Yoane 13
13
Yeso a Sugɨ Mɨku mɨ Bɨyɛʼ ɨbyi ɛ
1A bvúrɨ́ táʼ njwi á Nɨdorɨ nɨ Tsa-yɛʼnɨ lɔgɨ adiʼ ə. Yeso a zhí ngə́ nyom a kúʼnə wa zɨə mɨ lo nyɛʼtɨ mbyi zen, ɨ tiʼ ghɛn a mbó Tarɨ ə. Nkfu tsum, wɛrə a kɔ́ŋ ɨbɛn bɨ atuəshe wen ba bɨ bénɨ́ ɨbyi ɛ. Wɛrə a kɔ́ŋ awa ɨ kɔʼ kuʼ a ndwitə ghe.
2Yeso bo bɨ bɨyɛʼ ɨbyi tsí a mɨdzɨ mɨ nkwɛfɔ ə. Dəbɨrɨ a kwɛ́nə nɨ́ŋ akwaʼtɨ a fiŋ Yeso a mu ntəm Yudasɨ Iskario wa a bénɨ́ mɔn Samɔn Iskario ghe. 3Yeso a zhí ngə́ Ta ɨyi a kwɛ́nə nga mɨtən mɨtsum a mbó zɨ; wɛrə a zhí ngə́ zɨə ló a mbó Ŋwi nkə́ mbɨ́ŋə́ ngěn a mbó Ŋwi ə. 4Ma lan, wɛrə a ló atɨ́, atú atɛkɨ za ntsɔʼ atsɛʼ azhi zə abyɛn, ntiʼ nkorɨ atsɛʼ a nchiʼ ɨnye a tɨŋnɨ zɨə. 5Wɛrə a tíʼ nɨ́ŋ nkyi a mu alonga ntiʼ mbiʼnɨ sugɨ mɨku mɨ bɨyɛʼ ɨbyi, ɨ kɨ chiʼ a mɛrə nɨ atsɛʼ a nchiʼ ɨnye za wɛrə a kórɨ́nɨ́ atɨŋnɨ zɨ lá. 6Wɛrə a yenə nkuʼ a nye Samɔn Bita, a bitɨ a Yeso ngə́, “Maʼmbyí, o mɨ sugɨ mɨku ɨman dé?”
7Yeso a chwɨ́gɨ́ ayi ngə́, “Ka o ndzuʼə agho nkə́ njiɛ anu za ma ghɨnə tɨtsɔŋnɨ ə, lá o ghɨ zuʼ ɨ kɨ zhi a nkfu ndzum ə.”
8Bita a sóŋ ntəm ɨyi ngə́, “Kə́ kə́, o láʼ koʼ mɨku ɨman sugə!”
Yeso a chwɨ́gɨ́ ngə́, “Be ma tú mɨku ɨmo sugɨ, o mɨ koʼ ngyɛʼ ɨghan bə mbe.”
9Samɔn Bita a chwɨ́gɨ́ ngə́, “Maʼmbyí, a be lá, koʼ tsɛʼ mɨku ɨman sugə! Sugɨ mbó ɨman abɔʼnɨ atú azan wəbɔʼ ə!”
10Yeso a sóŋ ngə́, “Ɨbɛn bɨtsum ba bɨ sugɨnə ɨnye ɨtsa, fɛm ngɛn mɛtɨ, nkeʼ bə ntsi nɨ ɨ sugɨ ɨnye ɨtsa, ntsa a sugɨ mɨku ɨma ghe#13:10 Ɨŋwaʼnɨ tsɨ lvuŋ tsɨ mɔʼɔ tsa bɨ tsánɨ́ mbyi ŋwaʼnɨ se nɨ adiʼ zen tsi ngə́, “ntsa a sugɨ mɨku ɨma” . Bən bɨtsum nɨ fɛmə — bɨtsum, a tiʼ ngɔŋ tsɛʼ táʼ ghe.” 11(Yeso a kwɛ́nə nji a ŋwɔn wa a tsínɨ́ nɨ ɨ fiŋ zɨ; nə nɨ anu za a sóŋnɨ́ ngə́, “Bən bɨtsum nɨ fɛmə, a tiʼ ngɔŋ tsɛʼ táʼ ghe.”)
12Yeso a mɛtɨnə a sugɨ mɨku ɨma, mbə ngwəgɨ atsɛʼ azhi zə abyɛn, mbə ngɛn adiʼ zɨə. A bítɨ́ bɨyɛʼ ɨbyi ngə́, “Nɨ zuʼ nkɨ nji anu za ma lonɨ tsɛʼ tɨtsɔŋnɨ a ngɨə a ɨnye bən lá le? 13Nɨ tɔ́ŋə́ aghan ngə Ndiʼ Aŋwaʼnɨ, nkə́ ntɔ́ŋə́ aghan ngə́ Maʼmbyí, a kɨ nkuʼnɨ ngə́ á nɨ tɔŋ adzaŋ məwa, mbɨ́ʼ ngə́ lá nɨ me məwa. 14Me, Maʼmbyí abɔʼnɨ Ndiʼ Aŋwaʼnɨ ɨwən, ma lo a sugɨ mɨku ɨmən tɨtsɔŋnɨ ə. Ma lan, bən, nɨ tsi nɨ sugɨ mɨku ɨmən bən nɨ bɨŋ ə. 15Ma lo lá a ndiʼ alisɨ a mbó bɨŋ ə, taŋ á nɨ nyámə́ ngɨə tsɛʼ za ma ghɨnɨ a mbó bən lá. 16Ma sǒŋ nkənu a mbó bɨŋ ə: ka ɨbuʼ tsa awa a tabuʼ ɨwa, ndontom a keʼ kɨ ntsa a ŋwɔn wa a tyigɨnɨ ayi ɛ. 17Tɨtsɔŋnɨ wa mbáʼ nɨ zhinɨ ngə́ anu zen za ma soŋnɨ a nɨ nkənu lá, ɨfɔgə wu wi ghɨ tsí a mbó bən mbáʼ be nɨ kə ngɨə a zɛrə ghe!
18Ka ma ngamə aghan lá mbɨ́ʼ awən bɨtsum ə; ma zhi a ba ma tsɔʼtɨnə ghe. Lá za bɨ ŋwáʼnɨ́nɨ́ a mu aŋwaʼnɨ a Ŋwi ngə́, ‹ŋwɔn wa bɨgɨ zɨ dzɨ́nɨ́ mɨdzɨ ɨman, a bə́nkɨ́ ayi a nye me ghe›, a tsi nɨ ɨ zagɨ fu a nye nkənu ə. 19Ma soŋə a məzen a mbó bən tɨtsɔŋnɨ bɔŋ á ghɨ fúə, taŋ a ghɨ fú, nɨ nɨŋ mɨntəm ɨwu ngə́, ‹Ma Nɨ Wɛrə Wa Ma Nɨ Wɛrə› ghe. 20Ma sǒŋ nkənu a mbó bɨŋ ə: ŋwɔn tsum wa a kwarɨnɨ a ŋwɔn wa ma tsagɨnɨ a kɨ nkwarɨ aghə; ŋwɔn tsum wa a kwarɨnɨ aghan, a kwarɨ a ŋwɔn wa a tságɨ́nɨ́ aghə.”
Yeso a Soŋ ngə́ Táʼ Ngyɛʼ ɨyi a Ghɨ Fen ayi ɛ
(Mat 26:20-25; Mar 14:17-21; Alu 22:21-23)
21Yeso a ghɨnə mɛ́tɨ́ a sóŋ məzen, asɔbɨnɨ a lwɨgɨ ntəm ɨyi be tɨ́sə́n, a soŋ ntəm ɨyi asaŋəsaŋ ngə́, “Ma sǒŋ nkənu a mbó bɨŋ ə: táʼ ŋwɔn nɨ bən a ghɨ fen aghə.”
22Bɨyɛʼ ɨbyi lénɨ́ awa ŋwɔn nɨ ŋwɔn, a tiʼ nkɨʼnɨ awa ngə́ a lə ngamə lan mbɨ́ʼ a ɨwa. 23Táʼ ngyɛʼ ɨyi wa wu mɔʼɔ, wa Yeso a kɔ́ŋnɨ́ tsɛʼ a nkan, a shíʼtɨ́ ntsi a mbyɛn Yeso ghe. 24Samɔn Bita a ghám wəmbo nɨ abó azhi ngə́, “Bitɨ ayi mbɨ́ʼ a ŋwɔn wa a ghamnə mbɨ́ʼ ayi lá.”
25Ngyɛʼ wa tíʼ ngɛn fátɨ́ a Yeso mbitɨ ayi ngə́, “Maʼmbyí, o ghamə lá mbɨ́ʼ a ɨwa le?”
26Yeso a chwɨ́gɨ́ ngə́, “Ŋwɔn wa ma mɨ tsubtɨ abagɨ abán a mu ndza ɨ gha wəmbo, lá nɨ wɛrə ghe.” Ma lan, a tíʼ ntsubtɨ abagɨ abán a mu ndza nga a mbó Yudasɨ, wa a bénɨ́ mɔn Samɔn Iskario lá. 27Tsɛʼ mbáʼ Yudasɨ a kwárɨ́nɨ́ abán za, Satan a kón wə mu ɨnye ə. Yeso a sóŋ wəmbo ngə́, “Tsɔʼtɨ ɨnye ɨzo, ngwaŋnɨ ngɨ anu za o mɨ zagɨ ghɨ lá!” 28A tɨtərɨ bə mɔʼɔ ba bɨ tsínɨ́ atú atɛkɨ za, ŋwɔn tse sé zuʼ nkɨ nji anu za a ghɨ́nɨ́ Yeso a soŋ anu za a sóŋnɨ́ wəmbo lá. 29Mbáʼ Yudasɨ a kɨ́nə́ ndě aban a nkáb za lá, bɨyɛʼ ba bə tse kwáʼtɨ́ ngə́ Yeso a sóŋ lá ngə́ á Yudasɨ a ghɛn ndzuŋ ɨdzúm tsa bo tsínɨ́ nɨ nkyaŋtɨ nɨdorɨ na nɨ tsɛrə, kə ngə́ á gha bɨkaba ba bə tse a mbó ɨfúm ə.
30Yudasɨ a kwárɨ́ abán za, mbyi fu ayi abyɛn táʼ nkfu ə. A bé nɨ ɨtfúʼ ə.
Ntɨgə zɨ Fi ə
31Yudasɨ a ghɨnə ndó ayi, Yeso a soŋ ngə́, “Tɨtsɔŋnɨ, bɨ kyɛʼnə nɨfáŋ nɨ Mɔn Ŋwɔn; tɨtsɔŋnɨ, bɨ kyɛʼnə nɨfáŋ nɨ Ŋwi a ntsǎ a ndzum Mɔn ɨyi wu Mbáŋnɨ́ ə. 32Be bɨ kɨ nkyɛʼ nɨfáŋ nɨ Ŋwi a ntsǎ a ndzum wɛrə, muŋ Ŋwi a mɨ kyɛʼ nɨfáŋ nɨ Mɔn Ŋwɔn a mu atuəmbəm azhi ɛ, a mɨ kɨ byi ghɨ adzaŋ məwa. 33Ɨbɔ ɨban, ma mɨ kaʼ bə ntsi bɨgɨnə a nye abaŋ zə sa ghe. Nɨ mɨ tsaʼ aghan; lá tɨtsɔŋnɨ á ma soŋ anu za ma kwɛ́nə soŋ a mbó bɨsáʼ bɨ ɨlaʼ bɨ bə Yuda ngə́, ‹Nɨ chi keʼ ghɛn adiʼ wa ma ghɛnə ghe.› 34Tɨtsɔŋnɨ, ma gha ntɨgə zɨ fi a mbó bɨŋ ə: á nɨ kɔŋnɨ awən bən nɨ bɨŋ ə. A nɨ kɔŋnɨ awən bən nɨ bən, tsɛʼ tso mbáʼ ma kɔ́ŋnɨ́ awən lá. 35Be nɨ kɔŋnɨ awən bən nɨ bən, muŋ ŋwɔn tsum a mɨ tiʼ zhi ngə́ nɨ nɨ bɨyɛʼ ɨbə.”
Yeso a Soŋ ngə́ Bita a Ghɨ Tón ayi ɛ
(Mat 26:31-35; Mar 14:27-31; Alu 22:31-34)
36Samɔn Bita a bítɨ́ ayi ngə́, “Maʼmbyí, o ghěn lá ɨ ghé le?”
Yeso a chwɨ́gɨ́ ngə́, “O chi koʼ zɔŋ aghan adiʼ wa ma ghɛnə tɨtsɔŋnɨ ə, lá a nkfu ndzum, o ghɨ zɔŋ aghə.”
37Bita a bítɨ́ ngə́, “Maʼmbyí, ma chi kaʼ agho tɨtsɔŋnɨ zɔŋ mbɨ́ʼ ake? Ma kyaŋtɨnə ɨnye ɨzan a nkfó mbɨ́ʼ atú azo ə!”
38Yeso a chwɨ́gɨ́ ngə́, “Njingə o lanɨnə nkyaŋtɨ ɨnye ɨzo a nkfó mbɨ́ʼ atú azan le? Ma soŋə agho tsɛʼ a nkənu ə: bɔŋ á ankɨʼə a ntɔ́ŋə́, o mɨ soŋ nkfu tsi tárə́ ngə́ ka o zhi agho aghə.”
Pilihan Saat Ini:
Yoane 13: MNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2023, CABTAL
