यूहन्ना 14

यीशु रा आपणे चेले बे होसला दीणा

1थारा मन ब्याकुल ना होए; परमेश्वरा में बुशाह डाहा होर महा पेंदे भी बुशाह डाहा। 2मेरे बापू रे घरे रहंणे री बहू जागा साहा अगर नांई हूँदी तेबा हाऊं तमाबे बोलदअ; किबेकि हाऊं तमाबे जागा त्यार करदअ नाहंदा। 3होर अगर हाऊं नाहीं करे तमाबे जागा त्यार करू, तेबा भी इछी करे तमे आपणे अखे नींणे कि ज़खे महा रहंणा तखे तमे भी रहे। 4ज़खे हाऊं नाहंदा तमे तखली बाता जाणा। 5थोमे तेऊबै बोलू, हे प्रभु, हामें नांई ज़ाणदे कि तूह कंदा बे चालू, तेबा बात केहडे ज़ाणनी? 6यीशु तेऊबै बोलू, बात होर सत्य होर जीबन हाऊं ही साहा; बिना मेरे द्वारा कोहे बापू सेटा नांई पूजी सकतअ। 7अगर तांई हाऊं जाणु हूँदअ, तेबा मेरअ बापू भी ज़ाणदअ; होर ऐबा तेऊ जाणा, होर सह हेरू भी। 8फिलिप्पुसे तेऊबै बोलू, हे प्रभु, पिता हाँमा बे रिहा, यह हामा बे बहू साहा।

9यीशु तेऊबै बोलू, हे फिलिप्पुस, हाऊं ऐतरी धियाड़ी का तमे संघे साहा, कैह तूह महा ज़ाणदअ? जूणी हाऊं हेरू तेऊ बापू हेरू। तूह किबे बोला कि बापू हामा बे रिहा? 10कैह तूह बुशाह करदअ कि हाऊं बापू में साहा होर बापू महा में साहा? या गला जोह तमाबे हाऊं बोला, आपणी तरफा का बोला, पर बापू महा में रही करे आपणे काम कराऊंदा। 11पर बुशाह करा कि हाऊं बापू में साहा होर बापू महा में साहा; नांई तअ कामा रे बजा का ही मेरा बुशाह करा। 12हाऊं तमाबे सच-सच बोला कि जोह महा में बुशाह डाहंदा, या काम जोह हाऊं करा तेहुकी भी करने, पर ऐताका भी बडे काम करने, किबेकी हाऊं बापू सेटा बे नाहंदा। 13जोह कुछ तमे मेर ना का माँगले, सहा महा करना कि शोहरू रे साबे बापू री महिमा हो। 14अगर तमे महा का मेरे ना का कुछ मांगले, तेबा सह महा करना।

पवित्र आत्मा री प्रतिज्ञा

15अगर तमे मांई संघे प्रेम डाहंदा, तेबा मेरी आज्ञा मनणी। 16महा बापू संघे बिनती करनी, तेबा ताहबे एक होर साहायक दींणअं कि सह सदा तांई संघे रहे। 17मतलब सचाई री आत्मा, जासु संसार ग्रहण नांई करी सकतअ किबेकि सह तेऊ हेरदा होर ना तेऊ ज़ाणदअ; तमे तेऊ जाणा, किबेकि सह तमे संघे रहंदा, होर सह तमामें होलअ। 18महा तमे अनाथ नांई छाडने; हाऊं तमा सेटा बे ईहंदा। 19होर थोड़ी देर रही कि तेऊकी संसार हेरनअं, पर तमा हाऊं भी हेरनअं; ऐतकी तणी कि हाऊं जिऊंदअ साहा, तमे भी जिऊंदे रहंणे। 20तेसा धियाड़ी तमा ज़ाणना कि हाऊं आपणे बापू में साहा, होर तमे महा में, होर हाऊं तमामें। 21जासू सेटा मेरी आज्ञा साहा होर सह त्या मना साहा, मांई संघे प्रेम डाहंदा; होर जोह महा में प्रेम डाहंदा तेऊमें मेरअ बापू प्रेम डाहंदा। होर आपणे आपा तेऊ पेंदे प्रकट करनअ।

22तेऊ यहूदा जोह इस्करियोती, तेऊबै बोलू, हे परमेश्वर, कैह होऊ कि तूह आपणे आपा बे हाँमा पेंदे प्रकट करणा चाहंदा होर संसारा पेंदे नांई? 23यीशु तेऊबै उतर दिंना, अगर कोई महा में प्रेम डाहलअ तेबा तेऊ मेरे बचन मनणे, होर मेरे बापू तेऊ संघे प्रेम डाहंणा, होर हामे तेऊ सेटा बे ईहंणा होर तेहू बास करना। 24जोह महा में प्रेम डाहलअ, तेऊ मेरे बचन मनणे; होर जोह बचन तमे शूणा त्या मेरे नांई पर बापू रे साहा। जूणी हाऊं भेजु।

25या गला मांई तमे संघे रही करे तमाबे बोली। 26पर साहायक मतलब पवित्र आत्मा जासु बापू मेरे ना का भेज़लअ, तेऊ तमाबे सभे गला सखाऊणी, होर जोह कुछ मांई तमाबे बोलू, तेऊ तमाबे सबे याद कराऊणा। 27हाऊं तमाबे शांति दिंदा, आपणी शांति तमाबे दिंदा; जेहड़ा संसार दिंदा, हाऊं तमाबे नांई दींदअ थारा मन ब्याकुल नांई होए होर नांई डरे।

28तमे शुणु कि मांई तमाबे बोलू, हाऊं नाहूँ, होर तमा सेटा भी आउअ। अगर तमे मांई संघे प्रेम डाहंदा, तेबा ऐसा गला का खुश हुंदा कि हाऊं बापू सेटा बे नाहंदा, किबेकी बापू महा का बढ़अ साहा। 29होर मांई एउ हूँणे का पहिले तमाबे बोलू, कि जेबा सह होए, तेबा तमे बुशाह करा। 30महा ऐबा तमे संघे बहू गला नांई करनी, किबेकी ऐऊ संसारा रे सरदार ईहंदा महा पेंदे तेऊरा कोई अधिकार नांई आँधाआ; 31पर यह ऐतकी तणी हुंदा कि संसार ज़ाणे कि हाऊं बापू संघे प्रेम डाहंदा, होर जेडी बापू महा बे आज्ञा दिंनी हाऊं तेहडा ही करा। उठा, अखा का नाहंणा।

Pilihan Saat Ini:

यूहन्ना 14: ISJNT

Sorotan

Berbagi

Salin