मर्कूस 14

येशूके मारनको षड़यन्त्र

(मत्ती. 26:1-16; लूक. 22:1-6)

1अब यहूदीनको निस्तार तेवहार और अखमिरी रोटीको तेवहार दुई दिन पिच्छु सुरु होन बारो रहए। मुखिया यहूदी पुजारी और मोशाको नियम कानुन सिखान बारे येशूके कैसे छलएं और कैसे पकणके मारएं करके दाउमे रहएं। 2पर बे कही रहएं, “हमके यहूदीनको निस्तार तेवहारको समयमे बाके नाए पकणन पणो और बाके नाए मारनपणो। काहेकी अगर हम पकणके मारङगे तओ आदमी गुस्सा हुइके हुलदङगा मचाएदेमंगे।”

बेथानियामे येशूको अभिषेक

3बो बेरा येशू बेथानिया गाउँमे सिमोन, जौनक येशू कोढ रोगसे अच्छो करि रहए, बहेक घरमे गओ। जब येशू खानु खात रहए, तओ एक बैयर शुद्ध जटामसीको तेल पत्थरको बोतलमे लैके आइ, जो सिङगमरमरसे बनो रहए। जटामसीको तेल बहुत महिंगो रहए। बो बोतलकी कुप्पी खोली, ताकी बो तेल येशूके आदर देनके ताहीं बाके मुणमे सब जटामसीको तेल डार पाबए। 4तओ कोइ-कोइ आदमी गुस्साएके आपसमे कहान लागे, “बोके कभी फिर जा महिंगो जटामसीको तेलके बर्बाद नाए करन रहए!” 5काहेकी जा जटामसीको तेल सओ सिक्कामे बेँचो जाए सकत रहए और गरीबनके बाँटो जाए सकत रहए। और अइसीयए, बे बोके बहुत डाटीं।

6तओ येशू उनसे कही, “बोके परेसान मत् करओ, बो मिर ताहीं जो काम करीहए बहुत अच्छो हए। 7काहेकी गरीब तुमर सँग सब दिन रहात हएं, और तुम जब चाहैगे तओ बोको भलाइ कर सकत हओ, पर मए तुमर सँग सब दिन नाए हुइहओं। 8जा बैयर, जो बो करसकत रहए बो मैसे सबसे अच्छो काम करी। बो मिर शरीरमे जटामसीको तेल डारी और मेरे मरनसे पहिले मोके दफ्नानके ताहीं तयार करी। 9नेहात्तओ मए तुमसे कहात हओं, सारा संसारमे जहाँ-जहाँ फिर अच्छो समाचार परचार हुइहए, बिनके जा फिर बताओ जाबैगो, कि बैयर का करीहए, और आदमी बोके याद करंगे।”

यहूदा येशूके पकणबानकी तयारी

10तओ यहूदा इस्करियोत जो बाह्र चेलन मैसे एक रहए, बो मुखिया यहूदी पुजारी ठिन गओ और बताइ, कि बो बिनके येशूके पकणबानमे मदत करैगो। 11यहूदा इस्करियोत जा सुनके खुसी भओ, और बोके रुपैया देनके कबुल करीं। और येशूके कैसे पकणाओ करके बो अच्छो मौका ढुँणन लागो।

येशू चेलनकेसँग अन्तिम भोज खाइ

(मत्ती. 26:17-35; लूक. 22:7-23)

12अखमिरी रोटीको तेवहारको पहिलो दिन, जौनमे बे यहूदीनको निस्तार तेवहारको भोजमे जानबरको बलिदान मारत रहएं, येशूके चेला बासे पुछीं, “तए हमए कहाँ पठान चाँहत हए, कि हम यहूदीनको निस्तार तेवहारके ताहीं भोज तयार करएं, ताकी हम जाके खाएपामएं?”

13और बा अपन चेला मैसे दुई जनैके अइसे कहिके पठाइ, “यरूशलेम सहरमे जाओ, और घल्लामे पानी लैजात एक आदमी तुमके मिलैगो, बोके पिच्छु जैयओ। 14बो आदमी जहाँ घुसैगो बो घरको मालिकसे कहिओ, ‘महान गुरु पुँछत हए, मिर ताहीं तयार करो कोठा कहाँ हए जौनमे मए अपन चेलनके सँग यहूदीनको निस्तार तेवहारको भोज खाएपामओं?’ 15फिर बो तुमके उपरको एक बडो सजो सजाओ इनतजाम भओ कोठा दिखाबैगो, हुवएं तुम हमर ताहीं निस्तार-तेवहारको भोजको इनतजाम करीयओ।”

16तओ दुई चेला निकरके सहरमे घुसे, और जैसियए येशू उनसे कही रहए बहे अनुसार पाइं, और बे हुना यहूदीनको निस्तार तेवहारको भोज इनतजाम करीं। 17जब संझा भओ, तओ येशू अपन बाह्रऔ चेलनके सँग घरमे आओ। 18बे आडास लैके खात पेती येशू कही, “नेहात्तओ मए तुमसे कहात हओं, तुम मैसे मिर सँग भोजन खान बारो एकजनै मोके पकणबानके ताहीं मिर दुस्मनके मदत करैगो।” 19जब चेला जा बात सुनीं, तओ बे दुखी हुइगए, और चेला येशूसे एक-एक करके पुछन लागे, “का बो मए हओं?” 20येशू उनसे कही, “बाह्रऔ चेला मैसे एकजनै हए, जौन मिर सँग कटोरामे भओ काँजीमे रोटी डुबाएके खाए रहोहए। 21मए, आदमीको लौंणा मारोजएहओं, जैसेकी पबित्र-शास्त्रमे लिखो हए: ‘पर बो आदमीके डारौनो सजाय होबैगो, जौन मोके पकणबानमे मदत करत हए। अगर बो आदमी जनम नाए लित्तो तओ बोके ताहीं अच्छो हुइतो!’”

येशू चेलनके सँग प्रभुभोज

22और जब बे खात रहएं तओ येशू रोटीको खुद्रा लइ, और जाके ताहीं परमेश्वरके धन्यबाद दइके रोटी तोडी, अपने चेलनके दइ तओ बिनसे कही, “लेओ और खाओ, जा मिर शरीर हए।” 23तओ फिर बा अंगुरको रसको कटोरा उठाइ, और लैके परमेश्वरके धन्यबाद दइ और अपन चेलनके दइ, और बे सबए बहे मैसे पिइं। 24और बा बिनसे कही, “जा दाखको रसा मिर बलिदानको खुन हए। मिर खुन बहुत आदमीनके घेनसे बलिदानके रुपमे अख्नाओ जाबैगो। जा, बो नयाँ करारके साबित करैगो, जो परमेश्वर अपन आदमीनके ताहीं बहान डटो हए। 25नेहात्तओ, मए तुमसे कहात हओं, जाके पिच्छु, मए बो दिनतक कभी फिर दाखको रसा नाए पिहओं, जबतककी मए परमेश्वरको राज्यमे नयाँ अंगुरको रसके नाए पिइलेओं”

26तओ येशू और बाके चेला यहूदीनको निस्तार तेवहारमे परमेश्वरकी स्तुति करीं और यरूशलेम सहरसे बाहेर जैतूनको पहाड घेन चलेगए, जोकी ढिँगैए रहए।

येशू पत्रुसके सम्झाइ

27जब बे पहाड घेन जात रहएं, येशू उनसे कही, “तुम सब मोके छोडके भाग जाबैगे। जैसेकी मिर बारेमे पबित्र-शास्त्रमे लिखो हए, ‘जो बकरेहेरा कता मिर आदमीके रेखदेख करत हए, मए बोके मारदेहओं, और भेंणन कता छिदरबिदार हुइजए हएं।’ 28मरके जिन्दा हुइके मए तुमसे पहिले गालील परदेशमे जामंगो और हुनए मिलंगो।” 29पत्रुस बासे कही, “सब जनै धोखा देहएं, पर मए तुमके धोखा नाए देहओं।” 30तओ येशू बोसे कही, “नेहात्तओ मए तोसे कहात हओं, आजए रातके मुर्गा दुई चोटी बासनेसे अग्गु तए तीन चोटी कहाबैगो, कि मए तोके नाए जानतहओं।”

31तओ बो और जोडसे कही, “तुमर सँग मोके चहुँ मरन पणए, तहुँफिर मए कभीनाए कहाँगो कि ‘मए तोके नाए जानतहओं।’” और बे सब अइसियए कहीं।

गेतसमनीके बगियामे येशूको प्राथना

(मत्ती. 26:36-46; लूक. 22:39-46)

32जब येशू और बाके चेला गेतसमनी नाउँको ठाउँमे पुगे, तओ बा अपन चेलनसे कही, “मए परमेश्वरसे प्राथना करन तक तुम हियँइ बैठियओ।” 33और येशू पत्रुस, याकूब और यूहन्नाके थोरी अग्गु लैगओ, और बा बहुत दुखी और व्याकुल होन लागो। 34बा उनसे कही, “मए इतनो दुखी हुइगओ हओं, कि मोए लागत हए जैसे मए मररहो हओं। तुम हियाँ बैठओ, और जगे रहियओ।”

35फिर येशू थोरी अग्गु बढो। बा घुँटो टेकके और अपन चहेरा भिमे धरके परमेश्वरसे प्राथना करी। 36और बा कही, “हे अब्बा, हे दौवा, तुमर ताहीं सब बात सम्भब हए। अगर तुमर इच्छा हए, तओ जा दुखसे मोए बचाएलेओ। तहुँफिर, जैसे मए चाँहत हओं उइसो नाए, पर जो तुम चाँहत हओ बहे होबए।”

37जब येशू लौटके आओ और तीन चेलनके सोत पाइ, बा पत्रुससे कही, “सिमोन, का तए सोए रहो हए? का एक घण्टा फिर जगके बैठ नाए पातहए? 38जगे रहाओ और परमेश्वरसे प्राथना करतए रहओ, तुम सतावटमे नाए पणनके ताहीं जगे रहाओ और प्राथना करत रहाओ। तुमर ह्रदय सही हए, पर तुमर शरीरमे तागतकी कमी हए।”

39येशू फिर दोहोराएके हुवएं चलोगओ और बहे बात कहिके परमेश्वरसे प्राथना करी।

40फिर आएके बा बिनके सोत पाइ, काहेकी बे बहुत थकिगए रहएं, और बिनके पता नाए रहए, कि जब बा बिनके जगाइ तओ बाके का जबाफ देनके हए। 41फिर तिसरो चोटी आएके उनसे कही, “का तुम अभौफिर उँघाए रहेहओ और अराम कररहेहओ? तुम बहुत सोएडारे हओ, बेरा आइगओ हए। देखओ मए, आदमीको लौंणा पापीनके हातमे पणनलागो हओं। 42उठओ, चलएं! देखओ, बो एक मोके पकणबानमे मदत कररहो हए, बो हियाँ आएरहो हए।”

येशूको गिरफ्तारी

(मत्ती. 26:47-56; लूक. 22:47-53; यूह. 18:3-11)

43जब येशू हबए फिर मसकतए रहए, तओ यहूदा इस्करियोत जो बाह्र चेला मैसे एक रहए, हुवाँ आओ। बो एक बणी भिडके सँगमे आओ रहए जो तरबार और हथियार अपने सँग लए रहएं। जे आदमीनके, मुखिया यहूदी पुजारी, मोशाको नियम कानुन सिखान बारे और यहूदी अगुवनको समुहसे पठाओ गओ रहए।

44बिनके येशूके गिरफ्तार करनमे मदत करबान बारो यहूदा जा भिडके पहिलीयए बताइ रहए कि, “जौन आदमीके मए प्यारसे नमस्कार करंगो बहे आदमी हए, बाके पकणलियओ और घेरा लागएके लैचलेजैयओ।” 45और सिधे येशू ठिन जाएके यहूदा कही, “हे महान गुरु, नमस्कार” और बो बाके चुमी। 46तओ बे येशूके जोडसे पकणीं और बाके गिरफ्तार करीं। 47बे मैसे जो ढिँगै ठाणे रहएं, कोइ एक तरबार निकरके प्रधान यहूदी पुजारीको कमैयाके उपर तरबार चलाइ, जौनसे बोको कान कटिगओ। 48येशू उनसे कही, “का तुम एक डाँकु कता तरबार और लठ्ठी लैके मोके गिरफ्तार करनके ताहीं आए हओ? 49मए त रोजदिन यरूशलेमको मन्दिरमे तुमर सँग रहिके सिखात रहओं, और बो बेरा तुम मोके गिरफ्तार नाएकरे, पर जा जहेमारे भओ हए, कि पबित्र-शास्त्रमे लिखो भओ बचन पुरा होबए।” 50और सब चेला बाके छोडके भाजे।

51अपन शरीरके सुती कुर्तासे इकल्लो लपेटे एक जनै जवान बाके पिच्छु गओ। बे बो जवानके पकणीं। 52पर बो बाहिरी कुर्ता छोडके, बिनए कुर्ताको भाजिगओ।

माहासभाके ठिन येशू

(मत्ती. 26:57-68; लूक. 22:66-71; यूह. 18:12-13,19-24)

53फिर बे येशूके प्रधान यहूदी पुजारी ठिन लैगए, और हुवाँ सब मुखिया यहूदी पुजारी, यहूदी अगुवनको समुह और मोशाको नियम कानुन सिखान बारे इकट्ठा भए। 54पत्रुस येशूके दुरए-दुरसे बाके पिच्छु-पिच्छु प्रधान यहूदी पुजारीके आँगन भितर घुसो और मन्दिरके लखबारियाके सँग हुवएं बैठके आगी तापन लागो।

55अब मुखिया यहूदी पुजारी और जम्मए यहूदी सभाघरके सदस्य येशूके मारनके ताहीं बाके बिरुद्धमे गवाही ढुँणीं, पर कुछु नाएपाइं। 56बहुत बाके बिरुद्धमे झुठी गवाही दइं। पर बिनको गवाही औरेनकी गवाहीसे मेल नाए खाइ।

57तओ पिच्छु कित्ने जनै उठके, बाके बिरुद्धमे अइसे कहात झुठो दोष लगान लागे, 58“जाके अइसे कहात हम सुनेहएं, ‘आदमीको बनाओ भओ जा मन्दिर मए उजाड देमंगो, और तीन दिनमे मए दुस्रो मन्दिर बनाए देमंगो।’” 59पर जामे फिर उनको गवाही एकए हानी नाए रहए।

60तओ प्रधान यहूदी पुजारी, यहूदी सभाके अग्गु येशूसे पुछीं, “का तिर ठिन कुइ जबाफ नाए हए? जे आदमी तिर बिरुद्धमे का गवाही देत हएं?” 61पर येशू चुप रहो, और कुछु फिर जबाफ नाए दइ। प्रधान यहूदी पुजारी फिरसे बासे पुछीं, “का तए परमेश्वरको लौंणा ख्रीष्ट हए, जौनके हम आराधना करत हएं?”

62येशू कही, “हाँ मए हओं, और तुम मए, आदमीको लौंणाके परमेश्वरको महान शक्तिको दहिने बाहुलीमे बैठो और तुम मोके फिरसे स्वर्गसे बादरके बद्रिके सँग आत देखैगे जहाँ परमेश्वर बैठतहए।” 63जब प्रधान यहूदी पुजारी जा सुनी, कि येशू का कही हए, तओ बो अपन कुर्ताके फारके कही, “अब हमके औ गवाहीको जरुरत नाए हए। 64तुम सुने, कि जा परमेश्वरको बदनाम करत हए। जामे तुमर का बिचार हए?” यहूदी सभाके सब सदस्य सहमत भए, कि येशू अपराधी हए और बाके मरन पणैगो। 65और कोइ-कोइ बाके थुकनलागे, और बाको मुँहुँ तोपके थप्पड मारन लागे और ठट्ठा करके कहान लागे, “अगर तए अगमबक्ता हए कहेसे, हमके बता, कि तोए कौन मारी।” तओ पिच्छु लखबारिया बाके अपन जिम्मामे लइं, और बाके मुक्का मारीं।

पत्रुसको इन्कार

(मत्ती. 26:69-75; लूक. 22:56-62; यूह. 18:15-18,25-27)

66जब पत्रुस आगीके ढिँगै आँगनमे रहए, तओ प्रधान यहूदी पुजारीकी नोकरनी मैसे एक जनै हुवाँ आइ, 67और पत्रुसके आगी तापत देखके बोके निहारके देखके कही, “तए फिर नासरत गाउँको येशू सँग रहए।”

68तओ बो अइसे कहात इन्कार करी, “तए का कहात हए बो मए नाए जानतहओं और नाए बुझतहओं।” तओ बो हुनासे अँगनको फाटक घेन गओ और तुरन्त मुर्गा बासदइ। 69नोकरनी फिरसे पत्रुसके देखके ठाणेभए मनैनसे कहान लागी कि, “जहुँ आदमी चेला मैसे एक हए।” 70पर बो फिर इन्कार करी। और कुछ देरमे, आसपिस ठाणेभए मैसे फिरसे पत्रुससे कहीं, “नेहात्तओ तहुँफिर चेला मैसे एक हए काहेकी तिर बोलनको तरिका जा जनात हए, कि तए फिर गालील परदेशसे हए#14:70 तए फिर गालील परदेशसे हए जे आदमीनके पता रहए, कि येशू और पत्रुस गालील परदेशके रहएं काहेकी गालीलके आदमी यरूशलेमके आदमीनसे फरक बोलत रहएं (मत्ती 26:73)। यहूदा इस्करियोत बाहेक, येशू और बाके सब चेला गालीलके।।” 71तओ बो अपनएके सरापत और कसम खात कहान लागो, “जौनके बारेमे तुम कहात हओ, बा आदमीके मए नाए जानतहओं।”

72और तुरन्त दुस्रो चोटी मुर्गा बासदइ, और पत्रुससे जो बात येशू कही रहए तुरन्त सम्झलै कि “मुर्गा दुई चोटी बासनेसे अग्गु तए मोके तीन चोटी इन्कार करैगो।” और जा बात सम्झके बो धरधरहुँस रोइ।

Pilihan Saat Ini:

मर्कूस 14: THRNT

Sorotan

Berbagi

Salin