मत्ती 27

पिलातसके अग्गु येशू

(मर्क. 15:1; लूक. 23:1-2; यूह. 18:28-32)

1जब भुकभुको सुबेरे भओ रहए, तओ सब मुखिया यहूदी पुजारी और जनताके यहूदी अगुवनको समुह येशूके मृत्युदण्ड देन करके येशूके बिरुद्धमे सरसल्लाह करीं 2और बे येशूके बाँधके लैगए, और हाकिम पिलातस ठिन सौँपदइं।

यहूदा इस्करियोतको आत्महत्या

(प्रे. 1:18-19)

3तओ बाके पकणान बारो यहूदा इस्करियोतके पता चलो, कि बाके मरबान बारो दोषी ठहिरैगो। तओ बो पछतानो और बे तीस चाँदीको सिक्का मुखिया यहूदी पुजारी और यहूदी अगुवनको समुहके ठिन फिरके घुमानके आओ। 4और कही, “मए निर्दोष आदमीके पकणाएके पाप करो हओं।” पर बे कहीं, “जासे हमए का मतलब? तए अपनए जान।” 5तओ बो बे चाँदीके सिक्काके यरूशलेमको मन्दिरके आँगनमे फेकके गइभओ, और बाहिर जाएके अपनए फासी लैके आत्माहत्या करलै।

6पर मुखिया यहूदी पुजारी चाँदीके सिक्का लैके कही, “इनके मन्दिरको तिजोरीमे धरनके ठिक नाए हए, काहेकी जा कोइ आदमीको खुनको मोल हए।” 7जहेमारे बे आपसमे सल्लाह करके, बो पैसासे परदेशीनके मट्टी देनके ताहीं कुम्णक जमिन किनीं। 8जहेमारे बो जमिनके आजतक फिर खुनको जमिन कहात हएं। 9हियाँ यर्मिया अगमबक्ताको कहो भओ बचन पुरो भओ, “बे बो चाँदीके तीस सिक्का अथवा बो किमत, जौन इस्राएल देशके आदमी बोके देनके ताहीं सहमत भए रहएं।

10और परमप्रभु मोके अढाइ अनुसार, कुम्णाके खेत खरीदनके ताहीं बे बो सिक्काको प्रयोग करीं।”

पिलातसको येशूसे प्रश्न

(मर्क. 15:2-15; लूक. 23:3-5,13-25; यूह. 18:29-19:16)

11येशू हाकिमके अग्गु ठाणो रहए, और बे येशूसे पुछीं, “का तए यहूदीको राजा हए?” येशू बिनसे कही, “तुमहीं अइसो कहात हओ।” 12तओ मुखिया यहूदी पुजारी और यहूदी अगुवनको समुह येशूके उपर दोष लगाइं, तओ येशू कोइ जबाफ नाए दइ। 13तओ पिलातस येशूसे कही, “तुमर बिरुद्धमे बहुत बातको गवाही देत हएं, का तुम नाए सुन्त हओ?” 14पर येशू बिनके एकु बातक फिर जबाफ नाए दइ। हाकिम फिर जा बातमे गजब अचम्मो मानी।

येशूके छोडनके पिलातसको असफलता

15निस्तार तेवहारको बेरा बडो हाकिम आदमीनको रोजो भओ एक जनै कैदीके छोडेकर्त रहए। 16बो समय बारब्बा नाउँको एक नामी कैदी रहए। 17जब आदमी इकट्ठा भए, पिलातस बिनसे पुछीं, “तुम कौनके चाँहत हओ? मए तुमर ताहीं कौनके छोडदेओं? ‘बारब्बाके’ कि ‘ख्रीष्ट कहान बारो येशूके?’” 18काहेकी बो जानत रहए कि बे बाके दिक्कसे सौंपी रहएं। 19तओ जब बो न्याय-आसनमे बैठो रहए, तओ बहे समयमे बोकी बैयर अइसे कहिके खबर पठाइ, “येशू निर्दोष आदमी हए बाके कुछु मत् करीयओ, काहेकी आज सपनामे येशूके मारे मए बहुत दु:ख भोगो हओं।”

20तओ मुखिया यहूदी पुजारी और यहूदी अगुवनको समुह बारब्बाके छोडदेन और येशूके मृत्युदण्ड देनके माग करन आदमीके उकसाइं। 21हाकिम फिरसे बिनसे पुछी, “दुई मैसे कौनके मए तुमर ताहीं छोडदेओं करके तुम चाँहत हओ?” बे कहीं, “बारब्बाके।”

22पिलातस बिनसे कही, “तओ ख्रीष्ट कहान बारो येशूके मए का करओं?” बे पिलातसके जबाफ दइके कहीं, “येशूके क्रूसमे टाँगओ।”

23बो कही, “काहे? येशू का अपराध करीहए?” तओ बे और जोडसे चिल्लाइं, “येशूके क्रूसमे टाँगओ।”

24पर कोइ सीप नाए लगो देखके, झन् हलचल मचिजएहए करके डराएके पिलातस पानी लैके भिडके अग्गु अपन हात धोएके कही, “तुम अपनए जानओ, मए जा आदमीको खुनसे निर्दोष हओं।” 25सब आदमी जबाफ दइं, “येशूको खुन हमके और हमर सन्तानके उपर पणए।”

येशूके क्रूसमे चढानके सौपी

26तओ पिलातस बिनके ताहीं बारब्बाके छोड दइ, और येशूके कोर्रा लागएके क्रूसमे टाँगनके सौँपदइ।

येशूको अपमान

(मर्क. 15:16-20; यूह. 19:2-3)

27तओ हाकिमके सिपाही येशूके महलमे लैगए, और जम्मए पल्टन बाके चारौ तरफ इकट्ठा हुइगए। 28बे येशूको कुर्ता खोलके येशूके लाल कुर्ता लगाए दइं। 29बे काँटोको मुकुट बनाएके येशूके मुणमे लगाए दइं, और येशूके दहिना हातमे लकणी दइं, और येशूके अग्गु घुँटो टेकके येशूसे अइसे कहिके गिल्ला करीं, “हे यहूदीनको राजा, प्रणाम।” 30तओ बे येशूके उपर थुकीं, और बो लकणी लैके येशूके मुणमे मारीं। 31जब बे येशूके गिल्ला करडारीं तओ बे बाको कुर्ता खोलदइं और येशूके अपनो कुर्ता पैँधाएके येशूके क्रूसमे टाँगन लैगए।

येशूके क्रूसमे टाँगीं

(मर्क. 15:21-32; लूक. 23:26-43; यूह. 19:17-27)

32जातएजात बे सिमोन नाउँ भओ कुरेनी सहरको एक आदमीके पाइं, और बे बोके येशूको क्रूस बोकनके कर लगाइं। 33जब बे गलगथा कहान बारो ठिहामे आएपुगे, जौनके खोपडीको ठिहा कहात हएं, 34तओ बे येशूके पित मिलो भओ अंगुरको रसा पिनके दइं, पर येशू चाखके बो पिन नाए चाही। 35तओ बे येशूके क्रूसमे चढाइं, और चिट्ठा डारके बाको कुर्ता आपसमे बाँटलैं। 36और हुवाँ बैठके बे बाको चौकीदारी करन लागे। 37“जा येशू, यहूदीको राजा हए” कहिके बाके बिरोधमे दोष-पत्र बनाइं और बे बाके मुणसे उपर टाँगदइं। 38येशूके सँग दुई डाँकु फिर क्रूसमे टाँगेगए रहएं, एक येशूके दहिना घेन और दुस्रो दिबरा घेन। 39बो डगर हुइके आनजान बारे अपन-अपन मुण हलाएके बाको गिल्ला करीं, 40और कहीं, “ए मन्दिर उजाणन बारो और बोके तीन दिनमे बनान बारो, अपनएके बचा, और परमेश्वरको लौंणा हए तओ, क्रूससे उतरके तरे आएजा।” 41मुखिया यहूदी पुजारी फिर मोशाको नियम कानुन सिखान बारे और यहूदी अगुवनको समुह सँगए मिलके येशूको गिल्ला करत कहीं, 42“जा औरेनके त बचाइ, पर अपनएके नाए बचाए पाइ। जा इस्राएल देशको राजा हए कहेसे हबए क्रूससे तरे उतरके अबए, तओ हम बिश्वास करंगे। 43जा परमेश्वरमे भरोसा करत रहए और परमेश्वर जाके चाँहत हए कहेसे बा जाके अभइ छुटकारा देबए, काहेकी जा ‘मए परमेश्वरको लौंणा हओं,’ करके कहात रहए।” 44और बाके सँग क्रूसमे टँगे बे डाँकु फिर अइसीयए बोको अपमान करीं।

येशूको मृत्‍यु

(मर्क. 15:33-41; लूक. 23:44-49; यूह. 19:28-30)

45अब दुपहारसे लैके तीन बजेतक सारा देशमे अंधियारो छैगओ। 46तीन बजे घेन येशू अइसे करके बडो जोडसे चिल्लाइ, “इलोई, इलोई, लामा सबखथनी?” अर्थात्, “हे मिर परमेश्वर, हे मिर परमेश्वर, तुम मोके काहे छोडदए?”

47हुवाँ ठाणेभए मैसे कित्तो जनै जा सुनके कहीं, “जा आदमी एलियाके बुलातहए।”

48बिन मैसे एक जनै झट्ट दौडके गओ और एक स्पन्ज लैके सिर्कामे डुबाएके डण्डामे धरके बाके पिन दइ। 49पर औ आदमी कहीं, “देखएं, कोइ एलिया यिनके बचान आत हए कि?”

50तओ येशू फिर बडो जोडसे चिल्लाइ और अपन आत्मा त्याग दइ।

51तओ बो समयमे यरूशलेमको मन्दिरको पर्दा उपरसे लैके तरे तक फटके दुई भाग हुइगए और जमिन काँपन लागी और चट्टान फुटे। 52तओ चिहान खुलीगए, और मरे भए बहुत सन्तनके मृत शरीर जिन्दा हुइके उठे, 53और बे चिहानसे निकरे, और जब येशू मरके जिन्दा भओ तओ बे पबित्र सहरमे गए और बहुतनके दिखाइ पणे। 54जब कप्तान और जो बोके सँग चौकीदारी करत रहए, तओ भुकम्प और जो कुछ भओ रहए, बो देखके बहुत डराइगए, और कहीं, “नेहात्तओ जा परमेश्वरको लौंणा रहए।” 55हुवाँ गालील परदेशसे आएभए बहुत बैयर फिर रहएं, बे दुरसे जा सब देखनडटि रहएं। बे येशूको सेवा-सत्कार करत गालील परदेशसे येशूके पिच्छुपिच्छु आइ रहएं। 56बे मैसे मरियम मग्दलिनी, और छोटो याकूब और योसेफकी अइया मरियम, और जब्दियाके लौंणनकी अइया रहए।

येशूको दफन

(मर्क. 15:42-47; लूक. 23:50-56; यूह. 19:38-42)

57संझा हुइगओ रहए तओ अरिमाथियाको योसेफ नाउँ भओ एक जनै धनी आदमी आओ। बो अपनए फिर येशूको चेला रहए। 58बो पिलातसके ठिन जाएके येशूको मृत शरीर मागी, और पिलातस फिर बोके लहास लेनके अनुमति दइ। 59योसेफ मृत शरीर लैजाएके सफा मलमलको लत्तामे लपेटी, 60और बो चट्टानमे खोपके बनाइ भइ अपनो नयाँ चिहानमे धरी, और चिहानके द्वारमे एक बहुत भारी पत्थर लुढकाएके चलोगओ। 61चिहानके अग्गु मरियम मग्दलिनी और दुसरी मरियम फिर बैठी रहएं।

येशूके मरघटमे पहरेदार

62तओ आन बारो कलके दिन, पबित्र दिन रहए, मुखिया यहूदी पुजारी और फरिसीनको समुह पिलातससे मिलनके गए। 63“हजुर, हमके याद हए, कि बो ठगहा जिन्दा रहन पेती कही रहए, ‘मिर मरनके तीन दिन पिच्छु मए फिर जिन्दा हुइ जामंगो।’ 64बहेमारे आज्ञा देओ, कि तिसरो दिनतक बे बो चिहानके ध्यानसे लख्बारी करएं, अगर तुम अइसे नाए करैगे तओ बिनके चेला आएके बाको लहास चुराएके लैजामंगे, और आदमीनसे झुठ कहान लगंगे, कि ‘येशू मरो भओ मैसे जीइउठो हए’ और जा अभएको झुठ पहिलेको झुठसे खराब हुइ जाबैगो, जैसे येशू ‘ख्रीष्ट हओं’ करके दाबी करे रहए।”

65तओ पिलातस बिनसे कही, “सिपाहिनके लैजाएके जित्का सिकैगे अच्छेसे चिहानको चौकीदारी लग्बाबओ।” 66और बे सिपाहिनके सँगमे लैके गए, और पत्थरमे लाल मोहर लगाइं ताकी कोइ फिर बो पत्थरके नाए हटाबए।

Pilihan Saat Ini:

मत्ती 27: THRNT

Sorotan

Berbagi

Salin