मत्ती 26

येशूको हत्याको षड़यंत्र

(मर्क. 14:1-2; लूक. 22:1-2; यूह. 11:45-53)

1जब येशू जे सब बात कहेडारी तओ अपन चेलनसे कही, 2“तुमके पता नैयाँ, अबको दुई दिन पिच्छु यहूदीनको निस्तार तेवहार होबैगो, और आदमीको लौंणा क्रूसमे टाँगनके ताहीं पकणो जएहए।” 3तओ कैयाफा नाउँको प्रधान यहूदी पुजारीके दरबारमे मुखिया यहूदी पुजारी और जनताके यहूदी अगुवनको समुह इकट्ठा भए। 4और बे येशूके कैसे पकणएं और मारएं करके सल्लाह करन लागे। 5तओ बे कहीं, “तेवहारमे नाए, नत आदमीनमे हलचल हुइजएहए।”

येशूके उपर बहुमूल्य जटामसीको तेल अख्नाइ

(मर्क. 14:3-9; यूह. 12:1-8)

6येशू बेथानियामे सिमोन, जौनक येशू कोढ रोगसे अच्छो करि रहए, बहेके घरमे रहए, 7एक बैयर सिङ्ग मरमरको एक शीशीमे बहुमूल्य जटामसीको तेल लैके बाके ठिन आइ, और बा खानके बैठो रहए, तओ बो बाके मुणमे अख्नाए दइ। 8जा देखके चेला दिक्काइगए, और बे कहीं, “काके ताहीं जा इत्तो नुकसान करीहए? 9काहेकी जा जटामसीको तेल बहुत रुपैयामे बेँचके बो पैसा गरीबके दओजाए सकत रहए।”

10तओ येशू जा बात पता पाएके बिनसे कही, “तुम जा बैयरके काहे दु:ख देत हओ? बो त मिर ताहीं एक अच्छो काम करीहए।

11काहेकी गरीब तुमर सँग सब दिन हुइहएं। पर मए तुमर सँग सब दिन नाए हुइहओं।

12बो जा जटामसीको तेल मिर शरीरमे अख्नाएके दफ्नके ताहीं मोके तयार करीहए। 13नेहात्तओ, मए तुमसे कहात हओं, सारा दुनियामे जहाँ जा अच्छो समाचार परचार हुइहए, जा बैयर जो करीहए, बोको चर्चा बक सम्झनाके ताहीं करोजएहए।”

यहूदा इस्करियोतको बिश्वासघात

(मर्क. 14:10-11; लूक. 22:3-6)

14तओ बाह्र चेला मैसे एक जनै यहूदा इस्करियोत कहान बारो मुखिया यहूदी पुजारी ठिन गओ, 15और कही, “अगर मए येशूके तुमर हातमे सौँप देहओं तओ, मोके का देहओ?” बे बोके चाँदीके तीस सिक्का दइं। 16बहे बखतसे यहूदा बाके पकणानके मौका ढुँणन लागो।

अन्तिम भोज

(मर्क. 14:12-26; लूक. 22:7-23; यूह. 13:21-30)

17जब अखमिरी रोटीको तेवहारको पहिलो दिन रहए तओ चेला येशू ठिन आएके कहीं, “तुमर ताहीं यहूदीनको निस्तार तेवहारको भोज खानके तयारी हम कहाँ करएं?”

18येशू कही, “सहरमे एक आदमी ठिन जाओ, और बोसे कहाओ, ‘महान गुरु कही हए, मिर समय ढिँगै आइगओ हए। मए अपन चेला सँग तुमर घरमे यहूदीनको निस्तार तेवहार मनएहओं।’ ” 19तओ येशूको हुकुम अनुसार चेला करीं और बे यहूदीनको निस्तार तेवहारको भोजको तयारी करीं।

20जब संझा भओ तओ येशू बाह्रऔ चेलनसँग बैठो। 21बा खात पेती कही, “नेहात्तओ, मए तुमसे कहात हओं, तुम मैसे एक जनै मोके पकणाए देहए।”

22तओ बे बहुत दुखी हुइके सब येशूसे पुछन लागे, “प्रभु, का बो मए हओं?”

23और येशू कही, “जौन मिर थरियामे रोटी बोरीहए, बहे मोके पकणाए देहए। 24आदमीको लौंणाके त बोके बारेमे पबित्र धर्मशास्त्रमे लिखेबमोजिम हुइहए। पर बो आदमी डर लागन बारो सजाय पबैगो, जौन आदमीको लौंणाके धोखा देबैगो। बो आदमीके नाएजन्मनो बोके ताहीं असल रहए।”

25तओ येशूके पकणाए देन बारो यहूदा इस्करियोत पुछी, “महान गुरु, का बो मए हओं?” येशू बोसे कही, “तए अपनए कहात हए।”

प्रभुभोज

26बे खानु खात पेती येशू रोटी लइ और आशिष दइके बा रोटी तोरी और चेलनके दइके कही, “लेओ, खाओ, जा मिर शरीर हए।”

27तओ कटोरा फिर लइ तओ येशू धन्यबाद दइके चेलनके अइसे कहिके दइ, “तुम सब जासे पिबओ। 28काहेकी जा नयाँ करारको बलिदानको खुन हए, जा बहुतके ताहीं पापनको क्षमाके ताहीं बहोहए। 29पर मए तुमसे कहात हओं, कि अंगुरको रसा मए तबतक नाए पिइहओं जब तक अप्नो दौवाको राज्यमे तुमरसँग नयाँ अंगुरको रसा नाए पिइलेओं”

30एक भजन गाएके पिच्छु बा जैतून डँगा घेन निकरके गओ।

पत्रुसको इन्‍कारके बारेमे येशूको अगमबाणी

(मर्क. 14:27-31; लूक. 22:31-34; यूह. 13:36-38)

31तओ येशू बिनसे कही, “आज रातके मिर कारणसे तुम पच्छु हटके जएहओ। काहेकी अइसो लिखो हए,

‘मए बकरेहेराके मारंगो,

और बगालके भेंणा तितरबितर हुइजए हएं।’

32पर मए मरके जिन्दा हुइके तुमसे अग्गु गालीलमे जएहओं।”

33पत्रुस येशूके जबाफ दइके कही, “तुमर कारणसे सब जनै पिच्छु हटजएहएं पर मए कभु पिच्छु नाए हटंगो।” 34येशू बोसे कही, “नेहात्तओ, मए तोसे कहात हओं, आज रातके मुर्गा बासनेसे अग्गु तए मोके तीन चोटी इन्कार करैगो।”

35पत्रुस येशूसे कही, “मोए तुमर सँग मरन पणेहए, तहुँफिर मए तुमके इन्कार नाए करंगो।” और बाँकी सब चेला अइसीयए कहीं।

गेतसमनीके बगियामे येशूको प्रार्थना

(मर्क. 14:32-42; लूक. 22:29-46)

36तओ येशू गेतसमनी कहान बारो ठाउँमे बिनके सँग गओ, और चेलनसे कही, “तुम हियाँ बैठओ, मए थुरदुर जाएके परमेश्वरसे प्राथना करंगो।” 37और अपने सँग पत्रुस और जब्दियाके दुई लौंणनके लैके येशू शोकित और व्याकुल होन लागो। 38तओ येशू बिनसे कही, “मिर प्राण गहिरो शोकसे अध्मरा हुइगओ हए। तुम हियाँ बैठियओ, और मिर सँग जगे रहियओ।”

39और येशू थुरदुर जाएके मुँहुँके बल गिरके परमेश्वरसे अइसे प्राथना करी, “हे मिर दौवा, हुइ सकत हए तओ, जा कटोरा मोसे हटाए देओ। तहुँफिर जैसे मए चाँहत हओं उइसे नाए पर जैसी तुम चाँहत हओ उइसीयए होबए।”

40फिर येशू चेलनके ठिन आओ और बिनके सोत पाइ, और पत्रुससे कही, “का तुम मिर सँग एक घण्टा फिर जगके नाए बैठ पाए? 41जगे रहओ, परमेश्वरसे प्राथना करओ और सतावटमे मतपणओ। आत्मा त नेहात्तओ तयार हए, पर शरीर कमजोर हए।”

42फिर दुस्रो चोटी येशू परमेश्वरसे प्राथना करन गओ और अइसे कही, “हे मिर दौवा, मोए जा नाए पिएसे नाए हुइहए कहेसे तुमरी इच्छा पुरा होबए।”

43येशू फिरसे आएके उनके सोत पाइ, काहेकी बे बहुत निँधाने रहएं। 44जहेमारे येशू फिर बिनके छोडके गओ, और जाएके बेहीं बात दोहोराएके तिसरो चोटी परमेश्वरसे प्राथना करी।

45तओ येशू चेलनके ठिन आएके बिनसे कही, “तुम हबएतक सोए रहेहओ और अराम कर रहेहओ? देखओ, समय ढिँगै आइगओ हए। आदमीको लौंणा पापीनके हातमे पणनलागो हए। 46उठओ, चलएं। देखओ, पकणाए देन बारो ढिँगै आइगओ हए।”

येशूके बन्दी बनानो

(मर्क. 14:43-50; लूक. 22:47-53)

47येशू मसकतए-मसकत बाह्र चेला मैसे एक चेला आओ जो यहूदा इस्करियोत रहए। बोकेसँग मुखिया यहूदी पुजारी और जनताके यहूदी अगुवनको समुहके द्वारा पठाइभइ एक बडी भिड तरबार और लठ्ठु लैके आए। 48बाके पकणाए देन बारो उनके एक संकेत दइ रहए, “जौन आदमीके मए चुमंगो, बा बहे हए, बहेके पकणीयओ।” 49तुरन्त येशू ठिन जाएके यहूदा इस्करियोत कही, “हे महान गुरु प्रणाम!” और बो बाके चुमी। 50येशू बोसे कही, “सँगी, तुम जो करन आए हओ, बो करी डारओ।” तओ बे अग्गु आएके येशूके पकण लइं। 51येशूके सँगमे होन बारे मैसे एक जनै अपनो हात बढाएके तरबार निकारी। और प्रधान यहूदी पुजारीको कमैयाको कान काटके अलग करदइ।

52तओ येशू बोसे कही, “अपन तरबार खोलमे डार, काहेकी तरबार चलान बारे सब तरवारसे नष्ट हुइहएं। 53तुम का मानत हओ, का मए अपन दौवासे बिन्ती नाए करपए हओं, और का बा तुरन्त स्वर्गदूतनको बाह्र पल्टनसे जद्धा मिर ताहीं नाए पठाए देहए? 54पर अगर मए मागो कहेसे त पबित्र-शास्त्रमे अइसीयए होन पणैगो करके लिखीभइ बात कैसे पुरो हुइपए हए?”

55बो समय येशू भिडसे कही, “डाँकुके पकणन कता मोके पकणन तरबार और लठ्ठु लैके तुम काहे आए? मए सब दिन यरूशलेमको मन्दिरमे शिक्षा देत बैठत रहओं, तओ तुम मोके नाएपकणे। 56पर अगमबक्तनको पबित्र-शास्त्रको बचन पुरा होए करके जा सब भओ हए।” तओ सब चेला बाके छोडके भाजे।

यहूदी सभाघरके ठिन येशू

(मर्क. 14:53-65; लूक. 22:54-55,63-71; यूह. 18:13-14,19-24)

57येशूके पकणके बाके प्रधान यहूदी पुजारी कैयाफाके ठिन लैगए। हुवाँ मोशाको नियम कानुन सिखान बारे और यहूदी अगुवनको समुह इकट्ठा भए रहएं। 58पर पत्रुस दुरएसे प्रधान यहूदी पुजारीको घरको भवनको आँगन तक बाके पिच्छुपिच्छु गओ, और अन्तमे का हुइहए, सो देखनके ताहीं भितर घुसके चौकीदार सँग बैठो।

59अब मुखिया यहूदी पुजारी और जम्मए यहूदी सभाघरके येशूके दण्ड देनके ताहीं बाके बिरुद्धमे झुठी गवाही ढुँणन लागे। 60बहुत झुठी गवाही देन बारे आए, पर बे कोइ प्रमाण नाए पाइं। आखिरमे दुई जनै अग्गु आए, 61और कहीं, “जा आदमी कही हए, ‘मए परमेश्वरको मन्दिरके उजाणके जाके तीन दिनमे बनाए देहओं।’”

62तओ प्रधान यहूदी पुजारी उठके कही, “का तए कुछ जबाफ नाए देहए? जे आदमी तेरे बिरुद्धमे दइभइ गवाही का हए?” 63पर येशू चुप रहो। प्रधान यहूदी पुजारी येशूसे कही, “जिन्दा परमेश्वरको नाउँमे कसम खाएके कहो, हमके बता, का तए परमेश्वरको लौंणा ख्रीष्ट हए?”

64येशू बोसे कही,

“तुम अपनए कहीदए: तहुँफिर मए तुमसे कहात हओं, पर अबसे तुम आदमीको लौंणाके सर्बशक्तिमानके दहिना हात घेन बैठो, और बादरके बद्रिमे आत देखैगे।”

65तओ प्रधान यहूदी पुजारी अपन कुर्ता फारी और कही, “जा त परमेश्वरको निन्दा करी हए। हमके अब औ गवाहीको का जरुरत? तुम हबए जाके परमेश्वरको बदनाम करत सुनलए हओ। 66तुमर का बिचार हए?” बे जबाफ दइं, “जा मृत्युदण्डको लायक हए।”

67तओ बे येशूके मुँहुँमे थुकके मुक्का मारीं, और कोइ-कोइ अइसे कहात थप्पड मारीं, 68“हे ख्रीष्ट हमसे अगमबाणी करके कहो! तोके मारन बारो कौन हए?”

पत्रुस येशूके इन्कार करी

(मर्क. 14:66-72; लूक. 22:56-62; यूह. 18:15-18,25-27)

69पत्रुस बाहिर आँगनमे बैठो रहए। एक नोकरनी बोके ठिन आएके कही, “तए फिर गालील परदेशके निबासी येशू सँग रहए।”

70तओ पत्रुस उनके सबके अग्गु इन्कार करके कही, “तए का कहात हए, मए नाए जानत हओं।” 71जब बो आँगनको फाटकमे चलोगओ तओ दुस्री नोकर्नी बोके देखी, और हुवाँ बैठन बारे कहीं, “जा आदमी फिर नासरत गाउँमे बैठन बारो येशू सँग रहए।” 72बो फिर कसम खाएके कही, “मए बो आदमीके नाए चिनत हओं।”

73थोरी देरमे हुवाँ भए आदमी फिर पत्रुससे कहीं, “नेहात्तओ, तुम फिर बिन मैसे एक हओ, काहेकी तुमर बोलीसे जा पता चलत हए।” 74तओ पत्रुस अपनएके सरापत कसम खान लागो “मए बा आदमीके चिन्तए नैयाँ।” और तुरन्त मुर्गा बासदइ।

75तओ पत्रुसके येशूकी कहीभइ बात याद आइगइ, “मुर्गा बासनेसे अग्गु तए मोके तीन चोटी इन्कार करैगो।” तओ बो बाहिर जाएके धरधरहुँस रोइ।

Pilihan Saat Ini:

मत्ती 26: THRNT

Sorotan

Berbagi

Salin