewah, kemuhmeenahwaud dush kuhkenuh enenewun, ewh azhemuhnazenid.
46Anduhsoo‐kezheguk dush kepeëzhemahwunjeëdewug emuh keche‐ahnuhmeä‐weguhmigoong, kebuhquabenahwaud dush enewh buhquazhegunun emuh oowegewaumewaung, kemeejewaud dush oomeejimemewah emuh minwanduhmoowining kuhya emuh moojegedaäwining.
47Wahwezhanemahwaud dush enewh Kesha‐Muhnedoon, keminwanemegoowaud dush kuhkenuh enewh bamahdezenejin. Owh dush Tabaningad anduhsoo‐kezheguk oogeduhgoo‐ahsaun emuh ahnuhmeähwining egewh bamahjeïndjig.
Pilihan Saat Ini:
OODEZHECHEGAWINEWAH 2: OTW
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
